Jafnaðarstefna í efnahags- og atvinnumálum

Framsýn og ábyrg efnahagsstefna er ein af undirstöðum jafnaðarstefnunnar

Jafnaðarstefna í efnahags- og atvinnumálum

Samfylkingin lítur á verðmætasköpun samfélagsins sem samvinnuverkefni launafólks, atvinnurekenda og hins opinbera. Við viljum að afrakstur vinnu, framleiðslu og sjálfbærrar auðlindanýtingar dreifist með sanngjörnum hætti um samfélagið svo enginn líði skort og allir njóti jafnra lífstækifæra.

Það gerum við

●  með því að setja efnahagslegri starfsemi umgjörð og leikreglur sem tryggja að markaðir

virki í þágu fjöldans en ekki fárra,

●  með réttlátu skatt- og tilfærslukerfi sem jafnar lífskjör, spornar gegn því að auður safnist

á fárra hendur og tryggir afkomuöryggi allra,

●  með öflugri almannaþjónustu, velferðarkerfi og samfélagsstofnunum sem allir hafa

aðgang að og stuðla að menntun, heilbrigði, öryggi, vellíðan og velferð í víðum skilningi.

Heilbrigður vinnumarkaður

Samfylkingin og samtök launafólks eiga sameiginlegar rætur og skýra málefnalega samleið. Stéttarfélög eru þýðingarmikil í lýðræðissamfélagi því að þau verja hag vinnandi fólks í krafti samstöðu og vega upp á móti valdi fjármagnsins. Í kjarasamningum næst mestur árangur þegar stéttarfélög standa saman í víðtæku samfloti og semja af ábyrgð og styrk. Skipulagður og heilbrigður vinnumarkaður er ein af grunnstoðum norrænna jafnaðarsamfélaga ásamt ábyrgri hagstjórn með áherslu á fulla atvinnu og sterkri almennri velferðarþjónustu sem miðar að félagslegu réttlæti.

Með skipulögðum vinnumarkaði er meðal annars átt við almenna þátttöku í stéttarfélögum, að gerðir séu heildarkjarasamningar milli aðila á vinnumarkaði og að ólíkir hópar launafólks reki sameiginlega kjarastefnu.

Samfylkingin beitir sér fyrir bættum kjörum, vinnuvernd og jafnrétti á vinnumarkaði. Brýnt er að efla upplýsingagjöf um réttindi og skyldur launafólks og auka aðgengi þeirra sem þurfa að íslenskukennslu. Taka verður á félagslegum undirboðum og brotum gegn kjarasamningum af festu og gera launaþjófnað refsiverðan. Mismunun og misnotkun á vinnumarkaði má ekki líðast. Við viljum innleiða víðtækari keðjuábyrgð verktaka og stöðva kennitöluflakk. Þá vill Samfylkingin vinna gegn þeirri óheillaþróun að atvinnurekendur ráði fólk í verktöku sem ætti með réttu að hafa stöðu launamanns. Gerviverktaka grefur undan samtökum launafólks og réttindum þess á vinnumarkaði. Engu að síður er mikilvægt að gæta að stöðu og réttindum einyrkja og efla tengsl þeirra við stéttarfélögin sem þeir eiga yfirleitt samleið með.

Við viljum heilbrigðan vinnumarkað þar sem hlúð er að mannauði samfélagsins og uppfylltar kröfur um öruggar starfsaðstæður og vellíðan á vinnustað. Þá leggur Samfylkingin áherslu á rétt launafólks til fjölskyldulífs og jafnvægis milli heimilis og vinnu. Fjölskylduvænn vinnumarkaður útheimtir öfluga velferðarþjónustu, nægt framboð af leikskólaplássum, góða grunnskóla og frístundastarf auk stuðnings við barnafjölskyldur í gegnum skattkerfi og tilfærslur. Áfram skal unnið að styttingu vinnuvikunnar.