Kraftmiklar alvöru aðgerðir í loftslagsmálum - strax!

Loftslag, náttúruvernd og umhverfi

Hamfarahlýnun af mannavöldum kallar á stórtækar aðgerðir strax og nýja hugsun á öllum sviðum samfélagsins. Markmið Samfylkingarinnar um fulla atvinnu og efnahagslega endurreisn eftir COVID helst í hendur við stefnu okkar um græna umbyltingu í íslensku atvinnulífi.

Minna kolefnisfótspor

Samfylkingin vill ráðast í markvissar aðgerðir til að minnka neysludrifið kolefnisspor Íslendinga og stuðla að auknu gagnsæi og upplýsingagjöf um uppruna og framleiðsluaðferðir til að neytendur eigi auðveldara með að taka upplýsta ákvörðun um matarvenjur, ferðavenjur og aðra neyslu út frá umhverfisáhrifum. Slíkar merkingar á innlendri framleiðslu gætu skapað íslenskum afurðum sérstöðu á erlendum mörkuðum.

Kolefnisfótspor bygginga og heimila fólks eru ekki þekkt almenningi en ættu að vera það, enda stór hluti auðlindanýtingar og kolefnisfótspors fólks. Samfylkingin vill skapa sterka hvata til að nýta umhverfisvæna og loftslagsvæna kostir við nýbyggingar og að stutt verði í auknum mæli við nýsköpun á sviði sjálfbærra lausna í byggingariðnaði.