Guðmundur Ari Sigurjónsson er tómstunda- og félagsmálafræðingur og bæjarfulltrúi fyrir Samfylkinguna á Seltjarnarnesi. Guðmundur hefur starfað í æskulýðsgeiranum um árabil. Hann sinnti einnig íþróttum á yngri árum. Spilaði handbolta og fótbolta með Gróttu. Guðmundur Ari er giftur Nönnu Kaaber Árnadóttur íþróttafræðing og saman eiga þau börnin Árna Berg sem er fæddur 2013, Kjartan Kára sem er 2016 og Magneu sem fædd er 2018.

„Ég er fæddur og uppalinn á Seltjarnarnesi. Ég flutti af Nesinu þegar ég fór að heiman en eftir að ég byrjaði með konunni minni og við fórum að hugsa um að eignast börn fór okkur báðum að langa að flytja aftur heim á Nesið. Það eru mikil forréttindi að alast upp á Nesinu enda eins konar sveit í borg. Hér er einn leikskóli, einn grunnskóli og eitt íþróttafélag svo allir kannast við flesta. Það var góður skóli að æfa íþróttir með Gróttu á sínum tíma þar sem við vorum kannski ekki besta lið landsins en við hirtum þó nokkra prúðasta liðið bikara. Á Nesinu erum við líka með sterka tengingu við sjóinn, fjöruna og náttúruna á Vestursvæðunum. Það skemmir svo ekki fyrir að þrátt fyrir þessi sveita-lífsgæði þá erum við nær miðbæ höfuðborgarinnar en mörg hverfi Reykjavíkur.“

Fékk nýja nálgun á lífið fyrir austan

Þrátt fyrir að hafa verið ánægður með að alast upp á Nesinu segir Guðmundur Ari frá því að hann hafi gengið nokkuð utan leiðar í skólakerfinu. „Ég passaði ekki alveg inn í skólakerfið frá því að ég var svona 10 ára. Átti erfitt með að sitja kyrr og hlýða í blindni því sem kennarinn vildi að ég gerði. Þegar árin liðu endaði ég í raun skólagönguna á Nesinu í eiginlegri uppreisn við skólann. Þetta varð til þess að þegar ég byrjaði að vinna í Selinu nokkrum árum seinna héldu gamlir kennarar að ég væri mættur í 12 spora kerfið og væri að bæta fyrir gamlar syndir. Eftir grunnskólagönguna fór ég í FÁ og fann mig ekki heldur þar. Áherslan var aðallega á félagslífið og tómstundir. Sumarið eftir þetta fyrsta ár ákvað ég að breyta algjörlega til og flytja austur á Eskifjörð þar sem ég vann við að leggja hitaveitu í sveitarfélaginu. Á Eskifirði eignaðist ég kærustu og marga góða vini svo ég var þar áfram einn vetur í Verkmenntaskóla Austurlands. Það var alveg dásamlegt að búa á Eskifirði og þar rann upp fyrir manni hversu mikil lífsgæði eru fólgin í því að búa í þéttu samfélagi og hversu margt er líkt með samfélaginu á Seltjarnarnesi og samfélögum á landsbyggðinni. Lífið fyrir austan var að mörgu leyti öðruvísi en í borginni, maður vann 12 tíma á dag og svo voru sveitaböll um helgar. Eftir að ég kom suður á ný fór ég fyrst í Iðnskólann í Reykjavík og þaðan lá leiðin í Fjölbrautaskólann í Breiðholti.   

Guðmundur Ari byrjaði að vinna í félagsmiðstöðinni Selinu á Seltjarnarnesi þegar hann var 19 ára. „Ég vil meina að ýmislegt hafi snúist við hjá mér þegar ég byrjaði að vinnu í Selinu hér á Seltjarnarnesi. Í ungmennastarfinu fann ég mína köllun ef svo má segja. Eftir að ég byrjaði að vinna að þessum málum sótti ég um undanþágu til að innritast í nám í tómstunda- og félagsmálafræði við Háskóla Íslands. Ég varð að fara þá leið því ég hafði ekki lokið stúdentsprófi endanlega þótt ég væri komin með nægilega margar einingar. Það var í tómstundafræðinni sem mér leið í fyrsta sinn vel í skólanum. Annars held að Margrét Sigurðardóttir eða Magga í Selinu eins og við kölluðum hana alltaf hér á Nesinu hafi verið einn besti kennari minn og hvatti hún mig áfram í námi og starfi. Magga byggði upp faglegt æskulýðsstarf af krafti og árangurinn lét ekki standa á sér. Fyrir síðustu aldamót voru unglingar á Seltjarnarnesi Íslandsmeistarar í unglingadrykkju samkvæmt könnunum Rannsóknar og greiningar. Magga byrjaði að vinna í Selinu á þessum tíma og hún byggði upp gríðarlega öflugt samstarf við skólann, Gróttu og foreldrafélagið þar sem tekið var höndum saman við að auka framboð af jákvæðum tómstundum, auka aðhald og minnka drykkju. Þessi þróun leiddi að reykingar og drykkja hvarf nánast í Grunnskóla Seltjarnarness, þátttaka í jákvæðum tómstundum jókst sem birtist í aukinni þátttöku í starfinu á Nesinu en einnig í fjölda krakka á Nesinu sem tóku að sér leiðtogahlutverk í félagslífi framhaldsskólanna. Það var ótrúlega gefandi að vinna í Selinu undir forystu Möggu þar sem markvisst var unnið að því að bjóða upp á framúrskarandi félagsmiðstöðvastarf, námskeið, viðburði og ferðalög. Áherslan var alltaf á valdeflingu, að virkja unga fólkið til þátttöku, skapa öflugt nemenda- og ungmennaráð þar sem þau fengu sjálf að skapa og stýra eigin félagsstarfi með stuðningi okkar starfsfólksins.“

Guðmundur Ari segir verulega ástæðu til þess að hafa áhyggjur af ungmennastarfinu á Nesinu eftir að starfsemi Selsins var skorin niður um 40% en niðurskurður í Selinu varð til þess að Magga í Selinu sagði upp störfum og enginn hefur verið ráðinn í hennar stað. „Þessi niðurskurður er sorgarsaga um pólitíska skammsýni og því miður er að sækja í sama farið. Ungmennadrykkja er farin að aukast sem er afar slæmt. Í Covid faraldrinum hefur félagsleg einangrun aukist – ekki síst á meðal ungmenna. Sveitarfélögin í kringum okkur ásamt ríkinu eru meðvituð um þessa stöðu og eru að leggja aukna áherslu á að auka framboð á faglegu tómstundastarfi sem miða að því að virkja ungt fólk til þátttöku. Þetta ættum við að gera líka og vonast ég til að bæjarstjórn snúi þessum niðurskurði við svo að börnin okkar fái tækifæri til að alast upp í sama öfluga og skapandi félagsstarfi eins og við sem eldri erum fengum að kynnast.

Hóf sinn pólitíska feril í Sjálfstæðisflokknum

Þegar Guðmundur Ari starfaði sem forstöðumaður í Selinu hélt hann utan um valáfanga í Valhúsaskóla sem heitir félagsmálafræði. Eftir að hafa haldið fyrirlestur um mikilvægi þess að krakkarnir taki virkan þátt í nefndum og félagslífi skólans fann hann að hann þyrfti að vera virkur þátttakandi sjálfur. „Þegar ég labbaði úr þessari kennslustund hugsaði ég hversu mikill hræsnari ég væri þar sem ég var sjálfur ekki virkur í neinum ákvörðunum í mínu nærumhverfi. Ég ákvað því að mæta á fund hjá Sjálfstæðisfélaginu á Seltjarnarnesi þar sem ég var ekki búinn að móta pólitískar skoðanir mínar og Sjálfstæðismenn voru við völd svo ég hugsaði að þar væri hægt að hafa áhrif. Það þurfti svo reyndar bara einn fund þar sem fjallað var um skóla- og tómstundastarfið á Nesinu að ég gerði mér grein fyrir því að mín sýn um öflugt menntakerfi rúmaðist ekki á fundinum þar sem megininntak í umræðunum var um hvernig mætti skera niður þjónustuna.“ Eftir þetta stutta stopp hjá Sjálfstæðismönnum mætti Guðmundur Ari á fundi hjá Samfylkingunni, þar var honum stillt upp í annað sæti á lista flokksins í sveitarstjórnarkosningunum 2014 sem skilaði sæti í bæjarstjórn Seltjarnarness. „Það var ótrúlega skemmtileg upplifun að taka þátt í kosningum í fyrsta skipti árið 2014. Í Samfylkingunni var ótrúlega samheldinn og skemmtilegur hópur sem Margrét Lind Ólafsdóttir leiddi. Það var mjög lærdómsríkt að sitja með Margréti Lind í bæjarstjórn enda var hún mjög öflugur sveitarstjórnarmaður og er hún hin Maggan sem kenndi mér svo margt, studdi vel við bakið á mér og hvatti mig áfram.“ Í sveitarstjórnarkosningunum 2018 leiddi Guðmundur Ari lista Samfylkingarinnar og fékk framboðið aftur tvö menn kjörna í bæjarstjórn.“

Guðmundur Ari hefur einnig haft afskipti af landsmálum. Hann er nú í fjórða sæti á framboðslista Samfylkingarnar í Suðvestur kjördæmi eða kraganum eins og það er oft kallað. „Ég er mjög spenntur fyrir kosningunum framundan og vonast ég eftir að fá góðan stuðning svo að ég fái tækifæri til þess að stíga inn á Alþingi sem varaþingmaður til að berjast fyrir málefnum ungs fólks, umbótum í menntamálum ásamt stórum skrefum í umhverfis- og heilbrigðismálum. Maður hefur rekið sig á það í bæjarstjórninni og ekki síður í stjórn Sambands íslenskra sveitarfélaga að það þarf öflugri talsmenn sveitarfélaga inn á Alþingi. Á Alþingi er sífellt verið að setja lög sem auka kröfur á sveitarfélög um kostnaðarsama þjónustu án þess að fjármagn fylgi. Þetta verður til þess að svigrúm sveitarfélaga til þess að veita íbúum sínum öfluga þjónustu minnkar sem verður til þess að fleiri íbúar falla á milli kerfa sem endar svo sem stór kostnaðarliður á ríki og sveitarfélög í framtíðinni.“ 

Viðtalið við Guðmund Ara birtist í Borgarblöð þann 28. ágúst.

Skemmtilegt viðtal við Guðmund Ara sem skipar 4. sætið í Kraganum og er jafnframt oddviti Samfylkingarinnar á Seltjarnarnesi. 

Þurfum öflugri talsmenn sveitarfélaga inn á Alþingi

Veruleiki okkar um allt land er að reglulega kemur upp mygla í húsnæði hins opinbera og auðvitað einkaaðila sem rekja má til rakaskemmda. Vitund um þennan vanda er góðu heilli meiri en á árum áður og þekking líka en þó er það svo að skortur er á skýrum og óyggjandi mælikvörðum um tengsl myglu og heilsufarsvanda, orsakasamhengi og úrræði. Dæmin hrannast upp af skólahúsnæði þar sem mygla hefur greinst og aðeins örfá dæmi frá liðnum mánuðum og misserum eru Kársnesskóli sem þurfti að rífa vegna umfangsmikillar myglu og Leikskólinn Austurkór í Kópavogi, Varmárskóli í Mosfellsbæ, Lundarskóli, Brekkuskóli og Oddeyrarskóli á Akureyri, Grunnskólinn og leikskólinn Tjarnarbær á Ísafirði og Grunnskólinn á Suðureyri og undanfarið hafa bæst við Grundaskóli á Akranesi, Grunnskóli Borgarbyggðar að Kleppjárnsreykjum og Nesskóli í Neskaupsstað svo nokkur dæmi séu nefnd.

Í Reykjavík hafa komið upp mál þar sem mygla hefur fundist og hefur húsnæði Fossvogsskóla verið þar efst á baugi en reyndar líka leikskólinn Kvistaborg sem staðsettur er steinsnar frá í Fossvoginum. Í Fossvogsskóla hefur verið ráðist í ýmsar viðhaldsframkvæmdir og endurbætur til að ráða niðurlögum rakavandamála samkvæmt ráðleggingum fagaðila en ekki tókst þó að komast fyrir vandann og var þá kallað eftir nýrri úttekt verkfræðistofunnar EFLU sem leiddi í ljós að þörf var á talsverðum framkvæmdum til viðbótar. Nú er verið að leggja lokahönd á aðgerðaáætlun um þær framkvæmdir sem munu hefjast í haust.

Á meðan mun skóla og frístundastarf yngri barna fara fram í Fossvogi og í nýju húsnæði Hjálpræðishersins við Suðurlandsbraut. Tekin var ákvörðun um að nýta það tímabundið í nokkrar vikur meðan verið er að flytja til landsins og setja saman ný einingahús sem verða staðsett á lóð Fossvogsskóla. Þessi ákvarðanataka byggði ekki síst á samráði við foreldra í Fossvogsskóla og tekur mið af óskum þeirra um að börnin í yngstu árgöngunum geti sótt skóla í hverfinu eða nágrenni.

Nokkur umræða hefur verið sérstaklega í Morgunblaðinu um könnun sem ákveðið var að ráðast í á dögunum til að kanna viðhorf foreldra til þriggja valkosta sem lágu fyrir um bráðabirgðahúsnæði 2.- 4. bekkjar. Ástæða þess að ráðist var í könnunina var að fulltrúar foreldra í skólaráði Fossvogsskóla töldu sig ekki geta tekið afstöðu til kostanna fyrir hönd foreldrahópsins í heild. Könnun var framkvæmd í gegnum Mentor, samskiptavef skóla og foreldra og var eingöngu send foreldrum barna í umræddum árgöngum og kennara og starfsfólks sem vinna munu með viðkomandi nemendum. Góð þátttaka var í könnuninni og bárust svör frá forráðamönnum 80% nemenda og 9 af hverjum 10 starfsmönnum. Rétt er að taka skýrt fram að enginn fótur er fyrir fréttum í Morgunblaðinu um að utanaðkomandi aðilar hafi haft áhrif á niðurstöðuna. Samráð við foreldra hefur ráðið miklu varðandi þær bráðabirgðaráðstafanir sem ákveðnar hafa verið á skólahaldi komandi vetrar meðan framkvæmdir fara fram við skólann. Það verður að segjast eins og er að betur hefði þurft að standa að verkferlum og upplýsingagjöf í húsnæðismálum Fossvogsskóla og er nauðsynlegt að gera bragarbót á því án tafar. Unnið hefur verið að því að bæta verkferil í málum sem tengjast myglu og rakaskemmdum og verður hann kynntur í næstu viku ef að líkum lætur.

Nú gætu einhverjir spurt hvort staðan í húsnæðismálum Fossvogsskóla sé dæmigerð fyrir stöðu húsnæðismála í skólum borgarinnar. Svo er alls ekki því þó skóla og frístundastarf fari fram í um 170 stofnunum og nálægt 300 byggingum í borginni þá eru dæmin ekki mörg þar sem fundist hefur mygla eða alvarlegar rakaskemmdir. Það má þakka stórauknu fjármagni til viðhalds og endurbóta skólahúsnæðis á undanförnum 4-5 árum en á því tímabili hafa fjárveitingar til almenns viðhalds grunnskóla og leikskóla þrefaldast úr tæpum 600 milljónum árið 2016 í 2100 milljónir á þessu ári. Gerð hefur verið úttekt á ástandi skólahúsnæðis í borginni og á grundvelli hennar verður ráðist í aðgerðir til að bæta enn um betur í þessum efnum, enda metnaðarmál og hluti af nýrri menntastefnu borgarinnar að búa vel að nemendum og starfsfólki varðandi húsnæði og aðstöðu til skóla og frístundastarfs.

Frambjóðendur og borgarfulltrúar Sjálfstæðisflokksins hafa farið mikinn síðustu daga og vikur í umræðu um Fossvogsskóla og viðhaft stór orð um feril málsins og sett það í flokkspólitískt ljós. Það er athyglisvert í ljósi þess að Sjálfstæðisflokkurinn bar ábyrgð á því á sínum tíma að fjármagn til viðhalds skólahúsnæðis í borginni var skorið niður við trog. Það gerðist í beinu framhaldi af bankahruninu sem Sjálfstæðisflokkurinn bar auðvitað mesta pólitíska ábyrgð á, ásamt Framsóknarflokknum. Sami Sjálfstæðisflokkur hefur farið með stjórn fjármála í ríkiskerfinu lengur en nokkur annar flokkur og skilur eftir sig sviðna jörð þegar kemur að fjármögnun velferðarkerfisins, rekstur Landspítala er alvarlega vanfjármagnaður, rekstur hjúkrunarheimila sömuleiðis og samningar við sveitarfélögin um framlög til málefna fatlaðra hafa ítrekað verið sviknir af hálfu fjármálaráðuneytis. Loforð fjármálaráðherra um að bæta sveitarfélögunum milljarða tap vegna útgreiðslu séreignasparnaðar hefur ítrekað verið svikið og nýlegar upplýsingar um myglu og afleiðingar hennar í húsnæði Landspítalans draga fram dökka mynd af vanrækslusyndum Sjálfstæðisflokksins í fjármálaráðuneytinu. Í svari heilbrigðisráðuneytis við fyrirspurn á Alþingi kom fram að yfir 400 starfsmenn spítalans hafa leitað læknis vegna afleiðinga myglu á Landspítalanum. Kjósendur ættu að hafa þetta syndaregistur í huga þegar gengið verður til kosninga 25. september næstkomandi. Þá gefst gullið tækifæri til að gefa Sjálfstæðisflokknum frí og leggja grunn að heilbrigðara samfélagi þar sem jöfnuður, mannréttindi og velferð ráða ríkjum. Samfylkingin er tilbúin að taka þátt í nýrri ríkisstjórn með sérstakri áherslu á heilbrigðismál, loftslagsmál og breytta forgangsröðun í ríkisfjármálum.

Greinin birtist fyrst á visi.is 25. ágúst 2021.

Skúli Helgason er formaður skóla- og frístundaráðs og borgarfulltrúi Samfylkingarinnar.

Samfylkingarfélagið í Reykjavík og Verkalýðsmálaráð Samfylkingarinnar bjóða í vöfflukaffi þar sem gestir geta sest niður og rætt hagsmunamál vinnandi fólks í aðdraganda kosninga. Sérstakur gestur er Þórarinn Eyfjörð nýkjörinn formaður Sameykis stéttarfélags í almannaþjónustu. Frambjóðendur verða á staðnum og Helga Vala mun leiða lifandi samtal.

Stefnukynning Samfylkingarinnar verður haldin í húsnæði Austurbrúar á Reyðarfirði klukkan 20 fimmtudaginn 2. september. 

Logi Einarsson, formaður Samfylkingarinnar, mun kynna kosningastefnu flokksins og áherslur í kjördæminu ásamt Hildu Jönu Gísladóttur og Eydísi Ásbjörnsdóttur.

Kynning á kosningastefnu Samfylkingarinnar

Á mánudaginn mun Logi Einarsson, formaður Samfylkingarinnar, kynna kosningastefnu flokksins og áherslur í kjördæminu ásamt Valgarði Lyngdal oddvita kjördæmisins, Jónínu Björgu Magnúsdóttur og Sigurði Orra Kristjánsson. Fundurinn verður haldinn í félagsheimili Samfylkingarinnar á Akranesi, Stillholti 16 - 18.

Og við tölum um loftslagsmálin. Þau eru nefnilega líka málefni fjölskyldunnar, málefni okkar hér og nú, ekki einhverra annarra og ekki einhver staðar í fjarskanum. Þau snerta okkur því loftslagsbreytingar af mannavöldum gerast nú í rauntíma, eins og öfgar í veðurfari vitna um. Þau snerta þá afkomendur okkar og fjölskyldumeðlimi sem enn eru ófæddir. Við þurfum að gera sáttmála við þau. Ef við gerum það ekki verður arfleifð okkar sú að hafa brugðist þeim.

Við getum ekki samið við náttúruöflin. Ef við röskum loftslaginu, veðrakerfinu og hafið súrnar er engin önnur leið sem dugar en að draga verulega úr losun gróðurhúsalofttegunda.

Klukkan tifar. Samfylkingin hefur mótað skýra stefnu í þessum málum og raunhæfa. Hún er meira að segja svo raunhæf og góð að Vinstri græn tóku hana upp um daginn og gerðu að sinni – gott hjá þeim – færðust frá fyrri markmiðum um samdrátt í losun gróðurhúsalofttegunda fyrir 2030 um 29% og upp í 60% eins og Samfylkingin hafði þá þegar kynnt. Munurinn á okkur og Vg í þessu er hins vegar sá að þau telja að þessum markmiðum verði náð fram með Sjálfstæðisflokkinn við völd en okkur í Samfó langar að leiða saman þau og aðra umbótaflokka og mynda ríkisstjórn um loftslagsmálin og önnur þjóðþrifamál – önnur fjölskyldumál. Hvorki formaður Sjálfstæðisflokksins né Framsóknarflokksins hafa tekið undir fyrirheit Forsætisráðherra um 40% samdrátt – hvað þá 60%.

Við höfum talað um alvöru aðgerðir í loftslagsmálum. Raunhæfar aðgerðir sem hægt er að ráðast í ef viiljinn er fyrir hendi. Og við höfum sett fram markmið okkar í tíu liðum: í fyrsta lagi ætlum við að lögfesta að minnsta kosti 60% samdrátt í losun gróðurhúsaloftttegunda fyrir árið 2030, miðað við 2005 og tryggja fjármagn í þá umbreytingu svo hún verði réttlát og sjálfbær og skilvirk. Við ætlum að flýta borgarlínu og byggja upp raunverulegar almenningssamgöngur. Alltof lengi höfum við litið á almenningssamgöngur sem neyðarbrauð en ekki sjálfsögð réttindi og flottan kost fyrir nútímafólk vill komast fljótt og vel milli staða. Við ætlum líka að gera hjólreiðar enn fýsilegri kost um allt land, en á undanförnum árum hefur orðið algjör sprenging í því að fólk nýti sér þennan holla og skemmtilega farkost. Við ætlum að ráðast í umbætur á landbúnaðarkerfinu, ekki til að draga úr stuðningi við bændur heldur til að skapa hvata til að snúa sér að umhverfisvænni framleiðslu. Við viljum hætta að skilyrða styrki við framleiðslu á kjöti og mjólk og ýta frekar undir og styðja loftslagsverkefni, kolefnisbindingu með breyttri landnotkun, endurheimt votlendis, landgræðslu og skógrækt þar sem hún á við. Við ætlum að banna notkun og flutninga á svartolíu innan 12 mílna landhelgi Íslands. Við ætlum að rafvæða hafnirnar og banna olíuborun í íslenskri efnahagslögsögu. Við ætlum að styðja við tæknilausnir og hugvit sem beinist að kolefnisföngun og kolefnisförgun – styrkja nýsköpun á borð við Carbfix. Og við ætlum að hafa hátt á alþjóðavettvangi, sem land grænnar orku, sem ætlast til þess af öðrum þjóðum að þær geri allt sem í þeirra valdi stendur til að bjarga mannkyni og lífríki Jarðar úr þeim bráðavanda sem blasir við að mati vísindamanna.

Þá verðum við líka að gera allt sem í okkar valdi stendur. Sumt af því kann að vera bölvað vesen, og kann að líta út sem fórnir, þó að ég sé sannfærður um að mannlegu hugviti séu engin takmörk sett og ótal lausnir séu til þó að þær hafi enn ekki verið fundnar – enn ekki fæðst, frekar en þeir fjölskyldumeðlimir okkar sem munu þurfa að súpa seyðið af dáðleysi okkar ef við leggjumst ekki á eitt núna.

Því það er ekki um annað að ræða en að taka höndum saman og gera sáttmála við hin óbornu.

Greinin birtist á vísi.is 31. ágúst. 

Fyrir þessar kosningar leggur Samfylkingin áherslu á málefni fjölskyldunnar – hvernig svo sem hún er í laginu. Við tölum um húsnæðismálin, barnabæturnar, fæðingarorlofið ... við tölum um kjör og aðbúnað eldra fólks: þessi gömlu góðu baráttumál jafnaðarmanna, sem þeim hefur tekist að þoka áfram í rétta átt þessar fimmtán mínútur í senn sem þeir hafa komist að við landstjórnina án þess að Sjálfstæðisflokkurinn hafi þar neitunarvald.

Áherslur okkar í Samfylkingunni snúast um tvennt fyrir þessar kosningar: lífskjör almennings og loftslagsmál. Þær aðgerðir sem við leggjum til eru sannarlega metnaðarfullar, en þær eru líka raunsæjar.

Við ætlum að innleiða hér alvöru norrænt barnabótakerfi og greiða fleiri fjölskyldum út hærri barnabætur, þannig að barnafjölskyldur með meðaltekjur fái allt að 54.000 krónur í vasann mánaðarlega. Einstæðir foreldrar meira. Við ætlum að hækka greiðslur í fæðingarorlofi og brúa bilið milli fæðingarorlofs og leikskóla í samvinnu við sveitarfélögin. Við ætlum að stórbæta lífskjör eldra fólks og öryrkja með því að hækka grunnlífeyri, draga úr skerðingum og hækka frítekjumörk til muna. Og við ætlum að skipta um kúrs á húsnæðismarkaðnum áður en hann fer alveg úr böndunum, auka framboð og lækka leiguverð.

Við ætlum að setja fjölskylduna í forgang.

Í loftslagsmálum ætlum við að hefja kraftmikla sókn sem líkja má við hin stóru samfélagsverkefni 20. aldar: raflýsingu og hitaveitu, lagningu síma og þjóðvega. Það er hægt – það er aðkallandi – og það er spennandi. En til þess að hrinda þessu í framkvæmd þurfum við nýja nálgun og alvöru aðgerðir strax á öllum sviðum samfélagsins. Skýrari markmið, metnaðarfyllri aðgerðaáætlun, hraðari orkuskipti, stórsókn í almenningssamgöngum; öll svið samfélagsins eru undir.

Við ætlum líka að bregðast við ákalli almennings um betri heilbrigðisþjónustu. Samfylkingin ætlar að auka fjármagn bæði í heilbrigðiskerfið og í forvarnir, bæta starfsskilyrði og mönnun, stytta biðlista og tryggja aðgengi fólks um land – og ráðast í stórátak í geðheilbrigðismálum!

Allt eru þetta hagsmunamál almennings. En til þess að ráðast í þessi stóru verkefni þurfum við annars konar ríkisstjórn en þá sem nú situr og lítur á biðlista sem eina tegund stöðugleika. 

Greinin birtist fyrst í Fréttablaðinu 31. ágúst. 

Betra líf fyrir þig, þína fjölskyldu og komandi kynslóðir. Þetta er meginmarkmið Samfylkingarinnar og yfirheiti kosningastefnu okkar fyrir komandi kosningar.

Logi Einarsson, formaður Samfylkingarinnar, mun kynna kosningastefnu flokksins og áherslur í kjördæminu ásamt Þórunni Sveinbjarnardóttur oddvita kjördæmisins, Guðmundi Andra Thorssyni þingmanni og Ingu Björk Margrétar Bjarnadóttur. Fundurinn verður haldinn í Bæjarbíói í Hafnarfirði kl. 15:30.

Það er ömurlegur vitnisburður um samfélag okkar að efnalitlir foreldrar þurfi að leita til hjálparstofnana til að fæða og klæða börnin sín. Það er því ekki einkamál neins að tíu þúsund börn á Íslandi búi við fátækt heldur blákaldur veruleiki sem við öll berum ábyrgð á.

Frá 1990 hefur stuðningur með hverju barni minnkað um meira en helming á Íslandi. Sannkölluð öfugþróun sem sendir þau skilaboð til almennings að barnabætur séu ekki sjálfsagður hluti velferðarkerfisins. Meira að segja þau tekjulægstu fá ekki fullar barnabætur. Þær byrja nefnilega að skerðast við tekjur umfram 351.000 kr. á mánuði. Helmingur launafólks hér á landi er með tekjur á bilinu 480.000 kr. til 749.000 kr. skv. upplýsingum Hagstofunnar.

Samfylkingin leggur til hækkun barnabóta og að þær verði greiddar út mánaðarlega. Við leggjum til að skerðingarmörk barnabótagreiðsla verði hækkuð í 600.000 kr. fyrir einstætt foreldri og 1.200.000 kr. fyrir par. Tökum dæmi um einstætt foreldri sem á tvö börn, annað undir sjö ára aldri, og er með 600.000 kr. í mánaðartekjur. Mánaðarlegar barnabætur þess verða skv. okkar tillögum 77.625 kr. Sambýlisfólk með börn á sama aldri og samanlagðar tekjur upp á 1.200.000 kr. færu í 54.208 kr. á mánuði. Barnabætur eru skattfrjálsar greiðslur og mjög mikilvægur hluti velferðarsamfélagsins enda ritað í DNA jafnaðarstefnunnar að fjárhagsstaða foreldra megi ekki koma í veg fyrir að börn og ungmenni njóti sjálfsagðra mannréttinda eins og skólamáltíða og tómstundaiðkunar.

Fyrir 30 árum var fjölskylduformið einsleitt hér á landi. Flest börn tilheyrðu hefðbundinni kjarnafjölskyldu tveggja gagnkynhneigðra foreldra eða einstæðra foreldra. Nú er öldin önnur, sem betur fer. Fjölskyldur eru fjölbreyttar, hinsegin og samsettar. Fjölmörg börn alast upp til jafns hjá foreldrum sem deila forræði. Barnabótakerfið þarf að aðlaga sig betur að veruleika fjölskyldnanna hvernig sem þær eru og styðja foreldra án tillits til lögheimilis barna. 

Greinin birtist fyrst í Kjarnanum 31. ágúst. 

Við jafnaðarmenn lítum svo á að samfélagið allt beri ábyrgð á framfærslu og velferð barna og því segir sig sjálft að stuðningur við barnafjölskyldur er réttlætismál, bæði sanngjarn og nauðsynlegur. 

Nýafstaðnir atburðir innan knattspyrnuhreyfingarinnar hafa varla farið framhjá neinum þar sem frásagnir af kynbundnu ofbeldi knattspyrnumanna í fremstu röð hefur komið upp á yfirborðið. Forysta knattspyrnusambandsins hefur því miður ekki játað opinberlega vitneskju um ofbeldið og hefur mistekist að miðla þeim sjálfsögðu skilaboðum að kynbundið ofbeldi verði aldrei liðið innan knattspyrnuhreyfingarinnar á Íslandi.

Vinnulag íþróttahreyfingarinnar í heild, sem hefur veigamiklu samfélagshlutverki að gegna og er studd af miklu leyti af opinberum fjármunum, verður líka að vera skýr.

Til að breyta viðhorfi og uppræta kynjaða og eitraða menningu innan knattspyrnuhreyfingarinnar, verða að eiga sér stað róttækari breytingar og það verður að umbylta vinnubrögðum með jafnrétti kynjanna að leiðarljósi. Kynjahlutföll í stjórnum og ráðum íþróttahreyfingarinnar verður nú að jafna hratt og fjármunum verður að dreifa jafnt milli kvenna og karla, stráka og stelpna. Ofbeldi má aldrei líðast í einni allra fjölmennustu fjöldahreyfingu á Íslandi sem gegnir svo veigamiklu hlutverki í uppeldi og forvörnum barna og ungmenna.

Við erum ennþá í stormi #metoo bylgjunnar sem hófst af fullu undir lok árs 2017. Metoo hefur reynst mörgum afskaplega erfið enda hefur verið varpað ljósi á myrkvaðar hliðar samfélags okkar. Steinum hefur verið velt við, sár hafa verið ýfð upp og við höfum flestöll þurft að horfast í augu við skuggahliðar menningu okkar og samfélags þar sem kynbundið ofbeldi og áreitni, klámvæðing og nauðgunarmenning þrífst. Við höfum krafist þess að meðvirkni og þöggunarmenning í kringum þetta allt hætti og víki fyrir uppbyggilegri og jákvæðri menningu sem byggir á jafnrétti. Við höfum líka þurft að horfast í augu við að hetjurnar okkar og barnanna okkar, hafa ekki staðið undir upphafningunni og aðdáuninni sem þær hafa fengið.

En íþróttahreyfingin er ekki eyland þegar kemur að kynbundinni áreitni, kynbundu ofbeldi eða eitraðri karlmennsku. Við höfum séð það um allt samfélagið. Til að breyta því þurfum við öll að leggjast á árarnar. Til að breyta viðhorfum og vinnubrögðum og uppræta eitraða menningu sem eru mannskemmandi. Og það er hægt ef vilji og þor er til staðar.

Við þurfum að koma kynjafræðslu inn í skólakerfið og láta kynfræðslu snúast um umburðarlyndi og virðingu fyrir sínum eigin mörkum og annarra í nánum samskiptum. Kynjuð fjárlagagerð verður að vera hluti af allri opinberrri fjármálastefnu til að tryggja að opinbert fé okkar allra renni til okkar allra, í þágu allra kynja. Það á líka við um opinberan stuðning sveitarfélaga til íþróttafélaga. Við þurfum líka að meta reynslu kvenna og störf þeirra að verðleikum með því að vinna bug á kynskiptingu vinnumarkaðarins og útrýma launamun kynjanna.

Margir hafa fundið til varnarleysis gagnvart svokölluðum dómstól götunnar í kynferðisafbrotamálum. Til þess að sú leið verði ekki ráðandi verðum við að tryggja að réttarvörslukerfið okkar virki sem skyldi. Þolendur sem treysta ekki réttarvörslukerfinu upplifa að það kerfi sé ekki fyrir þau og leita því annarra leiða til að vekja athygli á ofbeldi sem þau hafa verið beitt. Við þurfum að gera miklar umbætur á réttarstöðu þolenda svo að þau geti trúað og treyst kerfinu okkar ef brotið er á þeim.

Uppfræða þarf lögreglufólk, verjendur, sækjendur og dómara markvisst og með reglulegum hætti um kynbundna áreitni, kynjakerfið og kynferðislegt ofbeldi og áhrif þess konar ofbeldis á þolendur.

Við þurfum líka að stytta málsmeðferðartíma í kynferðisafbrotamálum og tryggja málsaðild þolenda þegar réttað er yfir gerendum í kynferðisafbrota - og heimilisofbeldismálum. Við þurfum að lögbinda rétt til launaðs leyfis í kjölfar kynferðisbrots svo þolendur fái andlegt og tilfinningalegt næði. Það þarf að rýmka gjafsóknarreglur svo fólk geti leitað réttar síns óháð tekjum og stéttarstöðu. Og það þarf líka langtímastuðning og öryggi fyrir þolendur á meðan mál eru til rannsóknar.

En umfram allt verðum við að jafna stöðu kynjanna og ráðast af alefli gegn kerfisbundinni mismunun og fordómum og tryggja jafna meðferð á öllum sviðum samfélagsins óháð kynjum, kynhneigð, kynvitund, kyneinkennum eða kyntjáningu.

Ísland hefur iðulega komið sér á verðlaunapall á Evrópumótinu og Heimsmeistarakeppninni þegar kemur að jafnrétti kynjanna. Sum okkar hafa bent á að þrátt fyrir þann góða árangur, er hér víða pottur brotin í jafnréttismálum.

Til að við höldum okkur í fremstu röð ríkja á alheims-jafnréttisleikunum, þurfum við að gefa kynbundnu ofbeldi rauða spjaldið og vera óhrædd við að dæma úr leik hvers kyns þöggun og meðvirkni með þess konar ofbeldi eða eitraðri menningu. Það er til mjög mikils að vinna.

Greinin birtist fyrst á vísi.is 30. ágúst. 

Leit um „��"

3316 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������"

3316 niðurstöður fundust við leit að „���������������������������"