Samfylkingin kynnti í dag, þegar nákvæmlega einn mánuður er til kosninga, kosningastefnu sína fyrir alþingiskosningarnar 25. september. Þar má finna þær megináherslur sem flokkurinn setur á oddinn við stjórnarmyndun og í störfum sínum á Alþingi næstu fjögur árin.

Kosningastefnan ber yfirheitið Betra líf - fyrir þig, þína fjölskyldu og komandi kynslóðir.

„Samfylkingin ætlar að leiða saman annars konar ríkisstjórn en þá sem nú situr. Ríkisstjórn sem setur fjölskyldur í forgang, er tilbúin að stórbæta kjör eldra fólks og öryrkja, byggja upp sterkara samfélag með nýrri atvinnustefnu, þar sem allir hafa aðgang að fyrsta flokks heilbrigðisþjónustu og ráðast í alvöru aðgerðir í loftslagsmálum,” - sagði Logi Einarsson, formaður flokksins þegar hann kynnti stefnuna.

Hægt að er að skoða stefnuna undir Stefnan okkar í valmynd. 

Kosningastefnan skiptist í fjóra hluta:

Hærri barnabætur og meira fyrir eldra fólk og öryrkja 

Samfylkingin leggur áherslu á taka upp alvöru norrænt barnabótakerfi og greiða fleiri fjölskyldum út hærri barnabætur í hverjum mánuði, þannig að barnafjölskyldur með meðaltekjur fái allt að 54.000kr í vasann mánaðarlega. Þá ætlar hún að hækka grunnlífeyri eldra fólks og öryrkja til samræmis við Lífskjarasamningana og hækka frítekjumörk - og ráðast í kerfisbreytingar á húsnæðismarkaði til að auka verulega framboð og lækka verð.

Samfylkingin ætlar sér stóra hluti í loftslagsmálum. „Við ætlum við að að hefja kraftmikla sókn gegn loftslagsbreytingum sem jafnast á við stærstu samfélagsverkefni 20. aldar: Raflýsingu og hitaveitu, lagningu síma og þjóðvega,” sagði Logi í ræðu sinni, „til þess þurfum við nýja nálgun og alvöru aðgerðir strax á öllum sviðum samfélagsins.”

Meðal þess sem Samfylkingin ætlar að gera er að lögfesta loftslagsmarkmið um a.m.k. 60% samdrátt í losun gróðurhúsalofttegunda fyrir árið 2030 og hefja undirbúning að Keflavíkurlínu, grænni tengingu milli Reykjavíkur og Keflavíkurflugvallar, og flýta Borgarlínu. Ásamt því ætlum við að byggja upp Landlínu, heildstætt almenningsvagnanet svo að það verði einfaldur og raunhæfur kostur fyrir fólk að ferðast um Ísland án einkabíls. Rafvæða bílaleiguflotann með skattalegum hvötum og markvissri uppbyggingu hleðsluinnviða. Stofna grænan fjárfestingarsjóð að norrænni fyrirmynd og ráðast í umbætur á landbúnaðarkerfinu án þess að draga úr stuðningi við bændur, með því að hætta að skilyrða styrki við framleiðslu á kjöti og mjólk en styðja frekar loftslagsvæn verkefni.

Þjóðarátak í geðheilbrigðismálum og ný atvinnustefna

Samfylkingin ætlar að auka fjármagn, bæta mönnun og aðgengi almennings að heilbrigðisþjónustu um allt land - og ráðast í þjóðarátak í geðheilbrigðismálum. Fyrsta skrefið væri að gera sálfræðiþjónustu fyrir börn og ungmenni mun aðgengilegri og gjaldfrjálsa. Samfylkingin ætlar auk þess að móta nýja og spennandi atvinnustefnu sem byggir meira á hugviti og grænum umskiptum og styðja betur við lítil fyrirtæki og einyrkja með upptöku sérstaks frítekjumarks fyrirtækja - sem eru nýmæli í íslenskum stjórnmálum.

Sókn gegn sérhagsmunum og jöfn tækifæri

Samfylkingin boðar sókn gegn sérhagsmunum, hærri veiðigjöld og endurskoðun á fiskveiðistjórnunarkerfinu með það að markmiði að hámarka arð þjóðarinnar af sjávarauðlindinni. Þá leggur flokkurinn áherslu á haldin verði þjóðaratkvæðagreiðsla um áframhald viðræðna við ESB, að stjórnarskrármálið verði klárað á grundvelli tillagna stjórnlagaráðs, að ný og mannúðlegri stefna í málefnum flóttafólks verði tekin upp og að samningur SÞ um réttindi fatlaðs fólks verði lögfestur, svo eitthvað sé nefnt. 

Borgarlandið, söfn, leikvellir og önnur útivistarsvæði bjóða upp á fjölmörg tækifæri fyrir fjölskyldur og vini til að njóta skapandi og uppbyggjandi samveru. Ég hvet borgarbúa til að líta sér nær og nýta þá innviði sem borgin hefur upp á að bjóða og þá sérstaklega barnafjölskyldur. 


Stærstu minningar barnæskunnar og uppbyggilegustu stundirnar eru oftar en ekki gæða samvera með okkar nánustu. Þær þurfa ekki að kosta mikla fyrirhöfn eða fjármuni.


Reykjavíkurborg er borg barnamenningar og hefur skartað Barnamenningarhátíð um nokkur misseri. Hátíðin var haldin í ár með óvenjulegum hætti en tókst frábærlega. Boðið var upp á fjölmarga viðburði í mörgum hverfum borgarinnar. Iðkun barnamenningar þarf ekki að einskorðast við hátíð, heldur er hægt að hvetja börn til þátttöku í menningu og listum, bæði til sköpunar og að njóta allt árið um hring.

Jöfn tækifæri og aðgengi að menningu og listum

Þátttaka í hvers kyns menningarstarfi er mikilvægur grunnur í menntun og þroska barna okkar. Þess vegna er það sérstök áhersla Samfylkingarinnar að öll börn og ungmenni hafa jöfn tækifæri og aðgengi að menningu og listum.
 
Söfn borgarinnar bjóða reglulega upp á tækifæri til skapandi samveru, má þar til dæmis nefna sýningu sem nú stendur yfir á Kjarvalsstöðum til 19. september og nefnist „Eilíf endurkoma - Kjarval og samtíminn“. Reglulega hefur verið boðið upp á leiðsögn fyrir börn og fjölskyldur og er næsta leiðsögn á dagskrá laugardaginn 11. september kl. 11. Alla daga er hægt að fá lánaðan bakpoka í móttökunni á Kjarvalsstöðum sem inniheldur ýmis spennandi verkefni sem leiðir fjölskylduna í skemmtilegt ferðalag í gegnum sýninguna.
 
Mig langar einnig til að nefna sýningarröðina „Hjólið“ sem Myndhöggvarafélagið í Reykjavík hefur sett upp í opinberu rými og stendur yfir til 5. september. Þar gefst borgarbúum tækifæri á að skoða fjölmörg og ólík listaverk með því að þræða sig eftir hjóla- og göngustígum borgarinnar sem er tilvalin samverustund fyrir fjölskylduna. Þannig er hægt að samtvinna útivist, hreyfingu, menningu og listir. Hægt er að sjá staðsetningu listaverkana á göngu- og hjólakortum á hjolid.is

Nýtum alla borgina til samveru og valdeflingar

Samvera er besta forvarnarráðið og styrkir tengsl, traust og vináttu fjölskyldna – barna og fullorðinna. Þar eru unglingarnir okkar ekki undanskildir. Við, fullorðna fólkið, höldum stundum að þau hafi mögulega ekki áhuga á slíkum samverustundum, sem er alls ekki alltaf rétt ályktað hjá okkur og því sérstaklega mikilvægt að við hvetjum þau og virkjum til þátttöku. Altaf er hægt að finna eitthvað áhugavert við að vera fyrir fólk á öllum aldri í borginni.

Þá getur verið mjög valdeflandi fyrir börn og lærdómsríkt að fela þeim það verkefni að skipuleggja óvissuferð fjölskyldunnar í borginni. Hægt væri að heimsækja annað borgarhverfi og finna alla afþreyingu þar til að njóta; svo sem leikvelli, söfn, útilistaverk, sundlaug, bókasafn eða annað sem hverfið býður upp á. Leyfum börnunum að ráða för, hvetjum þau til að vera frjó og skapandi, treystum þeim, tökum þeim áskorunum sem þau koma fram með og leyfum okkur svo að fylgja þeim.

Setjum nesti í bakpoka, tökum með okkur aukaföt, lítið teppi, hoppum í Strætó, hjólum, leikum okkur á öðrum skóla- eða leikskólalóðum. Verum ófeimin við að taka okkur pláss og setjast niður með föggur okkar, teppi og kaffibrúsann. Ákveðum að eiga útidag fjölskyldunnar, í Fjölskyldu- og húsdýargarðinum, Árbæjarsafni, Elliðaárdalnum, á Klambratúni, við tjörnina í Hólmaseli eða við Korpúlfsstaði svo eitthvað sé nefnt. Þá má einnig hjóla í miðborginni, heimsækja listasöfn, keppast í París á Laugaveginum og enda svo í sundi í Vesturbæjarlauginni.

Greinin birtist fyrst í Morgunblaðinu 19. ágúst 2021.

 Ellen Calmon er formaður Samfylkingarfélagsins í Reykjavík og borgarfulltrúi Samfylkingarinnar, einnig er hún fulltrúi í menningar-, íþrótta- og tómstundaráði.

Skapandi samvera, jöfn tækifæri í barnamenningarborginni Reykjavík

Mikið fór fyrir umræðu fyrri hluta árs um hvaða áhrif fjárframlög vegna COVID hefðu haft á hagvöxt. Að augljóst væri að nóg væri að gert því fall í landsframleiðslu hefði verið minna en áður var spáð. Þessi framsetning er þó grundvallar misskilningur á eðli krísunnar.

Aðgerðapakkar hingað til áttu ekki að snúast um örvun hagkerfisins. Þetta áttu að vera rústabjörgunarpakkar. Tilgangurinn var að milda erfiðleika fólks og fyrirtækja þar til bóluefnin væru farin að virka. Styrkja innviði til að takast á við faraldurinn. Skapa þannig forsendur fyrir hagvöxt síðar meir.

Einn stór mælikvarði á hversu vel rústabjörgunarpakkarnir skiluðu sér er staðan í heilbrigðiskerfinu í yfirstandandi bylgju. Þó margir hafi veðjað á endalok veirunnar í kjölfar bólusetningar sætir það furðu að ráðstafanir hafi ekki verið gerðar í tæka tíð til að efla þá hluta heilbrigðiskerfisins sem eru viðkvæmastir fyrir annarri bylgju.

Þetta kostar peninga. En þetta er fjárfesting sem dregur úr þörf á harðari aðgerðum í daglegu lífi fólks. Dregur úr líkunum á að fólki hólfi sig sjálfkrafa af, sem aftur dregur kraft úr atvinnulífinu.

Núverandi aðstæður eru vissulega óvenjulegar. En þetta ástand veitir engu að síður hraðsoðna innsýn inn í miklu stærri mynd hér á landi, sem er algjörlega óháð núverandi aðstæðum: Hversu stór kjölfesta velferðarkerfið raunverulega er fyrir atvinnulífið og verðmætasköpun.

Frá 1960 til 1990 jukust heildarútgjöld hins opinbera úr 27% af landsframleiðslu í um 40%. Síðan þá hefur hlutfallið verið rúmlega 40% ef frá eru talin áfallaárin eftir 2008 krísuna og nú í fyrra. Umrædd aukning frá 1960 má einna helst rekja til aukinna umsvifa í skólamálum og velferðarkerfinu.

Þetta eru umsvif sem við komum okkar saman um sem samfélag því við sáum verðmæti í því. Þessi kerfi okkar hafa gert stórum hópum einstaklinga kleift að fara út á vinnumarkaðinn í krafti aðgangs að umönnunarþjónustu utan heimilis og stuðnings í daglegu lífi. Já, þessi umsvif hafa skapað opinber störf. En þau hafa líka stóraukið þann starfskraft sem einkageiranum býðst. Þar liggja gífurleg verðmæti.

Tilkall einkageirans til verðmætasköpunarinnar er því stórkostleg einföldun á þeirri heimsmynd sem blasir við. Þegar talið berst að auknum umsvifum hins opinbera er sjaldan bent á þá staðreynd að við gerum umtalsvert meiri kröfur til samfélagsins í dag en við gerðum árið 1960. Við lifum lengur, menntum okkur meira og berum meiri virðingu fyrir þörfum hvers og eins einstaklings. Samt hefur okkur tekist að halda umsvifum hins opinbera meira og minna í takt við landsframleiðsluna frá 1990.

Talið berst stundum að bákninu og íþyngjandi viðveru hins opinbera hvað varðar hagvaxtargetu. En þessu má allt eins snúa á haus – hverjar væru þjóðartekjurnar hér á landi, gjaldeyrissköpunin, ef við hefðum ekki komið öllum þessum fjölbreyttu einstaklingum út á vinnumarkaðinn með meiri þekkingu en nokkru sinni fyrr með öflugu stuðningsneti?

Þótt fjárframlög til heilbrigðiskerfisins hafi aukist á síðustu árum er þar gríðarleg uppsöfnuð innviðaskuld eftir síðustu krísu. Sú skuld hefur gert kerfið dýrara í rekstri fyrir vikið og dregið úr möguleikum þess til að auka hina margumtöluðu framleiðni. Rétt eins og verksmiðja sem keyrir á fullum afköstum áður en fjárfest hefur verið í grunnþáttum nær aldrei ásættanlegum árangri sama hversu mikið starfsfólkið leggur á sig.

Greinin birtist fyrst á vísi.is 19. ágúst 2021. 

Viðkvæm staða í heilbrigðiskerfinu gerir það að verkum að erfiðara er að aflétta sóttvarnartakmörkunum en vonir stóðu til. Daglegt líf fjölskyldna og rekstur fyrirtækja líður fyrir ástandið. Ef velferðarþjónustan er löskuð reynist nefnilega erfitt að sækja fram – lífsgæði fólks rýrna.

Samfylkingin vill sterkara samfélag þar sem vel er hugað að innviðum eins og heilbrigðis- og menntakerfi

Samfylkingin vill byggja upp fyrsta flokks heilbrigðisþjónustu, menntakerfi sem tryggir öllum jöfn tækifæri og móta nýja atvinnustefnu um hugvit, nýsköpun og sjálfbær umskipti. Við viljum vaxa út úr Covid-kreppunni og höfnum alfarið áformum ríkisstjórnarinnar um 100 milljarða niðurskurð á næstu árum. Við viljum beita almennri skynsemi og réttlætissjónarmiðum í skattastefnu og auðlindamálum, vinna að nýrri stjórnarskrá og færa aukin völd beint til almennings.

Byggjum upp betri heilbrigðis-þjónustu

Við ætlum að snúa við blaðinu í heilbrigðismálum, fjármagna heilbrigðisþjónustuna betur og beita okkur fyrir tímabærum kerfisbreytingum og umbótum í þjónustu við fólk og fjölskyldur. Það ríkir þjóðarsátt um nauðsyn þess að byggja upp betri heilbrigðisþjónustu fyrir okkur öll, óháð efnahag og búsetu, og nú verður ekki lengur beðið eftir brýnum aðgerðum. 

Það þarf bæði að leysa brýnustu vandamálin og byggja upp þjónustuna til lengri tíma. Á bak við hvert nafn á biðlista eftir nauðsynlegum aðgerðum, heimsóknum til sérfræðinga og viðtölum við sálfræðinga og geðlækna eru fjölskyldur sem þurfa lausn á sínum vanda. 
 
Samfylkingin telur tíma til kominn að hlusta á raddir heilbrigðisstarfsfólks sem hefur lengi kallað eftir umbótum. Í samvinnu við það þurfum við að bæta heilbrigðisþjónustuna með öllum ráðum. Það verður ekki „lifað með veirunni“ nema við styrkjum verulega Landspítala og styðjum við heilbrigðisstarfsfólk.

Auka fjármagn til opinberrar heilbrigðisþjónustu, og ráðast í aðgerðir gegn undirmönnun og stytta biðlista eftir brýnum aðgerðum.

Ráðast í þjóðarátak í geðheilbrigðisþjónustu um allt land. Gera geðheilbrigðisþjónustu að hluta af almenna heilbrigðiskerfinu. Byggja nútímalegar geðdeildir og vinna markvisst niður biðlista barna og ungmenna eftir nauðsynlegri þjónustu. Innleiða gjaldfrjálsa sálfræðiþjónustu fyrir börn og ungmenni. 

Styrkja forvarnir. Bæta strax úr fyrirkomulagi skimana fyrir legháls- og brjóstakrabbameini og taka upp skimanir fyrir fleiri gerðum krabbameins.

Létta álagi af Landspítala með kerfisbreytingum, nýjum búsetu- og þjónustuúrræðum fyrir eldra fólk, aukinni heimaþjónustu og markvissri fjölgun hjúkrunarrýma. Leiðrétta greiðslur vegna hjúkrunarrýma.

Nýta betur fjármagn sem veitt er til heilbrigðismála með eflingu innri endurskoðunar hjá hinu opinbera auk stýringar, samræmingar og skilvirkara eftirlits með ólíkum þáttum heilbrigðiskerfisins.

Efla heilbrigðisþjónustu við fólk um allt land með ákvæðum um starfsaðstæður og kjör heilbrigðisstétta og fjárfestingu í tæknilausnum til fjarlækninga. Greiða allan ferðakostnað innanlands vegna nauðsynlegrar heilbrigðisþjónustu við fólk fjarri heimabyggð.

Hvernig viljum við takast á við vandann?

Ný atvinnustefna og ábyrg efnahagsstjórn

Við viljum að Ísland vaxi úr kreppunni og höfnum niðurskurðaráætlunum ríkisstjórnarinnar til næstu ára. Öflug velferðarþjónusta og gengisstöðugleiki er grundvöllur þess að hér sé heilbrigt og gott atvinnulíf. Þess vegna er ábyrga leiðin í efnahagsmálum að styrkja innviði, sækja fram fyrir alþjóðageirann og styðja við nýsköpun og fjölbreytni í atvinnulífi. Stærsta atvinnumál þessa áratugar er svo réttlát og sjálfbær umbreyting í efnahags- og atvinnulífi til að mæta grænni framtíð.

Fjárfesta af krafti í grunninnviðum, sér í lagi þeim sem stuðla að grænni umbreytingu, og standa að umbótum við rekstur ríkisins.

Hverfa frá áformum núverandi ríkisstjórnar um 100 milljarða niðurskurð, sem ógnar atvinnulífi, almannaþjónustu og hagkerfinu öllu.

Móta nýja atvinnustefnu, vinna að stafrænni umbreytingu í þjónustu við fólk og fyrirtæki og bæta stuðning við nýjar stoðir í atvinnulífinu, hugvit, nýsköpun, alþjóðageirann og skapandi greinar.

Einfalda rekstrarumhverfi lítilla fyrirtækja og einyrkja, auka þjónustu við þau og létta álögur á þau með setningu frítekjumarks, samanber persónuafslátt. Setja lög um nýtt félagsform fyrir frumkvöðla sem auðveldar stofnun og þróun fyrirtækja með takmörkuðum skyldum fyrstu tvö árin.

Byggja nýsköpunarklasa í öllum helstu þéttbýliskjörnum í samvinnu við heimafólk, þar sem frumkvöðlar, fyrirtæki og stofnanir fá aðstöðu og stuðning um allt land.

Ráðast í sjálfbæra uppbyggingu ferðaþjónustu um allt land og standa fyrir samstilltu átaki til viðhalds og uppbyggingar á ferðamannastöðum. Móta ferðamálastefnu sem stuðlar að aukinni hagsæld.

Efla samkeppniseftirlit, setja lög gegn kennitöluflakki og efna fyrirheit síðustu kjarasamninga um aðgerðir gegn brotum á vinnumarkaði.

Við viljum byggja upp í stað þess að skera niður - Lestu meira

Menntakerfi sem tryggir öllum jöfn tækifæri

Við viljum raunverulegt jafnrétti til náms á öllum skólastigum. Með fjölbreyttu menntakerfi sem byggist á jöfnuði ræktum við styrkleika hvers og eins. Þannig búum við best í haginn fyrir samfélagið allt til framtíðar. Við viljum skapa menntakerfi þar sem enginn er skilinn eftir, og hver nemandi fær fræðslu og tekur út þroska á eigin forsendum. Nú þarf sérstaklega að styðja við framhaldsskólanema sem hafa þurft að sæta takmörkunum til náms og félagslífs, og grípa til aðgerða til að forða brottfalli.

Hækka grunnframfærslu námsmanna í dæmigert neysluviðmið félagsmálaráðuneytisins og tryggja að frítekjumark fylgi launaþróun.

Styrkja nýsköpun og þróunarstarf í menntamálum, efla stoðþjónustu við kennara og nemendur og bæta aðgengi að sálfræðingum, félagsráðgjöfum og annarri stuðningsþjónustu í skólum.

Styðja sveitarfélög og skóla þar sem hátt hlutfall barna hefur íslensku ekki að móðurmáli svo að efla megi íslensku- og móðurmálskennslu á öllum skólastigum.

Auka við framlög til rannsóknar- og vísindasjóða og liðka fyrir þátttöku Íslendinga í stórum alþjóðlegum nýsköpunar- og rannsóknarverkefnum.

Efla listnám með lækkun skólagjalda við Listaháskóla Íslands og greiðara aðgengi fólks að listnámi um allt land.

Efla iðn-, verk- og starfsnám og auka þar framboð til þess að fleiri fái inngöngu í skólana.


Við viljum almenna skynsemi ásamt réttlætissjónarmiðum í skatta- og auðlindamálum og að skattkerfinu sé beitt til að draga úr ójöfnuði. Það er nóg til, en vanda verður til verks við tekjuöflun hins opinbera.

Hækka veiðigjöld og taka upp sérstakt álag á stærstu útgerðir (afla yfir fimm þúsund þorskígildistonnum á ári). Það leggst aðeins á um tuttugu stærstu fyrirtækin.

Gera gagngera úttekt á núverandi fiskveiðistjórnunarkerfi og móta tillögur að breytingum til að hámarka arð þjóðarinnar af auðlindinni, draga úr samþjöppun og stuðla að nýliðun. Kanna sérstaklega áhrif af útboði tímabundinna veiðiheimilda.

Innleiða á ný stóreignaskatt á hreina eign umfram 200 milljónir. 

Efla skatteftirlit og skattrannsóknir til að draga úr undanskotum og fela embætti skattrannsóknarstjóra ákæruvald.

Hvað væri sanngjörn skattastefna? - Lestu meira

Hvernig viljum við takast á við sérhagsmuni? - Lestu meira

Finnurðu ekki málefni sem er þér kært? Skoðaðu málefnaskrá xS eins og hún leggur sig!

KosningastefnaXs2021_vef.pdf

Viltu skoða stefnuna á PDF? Gjörðu svo vel!

Öll fimmtudagskvöld í ágúst mun Samfylkingin í Kraganum standa fyrir ólíkum viðburðum í húsnæði Samfylkingarinnar í Hafnarfirði við Strandgötu þar í bæ að teknu tilliti til samkomutakmarkanna.

Þetta er fjölskyldan mín. Hún samanstendur af tveimur mömmum, litlum strák og ketti. Við erum ekkert öðruvísi en aðrar fjölskyldur. Hafragrautur á morgnanna, gleymist að taka úr þvottavélinni endrum og eins, ömmur og afar sækja á leikskólann þegar mömmurnar eru á haus og það hanga blaut útiföt í forstofunni.

Ég var vön að fá sting í magann þegar ég las barnabækur með syni mínum og las um hinn dularfulla pabba sem ekki er til á okkar heimili. Að strákurinn minn myndi upplifa að við værum öðruvísi. En staðreyndin er sú að á sumum heimilum eru pabbi og mamma, á öðrum heimilum tveir pabbar, tvær mömmur, ein mamma, einn pabbi, tvær mömmur og einn pabbi; allskonar foreldrar og foreldrasett. Á sumum heimilum eru systkini, eldri, yngri, hálf-, stjúp-, fá eða mörg. Það er dýrmætt og mikilvægt að við fögnum þessu og fjöllum um þennan fjölbreytileika.

Fjölskyldur eru nefnilega ólíkari en bækur, myndir og sjónvarpsefni vilja vera láta, þar sem hin hefðbundna kjarnafjölskylda með mömmu, pabba og tveimur börnum ræður ríkjum. En íslenska kerfið notar kjarnafjölskylduna til eftirprentunar sem veldur fjölbreyttum fjölskyldum oft miklum vandræðum og býr til óréttlæti. Dæmi um þetta eru pappírar sem hinsegin foreldrar þurfa að skila eftir fæðingu barns til að sanna hverjir séu foreldrar þess eftir frjósemisaðstoð. Sís-gagnkynja pör sem glíma við ófrjósemisvanda þurfa þess hins vegar ekki, þó þau nýti sér sömu aðstoð hjá sama aðila. Annað dæmi er jafn aðgangur foreldra sem ekki búa saman að t.d. upplýsingum frá hinu opinbera er varða barnið og að stuðningi vegna fatlaðra og langveikra barna á heimili sem ekki telst lögheimili. Öll kerfi eru mannanna verk og þau eiga að vinna fyrir okkur.

Íslenskt samfélag er fjölbreytt og kerfið okkar þarf að taka mið af okkur sem það byggjum og fjarlægja hindranir sem fjölskyldur þurfa að klofa — ofan á allt hitt!

Greinin birtist fyrst á visi.is 3. ágúst 2021.

Inga Björk er hinsegin móðir og skipar 3. sæti Samfylkingarinnar – jafnaðarmannaflokks Íslands í Suðvesturkjördæmi.

Fátt er betra en íslensk sumar, ég tala nú ekki um þegar hitinn nær tveggja stafa tölu og sólin skín. Í íslenskri sumarsælu er kannski ekki mikil spurn eftir nýjustu fréttum af loftslagsbreytingum og hamfarahlýnuninni en samt verður ekki undan því vikist að kynna sér þær – og bregðast við.

Daglega berast fregnir af hitabylgjum, gróðureldum, þurrkum og bráðnun jökla. Í norðvesturhluta Bandaríkjanna og Kanada hafa hitametin verið slegin svo um munar og fólk deyr, vegna hitans. Bráðnun heimskautaíssins er hröð og úthöfin súrna vegna hlýnunar.

Greint var frá skelfilegum tímamótum í vikunni þegar var sagt frá rannsókn sem sýnir að Amazon-regnskógurinn losar nú meira af gróðurhúsalofttegundum en hann bindur. Skógurinn er ruddur og brenndur undir soja- og nautgriparækt og ekkert kemur í staðinn. Það er auðvelt að missa móðinn við þennan lestur og halda að ekkert geti stöðvað hlýnun jarðar. Sem betur fer er það ekki þannig, en tíminn er naumur. Og öll höfum við okkar skyldum að gegna. Vísindin sögðu fyrir um hlýnunina

Allt frá því að vísindanefnd Sameinuðu þjóðanna um loftslagsbreytingar af mannavöldum skilaði sinni fyrstu skýrslu fyrir aldarfjórðungi hafa spár hennar gengið eftir. Sviðsmyndirnar eru nokkrar og sýna margvíslegar afleiðingar hlýnunar á vistkerfi og búsvæði jarðar. Sú hætta er raunverulega fyrir hendi að hlýnunin í lofthjúpnum nái vendipunkti (e. tipping point). Þangað viljum við ekki fara því að sé vendipunkti náð er staðan orðin óviðráðanleg og hlýnun af mannavöldum fær ótrufluð að eyða náttúrufari, bræða jökla og útrýma dýrategundum.

Á loftslagsráðstefnu Sameinuðu þjóðanna árið 2015 náðu ríki heims samkomulagi sem kennt er við París um að halda hlýnun jarðar undir 2°C (miðað við stöðuna fyrir iðnbyltingu) og reyna að halda henni innan við 1,5°C. En síðan eru liðin nærri sex ár og skuldbindingar sem þessi sömu ríki hafa sjálfviljug axlað duga ekki til. Nú horfir heimsbyggðin til loftslagsráðstefnunnar í Glasgow í árslok í von um skýrari skuldbingingar svo að markmiðinu verði náð í tæka tíð.

Forgangsmál að draga úr losuninni. Bindingin er bónus

Hvert einasta ríki heims þarf að leggja sitt af mörkum í baráttunni gegn hamfarahlýnun, hálfkák og fögur orð duga ekki og aðgerðaleysi er ekki í boði. Við verðum að draga úr losun gróðurhúsalofttegunda með öllum tiltækum ráðum og það er brýnt að horfast í augu við að raunverulegur samdráttur í losun gróðurhúsalofttegunda verður að vera í forgangi. Binding koldíoxíðs í landgræðslu og skógrækt skiptir vissulega máli en en eins og málum er komið er hún bara bónus.

Samfylkingin leggur til að dregið verði úr losun hér á landi um 60% eigi síðar en 2030 og að Ísland verði orðið kolefnisneikvætt árið 2040. Til að svo megi verða þurfa allar opinberar fjárfestingar hér á landi að hafa það að markmiði að draga úr losun. Uppbygging atvinnugreina verður að hafa það að aðalmarkmiði að draga úr losun. Skattaívilnanir og efnahagslegir hvatar verða að sjálfsögðu að hafa sama markmið og nýtast öllu launafólki, ekki bara þeim sem hafa efni á að kaupa sér niðurgreidda en rándýra rafmagnsbíla. Uppbygging borgarlínunnar er auðvitað forgangsmál. Til að skapa breiða samstöðu um nauðsynlegar aðgerðir þurfa stjórnvöld að eiga náið samstarf við verkalýðshreyfinguna og samtök atvinnurekenda.

Það var ánægjulegt að sjá tilmæli OECD um loftslagsaðgerðir í nýrri skýrslu um Ísland en þau eru í góðu samræmi við stefnu Samfylkingarinnar. Þar er lagt til að þróa samræmda umgjörð um loftslagsaðgerðir með skýrri forgangsröðun og aðgerðaáætlun og draga úr vægi tæknilegra ráðstafana; framkvæma kostnaðar- og ábatagreiningu fyrir loftslagsaðgerðir; leggja kolefnisskatta eða aðra loftlagsskatta á allar greinar út frá losun þ.á.m. jarðhita, sorphirðu og landbúnað. Og að lokum að auka fjárfestingu í lágkolefna samgönguinnviðum, orkuskiptum og stafrænum innviðum.

Frambjóðendur Samfylkingarinnar skoðuðu hið stórmerka CarbFix verkefni við Hellisheiðarvirkjun nýlega. Þar er fjárfesting í hugviti og mannauði að skila okkur ávinningi sem engan hefði órað fyrir: að binda koldíoxíð útblástur frá jarðvarmavirkjun í berglögum. Ekki furða að CarbFix verkefnið hafi vakið heimsathygli. Ég er þess fullviss að framfarir á sviði vísinda og nýsköpunar munu vinna með mannkyni í baráttunni við loftslagsbreytingar en þær gefa okkur ekki leyfi til að sitja með hendur í skauti og vona það besta. Brýnasta verkefni okkar næst ártuginn er að draga úr losun gróðurhúsalofttegunda þannig að Ísland geti með sanni sagt þegar frá líður: Við gerðum okkar til að koma í veg fyrir hamfarahlýnun á 21. öldinni.

Greinin birtist fyrst í Kjarnanum 15. júlí 2021.

Þórunn Sveinbjarnardóttir er fyrrverandi umhverfisráðherra og oddviti Samfylkingarinnar í Suðvesturkjördæmi.

Nú þegar við höldum hátíðlega Hinsegin daga með fjölskrúðugri dagskrá, litasprengjum og gleði er vert að minnast þeirra sem ruddu brautina. Þetta var fólk sem hafði mátt sæta ofsóknum og lítillækkun samfélagsins alla sína tilveru. Það þurfti mikið hugrekki, áræðni og sannfæringarkraft fyrir mannréttindum hinsegin fólks til að stíga fram úr felum og neita að sætta sig við útskúfun og forsmánun. En þau höfðu baráttuþrek og sannfæringu um að við værum öll jöfn og samfélagið væri fyrir okkur öll.

Þetta er fólkið mitt. Þetta er mín kynslóð. Ég man svo langt aftur þegar Hörður Torfason kallaði saman á sellufund lítinn hóp manna sem læddust inn í litla íbúð í háhýsi í austurbænum í skammdegisdrunganum til að ræða stöðu sína og hugsanlega stofnun baráttuhóps. Margir í hópnum höfðu orðið illilega fyrir barðinu á fordómum og hatri. Orðið fyrir barsmíðum, mismunun á vinnumarkaði og sumir hreinlega misst bæði atvinnu og húsnæði fyrir það eitt að vera hinsegin.

Þetta var veturinn 1977-1978. Það var tekist á um hversu árennilegt það væri að storka opinberlega svo fordómafullu samfélagi með að bindast samtökum um mannréttindi hinsegin fólks. Harðasti kjarninn í þessum litla hópi stofnaði síðan Samtökin 78. Full sannfæringar um að ástin fer aldrei í manngreinarálit og ástin sigrar allt.

Síðan hef ég gegnum tíðina oft komið að starfi Samtakanna 78 á einn eða annan hátt, bæði í blíðu jafnt sem stríðu. Þessi lífsreynsla hefur mótað mig. Jafnréttisbarátta er hverjum og einum mikilvæg. Þá fyrst verður hún lífsnauðsynleg þegar hann verður sjálfur fyrir misrétti.

Það hefur fyllt mig endurnýjaðri orku og gleði að sjá hversu mikið hefur áunnist í þessari mannréttindabaráttu og ekki síst hversu margir hafa fundið lífshamingju sína vegna baráttu fólksins í Samtökunum 78.

Þetta er líka hreyfingin sem hefur skapað skemmtilegustu og litríkustu fjölskylduhátíð ársins. Hátíð sem hefur til skamms tíma sprengt hvert þátttökumetið eftir annað ár eftir ár.

Það hefur verið gæfa samtakanna að stöðugt hafa nýjar hendur komið og lagst á árarnar, þegar aðrar lúnari hafa þurft á hvíld að halda. En það er þó eðli baráttufólks að það dregur sig aldrei alveg í hlé. Því það veit að baráttunni er aldrei endanlega lokið. Mannréttindi eru aldrei sjálfsögð í augum alltof margra og við þurfum stöðugt að vera viðbúin nýjum hatursáróðri. Nýjum þvingunum. Vaktinni er aldrei lokið.

Því er vel við hæfi að yfirskrift Hinsegin daga í ár er „Hinsegin á öllum aldri“ til að vekja athygli á hversu mikil aldursbreidd og reynsla er á bak við þennan stóra hóp sem stoltur ber í dag uppi merki sýnileika, mannréttinda og ekki síst jafnréttis.

Brautryðjendurnir sem stofnuðu á sínum tíma Samtökin 78 eru flest orðin eftirlaunafólk í dag. Nú mæta þau enn nýjum áskorunum. Að máta sig við tilveruheim eldri borgarans eins og samfélagið hefur mótað hann. Á þeirra þá að bíða gömlu dansarnir með harmoniku og tilbreytingalítið, smáborgaralegt ævikvöld?

Ég held ekki. Þetta er fólkið sem kann að breyta hlutunum. Nú verður rokk og ról. Þetta er sko fólkið sem mun skora klisjurnar á hólm. Sjáið bara til.

Hinsegin eldri borgarar eru mættir á svæðið. Nú verður gaman að eldast!

Viðar Eggertsson er hinsegin eldri borgari og skipar 3. sæti á framboðslista Samfylkingarinnar í Reykjavíkurkjördæmi suður

Hinsegin eldri borgarar mættir á svæðið með stolti!

Samfylkingin nýtir vef- og samfélagsmiðla, líkt og aðra miðla, til þess að auglýsa og koma skilaboðum á framfæri við félaga og almenning. 

Hægt er að fela þær auglýsingar sem Samfylkingin birtir á vef- og samfélagsmiðlum, rétt eins og hægt er að bannmerkja sig hjá Þjóðskrá. Hér er að finna leiðbeiningar um hvernig er hægt að fela auglýsingar á ýmsum vefmiðlum. Jafnframt getur þú haft samband við skrifstofu flokksins og fengið aðstoð til að koma í veg fyrir að auglýsingar frá Samfylkingunni birtist þér.

Á Google í síma eða tölvu velur þú Info  > Why this ad. Turn off Show ads from Samfylkingin

Á Gmail, veldu Info > Control ads like this > Block this advertiser

Á Facebook velur þú ,,Hide ad“ við auglýsingu frá Samfylkingunni. Í kjölfarið getur þú valið að fela allar auglýsingar frá Samfylkingunni með því að velja ,,Hide all ads from Samfylkingin".

Á Instagram ýtir þú á punktana þrjá í horni auglýsingar frá Samfylkingunni. Þar getur þú valið að fela þá auglýsingu með því að velja ,,Hide ad“. Eins getur þú útilokað Samfylkinguna frá þínum reikningi með því að fara á Instagram-síðu Samfylkingarinnar, ýtt á punktana þrjá í hægra horninu uppi og valið þar Block.

Hér má finna persónuverndarstefnu Samfylkingarinnar í heild sinni.  

Formaður Samfylkingarinnar sendi eftirfarandi áskorun á alla stjórnmálaflokka 22. júlí 2021.

Í dag minnumst við þess að 10 ár eru liðin frá hinum hræðilegu atburðum í Útey og Osló, þar sem hryðjuverkamaður myrti 77 manns og særði 242, flest ungmenni, þau yngstu 14 ára gömul. Rótin að árásunum voru fordómar, rasismi og útlendingahatur, enda var þeim beint gegn þeim sem helst hafa haldið á lofti gildum alþjóðahyggju, mannúðar og umburðarlyndis.


Þrátt fyrir þetta höfum við síðasta áratuginn horft upp á mikla fjölgun árása á grundvallarréttindi minnihlutahópa víða um heim þar á meðal flóttamanna og hælisleitenda. Undirrótin er alls staðar sú sama; vaxandi fordómar, útlendingaandúð og einangrunarhyggja.

Sumir stjórnmálamenn á Vesturlöndum hafa kynt undir öfgasjónarmið og tekið þátt í að dreifa lygum og fordómafullum alhæfingum um minnihlutahópa til að afla sér vinsælda.

Ísland er því miður ekki undanskilið.

Við berum öll ábyrgð. Andvaraleysi getur leitt til þess að gengið verði á mannréttindi minnihlutahópa í samfélaginu og ýtt undir öfgar, hatur og mismunun.

Það er brýnt að formenn stjórnmálaflokka og annað forystufólk sendi skýr skilaboð um að málflutningur sem ýtir undir andúð í garð minnihlutahópa verði ekki liðinn í kosningabaráttunni framundan. Að kynda undir samfélagslegri sundrungu, fordómum og hatri getur haft ófyrirsjáanlegar afleiðingar. 

Á þessum tímamótum, þegar tíu ár eru liðin frá fjöldamorðunum í Noregi, sendi ég því eftirfarandi áskorun á formenn og forystufólk allra stjórnmálaflokka sem bjóða fram í Alþingiskosningunum 25. september.

Áskorun til stjórnmálaflokkanna 22. júlí 2021 

Hryðjuverkin í Noregi fyrir áratug voru sterk áminning um að fordómar, hatur og sundurlyndi geta haft ófyrirséðar afleiðingar í jafnvel friðsælustu samfélögum. Við sem gegnum forystu í stjórnmálum verðum öll að sýna ábyrgð.

Ég skora á formenn og forystufólk allra stjórnmálaflokka sem bjóða fram lista fyrir Alþingiskosningarnar 25. september að grípa til allra tiltækra aðgerða til að halda aftur af orðræðu og stefnumálum sem kynda undir mismunun og andúð gegn útlendingum og öðrum minnihlutahópum í samfélaginu. Við setjum tóninn. Það er ábyrgðarhlutur að beita pólitískum málflutningi hvort sem er í ræðu, riti eða á samfélagsmiðlum sem getur ýtt undir ógn og ofbeldi gagnvart minnihlutahópum – og þeim samtökum og einstaklingum sem halda á lofti fána umburðarlyndis, mannúðar og alþjóðahyggju á Íslandi.

 Logi Einarsson, formaður Samfylkingarinnar

Leit um „��“

2360 niðurstöður fundust við leit að „��“

Póstlisti Samfylkingarinnar

Samfylkingin

Flokkurinn

Flýtileiðir

Vertu í bandi:

Leit um „���������������������������“