Lög Samfylkingarinnar - jafnaðarflokks Íslands
1. kafli Stefnumið og starfsaðferðir
1.1 Samfylkingin - jafnaðarflokkur Íslands er stjórnmálaflokkur. Hlutverk hennar er að vinna að mótun íslensks samfélags í anda jafnaðarstefnunnar. Samfylkingin jafnaðarflokkur Íslands er opin öllum sem þetta styðja. Flokkurinn er með heimili og varnarþing í Reykjavík. Heimilisfang og aðalstarfsstöð Samfylkingarinnar - jafnaðarflokks Íslands er Hallveigarstígur 1, 101 Reykjavík.
1.2 Samfylkingin - jafnaðarflokkur Íslands vill lýðræðislegt þjóðskipulag byggt á virkri þátttöku almennings, valddreifingu og virðingu fyrir mannréttindum.
1.3 Samfylkingin - jafnaðarflokkur Íslands berst fyrir því að kynferði, trú, kynhneigð, fötlun, efnahagur eða uppruni hindri ekki aðgang að áhrifum, menntun eða störfum.
1.4 Að þessu hlutverki starfar Samfylkingin - jafnaðarflokkur Íslands á grundvelli lýðræðis og þingræðis með því að bjóða fram við Alþingis- og sveitarstjórnarkosningar og með því að beita áhrifum sínum á Alþingi, í ríkisstjórnum og sveitarstjórnum í samræmi við stefnu sína á hverjum tíma.
2. kafli Stjórn, skipulag og meginreglur
2.1 Samfylkingin - jafnaðarflokkur Íslands er lýðræðisleg fjöldahreyfing íslenskra jafnaðarfólks. Stjórnmálastarf hennar krefst náins sambands við flokksmenn og kjósendur.
Flokkurinn ber ábyrgð á:
a) útbreiðslu hugsjóna jafnaðarstefnunnar út frá stefnuskrá flokksins,
b) framþróun hugmynda jafnaðarfólks, stefnuskrár þeirra og vinnuaðferða,
c) skipulagningu og samhæfingu kosningabaráttu,
d) samhæfingu stjórnmálastarfs í sveitarstjórnum og í kjördæmum,
e) skipulagi alþjóðastarfs sem flokkurinn tekur þátt í,
f) stefnumótun um samstarf og samráð við verkalýðshreyfinguna,
g) stuðningi við flokksstarf í sveitarfélögum,
h) fræðslu og þjálfun flokksmanna,
i) sameiginlegri skipan á félagaskrá flokksins og innheimtu flokksskatts.
2.2 Landsfundur Samfylkingarinnar - jafnaðarflokks Íslands er æðsta vald í þeim málefnum sem varða stjórn hennar á landsvísu, stefnumál og samræmt stjórnmálastarf. Landsfundur markar stefnu hennar og setur henni lög.
2.3 Flokksstjórn fer á milli landsfunda með það vald sem ella er í höndum landsfundar með þeim takmörkunum sem lög þessi geyma.
2.4 Stjórn Samfylkingarinnar - jafnaðarflokks Íslands skipa sjö menn: formaður flokksins, sem jafnframt er formaður stjórnar, varaformaður, ritari, gjaldkeri, formaður þingflokks, formaður sveitarstjórnarráðs og formaður framkvæmdastjórnar.
2.5 Stjórnin ber höfuðábyrgð á stjórnmálastarfi flokksins og stuðlar að stefnumótunar- og málefnavinnu sem fram fari á breiðum grundvelli í málefnanefndum, sjálfstæðum málefnahópum og ráðum á vegum flokksins. Stjórn skal upplýsa framkvæmdastjórn um efni og ákvarðanir stjórnarfunda. Stjórn flokksins á sjálfkrafa sæti í framkvæmdastjórn Samfylkingarinnar - jafnaðarflokks Íslands, á fundum þingflokks hennar og sveitarstjórnarráðs.
2.6 Framkvæmdastjórn Samfylkingarinnar - jafnaðarflokks Íslands skipa stjórn flokksins skv. gr. 2.4 og 6 aðalfulltrúar og 6 varafulltrúar sem kosnir eru sérstakri kosningu á landsfundi. Framkvæmdastjórnin stýrir starfsemi flokksins í umboði landsfundar og flokksstjórnar, sbr. 8. kafla.
2.7 Flokksstarf Samfylkingarinnar - jafnaðarflokks Íslands byggist á sjálfstæðum, staðbundnum aðildarfélögum, sem eru grunneiningar flokksins sbr. 3. kafla. Staðbundin aðildarfélög jafnaðarfólks teljast til grunneininga. Grunneiningar mynda saman kjördæmis- og fulltrúaráð og kjósa fulltrúa á landsfund. Auk grunneininga starfa málfundarfélög og klúbbar að tilteknum málefnum og hugðarefnum, en teljast ekki til grunneininga.
2.8 a) Réttindi félagsmanna í aðildarfélögum eru að:
- greiða atkvæði á félagsfundum, við val fulltrúa á landsfund, á framboðslista, til kjördæmisráðs eða fulltrúaráðs og í almennri atkvæðagreiðslu í flokknum ásamt því að bera upp tillögur á félagsfundi,
- bjóða sig fram til trúnaðarstarfa innan félagsins og flokksins,
- taka þátt í stefnumótun flokksins og fræðslustarfi á vegum hans.
b) Skyldur félagsmanna í aðildarfélögunum eru að:
- samþykkja grunnhugmyndir flokksins eins og þær koma fram í stefnu og lögum hans,
- vinna að stefnumálum flokksins af heilindum, vera reiðubúnir til þátttöku í starfi flokksins og valda flokknum eða starfsemi hans ekki skaða,
- greiða árgjald í þeim félögum þar sem það er skilyrði aðildar.
2.9 Aðildarfélög Samfylkingarinnar - jafnaðarflokks Íslands í hverju kjördæmi landsins mynda kjördæmisráð sem fer með sameiginleg málefni aðildarfélaganna í kjördæminu, sbr. 9. kafla.
2.10 Aðildarfélög Samfylkingarinnar - jafnaðarflokks Íslands í hverju sveitarfélagi landsins mynda fulltrúaráð sem fer með sameiginleg málefni aðildarfélaganna í sveitarfélaginu, sbr. 10. kafla.
2.11 Kjördæmis- og fulltrúaráð aðildarfélaganna eru sjálfstæð um eigin málefni sé ekki á annan veg mælt fyrir um í lögum þessum.
2.12 Skrifstofa Samfylkingarinnar - jafnaðarflokks Íslands heldur rafræna félagaskrá fyrir flokkinn og öll aðildarfélög hans. Hún sér um að færa fólk milli aðildarfélaga í samræmi við búferlaflutninga og tilkynna stjórnum aðildarfélaga um það þegar þau þess óska. Óheimilt er að láta utanaðkomandi aðilum í té félagaskrár aðildarfélaga eða annast áritanir úr félagatali fyrir aðra.
2.13 a. Í öllum stofnunum flokksins, sem kosið er til, skal þess gætt að konur skipi hið minnsta 40% aðalfulltrúa og 40% varafulltrúa, svo fremi að nægilega margir séu í framboði. Ef færri konur en 40% eru í framboði teljast þær sjálfkjörnar. Við skipan á framboðslista skal stefnt að því að ekki halli á konur. Hið sama á við, þegar skipað er í ráðherrastörf á vegum flokksins.
b. a-liður þessarar greinar gildir ekki um þær stofnanir flokksins sem myndaðar eru af einstaklingum kjörnum í einstaklingskjöri, t.d. stjórn flokksins sbr. a-lið gr. 6.06.
2.14 Einfaldur meirihluti skal ráða úrslitum í sérhverju máli innan Samfylkingarinnar - jafnaðarflokks Íslands, nema annað sé ákveðið í lögum þessum. Kosningar skulu vera leynilegar ef þess er óskað.
2.15 Við val fulltrúa í ráð og nefndir utan Samfylkingarinnar - jafnaðarflokks Íslands, hvort heldur á Alþingi eða í sveitarstjórnum, skal að því stefnt, að fulltrúar hennar gegni ekki sömu trúnaðarstörfum lengur en átta ár í röð.
3. kafli Aðildarfélög
3.1 Stjórnmálafélög sem hlíta vilja grundvallarstefnuskrá Samfylkingarinnar - jafnaðarflokks Íslands undirgangast lög hennar og hafa a.m.k. 10 fullgilda félagaer heimils að sækja um aðild að Samfylkingunni - jafnaðarflokki Íslands.
3.2 Hlutverk aðildarfélags er meðal annars;
a) að breiða út grunnhugmyndir jafnaðar og stefnu Samfylkingarinnar - jafnaðarflokks Íslands,
b) að vinna að stefnumótun í sveitarstjórnarmálum fyrir starfssvæði félagsins,
c) að standa fyrir umræðum um lands- og bæjarmál,
d) að veita félögum fræðslu og þjálfun í hugmyndafræði jafnaðarfólks og starfsemi flokksins,
e) að auka gildi flokksaðildarinnar með nánu samstarfi og samráði við flokksmenn,
f) að bera ábyrgð á framboði til sveitarstjórnarkosninga, meirihlutamyndun og nánu samráði félagsmanna og kjörinna fulltrúa,
g) að vera bakhjarl og samráðsvettvangur kjörinna fulltrúa í sveitarstjórnum, nefndum og ráðum,
h) að kjósa fulltrúa frá starfssvæði sínu á landsfund Samfylkingarinnar - jafnaðarflokks Íslands, og í kjördæmis– eða fulltrúaráð,
i) að taka til umræðu og láta í ljós álit sitt á framkomnum tillögum fyrir flokksstjórnar- og landsfundi.
3.3 Ef félag óskar eftir aðild, getur flokksstjórnin veitt því viðtöku til næsta landsfundar með sömu réttindum og aðildarfélög þau hafa, sem landsfundur hefur samþykkt en á næsta landsfundi skal lagður fullnaðarúrskurður á það mál. Umsókn félags um inngöngu skal fylgja afrit af lögum félagsins.
3.4 Félög sem fengið hafa aðild að Samfylkingunni, jafnaðarflokki Íslands skulu leitast við að kenna sig við Samfylkinguna - jafnaðarflokk Íslands, í heiti sínu.
3.5 Hvert aðildarfélag hefur fullt frelsi um sín innri mál, svo fremi að ekki brjóti í bága við lög þessi.
3.6 Rétt til inngöngu í aðildarfélag á hver einstaklingur, sem náð hefur 18 ára aldri og skuldbindur sig til að hlíta lögum félagsins. Aldursákvæði þetta tekur ekki til aðildarfélaga ungs fólks sem aðild á að Samfylkingunni - jafnaðarflokki Íslands. Réttur til inngöngu í aðildarfélag er háður því að umsækjandi sé ekki félagi í öðrum stjórnmálaflokkum.
3.7 Aðildarfélagi er heimilt að takmarka aðild að félaginu við búsetu innan þess sveitarfélags sem félagið starfar í.
3.8 Skriflegri umsókn um inngöngu má beina til aðalskrifstofu Samfylkingarinnar - jafnaðarflokks Íslands, sem þá skipar umsækjanda í félag eftir búsetu hans, komi ekki fram ósk um annað. Þó skulu einstaklingar undir 35 ára aldri vera skráðir í Ungt jafnaðarfólk eftir búsetu þeirra komi ekki fram ósk um annað.
3.9 Enginn getur verið fullgildur félagi nema í einu aðildarfélagi. Um réttindi og skyldur aukafélaga fer skv. lögum viðkomandi aðildarfélaga. Hvert aðildarfélag ber ábyrgð á að halda utan um skrá yfir sína aukafélaga og ber að hlíta reglum Samfylkingarinnar - jafnaðarflokks Íslands um félagsskrá við meðferð skrárinnar.
3.10 Hvert aðildarfélag skal tilgreina í lögum sínum hvenær skuli halda aðalfund svo og dagskrá hans. Í lögum skal tilgreint hvernig standa skuli að kjöri stjórnar, varastjórnar og skoðunarmanna. Á aðalfundi skulu og lagðir fram reikningar félagsins fyrir næstliðið ár og teknar ákvarðanir um önnur þau mál er fyrir fundinum liggja. Reikningsár aðildarfélags er almanaksárið. Í lögum aðildarfélags skal jafnframt tilgreina hvernig standa skuli að fundarboði svo fundur teljist löglegur og einnig hvernig fara skuli með félagsslit.
3.11 Hvert aðildarfélag hefur rétt til að skjóta öllum ágreiningsmálum sem rísa kunna í félaginu og varða starfsemi þess og lög til framkvæmdastjórnar. Úrskurður framkvæmdastjórnar er bindandi fyrir báða eða alla aðila en vísa má þeim úrskurði til flokksstjórnar og er hann ekki bindandi fyrr en flokkstjórn hefur afgreitt hann.
3.12 Þar sem Samfylkingin - jafnaðarflokkur Íslands á kjörna sveitarstjórnarfulltrúa ein og sér eða í samstarfi með öðrum flokkum skal starfa bæjar eða borgarmálaráð, sem skal halda reglulega fundi um bæjar eða borgarmál.
3.13 Kjörnir sveitarstjórnarfulltrúar og stjórn aðildarfélags eða eftir atvikum fulltrúaráð í viðkomandi sveitarfélagi skulu í sameiningu leggja fram tillögu til félagsfundar um meirihlutamyndun og verkaskiptingu við stjórn sveitarfélagsins.
3.14 Rísi ágreiningur milli tveggja eða fleiri aðildarfélaga, sem varðar starfsemi þeirra og samskipti innan Samfylkingarinnar - jafnaðarflokks Íslands og sem þeim tekst ekki að jafna skal honum áfrýjað til framkvæmdastjórnar sem sker úr deilunni eins fljótt og tök eru á eftir að leitað hefur verið sátta með aðilum. Úrskurður framkvæmdastjórnar er bindandi fyrir báða eða alla aðila, en vísa má þeim úrskurði til flokksstjórnar og er hann ekki bindandi fyrr en flokksstjórn hefur afgreitt hann.
3.15 Gætt skal jafnræðis með aðilum við meðferð deilumála og skal þeim gefinn kostur á því, að koma að sjónarmiðum sínum innan hæfilegra fresta áður en deila er tekin til úrskurðar.
3.16 Úrsögn úr flokknum eða einstökum aðildarfélögum skal vera skrifleg með vottaðri undirskrift eða með auðkennanlegum rafrænum hætti í gegnum vefsetur flokksins.
3.17 Tillögu um að aðildarfélag segi sig úr Samfylkingunni, jafnaðarflokki Íslands, eða hætti störfum innan hennar má einungis taka til afgreiðslu ef hún er skriflega fram borin við stjórn félagsins af eigi færri en 1/4 hluta fullgildra aðalfélaga. Hljóti tillagan samþykki tveggja löglega boðaðra félagsfunda sem haldnir hafa verið með tveggja vikna millibili skal um hana höfð allsherjaratkvæðagreiðsla. Tillagan telst samþykkt ef 2/3 hlutar greiddra atkvæða eru með henni.
3.18 Bækur, sjóðir og aðrar eignir félags, sem til ráðstöfunar eru eftir að skuldir hafa að fullu verið gerðar upp, skulu er félag segir sig úr Samfylkingunni - jafnaðarflokki Íslands, eða hættir störfum falla til Samfylkingarinnar - jafnaðarflokks Íslands, og ber að afhenda þær skrifstofu hennar.
3.19 a. Skrifstofa flokksins heldur skrá yfir aðalfundi aðildarfélaga, innsenda ársreikninga og ársskýrslur og er skráin framkvæmdastjórninni ávallt tiltæk. Sama á við landshreyfingar, sbr. gr. 11.4.
b. Skili aðildarfélag eða landshreyfing ekki ársreikningi og ársskýrslu, sbr. a - lið, í tvö ár skal stjórn flokksins heimilt að boða til aðalfundar.
4. kafli Landsfundur
4.1 Landsfund Samfylkingarinnar - jafnaðarflokks Íslands skal halda annað hvert ár. Framkvæmdastjórn boðar til landsfundar og ákveður fundarstað. Framkvæmdastjórn er heimilt að fresta landsfundi ef brýn nauðsyn þykir bera til, t.d. vegna þingrofs eða kosninga, og skal þá boða til landsfundar eins fljótt og auðið er.
4.2 Reglulegan landsfund skal halda annað hvort að vori eða hausti. Framkvæmdastjórn hefur heimild til þess að boða landsfund á öðrum tíma ef nauðsyn þykir bera til, t.d. vegna þingrofs. Landsfundur er lögmætur ef hann er löglega boðaður.
4.3 Afl atkvæða ræður niðurstöðu mála á landsfundi. Í starfsnefndum á landsfundi, eins og í öðru starfi Samfylkingarinnar - jafnaðarflokki Íslands, skal þó leitast við að ná sameiginlegri niðurstöðu um helstu mál án atkvæðagreiðslu.
4.4 Allir félagar í Samfylkingunni, jafnaðarflokki Íslands og aðildarfélögum hennar eiga sæti á landsfundum með málfrelsi og tillögurétti. Kjörgengi á landsfund miðast við 18 ára aldur. Þó skal kjörgengi í flokksstjórn miðast við 16 ára aldur. Um atkvæðisrétt fer samkvæmt 5. kafla.
4.5 Landsfund skal boða bréflega með minnst 12 vikna fyrirvara til allra aðildarfélaga flokksins og með a.m.k. einni almennri auglýsingu í útbreiddum fjölmiðli.
4.6 Tillögur málefnanefnda skulu berast stjórn minnst 10 vikum fyrir upphaf landsfundar. Þær skal senda aðildarfélögum til umræðu og umsagnar minnst 8 vikum fyrir upphaf landsfundar.
4.7 Tillögur að ályktunum frá aðildarfélögum og einstökum félagsmönnum skulu berast framkvæmdastjórn minnst 4 vikum fyrir upphaf landsfundar. Þær skulu birtar á vef flokksins þá þegar.
4.8 Samhliða útsendingu fundarboðs til landsfundar skal boðað til fundar formanna aðildarfélaga og landshreyfinga þar sem farið er yfir undirbúning og vinnulag í aðdraganda landsfundar í aðildarfélögum.
4.9 Heimilt er að boða til aukalandsfundar með skemmri fyrirvara, ef sérstakar og óvenjulegar aðstæður eru fyrir hendi að dómi flokks- eða framkvæmdastjórnar, eða ef meirihluti aðildarfélaga krefst þess skriflega.
Sé boðað til aukalandsfundar með hinum skemmri fyrirvara er óheimilt að láta fara fram kosningar til stjórnar flokksins, framkvæmdarstjórnar eða flokksstjórnar, eða afgreiða lagabreytingar.
4.10 Landsfundur samþykkir fundarsköp og skal fundum stjórnað samkvæmt þeim. Ritari flokksins og ritari framkvæmdastjórnar hafa umsjón með ritun fundargerðar landsfundar og bera ábyrgð á frágangi hennar.
4.11 Framkvæmdastjórn kýs fimm manna landsfundarnefnd sem undirbýr dagskrá landsfundar og gerir tillögur um embættismenn fundarins.
4.12 Landsfund skal halda í heyranda hljóði. Þó skal umræða um ákveðin mál fara fram fyrir luktum dyrum, ef tillaga þess efnis hlýtur meira en helming greiddra atkvæða.
4.13 Atkvæðisbærir fulltrúar á landsfundi skulu skipta með sér ferðakostnaði sínum til og frá landsfundi, þannig að allir greiði sem næst sömu fjárhæð í beinan ferðakostnað hvar sem þeir eru búsettir á landinu.
4.14 Fulltrúar á landsfundi eða félög sem þeir eru fulltrúar fyrir skulu greiða kostnað við landsfund. Framkvæmdastjórn ákveður upphæð greiðslu og skal hún innt af hendi í síðasta lagi við upphaf landsfundar.
5. kafli Fulltrúar á landsfundi og val þeirra
5.1 Hverju aðildarfélagi er skylt að láta fram fara kosningu atkvæðisbærra fulltrúa á landsfund úr hópi félaga sinna. Tala fulltrúa miðast við tölu fullgildra aðalfélaga eins og hún var samkvæmt flokksskrá 31. desember næstliðins árs. Fyrir 10 félagsmenn sé kjörinn einn fulltrúi og síðan til viðbótar einn fulltrúi fyrir hverja 10 félagsmenn eða brot úr þeirri tölu sem þó sé eigi minna en einn þriðji. Kjósa skal jafn marga fulltrúa til vara.
5.2 Nýtt félag miði fulltrúatölu sína við tölu félaga eins og hún var þegar félagið sótti um inngöngu. Sé félag stofnað innan þriggja mánaða fyrir boðaðan landsfund öðlast það félag ekki rétt til fulltrúakjörs.
5.3 Félag sem ekki hefur haldið aðalfund undanfarin 2 ár fyrir boðaðan reglulegan landsfund og sent ársskýrslu sína ásamt ársreikningi til framkvæmdastjórnar eða vanrækt skattgreiðslur til Samfylkingarinnar - jafnaðarflokks Íslands hefur ekki rétt til að senda atkvæðisbæra fulltrúa á landsfund.
5.4 Enginn félagi getur neytt atkvæðisréttar við fulltrúakjör til landsfundar í nema einu aðildarfélagi og þá einungis þar sem hann er fullgildur félagi.
5.5 Komi nafn einstaklings fram sem aðalfélaga á fleiri en einni innsendri félagaskrá telst hann við ákvörðun fjölda landsfundarfulltrúa tilheyra því aðildarfélagi sem hann gekk fyrst í.
5.6 Framkvæmdastjórn fyrirskipar kosningar til landsfundar. Stillt skal svo til að þær geti sem víðast farið fram á sama tíma og verið lokið um líkt leyti. Þó getur framkvæmdastjórn, ef sérstaklega stendur á fyrir einhverju aðildarfélagi eða félögum, veitt þeim annan tíma til kosningarinnar en almennt er ákveðinn ef félagsfundur eða stjórn félagsins ber fram ósk þar um við framkvæmdastjórn.
5.7 Engu aðildarfélagi er heimilt að hefja kosningu til landsfundar fyrr en framkvæmdastjórn hefur fyrirskipað kosningar. Kosningar til landsfundar skal tilkynna hverju aðildarfélagi bréflega.
5.8 Kosningar fulltrúa og varafulltrúa á landsfund skulu fara fram á félagsfundi. Ef fleiri eru í kjöri en fulltrúatala segir til um þá skal kosning fara fram leynilega og skriflega. Ef sérstaklega stendur á getur framkvæmdastjórn heimilað stjórn aðildarfélags að skipa landsfundafulltrúa félagsins ef félagsfundur ber fram rökstudda ósk þar um við framkvæmdastjórn. Er framkvæmdastjórn heimilt að veita skilyrt samþykki í slíkum tilfellum.
5.9 Félagsstjórn er heimilt að viðhafa allsherjaratkvæðagreiðslu við kosningar til landsfundar. Þá er og flokksstjórn heimilt að fyrirskipa allsherjaratkvæðagreiðslu við fulltrúakosningar til landsfundar í öllum aðildarfélögum.
5.10 Kjörtímabil fulltrúa er tímabilið milli reglulegra landsfunda og má aðildarfélag ekki kjósa oftar en einu sinni á kjörtímabilinu nema fulltrúar þess deyi eða missi kjörgengisskilyrði sín og varafulltrúum er ekki til að dreifa.
5.11 Aðildarfélög skulu þremur vikum fyrir landsfund senda framkvæmdastjórn lista með nöfnum kjörinna landsfundarfulltrúa. Framkvæmdastjórn skal til bráðabirgða athuga hvort samræmi sé milli fjölda félagsmanna og kjörinna fulltrúa en afhenda kjörstjórn síðan gögn þessi við upphaf landsfundar.
6. kafli Kosningar forystu, atkvæðisréttur, dagskrá landsfundar og störf
6.1
a) Formaður Samfylkingarinnar - jafnaðarflokki Íslands skal kjörinn allsherjaratkvæðagreiðslu meðal allra skráðra félagsmanna enda komi fram krafa þar um frá a.m.k. 150 flokksmönnum eigi síðar en 45 dögum fyrir boðaðan landsfund.
b) Framkvæmdastjórn skipar sérstaka þriggja manna kjörstjórn vegna allsherjaratkvæðagreiðslu um formannskjör 12 vikum fyrir landsfund. Hún auglýsir m.a. framboðsfrest sem skal vera a.m.k. 10 dagar. Framboðum skulu fylgja meðmæli a.m.k. 20 félagsmanna úr hverju kjördæmi landsins. Kosningarétt í kjörinu hafa þeir sem eru á félagaskrá flokksins við lok framboðsfrests. Hin sérstaka kjörstjórn afhendir kjörstjórn landsfundar niðurstöðu kjörsins á landsfundi. Berist einungis eitt framboð fellur allsherjaratkvæðagreiðsla niður og formaður skal kjörinn á landsfundi, sbr. gr. 6.2. Flokkstjórn setur nánari reglur um allsherjaratkvæðagreiðslu og störf hinnar sérstöku kjörstjórnar.
6.2 Fari ekki fram allsherjaratkvæðagreiðsla um embætti formanns samkvæmt gr. 6.1 skal formaður kjörinn á reglulegum landsfundi sbr. 6.6. Kjörgengir eru allir félagar 18 ára og eldri. Framboð skulu berast framkvæmdastjórn skriflega eigi síðar en einni viku fyrir upphaf landsfundar. Kosning skal fara fram þótt aðeins einn hafi gefið kost á sér.
6.3 Framkvæmdastjórn skipar þriggja manna kjörstjórn landsfundar 6 vikum fyrir landsfund.
6.4 Landsfundarnefnd sbr. gr. 4.12 skal gera tillögu um embættismenn landsfundar og 5 manna uppstillingarnefnd sem kjósa skal við upphaf landsfundar.
6.5 Á reglulegum landsfundi skal kjósa til tveggja ára sem hér segir:
a) Stjórn flokksins aðra en formann þingflokks og formann sveitarstjórnarráðs; formann flokksins nema viðhöfð sé allsherjaratkvæðagreiðsla skv. ákvæðum gr. 6.1, varaformann, ritara, gjaldkera flokksins og formann framkvæmdastjórnar hvern um sig sérstaklega og í ofangreindri röð.
b) Framkvæmdastjórn: Sex fulltrúa og sex til vara. Atkvæðaseðill er ekki gildur nema kosnir séu a.m.k. sex fulltrúar og er ógildur ef kosnir eru fleiri en tólf fulltrúar. Þau sex sem flest atkvæði hljóta teljast réttkjörnir aðalfulltrúar. Næstu sex sem hljóta næstflest atkvæði án þess að ná kjöri sem aðalfulltrúar teljast réttkjörnir varafulltrúar.
c) Þrjátíu fulltrúa í flokksstjórn.
d) Fimm fulltrúa í stjórn verkalýðsmálaráðs og fimm til vara.
e) Formann laganefndar, framkvæmdastjórn skipar aðra tvo fulltrúa í laganefnd eftir landsfund.
6.7 Starfsmenn flokksskrifstofu hafi ekki kjörgengi í framkvæmdastjórn flokksins.
6.8 Komi ekki fram fleiri framboð eða tilnefningar til starfa sem kjósa þarf til en sem nemur fullri tölu í viðeigandi störf teljast viðkomandi sjálfkjörin til starfa.
6.9 Kjörstjórn tekur við framboðum og tilnefningum til allra starfa sem kjósa þarf til á landsfundi.
6.10 Kjörstjórn afhendir uppstillinganefnd öll framboð og allar tilnefningar og skal uppstillinganefnd sjá til þess að framboð og tilnefningar fáist til allra starfa sem kjósa á til, leitar eftir samþykki þeirra sem tilnefnd eru og afhendir kjörstjórn endanlegan lista um framboð og tilnefningar.
6.11 Uppstillinganefnd er heimilt að stilla upp fleiri einstaklingum í framboð en sem tilnefndir hafa verið eða boðið sig fram.
6.12 Kjörstjórn útbýr kjörseðla fyrir allar kosningar í samræmi við lista uppstillinganefndar.
6.13 Engum atkvæðisbærum landsfundarfulltrúa má afhenda nema einn kjörseðil og engum landsfundarfulltrúa er heimilt að skila nema einum kjörseðli til kjörstjórnar.
6.14 Kjörstjórn stýrir talningu með aðstoð þeirra sem hún velur til þeirra starfa, hefur endanlegt úrskurðarvald um gildi vafaatkvæða og tilkynnir úrslit kosninga.
6.15 Formaður framkvæmdastjórnar skal ekki vera þingmaður. Nái hann kjöri til Alþingis skal kosið í hans stað á næsta reglulega flokksstjórnar- eða landsfundi.
7. kafli Flokksstjórn
7.1 Flokksstjórnin hefur milli landsfunda æðsta vald í öllum málefnum Samfylkingarinnar - jafnaðarflokki Íslands og ber hverju aðildarfélagi og hverjum þeim sem telst til félaga og gegnir trúnaðarstarfi fyrir hana að hlýða fyrirmælum hennar og úrskurðum er varða störf fyrir Samfylkinguna - jafnaðarflokk Íslands.
7.2 Hvert aðildarfélag og einstaklingur hefur rétt á að skjóta ágreiningsmálum sínum við flokksstjórn til landsfundar sem þá fellir fullnaðarúrskurð í málinu.
7.3 Í flokksstjórn eiga sæti með fullum atkvæðisrétti:
a) Framkvæmdastjórn flokksins og varamenn í forföllum þeirra, í þeirri röð sem þeir eru kjörnir.
b) Þrjátíu og einn fulltrúi kjörnir af kjördæmisráðunum (sbr. gr. 9.14) og varamenn í forföllum þeirra, í þeirri röð sem þeir eru kjörnir.
c) Þrjátíu fulltrúar kjörnir á landsfundi.
d. Alþingismenn og sveitarstjórnarfulltrúar Samfylkingarinnar – jafnaðarflokks Íslands enda séu þeir jafnframt félagar í Samfylkingunni – jafnaðarflokki Íslands.
e) Formenn kjördæmis- og fulltrúaráða og varaformenn í forföllum þeirra.
f) Formenn aðildarfélaga og landshreyfinga og varaformenn í forföllum þeirra.
g) Stjórn verkalýðsmálaráðs og varamenn í forföllum þeirra.
h) Formaður laganefndar.
7.04 Til að varamaður eða varaformaður, eftir atvikum, taki sæti á flokksstjórnarfundi skal aðalmaður tilkynna skrifstofu Samfylkingarinnar - jafnaðarflokks Íslands um forföll, ásamt því hvaða varamaður taki sæti í hans stað skv. gr. 7.3, í síðasta lagi sólarhring fyrir upphaf flokksstjórnarfundar. Aðalmaður getur ekki boðað varamann á flokksstjórnarfund sæki hann sjálfur fundinn og gildir það jafnframt þótt aðalmaður eigi sæti í flokksstjórn samkvæmt fleiri en einum bókstafslið gr. 7.3. Við boðun forfalla missir aðalmaður atkvæðisrétt á fundinum.
7.5 Hlutverk flokksstjórnar er:
a) Að sjá um að starfsemi Samfylkingarinnar - jafnaðarflokks Íslands, sé í samræmi við lög hennar, stefnuskrá og ályktanir landsfunda.
b) Að leggja höfuðlínur í stefnu Samfylkingarinnar - jafnaðarflokks Íslands, á grundvelli laga hennar og ályktana landsfunda.
c) Að taka ákvörðun um afstöðu til ríkisstjórna og ákveða þátttöku Samfylkingarinnar - jafnaðarflokks Íslands í myndun ríkisstjórnar.
d) Að staðfesta tilnefningu þingflokks Samfylkingarinnar - jafnaðarflokks Íslands á ráðherralista flokksins við stjórnarmyndun.
e) Að úrskurða í málum sem framkvæmdastjórn, þingflokkur eða aðildarfélög vísa til flokksstjórnar.
f) Að taka afstöðu til skýrslna framkvæmdastjórnar, þingflokks og sveitarstjórnaráðs sem þau skulu leggja fyrir flokksstjórn um störf sín eigi sjaldnar en einu sinni á ári.
g) Að setja flokknum skuldbindandi reglur um val á framboðslista.
7.6 Ef formaður Samfylkingarinnar - jafnaðarflokks Íslands fellur frá, segir af sér eða missir kjörgengi á kjörtímabilinu tekur varaformaður sæti hans og kýs þá flokksstjórn nýjan varaformann í hans stað úr sínum hópi fyrir þann tíma sem eftir er af kjörtímabilinu. Ef varaformaður Samfylkingarinnar - jafnaðarflokks Íslands fellur frá, segir af sér eða missir kjörgengi á kjörtímabilinu kýs flokksstjórn nýjan varaformann í hans stað úr sínum hópi fyrir þann tíma sem eftir er af kjörtímabilinu.
7.7 Flokksstjórnarfundi skal boða með auglýsingu og bréfi til allra meðlima flokksstjórnar með a.m.k. 6 vikna fyrirvara. Ef sérstaklega stendur á er heimilt að boða til flokksstjórnarfundar með skemmri fyrirvara með auglýsingum, símtölum, netskeytum eða símskeytum sem birt skulu eða eiga sér stað með a.m.k. 24 klukkustunda fyrirvara. Sé flokkstjórn kölluð saman skv. grein 7.11 má fyrirvari fyrir fund vera 7 dagar.
7.8 Flokksstjórnarfundur er lögmætur sé hann réttilega boðaður með þeim atkvæðisbæru fulltrúum sem hann sækja.
7.9 Ályktunartillögur fyrir reglulega flokkstjórnarfundi skv. grein 7.7, sem aðrir flytja en stjórn eða framkvæmdastjórn, skulu hafa borist a.m.k. tveimur vikum fyrir boðaðan fund og skulu kynntar á heimasíðu flokksins og eftir föngum í viðeigandi málefnanefndum hans.
7.10 Flokksstjórnin skal koma saman a.m.k. tvisvar á ári, nema það ár sem reglulegur landsfundur er haldinn en þá skal haldinn a.m.k. einn flokksstjórnarfundur. Halda skal reglulega flokksstjórnarfundi að vori eða hausti. Taka skal tillits til tímasetningu reglulegs landsfundar sé hann haldinn á viðkomandi ári þannig að sé landsfundur haldinn að vori skal halda flokksstjórnarfund að hausti, eða öfugt.
7.11 Flokksstjórn heldur fundi að öðru leyti þegar formaður eða framkvæmdastjórn ákveður.
7.12 Þá er og skylt að kalla flokksstjórnina saman til fundar þegar 40 flokksstjórnarmenn eða fleiri krefjast þess skriflega og tilgreina fundarefni, svo og þegar þingflokkurinn áfrýjar máli til flokksstjórnar. Flokksstjórnarfundur, skv. þessari grein, er lögmætur þegar 40 flokksstjórnarmenn eru mættir.
7.13 Ritari Samfylkingarinnar - jafnaðarflokks Íslands ritar fundargerðir flokksstjórnar og skulu þær sendar öllu flokksstjórnarfólki eins fljótt og kostur er.
7.14 Fundir flokksstjórnar eru opnir öllu félagsfólki Samfylkingarinnar - jafnaðarflokks Íslands sem njóta skal málfrelsis, tillöguréttar og kjörgengis en ekki atkvæðisréttar. Framkvæmdastjórn getur kallað til flokksstjórnarfundar, ef hún telur ástæðu til, þar sem einungis til þess bærir fulltrúar hafa seturétt.
7.15 Flokksstjórn er þó heimilt að funda fyrir luktum dyrum, samþykki meirihluti atkvæðisbærra og viðstaddra flokksstjórnarfulltrúa þá ráðstöfun í atkvæðagreiðslu.
8. kafli Framkvæmdastjórn
8.1 Í framkvæmdastjórn eiga sæti þrettán aðalfulltrúar og sex fulltrúar til vara. Auk þess eiga sæti í framkvæmdastjórn með málfrelsi og tillögurétti, formenn; Ungs jafnaðarfólks, Kvennahreyfingar Samfylkingarinnar - jafnaðarflokks Íslands, Landssamtakanna 60+ og verkalýðsmálaráðs og varaformenn í forföllum þeirra.
8.2 Í framkvæmdastjórn á sjálfkrafa sæti stjórn Samfylkingarinnar - jafnaðarflokks Íslands.
8.3 Til viðbótar við þá sem taldir eru í gr. 8.2 skulu kjörnir á landsfundi sex aðalfulltrúar og sex til vara og ráða atkvæði röð þeirra (sbr. gr. 6.6). Forfallist aðalfulltrúi tekur varafulltrúi sæti hans.
8.4 Á fyrsta fundi nýkjörinnar framkvæmdastjórnar skulu fulltrúar velja úr röðum sínum varaformann framkvæmdastjórnar og ritara framkvæmdastjórnar. Ef formaður framkvæmdastjórnar fellur frá, segir af sér eða missir kjörgengi á kjörtímabilinu tekur varaformaður framkvæmdastjórnar sæti hans fram að næsta reglulega flokksstjórnarfundi og kýs þá flokksstjórn formann framkvæmdastjórnar úr sínum hópi fyrir þann tíma sem eftir er af kjörtímabilinu.
8.5 Formaður framkvæmdastjórnar boðar fundi framkvæmdastjórnar og stýrir þeim. Fundi skal boða með viku fyrirvara. Heimilt er að boða fundi með styttri fyrirvara þegar nauðsyn krefur.
8.6 Hlutverk framkvæmdastjórnar er:
a) Að vinna með stjórn flokksins að tillögum um stefnumótun og málefnavinnu,
b) Að fjalla um stjórnmál líðandi stundar og mál frá fulltrúum í framkvæmdastjórn,
c) Að vinna að undirbúningi mála og stefnumótun fyrir landsfund og flokksstjórn,
d) Að sjá um framkvæmd á ályktunum landsfundar og flokksstjórnar,
e) Að annast tengsl við aðildarfélög, ráð, hópa og félaga og vinna að eflingu flokkstarfs um land allt,
f) Að starfa að fræðslu og útbreiðslu jafnaðarstefnunnar og stjórnmálastefnu Samfylkingarinnar - jafnaðarflokks Íslands, jafnt innan hennar sem á almennum vettvangi,
g) Að standa árlega fyrir opnum fundum í öllum kjördæmum um stjórnmál líðandi stundar,
h) Að hafa yfirumsjón með rekstri Samfylkingarinnar - jafnaðarflokks Íslands, fjármálum og eignum hennar, sem og fjáröflun til starfsemi hennar,
i) Að ráða starfsmenn að fengnum tillögum stjórnar,
j) Að tilnefna fólk af hálfu Samfylkingarinnar - jafnaðarflokks Íslands, í stjórnir, ráð, nefndir og aðrar trúnaðarstöður eftir því sem við á og það hlutverk ekki falið þingflokki í landslögum eða lögum þessum.
8.7 Framkvæmdastjórn skipar þau ráð og þær nefndir sem þurfa þykir til að vinna að málum í umboði framkvæmdastjórnar.
8.8 Framkvæmdastjórn annast og ber ábyrgð á rekstri Samfylkingarinnar - jafnaðarflokks Íslands í umboði landsfundar og tekur allar ákvarðanir um fjárhagslegar skuldbindingar hennar.
8.9 Formaður framkvæmdastjórnar eða gjaldkeri flokksins, hver um sig ásamt einum aðalfulltrúa framkvæmdastjórnar, rita firma flokksinsFramkvæmdastjórn er heimilt að veita formanni framkvæmdastjórnar, gjaldkera flokksins og framkvæmdastjóra hans almennt eða sérstakt umboð til þess að skuldbinda Samfylkinguna - jafnaðarflokk Íslands.
9. kafli Kjördæmisráð og val á framboðslista við alþingiskosningar
9.1 Í hverju kjördæmi landsins skal vera kjördæmisráð starfi þar fleiri en eitt aðildarfélag Samfylkingarinnar - jafnaðarflokks Íslands. Heimildir félags til að krefjast stofnunar kjördæmisráðs skv. þessari grein verða fyrst virkar þremur mánuðum eftir að flokksstjórn hefur samþykkt aðild félagsins.
9.2 Hlutverk kjördæmisráðs er að skipuleggja og efla flokksstarfið í kjördæminu, fara með sameiginleg mál Samfylkingarinnar - jafnaðarflokks Íslands þar og standa fyrir framboði við alþingiskosningar.
Kjördæmisráð ber ábyrgð á:
a) að standa fyrir umræðum um stefnumarkandi mál í samvinnu við aðildarfélögin,
b) kosningastarfi vegna alþingiskosninga í kjördæminu, framkvæmd og fyrirkomulagi niðurröðunar á framboðslista Samfylkingarinnar - jafnaðarflokks Íslands, við alþingiskosningar,
c) samþykkt og frágangi á framboðslistum til Alþingis,
d) virku sambandi við flokksstofnanir á starfssvæðinu og landshreyfingar,
e) stuðningi við starfsemi aðildarfélaganna,
f) að halda stefnuþing kjördæmisins til undirbúnings fyrir landsfundi.
9.3 Stjórn kjördæmisráðs skal m.a.:
a) sjá um að flokksstarfið sé í samræmi við skipulagsreglur flokksins,
b) framfylgja ákvörðunum kjördæmisráðs,
c) fylgjast með því að aðildarfélögin eða fulltrúaráðin kjósi fulltrúa í kjördæmisráð,
d) hafa með höndum vörslu kjördæmissjóðs,
e) eiga samstarf við aðildarfélögin í kjördæminu og framkvæmdastjórn flokksins.
9.4 Í kjördæmisráði eiga sæti fulltrúar allra starfandi aðildarfélaga í kjördæminu í hlutfalli við félagatölu þeirra eftir þeim reglum sem samþykktir eða lög kjördæmisráðsins kveða á um svo og aðrir sem samþykktir ráðsins kveða á um.
9.5 Kjördæmisráð skal skipa til tveggja ára í senn, en ráðið skal koma saman til funda a.m.k. árlega.
9.6 Á aðalfundi skal a.m.k. taka eftirfarandi fyrir, auk annarra mála:
a) Skýrslu stjórnar,
b) Ársreikning fyrir næstliðið ár,
c) Skýrslu þingmanna kjördæmisins,
d) Lagabreytingar, ef einhverjar eru,
e) Yfirlit um starfsemi aðildarfélaga,
f) Kjör stjórnarmanna og varamanna þeirra,
g) Kjör valnefndar og skoðunarmanna reikninga.
9.7 Aðalfundur kýs 5 manna stjórn kjördæmisráðsins og jafnmarga til vara. Formenn aðildarfélaga hafa seturétt á fundum stjórnar kjördæmisráðsins með málfrelsi og tillögurétti.
9.8 Kjördæmisráð setur sér sjálft samþykktir sem ekki mega stangast á við lög þessi. Þar skal kveðið á um hlutverk ráðsins og skipan og stjórn þess og starfsvettvang svo og gjaldskyldu aðildarfélaga og kostnað af störfum ráðsins.
9.9 Komi upp ágreiningur innan kjördæmisráðs um lög flokksins eða samþykktir ráðsins skal framkvæmdastjórn skera úr. Úrskurður framkvæmdastjórnar er bindandi fyrir báða eða alla aðila en vísa má þeim úrskurði til flokksstjórnar og er hann ekki bindandi fyrr en flokkstjórn hefur afgreitt hann.
9.10 Kjördæmisráð skulu gefa flokksstjórn árlega skýrslu um starfsemi ráðsins.
9.11 Kjördæmisráð ákveða framkvæmd og fyrirkomulag niðurröðunar á framboðslista Samfylkingarinnar - jafnaðarflokks Íslands við alþingiskosningar. Val á framboðslista fer skv. reglum sem flokksstjórn samþykkir.
9.12 Framboð til Alþingis á vegum Samfylkingarinnar - jafnaðarflokks Íslands þarf endanlega staðfestingu flokksstjórnar.
9.13 Þar sem eitt sveitarfélag eru tvö kjördæmi eða fleiri, fer fulltrúaráð aðildarfélaganna í sveitarfélaginu sameiginlega með hlutverk kjördæmisráða þeirra beggja eða allra.
9.14 Kjördæmisráð Samfylkingarinnar - jafnaðarflokks Íslands skulu kjósa í flokksstjórn hennar til tveggja ára í senn alls 31 fulltrúa og 18 til vara í tilgreindri röð. Fjöldi fulltrúa, sem hvert kjördæmisráða kýs í flokksstjórn, skal vera sem hér segir:
a) Norðvesturkjördæmi: fimm fulltrúar og þrír til vara.
b) Norðausturkjördæmi: fimm fulltrúar og þrír til vara.
c) Suðurkjördæmi: fimm fulltrúar og þrír til vara.
d) Suðvesturkjördæmi: sex fulltrúar og þrír til vara.
e) Reykjavíkurkjördæmi norður: fimm fulltrúar og þrír til vara.
f) Reykjavíkurkjördæmi suður: fimm fulltrúar og þrír til vara.
9.15 Fulltrúar kjördæmanna skulu kosnir óhlutbundinni kosningu. Er atkvæðaseðill eigi gildur nema kosin sé full tala.
9.16 Kjördæmisráðin skulu hafa lokið kosningu fulltrúa sinna í flokksstjórn fyrir reglulegan landsfund Samfylkingarinnar - jafnaðarflokks Íslands.
10. kafli Fulltrúaráð og framboð til sveitarstjórna
10.1 Í hverju sveitarfélagi landsins skal vera fulltrúaráð starfi þar fleiri en eitt aðildarfélag Samfylkingarinnar - jafnaðarflokks Íslands, enda hafi eitthvert aðildarfélaganna krafist stofnunar þess. Komi slík krafa ekki fram skal það af aðildarfélögunum sem stærst er fara með það umboð sem fulltrúaráðið fer með skv. lögum þessum. Heimildir félags til að krefjast stofnunar fulltrúaráðs skv. þessari grein verða fyrst virkar þremur mánuðum eftir að flokksstjórn hefur samþykkt aðild félagsins.
10.2 Hlutverk fulltrúaráðsins er að skipuleggja og efla flokksstarfið í sveitarfélaginu, fara með sameiginleg mál Samfylkingarinnar - jafnaðarflokks Íslands í því og standa fyrir framboði til sveitarstjórnar.
Fulltrúaráð ber ábyrgð á:
a) að standa fyrir umræðum um stefnumarkandi mál í samvinnu við aðildarfélögin,
b) kosningastarfi, framkvæmd og fyrirkomulagi niðurröðunar á framboðslista Samfylkingarinnar - jafnaðarflokks Íslands við sveitarstjórnarkosningar og alþingiskosningar ef við á,
c) samþykkt og frágangi á framboðslistum,
d) virku sambandi við flokksstofnanir á starfssvæðinu og landshreyfingar,
e) stuðningi við starfsemi aðildarfélaganna.
10.3 Í fulltrúaráði eiga sæti fulltrúar allra starfandi aðildarfélaga í sveitarfélaginu svo og aðrir þeir sem samþykktir ráðsins kveða á um í hlutfalli við félagatölu þeirra eftir þeim reglum sem samþykktir eða lög fulltrúaráðsins kveða á um svo og aðrir þeir sem samþykktir ráðsins kveða á um.
10.4 Fulltrúaráð skal skipa til tveggja ára í senn, en ráðið skal koma saman til funda a.m.k. árlega.
10.5 Fulltrúaráð setur sér sjálft lög sem ekki mega stangast á við lög þessi. Þar skal kveðið á um hlutverk ráðsins, skipan, stjórn þess, starfsvettvang, gjaldskyldu aðildarfélaga og kostnað af störfum ráðsins.
10.6 Komi upp ágreiningur innan fulltrúaráðsins um lög flokksins eða samþykktir ráðsins skal framkvæmdastjórn skera úr. Úrskurður framkvæmdastjórnar er bindandi fyrir báða eða alla aðila en vísa má þeim úrskurði til flokksstjórnar og er hann ekki bindandi fyrr en flokksstjórn hefur afgreitt hann.
10.7 Fulltrúaráð Samfylkingarinnar - jafnaðarflokks Íslands skulu gefa flokksstjórn árlega skýrslu um starfsemi ráðanna.
10.8 Fulltrúaráðin ákveða framkvæmd og fyrirkomulag niðurröðunar á framboðslista Samfylkingarinnar - jafnaðarflokks Íslands við kosningar til sveitarstjórna. Val á framboðslista fer skv. reglum sem flokksstjórn samþykkir.
10.9 Sé í sveitarfélagi einungis starfandi eitt aðildarfélag fer það með hlutverk fulltrúaráðs skv. lögum þessum.
11. kafli Landshreyfingar
11.1 Innan Samfylkingarinnar - jafnaðarflokks Íslands starfa landshreyfingar. Landshreyfing er starfrækt í öllum kjördæmum, hún er mynduð um tiltekna málaflokka s.s. málefni ungs fólks, fólks 60 ára og eldri eða málefni kvenna. Flokksstjórn veitir landshreyfingu aðild að flokknum og réttindi skv. þessum kafla. Um inntöku gilda sömu reglur og gilda um inntöku nýrra aðildarfélaga.
11.2 Ungt jafnaðarfólk, Kvennahreyfing Samfylkingarinnar - jafnaðarflokks Íslands og Landssamtökin 60+ teljast til landshreyfinga Samfylkingarinnar – jafnaðarflokks Íslands. Heimilt er að stofna nýja landshreyfingu sem uppfyllir skilyrði skv. þessum kafla.
11.3 Landshreyfingar geta starfrækt staðbundin félög og klúbba sem starfa skulu í nánu samráði við viðkomandi grunneiningar eða aðildarfélög, sbr. þó það sem segir í gr. 2.7 um staðbundin félög ungra jafnaðar.
11.4 Landshreyfingar senda framkvæmdastjórn ársreikning næstliðins árs og gefa flokksstjórn árlega skýrslu um starfsemi sína.
11.5 Landshreyfingar skulu kveða nánar á um boð á ársfund, dagskrá, fjármál, kosningar og slit hreyfingar í samþykktum sínum.
11.6 Formenn landshreyfinga eiga seturétt á fundum framkvæmdastjórnar með málfrelsi og tillögurétti.
12. kafli Málefnanefndir, málfundarfélög, klúbbar og ráð
12.1 Á fyrsta fundi flokksstjórnar eftir landsfund leggur framkvæmdastjórn fram tillögu um forystu og fyrirkomulag málefnanefnda.
Niðurstöður málefnanefnda skulu sendar til umfjöllunar í aðildarfélögum Samfylkingarinnar - jafnaðarflokks Íslands a.m.k. 8 vikum fyrir landsfund
12.03 Málfundarfélög og klúbbar eru frjáls vettvangur málefnavinnu eða annars flokksstarfs félagsmanna Samfylkingarinnar - jafnaðarflokks Íslands um hvert það málefni sem þeir kjósa. Að stofnun málfundarfélags eða klúbbs geta staðið félagsmenn, félög og stofnanir samtakanna.
12.4 Til þess að hópur félagsmanna teljist málfundarfélag eða klúbbur í skilningi laga þessa þurfa að eiga aðild að honum a.m.k. 5 félagsmenn Samfylkingarinnar - jafnaðarflokks Íslands.
12.5 Stofnun málfundarfélags eða klúbbs skal tilkynnt framkvæmdastjórn og skal hún leitast við að efla starf þeirra. Í tilkynningu skal koma fram það eða þau málefni sem hópurinn starfar að, hverjir séu stofnendur hans og hver verði tengiliður hans við framkvæmdastjórn og skrifstofu Samfylkingarinnar - jafnaðarflokks Íslands.
12.6 Málfundarfélög eða klúbbar skulu, eftir því sem tök eru á hverju sinni, eiga aðgang að húsnæði og aðstöðu Samfylkingarinnar - jafnaðarflokks Íslands í samráði við framkvæmdastjóra og samkvæmt þeim reglum sem framkvæmdastjórn ákveður. Málundarfélög hafa og rétt til þess að skila til landsfundar og flokksstjórnar tillögum sínum og niðurstöðum.
12.7 Fjöldi málfundarfélaga eða klúbba er ótakmarkaður. Framkvæmdastjórn er heimilt að standa að stofnun málfundarfélags eða klúbbs um þau málefni sem hún telur æskilegt að um sé fjallað hverju sinni.
12.8 Stjórn verkalýðsmálaráðs skiptir með sér verkum og boðar til fyrsta fundar ráðsins innan mánaðar eftir reglulegan landsfund. Rétt til setu á fundinum eiga kjörnir fulltrúar, starfsmenn stéttarfélaga og aðrir félagar í flokknum.
12.9 Stjórn verkalýðsmálaráðs skal boða fundi ráðsins, undirbúa og ákveða dagskrá þeirra. Meginverkefni stjórnar verkalýðsmálaráðs er að standa að og styðja við virkt samráð forystu Samfylkingarinnar - jafnaðarflokks Íslands við jafnaðarfólk í forystu verkalýðshreyfingarinnar.
12.10 Formaður stjórnar verkalýðsmálaráðs er tengiliður forystu flokksins við forystufólk í launþegahreyfingunni. Í samráði við framkvæmdastjóra og formann Samfylkingarinnar skipuleggur hann og boðar reglubundna samráðsfundi með fulltrúum stéttarfélaga. Stjórn verkalýðsmálaráðs má kalla saman sérstaklega, með skömmum fyrirvara, framkvæmdastjórn og/eða þingflokki til ráðuneytis.
12.11 Formaður eða varaformaður verkalýðsmálaráðs er einnig tengiliður ráðsins við framkvæmdastjórn Samfylkingarinnar - jafnaðarflokks Íslands og hefur seturétt á fundum framkvæmdastjórnar með málfrelsi og tillögurétti. Í tengslum við flokkstjórnarfundi heldur stjórn verkalýðsmálaráðs opnar málstofur eftir þörfum.
13. kafli Þingflokkur og sveitarstjórnarráð
13.1 Þingflokkur Samfylkingarinnar - jafnaðarflokks Íslands, kýs í upphafi hvers þings formann úr hópi þingmanna. Stýrir hann fundum þingflokksins og er formælandi hans á Alþingi.
13.2 Þingflokkurinn tilnefnir fulltrúa til setu í nefndum, ráðum og stjórnum sem kjörnar eru á Alþingi.
13.3 Stjórn Samfylkingarinnar - jafnaðarflokks Íslands (sbr. gr. 2.4) á sæti á fundum þingflokksins með málfrelsi og tillögurétti þótt stjórnarmenn eigi ekki setu á Alþingi.
13.4 Samráðsfundir framkvæmdastjórnar og þingflokks skulu haldnir a.m.k. tvisvar sinnum á ári. Þar skal fjalla um afstöðu Samfylkingarinnar - jafnaðarflokks Íslands og samræma málflutning hennar innan þings og utan í meiriháttar pólitískum stefnumálum.
13.5 Þegar Samfylkingin - jafnaðarflokkur Íslands myndar ríkisstjórn skal formaður stýra gerð málefnasamnings fyrir hönd flokksins í samráði við stjórn flokksins. Við val á ráðherrum hefur formaður verkstjórn og skal leita samráðs við stjórn flokksins og þingflokk. Um endanlega staðfestingu ráðherralista og afstöðu til ríkisstjórna, myndun og slit fer skv. c) og d ) liðum gr. 7.5 um hlutverk flokksstjórnar og skal svo fljótt sem auðið er kalla saman flokksstjórn og bera upp til samþykktar málefnasamning ríkisstjórnar með þátttöku Samfylkingarinnar - jafnaðarflokks Íslands og aðra tillögu um ráðherralista. Komi fram breytingartillaga um ráðherraval á flokksstjórnarfundi skal gengið til leynilegrar atkvæðagreiðslu. Hafni flokksstjórn ráðherralista skal formaður bera fram nýja tillögu að ráðherralista. Sama gildir um breytingar á starfandi ríkisstjórn.
13.6 Sveitastjórnarráð Samfylkingarinnar - jafnaðarflokks Íslands, skal skipað öllu því fólki sem kjörið er sem aðalmenn f.h. Samfylkingarinnar - jafnaðarflokks Íslands í sveitarstjórnir í landinu í sveitarstjórnarkosningum hverju sinni. Fulltrúar af sameiginlegum framboðslistum eiga þar þó einungis sæti ef þeir eru félagar í Samfylkingunni - jafnaðarflokki Íslands.
13.7 Hlutverk þess er að styðja sveitarstjórnarfulltrúa Samfylkingarinnar - jafnaðarflokks Íslands í þeirra störfum og fjalla með reglubundnum hætti um þróun sveitarstjórnarmála á hinum ýmsu sviðum þeirra og marka meginstefnuna í þeim málum á grundvelli stefnuskrár Samfylkingarinnar - jafnaðarflokks Íslands og samþykkta landsfunda.
13.8 Það skal koma saman til aðalfundar einu sinni á ári og skal þá m.a. kjósa þriggja manna stjórn þess. Skal hún skipuð formanni, ritara og gjaldkera er allir skulu kosnir sérstaklega. Einnig skulu kosnir tveir menn til vara.
13.9 Stjórn Samfylkingarinnar - jafnaðarflokks Íslands á rétt til setu á fundum sveitarstjórnarráðs með málfrelsi og tillögurétti þótt stjórnarmenn eigi ekki sæti í sveitarstjórn.
14. kafli Sátta- og trúnaðarnefnd
14.01 Á fyrsta flokksstjórnarfundi eftir reglulegan landsfund skal kjörin þriggja manna sátta- og trúnaðarnefnd og einn nefndarmann til vara. Tilgangur nefndarinnar er:
a) að taka við erindum um ótilhlýðilega framkomu, þ.m.t. einelti, kynbundna áreitni, kynferðislega áreitni og ofbeldi, og afgreiða þau í samræmi við málsmeðferðarreglur sem settar eru af landsfundi, sbr. gr. 14.5 (trúnaðarnefndarmál), og
b) stuðla að lausn erfiðra mála sem kunna að koma upp innan og/eða á milli aðildarfélaga, kjördæmisráð, fulltrúaráða og/eða einstakra flokksmanna vegna:
- alls ágreinings sem kann að koma upp innan aðildarfélaganna og varða starfsemi þeirra og samþykktir,
- ágreinings sem kann að koma upp milli aðildarfélaga varðandi starfsemi þeirra og samskipti sem ekki tekst að jafna,
- ágreinings sem kann að kom upp innan kjördæmis- eða fulltrúaráðs um lög flokksins eða samþykktir ráðsins,
- brota á lögum og reglum flokksins.
14.2 Þeir sem skipa sátta- og trúnaðarnefndina skulu ekki vera kjörnir fulltrúar flokksins á Alþingi og/eða sveitarstjórnum, fulltrúar í framkvæmdastjórn flokksins, starfsmenn skrifstofu flokksins né heldur vera kjörnir fyrir hönd flokksins í stjórnir ríkisstofnana eða valdir af ráðherrum flokksins til slíkra verka.
14.3 Í sáttanefndarmálum fer sáttaferlið fer fram á sáttafundi, einum eða fleiri, með deilendum og nefndarmönnum sáttanefndarinnar. Aðilum að sáttanefndarmálum er frjálst að segja sig frá sáttatilraunum á vegum sáttanefndar allt þar til samkomulag liggur fyrir.
14.4 Í sáttanefndarmálum er nefndinni heimilt að leggja til að fenginn verði óhlutdrægur sáttamaður utan nefndarinnar. Flokkstjórn skal setja nánari reglur um starfshætti sáttanefndar, sáttaferlið og hlutverk og hæfi sáttamanns.
14.5 Landsfundur setur málsmeðferðarreglur um meðferð trúnaðarnefndarmála.
14.6 Framkvæmdastjórn er heimilt, að fenginni tillögu sátta- og trúnaðarnefndar þar um að lokinni málsmeðferð trúnaðarnefndarmáls, að víkja flokksfélaga Samfylkingarinnar - jafnaðarflokks Íslands tímabundið eða ótímabundið úr öllum trúnaðarstörfum fyrir flokkinn. Telji framkvæmdastjórn málsmeðferð sátta- og trúnaðarnefndar ófullnægjandi er henni heimilt að vísa málinu aftur til sátta- og trúnaðarnefndar. Framkvæmdastjórn er jafnframt heimilt að leita umsagnar þess flokksfélaga sem tillagan lýtur að. Taki framkvæmdastjórn ákvörðun um að víkja flokksfélaga úr trúnaðarstörfum er ákvörðunin kæranleg til flokksstjórnar. Gæta skal fulls trúnaðar við brotaþola á öllum stigum máls.
15. kafli Fjármál Samfylkingarinnar - jafnaðarflokks Íslands
15.1 Reikningsárið er almanaksárið. Gjaldkeri semur reikning yfir tekjur og gjöld flokkssjóðs fyrir hvert reikningsár og skal leggja hann fyrir flokksstjórnina í febrúar ár hvert. Reikningurinn skal síðan lagður fyrir næsta landsfund til fullnaðargreiðslu. Það ár sem landsfundur er ekki haldinn skal gjaldkeri semja milliuppgjör og leggja fyrir flokksstjórn.
15.2 Framkvæmdastjórn velur endurskoðendur eða endurskoðunarfyrirtæki til eins árs í senn.
15.3 Landsfundur eða flokksstjórn í umboði hans tekur ákvörðun um flokksgjöld og þær almennu reglur sem gilda um skipan fjármála Samfylkingarinnar - jafnaðarflokks Íslands. Að öðru leyti skipa kjördæmisráð, fulltrúaráð og grunneiningar Samfylkingarinnar - jafnaðarflokks Íslands fjármálum sínum sjálf.
15.4 Á landsfundi og fundum flokksstjórnar er heimilt að innheimta jöfnunargjald til greiðslu ferðakostnaðar. Einnig er heimilt að verja ákveðnum hluta tekna af innheimtu flokksgjaldi í þessu skyni í samræmi við ákvörðun framkvæmdastjórnar.
15.5 Hvert aðildarfélag greiði árlega til flokksjóðs, miðað við tölu félagsmanna, eins og hún er 1. janúar ár hvert. Gjald þetta skal ákveðið af hverjum reglulegum landsfundi eða flokksstjórn í umboði þess fyrir eitt kjörtímabil í senn. Gjalddagi er 1. september ár hvert.
15.6 Nýtt aðildarfélag greiðir gjald á fyrsta gjalddaga eftir að það hefur verið tekið í Samfylkinguna - jafnaðarflokk Íslands eftir félagatölu sinni eins og hún er við inngöngu. Skal félagið greiða hlutfallslegt árgjald miðað við það sem eftir er ársins. Sé nýtt félag stofnað og því veitt aðild eftir 1. september og landsfundur haldinn fyrir 1. september árið eftir skal hið nýja félag þó greiða gjald skv. 1. ml. í síðasta lagi fyrir upphaf þess landsfundar.
15.7 Gjöld aðildarfélaga og gjöld einstakra stuðningsmanna renna í flokkssjóð. Í hann renna allar aðrar tekjur sem til verða í starfi Samfylkingarinnar - jafnaðarflokks Íslands, þar með taldir þeir styrkir sem veittir eru af Alþingi.
15.08 Flokkssjóður greiðir kostnað við landsfund, útbreiðslukostnað, laun starfsmanna, húsaleigu, ritfanga- og prentkostnað og annan óhjákvæmilegan kostnað milli þinga.
15.09 Félagsmönnum Samfylkingarinnar - jafnaðarflokks Íslands er að jafnaði óheimilt að gangast við sjálfsskuldarábyrgðum fyrir flokkinn, aðildarfélög hans, kjördæmisráð og fulltrúaráð.
16. kafli Brottvikning
16.1 Landsfundur hefur rétt til að víkja aðildarfélagi úr Samfylkingunni – jafnaðarflokki Íslands ef hann lítur svo á að það hafi gert sig sekt um athöfn sem sé Samfylkingunni - jafnaðarflokki Íslands til tjóns eða vanvirðu eða brjóti í bága við samþykktir hennar.
16.2 Hvert aðildarfélag sem vikið hefur verið úr Samfylkingunni, jafnaðarflokki Íslands, eða sem segir sig úr henni missir þegar í stað öll réttindi sín innan Samfylkingarinnar - jafnaðarflokks Íslands og fulltrúar þess í hverju starfi sem er á vegum hennar missa þar með umboð sitt. Sama gildir um einstaka félaga sem aðildarfélög hafa vikið út ef flokksstjórnin hefur samþykkt brottvikninguna.
17. kafli Lagabreytingar
17.1 Tillögur um breytingar á lögum þessum skal senda skrifstofu Samfylkingarinnar - jafnaðarflokks Íslands ekki síðar en 6 vikum fyrir boðaðan landsfund. Tillögum skal dreifa með öðrum landsfundargögnum svo tímanlega sem hægt er. Skulu lagabreytingartillögur sendar laganefnd sem er heimilt að veita umsögn um þær til að tryggja að lög þessi haldi samræmi sínu
17.2 Um lagabreytingar skal hafa tvær umræður. Til lagabreytinga þarf tvo þriðju hluta greiddra atkvæða og taka þær gildi þegar í stað nema annað sé tekið fram. Landsfundur getur þó ákveðið með 2/3 hlutum greiddra atkvæða að láta eina umræðu nægja.
18. kafli Lok samtakanna
18.01 Ákvörðun um slit samtakanna skal tekin af tveimur landsfundum í röð. Til samþykktar þarf 2/3 hluta atkvæða á báðum fundum. Seinni landsfundur skal ákveða um ráðstöfun eigna samtakanna.
Samþykkt á landsfundi Samfylkingarinnar - jafnaðarflokks Íslands, 11. - 12. apríl 2025.