„Tökum ábyrgð hvert á öðru“

I.

Flokksstjórn — eðalkratar og kempur;

þið sem hafið tekið slaginn og sigrað með okkur síðustu ár; nýir flokksfélagar og allir Íslendingar með jafnaðartaug.

Okkar skilaboð eru þessi:

Velkomin í Samfylkinguna.

Við tökum ábyrgð á Íslandi. Og við tökum ábyrgð á nærsamfélaginu. 

Því að Íslandi vegnar best þegar við tökum ábyrgð hvert á öðru — þegar réttur og skylda fara hönd í hönd, og allir leggja sitt af mörkum.

Þetta er okkar hugmyndafræði: Það sem aðgreinir Samfylkingu og sósíaldemókrata frá öllum öðrum flokkum.

Alltaf stolt.

Alltaf jafnaðarfólk.

Alltaf til þjónustu reiðubúin, fyrir fólkið í landinu.

Því saman erum við svo miklu meira en bara einstaklingar með eigin hagsmuni:

Við erum samfélag.

Eins og fjölskylda.

Og við eigum eitthvað alveg sérstakt saman hérna á Íslandi, sem er dýrmætt; sem okkur ber skylda til að vernda og varðveita, fyrir framtíðarkynslóðir.

Stolt þjóð, sem setur markið hátt fyrir alla sem hér búa; náin — og of fámenn fyrir mikinn ójöfnuð og öfgar í pólitík.

Þess vegna býður Samfylkingin fram til Alþingis og sveitarstjórna: Við stöndum þétt með þjóðinni. Við tökum ábyrgð á Íslandi og við tökum ábyrgð á nærsamfélagi okkar, hringinn í kringum landið.

Enda vitum við að hugsjónir jafnaðarmennsku eru sameinandi afl – sigrandi afl – og langsterkasta svarið gegn þeim stjórnmálaflokkum sem ala á sérhagsmunum og sundrungu.

II.

Þetta sýnum við í verki: Í ríkisstjórn og í sveitarstjórnum. Og áður en lengra er haldið vil ég segja:

Takk öll fyrir ykkar framlag. Almennir flokksmenn og jafnaðarfólk vítt um land, þið sem hafið verið kjörnir fulltrúar í sveitarstjórnum síðustu árin og nýir frambjóðendur sem taka nú við keflinu. Takk fyrir að standa vaktina og takk fyrir að taka þessa ábyrgð á samfélaginu. Gefum þeim öllum gott klapp!

* * * 

Flokksstjórn:

Næsta verkefni okkar verður að ganga til sveitarstjórnarkosninga. Og þar bjóðum við fram valkost fyrir vinnandi fólk. Venjulegt fólk. Með klassískri jafnaðarmennsku sem hefur, eins og flestir vita, lagt grunninn að farsælustu samfélögum heims, hér á Norðurlöndum. 

Á næstu vikum munum við kynna áherslur okkar í þessum kosningum. Þvert á landið, verkefni sem kalla á samstillt átak ríkis og sveitarfélaga, og sömuleiðis stefnumál á hverjum stað fyrir sig.

Ég kem betur að því hér á eftir.

En fyrst vil ég stikla á stóru og taka stöðuna á landsvísu:

* * *

Við stjórn landsmála hefur Samfylkingin látið verkin tala: Við gerum það sem við sögðumst ætla að gera og erum óhrædd við að taka erfiðar ákvarðanir, og standa með þeim. Klára málin. Við hreyfum okkur hratt. Hristum upp í kerfinu. Og þetta mun ekki breytast, því til þess vorum við kosin. Þó að það þýði að stundum þurfum við að gera eitthvað sem er óþægilegt og kröftuglega mótmælt vegna þess að verkstjórn sem leiðir breytingar getur ekki alltaf gert öllum til geðs.

Á síðasta kjörtímabili kynntum við útspil í ýmsum veigamiklum málaflokkum sem við framkvæmum nú í ríkisstjórn:

•                   Örugg skref í heilbrigðis- og öldrunarmálum

•                   Kröfu um árangur í atvinnu- og samgöngumálum

•                   Framkvæmdaplan í húsnæðis- og kjaramálum

Þar lögðum við fram áherslur, forgangsröðun og ítarlegar útfærslur á stefnu Samfylkingar. Og hvert útspil fyrir sig var unnið af stýrihópi eftir náið samtal við þjóðina á fjölda opinna funda um land allt.

Þessi vinna lagði grunninn að kosningastefnu, kosningasigri og loks verkum okkar í ríkisstjórn. Þetta gerðist ekki af sjálfu sér, heldur tókum við höndum saman, skipulögðum okkur og mættum til leiks vel undirbúin.

Sem gerir það að verkum að á rúmlega einu ári í ríkisstjórn höfum við:

lögfest stöðugleikareglu, ráðist í tiltekt og hagræðingu í ríkisrekstri, lækkað skuldir ríkisins um 7,5% af landsframleiðslu, lagt fram fjármálaáætlun um hallalaus fjárlög 2027 — í fyrsta skipti í að verða áratug — eins og við sögðumst ætla að gera.

Já, við erum að laga ríkisfjármálin eftir óstjórn síðustu ára. Og já, það tekur á. Það kallar á erfiðar ákvarðanir. En aðeins þannig náum við árangri og betra jafnvægi til lengri tíma.

Um leið erum við að tryggja að fleiri íbúðir nýtist sem heimili fólks, með fyrsta húsnæðispakkanum.

Og á einu ári í ríkisstjórn höfum við:

dregið úr hvatanum til að safna íbúðum á fáar hendur, lagað hlutdeildarlánakerfið, tekið á Airbnb, tryggt betri nýtingu stofnframlaga og þar með uppbyggingu fleiri almennra íbúða, hafið stórfellda einföldun á byggingarreglugerð og ráðist í umbætur á stjórnsýslu húsnæðismála — svo dæmi séu tekin.

Við erum að kæla kerfið þannig að það virki betur fyrir venjulegt fólk. Við drögum úr vægi verðtryggingar frá og með næstu áramótum. Og annar húsnæðispakkinn er handan við hornið.

Við höfum:

Fest lífeyri við laun fyrir öryrkja og eldra fólk, til að stöðva kjaragliðnun launa og lífeyris. Nákvæmlega eins og við sögðumst ætla að gera. Hækkað frítekjumark ellilífeyris. Hækkað fæðingarstyrki.

Ráðist í lagfæringar á fæðingarorlofskerfinu, þar sem enn má gera betur, ásamt því að gera betrumbætur á Menntasjóði námsmanna.

Allt þetta sögðumst við ætla að gera. Það stendur skýrum stöfum í Framkvæmdaplaninu, útspilinu okkar um húsnæðis- og kjaramál. Stjórnarandstaðan hefði ekki þurft að vera svona hissa.

Það sem hefur breyst er að nú er komin ríkisstjórn sem framkvæmir — og gerir það sem hún segist ætla að gera.

* * * 

Og þetta gildir í fleiri málaflokkum:

Við settum fram kröfu um árangur í orku- og samgöngumálum, sem við höfum sannarlega staðið undir. Því á rúmu ári í ríkisstjórn höfum við: höggvið á hnúta í orkumálum um land allt, einfaldað leyfisveitingar, afgreitt rammaáætlun, samþykkt lög um orkuöflunarmarkmið, aukið styrki til jarðhitaleitar og grænmetisræktar og unnið að jöfnun orkukostnaðar milli dreifbýlis og þéttbýlis.

Við erum á góðri leið með að tvöfalda fjárfestingu í samgöngum nú þegar, höfum stóraukið framlög til viðhalds vega, mælt fyrir frumvarpi um stofnun innviðafélags til að hefja stórframkvæmdir á ný og lagt fram fullfjármagnaða samgönguáætlun, í fyrsta skipti í fjölda ára. Loksins. Meðal annars til að byrja aftur að bora jarðgöng á Íslandi, eftir jarðgangastopp fyrri ríkisstjórnar.

Kemur þetta á óvart? Ja, þetta stendur allavega allt í útspilinu okkar um atvinnu- og samgöngumál, Kröfu um árangur. Og allt hefur þetta gengið eftir, meðal annars undir forystu okkar góða ráðherra umhverfis-, orku- og loftslagsmála, Jóhanns Páls Jóhannssonar. En hvern hefði grunað að það yrði gengið svona hratt í verkin?  

Í útspilinu var líka fjallað um almenn auðlindagjöld, skynsamleg og réttlát, sem renna til þjóðar og nærsamfélags að hluta þegar við á. Þess vegna leiðréttum við veiðigjöldin á síðasta ári. Við erum að klára lagareldisfrumvarpið í vor, sem tryggir meðal annars að tekjur renni beint til nærsamfélags. Og frumvarp um að afnema undanþágu frá gjaldtöku af orkumannvirkjum, og skila hluta af arðinum heim í hérað, er komið úr samráði. Sömuleiðis er á leiðinni frumvarp atvinnuvegaráðherra um gjaldtöku af aðgangi ferðamanna að náttúruperlum Íslands, sem hefur verið talað um svo árum skiptir.

Við sögðumst ætla að móta fyrstu atvinnustefnu Íslands og það höfum við gert: Atvinnustefnan er tilbúin og verður kynnt á allra næstu vikum. Og þar leggjum við líka áherslu á að efla hugverkaiðnað og nýsköpun í landinu með skýrum aðgerðum þar sem Logi Einarsson menningar-, nýsköpunar- og háskólaráðherra lætur til sín taka. Það eru jákvæð tíðindi framundan í þessum efnum.

Við höfðum áhyggjur af innviðaálagi. Engum hagvexti á mann í nærri 10 ár. Ósjálfbærri fólksfjölgun sem nú er loksins að hægja á. Nú höfum við gripið til aðgerða til að ná betri stjórn og styrkja Ísland. Vegna þess að við ætlum að snúa vörn í sókn, á nýjum og sterkari grunni.

* * *

Í Öruggum skrefum boðuðum við þjóðarátak í umönnun eldra fólks. Sem birtist okkur meðal annars í stórfelldri uppbyggingu hjúkrunarheimila um land allt, sem á sér engin fordæmi. Við erum loksins að tækla biðlistann eftir hjúkrunarrýmum sem tvöfaldaðist frá 2017 til 2024, þegar allt var stopp í uppbyggingu hjúkrunarheimila. Á rúmu ári höfum við gert samninga um eða hafið framkvæmdir við sjö hjúkrunarheimili um land allt. Við ætlum að helminga þennan biðlista strax á árinu 2027 og eyða honum alveg árið 2030, samkvæmt nýrri framkvæmdaáætlun.

Við settum fram þjóðarmarkmið um fastan heimilislækni og heimilisteymi fyrir alla 60 ára og eldri á fyrsta kjörtímabili. Það voru ekki einu sinni til almennileg gögn um þetta utan höfuðborgarsvæðis, þannig að við getum ekki gert samanburð aftur í tímann þar en á rúmu ári í ríkisstjórn erum við nú farin úr 85% upp í 95% hjá elsta hópnum á höfuðborgarsvæðinu, og úr 75% í 80% hjá 60 ára og eldri. Nú grípum við til aðgerða til að styrkja sérnám í heimilislækningum og skapa hvata til fastráðninga úti á landi. Til að tryggja fólki fastan tengipunkt í heilbrigðisþjónustu.

Á sama tíma hefur Alma Möller heilbrigðisráðherra gengið í að taka á skriffinnsku í heilbrigðiskerfinu til að fólkið á gólfinu hafi meiri tíma með sjúklingnum. Þar er ennþá verk að vinna. Um leið og við eflum heilbrigðisþjónustu á öllum sviðum og meðferðarúrræði. Staðan á bráðamóttöku Landspítala er vissulega ennþá þröng en nú sjáum við loks í land með viðbyggingu og nýrri matsdeild auk þess að staðan mun batna stórlega með fyrirsjáanlegri uppbyggingu hjúkrunarheimila.

Þetta eru öruggu skrefin, með Ölmu í fararbroddi og fleiri verkmiklum ráðherrum í ríkisstjórninni.

* * *

Margt fleira mætti telja: Fjölgun lögreglumanna. Fjármagn til viðbyggingar við 5 verknámsskóla um land allt. Samning sameinuðu þjóðanna um réttindi fatlaðs fólks, sem við festum loksins í lög.

Á rúmu ári í ríkisstjórn höfum við lögfest 5%fækkun ríkisstofnana með sameiningum til að bæta þjónustu og styrkja stofnanir – og við stefnum að 15% fækkun á kjörtímabilinu. Við höfum lagt fram frumvarp um umfangsmestu einföldun á eftirlitsumhverfi fyrirtækja í marga áratugi. Og bara núna í gær var greint frá því að starfsleyfisskyldu yrði létt af 16 flokkum atvinnustarfsemi. Til viðbótar við afnám auglýsingaskyldu vegna 104 tegunda atvinnustarfsemi. Með þessu erum við ekki að slaka á kröfum um heilbrigði og öryggi heldur að eyða óþarfa töfum, skapa sveigjanlegra umhverfi fyrir rekstraraðila, hvort sem um er að ræða einstakling sem eru að hefja nýjan rekstur eða sveitarfélag sem er að koma nýju skólahúsnæði í gagnið.

Dæmin eru fjölmörg: Samfylkingin einfaldar regluverk og vindur ofan af flækjunum sem fyrri ríkisstjórn skildi eftir sig. 

III.

Þannig höfum við unnið og þannig vinnum við áfram. Með fólkinu. Í þjónustu þjóðar. Landsmenn geta treyst því að það sem Samfylkingin setur á oddinn fyrir kosningar er sannarlega það sem Samfylkingin framkvæmir eftir kosningar — hvort sem er í landsmálum eða í forystu sveitarfélaga.

Frá flokksstjórnarfundi haustið 2025 hefur Samfylkingin efnt til opinna funda um „daglega lífið“. Við höfum bankað á dyr og spurt: Hvernig léttum við lífið þitt? Hvernig getur Samfylkingin aðstoðað? Og í þessari vinnu hefur kviknað fjöldi hugmynda hjá fulltrúum okkar á þingi og í sveitarstjórnum — bæði um stórt og smátt sem má betur fara í daglegu lífi. 

Sjálf bankaði ég á dyr allt frá Sandgerði suður með sjó og norður á Kópaskeri. Og ég vil þakka öllum þeim sem lögðu okkur lið í þessu skemmtilega verkefni, ekki síst stýrihópnum, sem hefur tekist að kjarna afraksturinn af þessari vinnu í nýju útspili. Stýrihópnum í þessari vinnu var að einhverju leyti vandi á höndum, því að við byrjuðum ansi breitt en vildum síðan koma saman útspili sem felur í sér sterka jafnaðarpólitík, þvert á landið, sem Samfylkingin getur framkvæmt á næsta kjörtímabili í sveitarstjórnum sem eru eins ólík og þau eru mörg.

Og niðurstaðan er sú að í þessu útspili setjum við fram þrjú samvinnuverkefni ríkis og sveitarfélaga sem Samfylking mun leiða til lykta að loknum sveitarstjórnarkosningum, fáum við til þess traust hjá kjósendum. Þetta eru allt verkefni sem miða að því að létta daglega lífið og eiga við um land allt, þótt staðan sé vitaskuld mismunandi frá einu sveitarfélagi til annars. Útspilið kjarnar þá tilfinningu sem situr eftir úr samtali síðustu missera og lýsir afstöðu okkar jafnaðarfólks til lykilverkefna á næstu árum. Það liggur hérna fyrir í drögum til kynningar fyrir flokksstjórn en verður síðan kynnt með formlegum og opinberum hætti á næstu vikum.

Yfirskriftin er Tökum ábyrgð hvert á öðru því að það er okkar sannfæring að við léttum daglega lífið með því að gera nákvæmlega þetta: taka ábyrgð hvert á öðru.

Samvinnuverkefnin þrjú eru í fyrsta lagi að lækka kostnað barnafólks, meðal annars með þaki á leikskólagjöldum og lögfestingu á rétti leikskólavistar frá lokum fæðingarorlofs í skrefum, með sameiginlegri fjármögnun ríkis og sveitarfélaga. Í öðru lagi leggur Samfylkingin áherslu á að við hlúum að fólkinu sem byggði landið. Með áframhaldandi þjóðarátaki í umönnun eldra fólks, þar sem við eyðum biðlistanum eftir hjúkrunarrýmum árið 2030, sem tvöfaldaðist frá árinu 2017, og hefjumst strax handa við að stórefla þjónustu við eldra fólk í heimahúsum á fjölbreyttan hátt, sem farið er yfir í útspilinu. Og síðast en ekki síst viljum við auðvelda rekstur og uppbyggingu með því að gera það sama í sveitarstjórnum og við höfum á okkar fyrsta ári í ríkisstjórn: Hrista upp í kerfinu og ráðast í markvissa einföldun regluverks, til að liðka fyrir framtaki og verðmætasköpun.

Þegar brasið er mest þá réttum við hjálparhönd. Þegar heilsan brestur þá stöndum við með fólki. Þegar atorkusamir einstaklingar vilja hefja rekstur eða skapa eitthvað nýtt – þá fögnum við því og liðkum fyrir framtakinu. Því saman erum við sterkari.

Þær aðgerðir sem við setjum á oddinn kalla í ýmsum tilfellum á samstillt átak ríkis og sveitarfélaga sem ekki hefur verið pólitískur grundvöllur til að ráðast í fyrr en nú. En við hlökkum til að láta hendur standa fram úr ermum í samvinnu við nýtt fólk í sveitarstjórnum landsins að loknum kosningum í vor.

Ég vonast til að fá viðbrögð flokksstjórnar við þessu útspili hér á eftir. Svo förum við með tillögurnar beint til fólksins og sækjum okkur umboð. Til að ráðast í samstillt átak ríkis og sveitarfélaga á næstu árum og létta daglega lífið með því að taka ábyrgð hvert á öðru. Við vinnum þetta saman!

IV.

Kæru vinir.

Ég hef verið hreinskilin varðandi efnahagsmálin. Og ég viðurkenni það að síðasta haust, eftir 2% lækkun stýrivaxta á einu ári, 5 vaxtalækkanir í röð og lægstu verðbólgumælingu í 5 á, þá vorum við vongóð. Og það hefur komið á daginn að við freistuðumst til að fagna of snemma á þeim tímapunkti.

Við gerum ekki lítið úr vandanum og dettur ekki í hug að hlaupast undan ábyrgð. Enda settum við háleit markmið um að negla niður vexti og verðbólgu. Þjóðin veit, allra best, að þetta getur reynst þrautin þyngri. Og leiðin hefur nú reynst skrykkjóttari en við vonuðum.

En munum að árangur vinnst ekki alltaf í einu skrefi. Þróunin hefur verið í rétta átt. Það er staðreynd. Og þó að nú hafi orðið bakslag og horfur hafi versnað vegna stríðsátaka við Persaflóa, þá getur sú þróun gengið hratt til baka sömuleiðis.

Það sem mestu skiptir er að við missum ekki sjónar á verkefninu. Förum ekki á taugum. Höldum plani. Höldum áfram að laga ríkisfjármálin. Til að ríkið sé ekki alltaf að kynda undir verðbólgu og þenslu í hagkerfinu. Þannig tryggjum við að ríkið geri sitt.

Eitt er víst, til að svara þeim sem hafa hæst í þórðargleði þessa daga: Það kemur ekki til greina að hverfa aftur til þeirrar efnahagsstjórnar sem færði okkur 10% verðbólgu og 9,25% vexti. Það kemur alls ekki til greina. Og nei, það kemur ekki til greina að dusta rykið af áætlunum fyrri ríkisstjórnar um áframhaldandi hallarekstur ríkisins út þetta ár og það næsta.

En dugi það ekki að taka til í ríkisfjármálunum og að byrja að skila afgangi á fjárlögum, þá er ekki nema eðlilegt að spyrja: hvað er það hér á landi sem leiðir til þess að laun hækka um 10% á ári, þrátt fyrir 0% hagvöxt á mann í nærri áratug? Við jafnaðarfólk leggjum áherslu á virðingu, að standa vörð um réttindi. En við þurfum í þessu samhengi að ræða líka um skyldur og ábyrgð.

Sitjandi ríkisstjórn kom ekki að kjarasamningum sem voru gerðir fyrir okkar tíð, hvort sem það er á almennum markaði eða hjá hinu opinbera. Né vorum við aðilar að launaskriði hjá stökum fyrirtækjum umfram kjarasamninga, hvað þá óþarfa álagningu fyrirtækja. Við vitum þó að við þurfum að veita forystu, leiða fólk saman. En þá þarf líka að vera rík ábyrgðartilfinning meðal allra.

Meðvitund um að hallalaus fjárlög ríkisstjórnar missa marks í umhverfi mikilla launahækkana, launaskriðs og óþarfa álagningar. Hér þarf samstillt átak. Hér þurfum við að taka ábyrgð á samfélaginu, ábyrgð á hvert öðru.   

Fólkið í landinu er ekki að biðja um skammtímaskyndilausnir. Það veit að leiðin að settu marki getur verið skrykkjótt. Og það sagði enginn að þetta ætti að vera auðvelt.

En ég hef trú á verkefninu: Ég veit að við getum gert betur í hagstjórninni en verið hefur á síðustu árum. Ég veit að við getum rekið góða velferðarpólitík á Íslandi með ríkissjóð réttum megin við núllið og náð að vinna niður verðbólgu og vexti. Og ég veit að við gerum það best með því að taka ábyrgð á stöðunni, ekki með endalausum bendingum á einhverja aðra. Við gerum þetta saman.

V.

Flokksstjórn — í Evrópumálum hefur línan verið skýr:

Við treystum þjóðinni.

Við gerum það sem við sögðumst ætla að gera.

Og efnum til þjóðaratkvæðagreiðslu um framhald aðildarviðræðna við Evrópusambandið.

Þið vitið nákvæmlega hvar ég stend í þessu máli og það hefur legið fyrir alveg frá því að ég hóf mína þátttöku í pólitík: Ég er Evrópusinni sjálf. En ég er jafnaðarmaður fyrst og fremst. Ég sýni fólki fullan skilning sem hefur efasemdir um að hagsmunum Íslands sé best borgið innan Evrópusambandsins. Ég hef sagt að fólk geti augljóslega verið sósíaldemókratar og haft hvaða skoðun sem er á þessu og verið í Samfylkingunni, hvað sem því líður.

En ég mun segja já í þjóðaratkvæðagreiðslunni þann 29. ágúst næstkomandi, sem gæti orðið fyrri þjóðaratkvæðagreiðslan af tveimur.

Ég held að það geti verið gluggi núna fyrir Ísland. Til að nýta tækifærin sem geta falist í þeirri stöðu sem nú er uppi í Evrópu og í alþjóðamálunum. Og ég tel að við ættum að minnsta kosti að halda því opnu að kanna nánar kostina sem kunna að felast í aðild að Evrópusambandinu.

En ég mun aðeins segja já í síðari þjóðaratkvæðagreiðslunni, fari hún fram, ef ég er algerlega sannfærð í hjarta mínu um að tekist hafi að landa góðum samningi fyrir Ísland. Sem tryggir hagsmuni okkar og fullt forræði yfir auðlindum þjóðarinnar.

Allt hefur þetta komið fram.

Ég hef ekki viljað þjófstarta umræðunni um þjóðaratkvæðagreiðsluna og tel fara best á því að við einbeitum okkur fyrst að sveitarstjórnarkosningunum 16. maí. En auðvitað fer svo umræðan smám saman í gang og áhuginn eykst eftir því sem nær dregur. Það er eðlilegt. Og við munum hafa nægan tíma í sumar til að vega og meta kostina og taka kraftmikið samtal við þjóðina í ágúst, eftir að fólk kemur til baka úr sumarfríinu.

Ég veit alveg að það eru skiptar skoðanir innan flokksins um það að hversu miklu leyti Samfylkingin á að keyra þessa kosningabaráttu og hvetja fólk til að greiða atkvæði með áframhaldandi viðræðum.

Ég held sjálf að það sé betra að hefja mál af þessari stærðargráðu upp yfir flokkspólitískar átakalínur. Og þess vegna er ágætt að þjóðaratkvæðagreiðslan fari fram þegar þingið er ekki að störfum.

En stjórn flokksins mun beita sér fyrir opinni umræðu og samtali um land allt þegar nær dregur. Og ég veit að fjöldi flokksmanna mun láta sig málið varða og beita sér í umræðunni. Það er bara hið besta mál og ég er fullviss um að allt fer þetta vel þegar upp er staðið.

Íslandi mun áfram vegna vel — hvort sem við kjósum að kanna nánar kosti aðildar eða ekki. En það er spennandi tækifæri fyrir þjóðina að fá loksins að kjósa um þetta.

Og ég get allavega fullyrt að ríkisstjórn Samfylkingar, Viðreisnar og Flokks fólksins mun virða vilja þjóðarinnar í þessu máli. Það er alveg á hreinu. En fróðlegt væri að vita hver afstaða þeirra flokka sem nú eru í stjórnarandstöðu er til þess og hvort að þeir flokkar muni una vilja þjóðarinnar. 

VI.

Flokksstjórn.

Við getum ekki annað en glaðst yfir gengi Samfylkingar:

Fjöldi fólks gengur til liðs við okkur.

Flokkurinn styrkist og stækkar. Og eflist í eldi reynslunnar.

Á meðan hægriflokkarnir í stjórnarandstöðunni hafa hlaupið frá miðjunni og út í jaðarinn. Frá hinum almenna manni út í hugmyndafræðilega mýri, lengst til hægri. Ég hef ekki lagt það í vana minn að segja of mikið um aðra flokka eða trufla þá á meðan þeir eru að gera mistök: En hver er munurinn á þessum flokkum í dag? Þetta er allt að renna saman. Jafnvel flokkar með glæsta sögu eins og Sjálfstæðisflokkur og Framsóknarflokkur. Merkilegir flokkar á marga lund, sem gættu þess að fara aldrei of langt frá miðju stjórnmálanna, en virðast núna sáttir með að enda í knippi með Miðflokki, alltaf á harðahlaupum á eftir því sem dreifist hraðast á TikTok þann daginn, eða því sem fær flesta þumla á Facebook, og keppast við að úthúða okkur jafnaðarfólki og útiloka jafnvel samstarf við fólk eins og okkur! Það er dapurlegt að fylgjast með þessari þróun.

Samfylkingin hefur stigið upp í þessu umhverfi. Kirfilega staðsett við bak hins vinnandi manns og á þungamiðju íslenskra stjórnmála. Og við gefum þessa stöðu ekki eftir svo glatt.

Það hefur ekki farið fram hjá neinum sem fylgist með íslenskum stjórnmálum að Samfylkingin er nú komin í lykilstöðu til að móta samfélagið og taka ábyrgð á Íslandi til framtíðar. Eins og vera ber fyrir flokk sósíaldemókrata í frábæru landi, þar sem þorri landsmanna hefur sterka jafnaðartaug.

Gleymum aldrei hvaðan við komum: 110 ára samleið með þjóðinni, frá stofnun ASÍ og Alþýðuflokks. Við týndum þræðinum um stund en litum í eigin barm á síðustu árum:

Saman breyttum við Samfylkingunni. Við höfum kallað fjölda fólks til verka, tekið upp breytt verklag og fært flokkinn nær fólkinu í landinu. Núna erum við opinn flokkur, sem trúir á framtíðina á Íslandi og hefur allt sem þarf til að leiða þjóðina á 21. öldinni.

Skilaboð okkar til allra sem geta hugsað sér að leggja okkur lið í þessu verkefni eru skýr: Velkomin í Samfylkinguna. Við höfum verk að vinna. Og saman munum við uppskera ríkulega í þágu lands og þjóðar á næstu árum og áratugum.

Kæru vinir. Njótum dagsins saman og eigum opinskáar umræður um landsins gagn og nauðsynjar. Tökum umræðuna og tökumst á en snúum síðan bökum saman í fundarlok og tökum ábyrgð hvert á öðru. Því saman höfum við sigra að sækja — fyrir Ísland. Takk og áfram gakk!

Hér má horfa á ræðuna:

https://www.youtube.com/live/rrQutmq52DA