Samfylkingin stendur vörð um trúfrelsi og vill tryggja jafnræði allra trú- og lífsskoðunarfélaga gagnvart ríkisvaldinu, að því gefnu að félögin brjóti ekki á réttindum þeirra sem aðild eiga að viðkomandi félagi.

Trúfrelsi og jafnræði og umburðarlyndi

Norrænt samstarf hefur alltaf verið hornsteinn utanríkisstefnu Íslands og hefur líklega aldrei verið mikilvægara en nú. Þar þarf nýjan samstarfssáttmála sem tryggir skilvirkari samvinnu til að takast á við þau stóru verkefni sem bíða. Vestnorrænt samstarf er mikilvægt og ber að efla en Ísland, Grænland og Færeyjar eiga sameiginlegra hagsmuna að gæta í mörgu. Efla á raddir Grænlands og Færeyja innan Norðurlandaráðs.

Græn utanríkisstefna

Samfylkingin leggur áherslu á að Ísland beiti sér fyrir jöfnuði og mannréttindum um allan heim og sé ávallt málsvari friðar, mannúðar, jafnréttis og lýðræðis. Sjaldan hefur verið jafn mikilvægt og nú að frjálslynt og lýðræðislega sinnað fólk fylki sér um grunngildi opins lýðræðisþjóðfélags og standi vörð um það sem áunnist hefur í alþjóðasamvinnu frá lokum síðari heimsstyrjaldar.

Okkur sem búum í einu af ríkustu samfélögum jarðar ber siðferðileg skylda til að leggja hlutfallslega meira af mörkum á alþjóðlegum vettvangi en fátækari ríkjum er unnt. Ísland á að reka mannúðlega utanríkisstefnu sem miðar í senn að því að styrkja stöðu Íslands á alþjóðavettvangi og leggja okkar af mörkum við úrlausn þeirra risavöxnu áskorana sem heimsbyggðin stendur frammi fyrir. Íslendingar eiga að beita sér í alþjóðasamvinnu á vettvangi loftslagsmála, ekki síst á Norðurslóðum, og sýna fordæmi heima við í baráttu gegn losun.

Samfylkingin er íslenskur stjórnmálaflokkur og starfar á Íslandi en hefur alþjóðlegan hugmyndagrunn og tilheyrir alþjóðahreyfingu jafnaðarmanna.

Forsenda þess að hér sé þróttmikið listalíf er að vel sé búið að listafólki. Mikilvægt er að halda úti öflugum sjóðum sem listamenn geta sótt í sér til framfærslu og til að fjármagna verkefni sín. Þau sem starfa í listum búa ekki við sama starfsöryggi og aðrar stéttir og við því þarf samfélagið að bregðast, enda verða listaverk ekki til í tómarúmi.

Samfylkingin vill efla menningarlíf vítt og breitt um landið. Það viljum við meðal annars gera með því að samþætta stuðning við listir og skapandi greinar og framsækna atvinnustefnu flokksins fyrir allt Ísland. Við viljum styðja myndarlega við sjálfstætt starfandi listafólk sem getur búið hvarvetna á landinu, þ. á m. með listamannalaunum. Allur slíkur stuðningur skal grundvallast á faglegum forsendum, gagnsæi og jafnræði.

Samfylkingin beitir sér fyrir eflingu höfuðborgarinnar sem alþjóðlegrar menningarborgar. Í því felst meðal annars að standa þétt að baki helstu menningarstofnunum þjóðarinnar sem þar eru og njóta góðs af nálægð hver við aðra. Við viljum einnig skilgreina skyldur þessara stofnana gagnvart landsmönnum sem búa utan höfuðborgarsvæðisins og tryggja nægt fjármagn til að unnt sé að uppfylla þær. Loks viljum við, með sérstökum samningum, efla menningarstofnanir í þéttbýliskjörnum sem sinna menningarlegu hlutverki fjarri höfuðborginni.

Þótt fjárframlög til menningarmála megi ekki að stjórnast af þröngum efnahagslegum sjónarmiðum er hagrænn ávinningur af stuðningi við listir og skapandi greinar ótvíræður. Hagtölur skapandi greina þarf að rannsaka með reglubundnum hætti eins og annarra atvinnugreina og með breytur eins og kyn, búsetu og uppruna að leiðarljósi. Einnig er brýnt að líta til þeirra efnahagslegu áhrifa sem íslenskt menningarlíf hefur með landkynningu og sem annað helsta aðdráttarafl ferðaþjónustu á Íslandi. Fjármagn til menningarmála má auka með skattaívilnunum, líkt og tíðkast með almannaheillafélög. Samfylkingin vill styðja með markvissum hætti við útflutning skapandi greina og sókn listafólks á alþjóðamarkaði. 

Öflugt menningarlíf um land allt

Treysta þarf grunnstoðir lýðræðissamfélagsins og setja valdhöfum skýrari meginreglur um samfélagslega ábyrgð og hlutverk en gert er í gildandi stjórnarskrá. Ákvæði um þjóðareign auðlinda, þjóðaratkvæðagreiðslur, framsal valds, jafnt atkvæðavægi og náttúruvernd eru á meðal þeirra fjölmörgu atriða sem m.a. tillögur stjórnlagaráðs frá árinu 2011 fjalla um og brýnt er að bundin verði í stjórnarskrá sem fyrst. 

Stjórnarskrárumbætur

Í grunnskólanum viljum við tryggja öllum börnum á Íslandi traustan grunn. Öll getum við lært en við erum ólík og lærum með ólíkum hætti. Grunnskólanám á að veita öllum tækifæri til að finna og rækta eigin styrkleika. Samfylkingin vill vinna gegn efnahags- og félagslegri aðgreiningu innan grunnskóla og á milli þeirra. Nám í grunnskóla á að vera að fullu gjaldfrjálst, þar með talið máltíðir og námsgögn.

Samfylkingin vill styrkja möguleika nemenda til að hafa áhrif á nám sitt, meðal annars með aukinni áherslu á val þeirra sjálfra um bæði inntak og aðferðir. Nemendur eiga að hafa sterka rödd þar sem teknar eru ákvarðanir um námskrá og annað sem snertir starfshætti skólanna. Mikilvægt er að bjóða holla og fjölbreytta fæðu í grunnskólum og flétta hreyfingu saman við daglegt skólastarf. List- og verknám á líka að vera stóraukinn hluti af leik og starfi barna í skólunum.

Við viljum vinna að aukinni samþættingu velferðar-, heilbrigðis- og menntakerfis til að samstilla sem best þjónustu við börn og ungmenni sem þurfa sérstakan stuðning og þjónustu af félagslegum, andlegum og líkamlegum toga.

Til að tryggja jöfn tækifæri allra barna á Íslandi vill Samfylkingin gera stórátak við að auka möguleika nemenda með annað móðurmál en íslensku til að njóta markvissrar íslenskukennslu í samræmi við þarfir hvers og eins, óháð búsetu. Þá er einnig mikilvægt að bjóða öllum börnum tækifæri til að verja auknum tíma í íslensku málumhverfi, svo sem með aðgengi að fjölbreyttum frístundum, námskeiðum utan skólatíma og/eða sumarskóla. 

Grunnskólar – byggjum traustan grunn

Stórefla þarf fangelsiskerfið á Íslandi sem hefur verið vanrækt um áratugaskeið með þeim afleiðingum að löng bið er eftir afplánun og dómar vegna afbrota fyrnast vegna plássleysis í fangelsum landsins. Samfylkingin styður því uppbyggingu fleiri fangelsa og endurnýjun þeirra sem nú eru í notkun, svo að fangar búi við heilnæmar aðstæður. Leggja þarf áherslu á samfélagslega endurhæfingu og betrun í fangelsum og að föngum bjóðist stuðningur við að fóta sig í samfélaginu á meðan á reynslulausn stendur og eftir að afplánun lýkur. 
Samfylkingin vill að stjórnvöld, atvinnulíf og menntakerfi taki höndum saman við að skapa viðeigandi úrræði fyrir fanga, þ.m.t. meðferðarúrræði, svo að fólk eigi þess kost að losna úr vítahring glæpa. Samfylkingin vill nýta reynslu félagasamtaka sem vinna að hagsmunum fanga til að móta stefnu í málaflokknum.Þá þarf að styrkja eftirlit með aðstæðum frelsissviptra (OPCAT eftirlit) á vegum embættis Umboðsmanns Alþingis.

Mannúðlegt fangelsiskerfi

Kraftmiklir háskólar eru lykillinn að því að skapa samfélag jöfnuðar og þekkingar á Íslandi. Bakgrunnur, fjárhagur og félagsleg staða fólks á ekki að koma í veg fyrir að það afli sér menntunar. Efla þarf fjárhagslegt stuðningskerfi námsmanna, húsnæðiskerfi og þjónustu við nemendur innan háskólanna.

Hátt menntunarstig þjóðarinnar er lykillinn að aukinni framleiðni og bættum lífskjörum til lengri tíma. Rannsóknir í háskólum eru gangvirki nýsköpunar innan skólanna og utan. Samfylkingin leggur áherslu á að opinber fjárframlög á hvern skráðan háskólanema nái meðaltali norrænu ríkjanna þannig að fjármögnun háskóla standist alþjóðlegan samanburð. Við viljum að gerðar séu ríkar kröfur um framþróun í kennsluháttum og kennslumati íslenskra háskóla í takti við það sem best gerist í heiminum.

Samfylkingin vill að ríkið styðji með markvissum hætti við uppbyggingu öflugra klasa um land allt þar sem atvinnulíf og menntastofnanir mætast með gagnkvæmum ávinningi. Til að ná sem bestum árangri er mikilvægt að móta framsækna atvinnustefnu fyrir allt Ísland. Vísindaþorp geta verið mikil lyftistöng fyrir nýsköpunar- og þekkingariðnaðinn og framfaraskref fyrir háskóla á Íslandi.

Samfylkingin vill bæta aðgengi að framhaldsnámi í listum. Standa þarf vörð um tónlistarskóla og stuðla að jöfnum tækifærum barna og ungmenna til tónlistarnáms.

Tryggja þarf að fólk af erlendum uppruna með háskólamenntun geti fengið menntun sína metna á Íslandi en jafnframt að nemendum með annað móðurmál en íslensku bjóðist sem fjölbreyttast háskólanám á Íslandi. Að sama skapi vill Samfylkingin tryggja að háskólanám verði inngildandi og aðgengilegt fötluðum nemendum. Endurskoða þarf stuðningsþjónustu með tilliti til þekkingar og reynslu.

Samfylkingin leggst alfarið gegn skólagjöldum og skráningargjöldum í opinberum háskólum. Menntun er fjárfesting samfélagsins í einstaklingum og á að vera gjaldfrjáls.

Háskólar og rannsóknir – aflvaki félagslegs hreyfanleika og nýjunga í tækni og hugmyndum

Svo lengi lærir sem lifir. Áskorunum samtímans og framtíðarinnar verður eingöngu mætt með þekkingaröflun. Vægi símenntunar verður sífellt meira og tryggja þarf hindrunarlausan aðgang að henni, ekki síst fyrir fólk í atvinnuleit. Öll þurfum við að fá tækifæri til að takast á við breytingar í starfi vegna sjálfvirknivæðingar eða annarra þátta sem geta haft áhrif á starfsgrundvöll heilla atvinnugreina. Gera verður fólki á vinnumarkaði kleift að uppfæra þekkingu sína og skipta um starfssvið.

Samfylkingin leggur áherslu á að hið opinbera og samtök launafólks og atvinnurekenda greini þörfina fyrir virk sí- og endurmenntunarúrræði til að mæta breytingum á þeim störfum sem einstaklingum bjóðast. Þá viljum við  að launafólki bjóðist endurgjaldslaus sí- og endurmenntun sem hluti af virkri atvinnuleit við missi atvinnu. Stöðug sí- og endurmenntun á að vera hluti af starfskjörum launafólks á vinnumarkaði. Að sama skapi er brýnt að fullorðið fólk hafi aðgang að náms- og starfsráðgjöf, raunfærni sé metin og að menntun innflytjenda fáist viðurkennd og metin til launa á Íslandi. Samfylkingin vill auka fjármagn í þróun á námsefni fyrir íslensku sem annað mál. Margir á íslenskum vinnumarkaði hafa stutta formlega skólagöngu. Samfylkingin mun beita sér fyrir því að ljúka heildarendurskoðun á framhaldsfræðslu í landinu auknum fjárframlögum hins opinbera til framhaldsfræðslunnar í landinu svo hún megi halda áfram að þróast og ná til fleiri.

Loks vill Samfylkingin að fólki sem ekki hefur íslensku að móðurmáli bjóðist íslenskukennsla sem er gjaldfrjáls, aðgengileg á fjölbreyttu formi og hentar vinnandi fólki. 

Sí- og endurmenntun – uppfærum þekkinguna

Allar ákvarðanir og ráðstafanir yfirvalda gagnvart börnum skulu byggjast á þeirri grundvallarreglu barnasáttmála Sameinuðu þjóðanna að það sem er barni fyrir bestu hafi ávallt forgang. Stjórnvöld eiga að sýna börnum virðingu og veita þeim tækifæri til að tjá sig um mál sem þau varða með formlegum hætti. Efla þarf ungmennaráð sveitarfélaga og halda reglulega samráðsfundi með börnum og ungmennum um mál sem þau varða. Mikilvægt er að tryggja að ungmennaráð og þátttakendur samráðsfunda endurspegli fjölbreytileika samfélagsins og gera ráðstafanir þannig að svo sé. Börn eiga að njóta vafans þegar grunur er um ofbeldi á heimili. Bæta þarf lagaumhverfi og lagaframkvæmd barnaverndar- og umgengnismála með hliðsjón af þessu.

Vellíðan barna í daglegu lífi leggur grunn að árangri í skóla- og frístundastarfi, að heilbrigði og að virkri þátttöku í samfélaginu. Samfylkingin vill að börn fái snemmtækan stuðning sem mætir misjöfnum þörfum þeirra og þá þjónustu sem börn eiga rétt á og þurfa til jöfnunar aðstöðumunar og til að þau geti nýtt hæfileika sína og liðið vel. 

Leit um „��"

2909 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „������������������������������������������������������������"

2909 niðurstöður fundust við leit að „������������������������������������������������������������"