Á Seltjarnarnesi á að vera gott að eldast, gott að ala upp börn og gott að lifa sjálfstæðu lífi á öllum skeiðum.

Það gerist ekki af sjálfu sér heldur með skýrri sýn, samþættri þjónustu og raunverulegum vilja til að setja velferð fólks í forgang.

Velferðarsamfélag er mælt eftir því hvernig við mætum fólki í daglegu lífi og þegar á reynir. Það sést í því hvort eldri borgarar fá þann stuðning sem þeir þurfa þegar heilsan breytist. Það sést í því hvort fatlað fólk fái þjónustu á eigin forsendum. Það sést í því hvort fólk á öllum aldri geti lifað sjálfstæðu og innihaldsríku lífi í öruggu umhverfi, án þess að þurfa að berjast við flókin kerfi og endalausa bið.

Við viljum að Seltjarnarnes verði fyrirmyndarsamfélag í velferðarmálum. Ekki bara sveitarfélag sem uppfyllir lágmarkskröfur heldur samfélag sem leggur metnað í að gera betur. Samfélag sem skilur að velferð er ekki jaðarmál heldur ein mikilvægasta grunnstoð góðs bæjarfélags. Hér á að vera gott að búa á öllum lífsskeiðum og hér á fólk ekki að þurfa að yfirgefa sitt samfélag þegar þarfir þess breytast.

Eitt mikilvægasta verkefnið á næstu árum er að tryggja heilbrigða öldrun og að við mætum þörfum sífellt fjölmennari hóps af alvöru og með reisn. Við viljum að það sé ekki aðeins gott að eldast á Seltjarnarnesi, það á að vera keppikefli sveitarfélagsins að skapa eldri borgurum góð skilyrði í daglegu lífi og leik, með þeim hætti að það létti líka álagi af aðstandendum. Það skiptir ekki aðeins máli fyrir þá sem eldast heldur líka fyrir fjölskyldur þeirra og aðstandendur sem bera oft þungan ábyrgðarhlut þegar þjónusta er óskýr, sundurleit eða torfundin.

Við viljum því einfalda aðgengi að ráðgjöf og upplýsingum um réttindi eldri borgara, aðstandenda þeirra og þau úrræði sem standa til boða. Fólk á ekki að þurfa að rata eitt í gegnum flókið kerfi til að fá svör við grundvallarspurningum um þjónustu, stuðning eða húsnæði. Sveitarfélagið á að vera virkur leiðbeinandi, ekki hindrun.

Markmiðið er að fleiri geti búið lengur heima hjá sér við öryggi og reisn, með aðgangi að öflugri heimaþjónustu, heimahjúkrun, endurhæfingu og félagslegum stuðningi. Þessi þjónusta á að vera samræmd og sveigjanleg. Flestir vilja búa sem lengst á eigin heimili og með réttum stuðningi er það oft bæði farsælasta og hagkvæmasta leiðin.

Þjónustan á að fylgja fólki, ekki kerfunum

Eitt stærsta vandamálið í velferðarkerfinu er að ábyrgðin dreifist á of mörg borð. Fólk rekst á veggi milli sveitarfélags, ríkis, heilbrigðiskerfis og annarra þjónustuaðila. Afleiðingin er sú að þeir sem mest þurfa á hjálp að halda sitja uppi með mestu flækjuna. Það er hvorki réttlátt né skilvirkt.

Við viljum brjóta þessa múra niður. Markmið okkar er að tryggja heildstæða og tafarlausari þjónustu þar sem ólík kerfi vinna saman í þágu íbúanna. Sveitarfélagið á ekki að vísa fólki áfram í næstu þjónustu. Það á að taka ábyrgð, samhæfa þjónustu og tryggja að einstaklingar og fjölskyldur fái skýr svör og raunverulegan stuðning.

Samþætt velferðar- og heilbrigðisþjónusta er forsenda þess að fólk geti lifað sjálfstæðu lífi við öryggi. Þegar þjónustan talar saman eykst öryggi, lífsgæði batna og álag minnkar. Það er þessi hugsun sem þarf að ráða ferðinni, ekki innri mörk kerfa eða stofnana.

Fjölbreytt húsnæði fyrir breytilegar þarfir

Við blasir að þörfin fyrir fjölbreytt húsnæðisform fer vaxandi. Fólk þarf mismunandi lausnir á mismunandi stigum lífsins, og sveitarfélag sem vill vera sterkt velferðarsamfélag verður að taka mið af því. Við viljum tryggja að íbúar þurfi ekki að yfirgefa Seltjarnarnes þegar þarfir þeirra breytast, heldur geti minnkað við sig og fundið hentugt húsnæði innan bæjarfélagsins.

Þetta á sérstaklega við um eldri borgara sem vilja áfram búa í sínu nærumhverfi, nálægt fjölskyldu, vinum og þeirri þjónustu sem þeir þekkja. Það er ekki sjálfgefið í dag. Þess vegna viljum við tryggja að í nýrri uppbyggingu verði sérstaklega hugað að íbúðum fyrir eldri borgara og öðrum húsnæðisúrræðum sem styðja við sjálfstætt líf og örugga búsetu.

Sama á við um fatlað fólk. Við viljum vinna markvissa áætlun um húsnæðisúrræði fyrir fatlað fólk þar sem þjónusta og búseta mæta ólíkum þörfum hvers og eins af virðingu. Þjónusta á ávallt að vera veitt á forsendum einstaklingsins, með skýra framtíðarsýn og raunverulegar lausnir í stað bráðabirgðahugsunar.

Velferð snýst ekki aðeins um formlega þjónustu heldur líka um tengsl, virkni og þátttöku. Einangrun hefur djúp áhrif á heilsu og líðan og hún bitnar ekki síst á eldri borgurum, fötluðu fólki og þeim sem standa höllum fæti félagslega. Þess vegna viljum við rjúfa einangrun og efla geðheilbrigði með nýsköpun í félagsstarfi og auknu samstarfi þvert á kerfi.

Við viljum skapa lífsgæðakjarna á Seltjarnarnesi í samstarfi við Félag eldri borgara, sem verði lifandi miðpunktur fyrir heilsueflingu, félagsstarf og samfélagslega virkni. Slíkur kjarni á ekki að vera jaðarverkefni heldur einn af hornsteinum sterks samfélags. Þar getur fólk hist, hreyft sig, fengið stuðning og tekið þátt í samfélaginu á eigin forsendum.

Við viljum jafnframt efla hlutverk forvarnarfulltrúa og tengja betur saman málaflokka eins og geðheilbrigði, hreyfingu og félagslega þátttöku. Þar þarf að hugsa heildstætt. Það dugar ekki að bjóða upp á einstök átaksverkefni ef þjónustan talar ekki saman og markmiðin eru ekki skýr. Við viljum samfélag þar sem vellíðan og öryggi eru í fyrirrúmi á öllum aldri.

Velferðartækni léttir lífið og styður við sjálfstæði

Nútímatækni getur skipt sköpum í velferðarþjónustu ef hún er nýtt rétt. Við viljum nýta tæknilausnir og fjarlausnir til að auka sjálfstæði íbúa, tryggja skjótari viðbrögð og bæta þjónustu.

Rétt nýtt getur tæknin auðveldað samskipti, aukið öryggi á heimilum og stutt við samfellu í þjónustu. Hún getur líka hjálpað fólki að búa lengur sjálfstætt og minnkað álag á fjölskyldur og þjónustukerfi. Við viljum að Seltjarnarnes sé í fararbroddi í að nýta slíkar lausnir af ábyrgð, með þarfir íbúa að leiðarljósi.

Fyrirmyndarsamfélag í velferð verður ekki til af sjálfu sér. Það verður til þegar þjónusta er sett í forgang, ábyrgð er tekin og fólk er sett framar kerfunum. Það er sú leið sem við viljum fara á Seltjarnarnesi.

Höfundur er bæjarfulltrúi og skipar 2. sæti á lista Samfylkingar, Viðreisnar og óháðra á Seltjarnarnesi

Sveitarfélag sem tekur velferð alvarlega tryggir ekki aðeins þjónustu heldur öryggi, sjálfstæði og lífsgæði á öllum lífsskeiðum. 

Vel­ferð er ekki til­viljun – hún er pólitískt val

Komdu og taktu þátt í skemmtilegri spilastund þar sem ævintýri, hlátur og leikur eru í aðalhlutverki! Við verðum með fullt af spennandi spilum sem henta öllum frá 4 ára aldri.

Öll velkomin – börn, foreldrar, afar, ömmur, ungmenni og aðrir sem vilja eiga notalega stund saman.

Mánudagurinn 11. maí, kl. 15:00 – 18:00, Austurmörk 23

Taktu með þér góða skapið – og vini og fjölskyldu!

Samfylkingin í Reykjanesbæ býður íbúum í vöfflukaffi og spjall við frambjóðendur um framtíð Reykjanesbæjar

Kíkið á okkur í dýrindis vöfflur og deilið með okkur hvað ykkur liggur mest á hjarta

Síðan vinnuskólinn hóf starfsemi sína hefur samfélagið þróast hratt en vinnuskólinn staðið í stað. Nú er staðan orðin þannig að vinnuskólinn getur ekki boðið börnum í 8. bekk vinnu. Því þarf að breyta! En vanda þarf til verka.

Vinnuskólinn er eini skóli bæjarins sem hingað til hefur ekki tilheyrt skóla- og frístundasviði eins og aðrar skólastofnanir bæjarins. Vinnuskólinn tilheyrir skipulags- og umhverfissviði, en nú er blessunarlega unnið í að breyta því. Það gefur því auga leið að áherslan hingað til hefur verið á orðinu „vinnu“ en ekki orðinu „skóli.“ Við í Samfylkingunni viljum breyta því.

Vinnuskólinn er fyrsta skref flestra Skagamanna út á vinnumarkaðinn og við verðum að taka vel á móti þeim. Við gerum það með fræðslu um samfélagið, vinnuhætti, vinnustaði, ferilskrárgerð, launaseðla, verkalýðsfélög, fyrirtæki, félagsleg tengsl og margt fleira sem tengist því að vera partur af atvinnulífinu. Þetta er skólinn sem á að eiga sér stað í vinnuskólanum.

Nú er mikil umræða um vöntun á flokkstjórum í vinnuskólanum og í kjölfarið hvað það felur í sér að vera flokkstjóri. Við sem samfélag hljótum að gera ríkar kröfur til þeirra sem vinna með börnum á öllum skólastigum og öðrum vettvangi, líka í vinnuskólanum. Kennarar og fagfólk í frístundastarfi þurfa menntun til að vinna með börnum. Fagaðilar sem sækja sér þekkingu og fólk sem hefur reynslu og þekkingu sem snýr að vinnu með börnum er fólkið sem við viljum hafa í vinnu með börnunum okkar. Börn í 8. bekk eru ekki starfsfólk eins og við sjáum í fyrirtækjum og á almennum vinnumarkaði og því er ráðning í störf í vinnuskólanum ekki sú sama og á almennum vinnumarkaði. Þetta eru fyrst og fremst börn. Við getum ekki bara ráðið inn „einhverja á atvinnuleysisskrá“ eða 18 ára krakka til að sitja yfir krökkunum á meðan þau eiga að vinna, starfið er mun meira og flóknara en það, enda eru gerðar þær kröfur að flokkstjórar verði að vera að minnsta kosti 20 ára. Það er algjör lágmarkskrafa.

Í vinnuskólanum er flokkstjórinn með alla ábyrgð, hann er leiðbeinandinn, yfirmaðurinn og verkstjórinn, hann veitir einstaklingsbundna kennslu í þeim verkefnum sem þarf að sinna og er félagslegur leiðbeinandi. Flokkstjóri í dag fær til sín hóp af 30 mismunandi unglingum með mismunandi þarfir og mis krefjandi hegðun, grassvæði og tilheyrandi verkefni og þarf þar að auki að sinna forvörnum og tómstundastarfi, allt í bland. Laun hafa ekki fylgt þessum auknu kröfu sem við gerum til flokkstjóra og því ekki skrítið að umsóknum fækki. Þessu þarf að breyta, laun þurfa að hækka, fækka þarf í hópum niður í 15 og við verðum að gera starf flokkstjóra eftirsóknarvert.

Auðvitað viljum við bjóða upp á vinnuskóla fyrir börn í 8. bekk en spurningin er: Á hann að vera vinna eða skóli? Viljum við ekki skapa grundvöll fyrir krakka í 8. bekk til að læra raunverulega á atvinnulífið en ekki aðeins labba um bæinn eftirlitslaus í 3 tíma á dag að tína rusl? Viljum við hafa fræðslu og mögulega námskeið sem krakkarnir sækja fyrsta sumarið í vinnuskólanum það góð að þegar krakkarnir eru í 9. bekk og koma aftur í vinnuskólann, þá eru þau betur í stakk búin að sinna þeim verkefnum sem bíða og öðlast þannig þá dýrmætu reynslu sem vinnan gefur? Jafnvel að þau komi svo ekki aftur í 10. bekk eða við 17 ára aldur því þau eru komin út á almennan vinnumarkað með þekkingu frá vinnuskólanum að vopni.

Þetta á ekki aðeins við um 8. bekk heldur allan aldur vinnuskólans. Við hljótum að vilja að vinnuskólinn þróist í takt við samfélagið en standi ekki í stað og sé alveg eins og hann var fyrir 20-30 árum. Við eigum ótrúlega hæfileikaríka krakka hér á Akranesi og fegrun bæjarins, sem vinnuskólinn sinnir, þarf ekki að einskorðast við græn svæði. Leyfum krökkunum að vinna við listir, sköpun, jafningjafræðslu og svo margt fleira sem þau svo sannarlega geta gert. En gerum þetta með faglegum hætti, góðum leiðbeinendum og flottum flokkstjórum. Tíðarandinn er ekki sá sami og fyrir 20 árum og þarfir barna ekki þær sömu. Markmið samfélagsins hlýtur alltaf að vera að mæta þeim!

Í vinnuskólanum hefur undanfarin ár verið rekinn „listavinnuskóli“ með góðum árangri en hann þarf að efla. Fjölgum listgreinum, í stað þess að hafa eina listgrein á ári eins og er núna ættum við að hafa þær sem flestar. Tengjum skapandi sumarstörf við vökudaga, 17. júní, írska daga og sólríka daga á Skaganum yfir sumartímann.

Hér á Akranesi eigum við fjöldann allan af hæfileikaríkum ungmennum sem geta auðgað mannlíf og menningu og fegrað bæinn til muna ef við búum til vettvang og gefum þeim tækifæri til þess. Setjum X við S og látum hlutina gerast!

Höfundur er fyrrum flokkstjóri í vinnuskólanum og skipar 5. sæti á lista Samfylkingarinnar á Akranesi.

Vinnuskólinn hefur verið starfræktur á Akranesi í fjölda ára og hafa flest allir bæjarbúar minningar frá því að hafa rakað tún bæjarins og unnið að fegrun hans með einum eða öðrum hætti. 

Samfylkingin og annað félagshyggjufólk býður í pizzuveislu á Café Cosý á Reyðarfirði.

Logi Einarsson, menningar-, nýsköpunar- og háskólaráðherra verður hjá okkur.

Hvar: Café Cosý
Hvenær: Þriðjudaginn 12. maí
Klukkan: 18:00

Allt eru þetta eðlilegar kröfur og væntingar og bæjaryfirvöld verða á hverjum tíma að standa vaktina og leggja sig fram um að bæjarbúar njóti alls hins besta sem nútíminn getur boðið upp á.

Þetta getur þó verið snúið á köflum, það þekkja öll sem hafa valist til forystu í bænum. Stundum þarf að velja á milli margra þarfra verkefna því að ekki eru til nægir fjármunir í bæjarsjóði. Bæjarfulltrúar vita að augu kjósendanna eru á þeim og þess vegna getur stundum verið erfitt að segja nei. Gildir þá svo sannarlega að sá á kvölina sem á völina.

Lykilatriði í rekstri bæjarfélagsins er að nýta skattfé almennings á sem hagkvæmastan hátt. Þess vegna er mikilvægt að eyða ekki meiru en aflað er, sum sveitarfélög hafa freistast, stundum af mikilli nauðsyn, til að taka lán sem eru síðan mjög íþyngjandi vegna hárra vaxtagreiðslna. Við hér á Akranesi höfum undanfarin kjörtímabil verið varkár í þessu efni, enda hefur skuldaviðmið bæjarsjóðs lækkað, er nú 68% en var 71% árið 2024. Einnig hefur skuldahlutfall lækkað á sama tíma úr 121% í 110%. Þessar tölur sýna að reksturinn stefnir í mjög jákvæða átt þó að bærinn hafi staðið í afar fjárfrekum framkvæmdum, s.s. byggingu nýja íþróttahússins að Jaðarsbökkum og endurbyggingu mikils hluta bæði Grundaskóla og Brekkubæjarskóla. Þá kemur fram í ársreikningi kaupstaðarins fyrir árið 2025, en hann verður til síðari umræðu í bæjarstjórn þann 12. maí að rekstrarniðurstaða A-hlutans er jákvæð um 408,5 milljónir króna. Þessar lykiltölur sýna að reksturinn er sterkur, bæjarstjórn hefur sýnt ábyrgð og festu og því náð góðum árangri.

Góð þjónusta, ábyrgur rekstur bæjarsjóðs og fjölbreytt atvinna einkenna vel rekið sveitarfélag. Við í Samfylkingunni höfum verið í meirihluta síðustu kjörtímabil. Á þeim tíma hefur íbúum fjölgað mikið, gríðarleg uppbygging orðið í íbúðar- og atvinnuhúsnæði. Þessu fylgja vaxtarverkir, við vitum að margt þarfnast endurbóta. Við erum bjartsýn á framtíðina, vitum að til okkar eru gerðar miklar kröfur og við ætlum okkur að standa undir þeim.

Höf. er bæjarfulltrúi og skipar 3. sæti á lista Samfylkingarinnar á Akranesi

Í vaxandi bæ er að mörgu að hyggja. Íbúar vilja fjölbreytta og góða þjónustu, aðlaðandi og snyrtilegt umhverfi og blómlegt atvinnulíf. 

Biðlistar hafa styst verulega og flest börn komast nú inn um 12 mánaða aldur. Leikskólagjöld eru jafnframt í hóflegu lágmarki. Þetta er mikilvægur árangur sem ber að fagna. Í dag taka heimgreiðslur við frá 12 mánaða aldri ef barn hefur ekki fengið leikskólapláss. Það hefur reynst mikilvægt öryggisnet fyrir fjölskyldur. En sífellt fleiri foreldrar kalla eftir meira en öryggi – þeir vilja raunverulegt val. Margir foreldrar vilja geta verið lengur heima með börnum sínum, jafnvel þótt leikskólapláss standi til boða. Í dag standa þeir frammi fyrir erfiðu vali: að snúa fyrr til vinnu en þeir kjósa eða taka á sig tekjutap með tilheyrandi áhrifum á atvinnuöryggi og stöðu á vinnumarkaði.

S-listinn bregst við ákalli
S-listinn í Hveragerði vill bregðast við þessu ákalli. Við leggjum til að foreldrar geti frestað leikskólaplássi tímabundið og fengið heimgreiðslur áfram upp að 24 mánaða aldri barns. Slík útfærsla þarf að vera einföld og skýr og tryggja að sveigjanleikinn komi ekki niður á aðgengi annarra barna eða nýtingu leikskólaplássa.

Leikskólinn er lykilstofnun og mikilvægt fyrsta skólastig sem öll börn eiga að eiga kost á. Á sama tíma eru fyrstu tvö ár barns mótandi tími þar sem tengsl, öryggi og nærvera við foreldra skipta sköpum. Fyrir sumar fjölskyldur er besti kosturinn að hafa meiri tíma saman á þessum fyrstu árum og ætti það að vera raunhæfur valkostur.

Heimgreiðslur eru ekki háar og skapa ekki verulegan fjárhagslegan ávinning. Þær skipta þó máli sem viðurkenning á vali foreldra og geta létt undir með fjölskyldum á viðkvæmum tíma. Hér erum við ekki aðeins að ræða kerfi, heldur fyrstu ár í lífi barns.

Með þessari tillögu viljum við auka sveigjanleika, treysta foreldrum og stuðla að farsælli leikskólabyrjun barna í Hveragerði.

Greinarhöfundar eru frambjóðendur á S-listanum í Hveragerði
Birgitta Ragnarsdóttir er í 1. sæti
María Araceli er í 3. sæti
Berglind Ósk Guttormsdóttir er í 5. sæti

Leikskólamál í Hveragerði hafa tekið miklum framförum á síðustu misserum. 

Frelsi foreldra og farsæl byrjun – heimgreiðslur til 24 mánaða

Kjödagskaffi Samfylkingarinnar og óháðra verður á Tryggvaskála!

Verið velkomin til okkar í kaffi og með því!

Sitt sýnist hverjum hvað þetta varðar en þó er ljóst að margir íbúanna úr kjörnunum tveimur eru enn að takast á, amk um gervigrasvöllinn og á hvorum göngu- og hjólastígnum yfir til Reykjanesbæjar á að byrja, frá Sandgerði eða Garði. Við erum að tala um átta ár, ýmislegt hefur gengið á og umræðan ekki alltaf uppbyggileg. Öllum ætti þó að vera ljóst að ekki er hægt að gera allt á öllum stöðum en það verður að vera hægt að taka skref framávið, sýna hugrekki og ganga í verkin - og stundum stór.

S-listinn í Suðurnesjabæ er skipaður fjölbreyttum hópi fólks sem vill gera Suðurnesjabæ að enn öflugra sveitarfélagi en það er í dag, nýta tækifærin sem til staðar eru og umfram allt að skapa ný. Við spyrjum því - er ekki kominn tími til að gera eitthvað frábært eftir sameiningu?

Við í S-listanum erum tilbúin í að koma þessum hlutum í verk auk fleiri verkefna sem öll snúa að því að gera sveitarfélagið okkar samkeppnishæfara þannig að hér byggist upp betri þjónusta og atvinnutækifæri. Þá spyrja eflaust einhverjir: Er þetta ekki allt sama fólkið og er búið að vera við völd síðustu ár? Því er auðsvarað. Jú að hluta til en við erum einnig komin með nýtt fólk í efstu sæti og trúum því að eðlilegt sé að hleypa fleirum að borðinu - og þannig virkar lýðræðið.

Listinn okkar er skipaður fólki með víðtæka reynslu og þekkingu, m.a. úr sveitarstjórnarmálum, stjórnsýslunni, atvinnulífinu og skólaumhverfinu. 

Við á S-listanum erum sammála um að það er margt gott að finna í Suðurnesjabæ og margt gott hefur verið gert - en við viljum meira. Við viljum horfa framávið, nýta kraftinn sem býr í okkur sjálfum og náttúrunni sem umlykur okkur. 

Við óskum því eftir samtali og samvinnu við íbúa og hefjum kosningabaráttuna okkar á tveimur málefnafundum sem fara fram 7. og 14. apríl. Báðir fundirnir fara fram í Golfskálanum hjá Golfklúbbi Sandgerðis, rétt á milli byggðakjarnanna og hefjast kl. 20.00.

Allir íbúar og aðrir áhugasamir um öflugra og sameinað samfélag í Suðurnesjabæ eru velkomnir. 

Fyrir hönd frambjóðenda S-listans í Suðurnesjabæ, lista Samfylkingar og óháðra,

Svavar Grétarsson, Bergný Jóna Sævarsdóttir, Egill Rúnar Sigurðsson, Önundur S. Björnsson, Thelma Dís Eggertsdóttir og Bára Kristín Þórisdóttir.

Þriðja kjörtímabilið eftir sameiningu, Sveitarfélagsins Garðs og Sandgerðisbæjar, er að hefjast og enn heyrast raddir um að lítillar hagræðingar hafi gætt og að lítið sé búið að gerast frá sameiningunni.

Er ekki kominn tími til að gera eitthvað frábært eftir þessa „blessuðu” sameiningu?

Alma Möller heilbrigðisráðherra var gestur á fundi Samfylkingar og félaga um málefni eldra fólks í Ölfusi sem fór fram í gær, miðvikudag. Hún hélt erindi um áherslur sínar og ríkisstjórnarinnar í málaflokknum og sagði meðal annars frá þjóðarátaki um uppbyggingu hjúkrunarheimila sem hefur verið á fleygiferð.

Eftir erindi hennar var opnað fyrir umræður og þar var hún spurð út í stöðuna á hjúkrunarheimili í Þorlákshöfn en stjórnvöld í Sveitarfélaginu Ölfusi hafa fullyrt að hjúkrunarheimili rísi í Þorlákshöfn. Svarið hennar var mjög skýrt. Þorlákshöfn er ekki á framkvæmdaáætlun um uppbyggingu hjúkrunarheimila og það hefur ekkert erindi borist frá Sveitarfélaginu Ölfusi eða ósk um viðræður þess efnis. Hún sagði jafnframt að það væri forsenda fyrir því að verkefni kæmist á framkvæmdaáætlun til ársins 2030 að sýnt væri fram á þörfina á hjúkrunarheimili og það væru oftar en ekki sveitarfélög sem gerðu það með erindi til ráðuneytanna, það er ríkið sem greiðir fyrir þjónustuna með samningum við Sjúkratryggingar Íslands.

Í fréttatilkynningu frá 23. september 2025 þegar fullyrt var að hjúkrunarheimili rísi í Þorlákshöfn var jafnframt sagt að hjúkrunarheimilið væri ,,órjúfanlegur hluti af stærra þróunarverkefni sem nær einnig til uppbyggingar íbúðarhúsnæðis við Óseyrarbraut”. Þessi fullyrðing var svo hrakin á íbúafundi sem haldinn var um fasteignaverkefnið í október síðastliðnum, þegar aðilarnir á bakvið það voru spurðir beint út í það hvort rétt væri að hjúkrunarheimilið væri órjúfanlegur hluti af fasteignaverkefninu. Fyrirtækið gat ekki staðfest það.

Fasteignaverkerkefnið er virkilega umdeilt. Það á að byggja 155 íbúðir ofan í hafnarsvæðinu sem takmarkar verulega þróun þess og býður hættunni heim varðandi átök íbúa og atvinnusvæðis þegar kemur í ljós sem víst er, að það verði ekki hægt að búa svo nálægt umsvifamikilli inn- og útflutningshöfn með mikilli gámaumferð, svolítið eins og að byggja íbúðahverfi ofan í Sundahöfn. Íbúar í gamla hverfinu svo kallaða eru líka margir mjög ósáttir við þessa fyrirætlan.

Í Ölfusi eru 266 íbúðir á byggingarstigi samkvæmt Húsnæðis- og mannvirkjastofnun og 174 íbúðir til sölu í Ölfusi dag og ljóst að ekki er þörf á að fara í þéttingarstefnu eins og þessa. Í Ölfusi er nóg af landsvæði.

Samfylkingin og félagar leggja áherslu á samstarf sem hefur skort verulega á síðustu ár hjá meirihluta Sjálfstæðisflokks. Það er einlægur vilji okkar að hjúkrunarheimili rísi í Þorlákshöfn og við ætlum að beita okkur fyrir því í góðu samstarfi við ríkið. Þá ætlum við líka að koma í veg fyrir að þrengt verði að höfninni með þessu skipulagsslysi sem er í uppsiglingu hjá Sjálfstæðisflokknum.

Gunnsteinn R. Ómarsson, oddviti Samfylkingar og félaga

Berglind Friðrikisdóttir, 2. sæti

Pálmi Þór Ásbergsson, 3. sæti

Bryndís Sigurðardóttir, 4. sæti

Innan­tóm lof­orð um hjúkrunar­heimili

Leit um „��"

3374 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3374 niðurstöður fundust við leit að „���������������������������������������������������"