Góðan daginn Vestlendingar og gleðilegt sumar! Ég heiti Jónína Björg Magnúsdóttir, 55 ára, og er í 2. sæti á lista Samfylkingar í Norðvesturkjördæmi til alþingiskosninga sem fara fram 25. september 2021. Mig langar til að kynna sjálfa mig í kjördæminu og fyrir hvaða skoðanir og lífsgildi ég stend en fyrst ber að kynna hverra manna ég er.

Þegar ég er spurð hvaðan ég sé þá hef ég alltaf sagt að ég sé fædd og uppalin á Akranesi, EN að móðurættin mín sé af Vestfjörðum og föðurættin af Austfjörðum. Faðir minn hét Magnús Sigurjón Guðmundsson og var frá Hrauni á Reyðarfirði en móðir mín hét Sigurbjörg Oddsdóttir og var fædd á Flateyri og ólst þar upp fyrstu árin en síðan á Álfadal á Ingjaldssandi og er meðal annars systir Benna Odds bílstjóra frá Flateyri og Jóns Oddssonar refaskyttu og Bjarts málara. Ég er yngst tíu systkina en níu komust á legg. Í svona stórum hópi þarf maður að hafa fyrir því að láta í sér heyra. Ég man fyrst eftir því að það hafi borið árangur að rífa kjaft þegar ég var sirka fimm ára. Þá höfðu bræðurnir verið að horfa á enska boltann og barnaefnið var byrjað. Við yngri fengum ekki frið til að horfa á okkar efni en þegar enski boltinn var þá fengum við ekki að segja orð. Ég yngsta krílið stóð þá upp og gaf þeim rökstudda yfirhalningu sem bar samstundis árangur. Bræðurnir hlógu en stóðu upp og fóru út úr stofunni.

Á æskuheimili mínu var tónlist í heiðri höfð. Pabbi söng í kórum og spilaði á orgel, nikku og melódiku og sög og kenndi okkur systkinum að það er margt tónlist þó ekki komi hún frá hefðbundnum hljóðfærum. Mamma var ekki sérlega lagviss en elskaði að dansa og oft tók pabbi upp nikkuna á sunnudagskvöldum og mamma dansaði við okkur í eldhúsinu eins og hún hafði alist upp við að amma Villa gerði í stofunni á Álfadal. Ég er ekki sérlega góður dansari en lét þó syni mína ekki fá vasapening nema þeir væru búnir að dansa nokkra hringi af „kassa-vals“ við mig.

Sambýlingur minn til 39 ára er Guðmundur Sigurðsson hljóðfæra-, húsa- og eldsmiður. Hans ættir eru að mestu frá Suðurlandsundirlendinu en hann ólst á sumrin upp á Dröngum á sumrin, stjúpsonur Sveins Kristinssonar og er þar oft nefndur Gummi Gunnvarar en tendgdamamma hét Gunnvör Björnsdóttir. Þau ár lögðu að miklu leyti til hans handverksgrunn og að kunna til verka en af Dranga bræðrum hefur hann m.a. lært grjót- og torfhleðslu. Við Gummi eigum þrjú börn, tvíburana Sigurð og Magnús fædda 1986 og dótturina Steinunni Ingu fædd í Svíþjóð 1993. Barnabörnin eru tíu og er ég mjög þakklát fyrir fjölskylduna mína. Ég er mikil barnakerling og líður aldrei betur en með eitt lítið á öxlinni og það er ekki vetur nema ég nái að búa til eins og einn snjókarl og renni mér að minnsta kosti eina ferð.

Frá æskuheimili mínu tók ég með mér út í lífið ríka réttlætiskennd, samkennd með fólki og þá sérlega þeim sem að minna mega sín í lífinu. Ég er þeim ósköpum búin að geta illa þagað þegar óréttlæti á sér stað og tek þá til máls og er þá nokkuð sama við hvern ég hef að etja eða fyrir hvern ég er að opna munninn. Ekkert starf tel ég vera fyrir neðan virðingu mína að vinna og ég hef víðtæka starfsreynslu. Mest hef ég þó unnið umönnunarstörf með fötluðum og sem stuðningsfulltrúi í grunnskólum Akraneskaupstaðar. Ég tel það heldur ekki fyrir neðan virðingu mína að hlusta á alla óháð aldri eða uppruna og læra af þeirra orðum og hugsun. Allir hafa eitthvað til málanna að leggja og við öðlumst ekki virðingu náungans nema að veita öðrum virðingu. Ég er ekki merkilegri en nokkur annar og enginn eitthvað merkilegri en ég.

Vorið 1988 tók ég stúdentinn frá Fjölbrautaskóla Akraness og hélt svo til Svíþjóðar með fjölskylduna. Fyrst áttum við heima í Stokkhólmi 1½ ár þar sem að ég nam málvísindi og ensku en fluttumst svo til Umeå í norður Svíþjóð þar sem að við áttum heima í  6½ ár og ég hélt áfram enskunáminu og vann á sambýlum fyrir fjölfatlaða. Af náminu er það að frétta að ég á enn eftir lokaritgerð til BA prófs en við fluttum heim til Íslands 1996.

Eftir heimkomuna tók við mikil vinna til að eiga í sig og á og get ég ekki sagt að þau störf hafi verið hálaunuð. Haustið 2010 hóf ég vinnu í frystihúsi HB-Granda á Akranesi og vann þar þangað til að þeir lögðu niður sína bolfiskvinnslu haustið 2017. Á þeim árum voru miklar tæknibreytingar og hagræðingar sem fólkið á gólfinu tók á sig möglunarlaust. Við tilkomu vatnsskurðarvélarinnar, sem skannaði flakið og skar út beinagarðinn með vatnssprautu, jukust afköst fyrirtækisins. Sú vél kallaði á meiri mannafla því að allt að helmingi meira fór í gegnum húsið dag hvern. En hver voru launin fyrir að leggja á sig að vinna helmingi meiri afla í húsnæði sem var jafnstórt og áður? Vélasalurinn var ekki stærri og lyftaramaðurinn eins og útspýtt hundskinn að sinna öllu sínu, fólkið í pökkuninni og konurnar á línunni sömuleiðis. Allir lögðust á eitt. Launin verkafólksins var íspinni! Þá gerði ég íspinnalagið fræga Sveiattan, sem fékk tíu þúsund áhorf á netinu fyrsta sólarhringinn. Á þremur vikum fengum við bónusinn hækkaðan, eitthvað sem hafði tekið trúnaðarmenn þrjú ár að reyna að fá úrbætur á. Ég veit því að ég get breytt kjörum fólks með því að berjast fyrir málefninu.

Frá haustinu 2017 hefur margt rekið á mínar fjörur. Fyrir utan að hafa kynnst atvinnuleysi þá hef ég samt aldrei verið atvinnulaus í langan tíma. Ég hef unnið sem stuðningsfulltrúi í Brekkubæjarskóla á Akranesi en einnig bætt við mig námslega með stuttum námskeiðum. Ég fór til dæmis í Leiktækniskóla Magnúsar Jónssonar og Þorsteins Bachmann (grunn- og framhaldsnámskeið) sem hefur hjálpað mér mikið í leik og starfi og þá sérlega við söng í erfiðum aðstæðum eins og jarðarförum.

Öðru námi hef ég líka sinnt vel og það er að bæta við þekkingu mína í þjálfun en ég er keiluþjálfari hjá Keilufélagi Akraness og hef verið aðstoðarmaður landsliðsþjálfara í verkefnum Unglingalandsliðsins í keilu, síðast í Qatar í febrúar 2020. Ég er með 3. stig af þremur í þjálfun frá ÍSÍ og 2. stig af 3 hjá ETBF (Evrópska Keilusambandinu) og hef þjálfað keilu hjá Keilufélagi Akraness í hartnær 20 ár en við hjónin rekum þriggja brauta keilusal á Akanesi, í kjallaranum á Íþróttahúsinu við Vesturgötu.

Afskipti mín af stjórnmálum hófust í kringum tvítugt og þá sem fulltrúi Alþýðubandalagsins í Æskulýðsnefnd Akraneskaupstaðar. Alþýðubandalagið var skemmtilegur flokkur með sterkar skoðanir og líka mikla tónlist og söng á fundum félagsins, tónlistin náði mér enda er hægt að segja mikið með söngtextum. Samfylkingin er samruni nokkurra flokka. Það segir mér að þar rúmist ýmsar skoðanir og ekki getum við öll verið eða þurfum að vera sammála alltaf. Hins vegar erum við í góðum málum þar sem að grunngildin um jöfnuð eru í hávegum höfð því það samræmist mínum skoðunum og gildum. Stundum vildi ég óska að minn flokkur væri meira afgerandi en með minni þátttöku í flokknum og starfi hans get ég bætt þar úr. Ég vil bæta kjör þeirra sem að minnstu launin hafa og finnst skipta máli að sinna erlenda verkafólkinu okkar og passa uppá þeirra réttindi og bæta þeirra aðbúnað. Íslenskukennsla og móðurmálskennsla fyrir börn af erlendum uppruna er mikið áhugamál hjá mér og mun ég beita mér fyrir því.

Í komandi kosningum get ég ekki ætlast til að fólk kjósi mig ef að það þekkir mig ekki eða hefur ekki séð mig svo að sumrinu ætla ég að eyða í að kynna mér kjördæmið og kjósendur þess. Ég elska að tala og ég elska kaffi og ef að þú býður mér ekki kaffi get ég kannski boðið þér sopa af minni uppáhellingu. Hlakka til að sjá ykkur sem flest og fá að syngja fyrir sem flesta annaðhvort með gítarinn í hönd, bara ég sjálf eða með fleiri mér við hlið.

Jónína Björg Magnúsdóttir (Nína), skipar annað sætið í Norðvesturkjördæmi

Kynni mig til leiks í framboði fyrir Samfylkinguna

Í lok mars lögðum við nokkrir þingmenn Samfylkingarinnar fram þingsályktunartillögu um nýja velferðarstefnu fyrir aldraða. Þar er lagt til að snúið verði frá ríkjandi viðhorfum í þjónustu við aldraða og markvisst horfið frá einhliða stofnanasýn.

Með tillögunni er lögð höfuðáhersla á að hver einstaklingur eigi þess kost að búa á eigin heimili til æviloka með persónulegum stuðningsúrræðum við hæfi og samkvæmt eigin óskum.

Ný sýn stjórnvalda auðveldi eldra fólki umskipti í aðgengilegt húsnæði með virkum, þekktum og raunhæfum leiðum. Stefnuleysi og takmörkuð framtíðarsýn hefur ríkt í málaflokknum og brýnt að stjórnvöld stigi skref í þessa átt, sýni frumkvæði, forgangsraði með nýjum hætti og greiði með beinni aðkomu fyrir stórauknu framboði á hentugum og öruggum búsetumöguleikum. Beinir hvatar geta m.a. falist í fjárhagslegri fyrirgreiðslu þar sem það á við. Allt til þess að tóna niður áralanga og kostnaðarsama stofnanavistun.

Í þessu sambandi verði fjölmargir möguleikar á sviði heilbrigðis- og velferðartækni nýttir eins og þekkt er víða um lönd. Sérstakt þróunarverkefni verði sett á laggirnar varðandi þennan þátt.

Að þessu beinist okkar sýn í Samfylkingunni og áskoranir gagnvart fagfólki sem velur sér öldrunarþjónustu sem starfsvettvang eru talsverðar. Til þess að tryggja framkvæmd þessara veigamiklu áherslubreytinga er mikilvægt að kveikja áhuga og skilning víða. Lykilatriði er fá til samstarfs bæði fagfólk og annað sérhæft starfsfólk og tryggja þjálfun og innleiðingu í samræmi við áherslur stjórnvalda um einstaklingsbundna þjónustu á eigin heimili.

Liður í umbreytingarferlinu verði jafnframt endurskoðun á fjárhagslegri umgjörð málaflokksins, þ.m.t. fjármögnun stofnanavistunar og greiðsluþátttöku einstaklinga.

Markmið um persónulegt og fjárhagslegt sjálfræði og sjálfstæði verði virt í öllu tilliti.

Endurskoðun almannatryggingakerfisins er síðan sjálfstætt og brýnt verkefni sem æskilegt er að unnið verði að samhliða. Þar eru álitaefnin mörg, m.a. um vaxandi áhrif lífeyrissjóðsgreiðslna hjá eldra fólki og tengsl þeirra við greiðslur almannatrygginga.

Hluti af verkefninu verði þróun á reiknilíkani sem geri sveitarfélögum kleift að veita viðeigandi, markvissa og breytilega þjónustu eftir þörf og aðstæðum hverju sinni.

Með því að undirstrika viðhorfs- og stefnubreytingu verði lög um málefni aldraðra nr. 125/1999 endurskoðuð í því augnamiði að þau verði felld úr gildi.

Mikilvægt er að vandað verði til undirbúnings og faglegur og fjárhagslegur ávinningur gerður mælanlegur, metinn reglulega og verkefninu skipt í tímasetta áfanga. Það á bæði við um þá margvíslegu þætti sem snúa að ríkisvaldinu og sveitarfélögum en ekki síst að þeim sem eiga mestra hagsmuna að gæta, hinum öldruðu sjálfum.

Um þessi atriði fjallar hófstillt en á sama tíma róttæk og löngu tímabær þingsályktunartillaga okkar í Samfylkingunni, sem nánar má lesa um á vef Alþingis.

Guðjón Brjánsson, þingmaður, skrifar hér um þingsályktunartillögu Samfylkingarinnar um rétt aldraðra til að velja sér sjálft hvernig það ver sínum efri árum.

MeToo-byltingin hefur valdið stórkostlegri hugarfarsbreytingu en það er stjórnmálafólks að fylgja byltingunni eftir með stórum ákvörðunum: áþreifanlegum breytingum á umgjörð og leikreglum samfélagsins í þágu þolenda.

Það er ekki nóg að segjast styðja þolendur; kjörnir fulltrúar verða líka að hafa pólitískan metnað til að skapa þolendavænna samfélag og bæta réttarstöðu þeirra sem brotið er á. Eftirfarandi eru sjö aðgerðir sem við í Samfylkingunni óskum eftir umboði kjósenda til að hrinda í framkvæmd á næsta kjörtímabili.

Breytum lögum um meðferð sakamála þannig að þau sem kæra kynferðisbrot eða ofbeldi í nánum samböndum fái aðild að sakamálinu eða flest þau réttindi sem felast í málsaðild. Núverandi ríkisstjórn hefur ekki orðið við ákallinu um slíka réttarbót. Auðvitað eiga þolendur og réttargæslumenn þeirra að geta fylgst með réttarhöldum yfir geranda, lagt fram viðbótarsönnunargögn, spurt ákærða og vitni viðbótarspurninga og loks haft heimild til áfrýjunar. Slík réttindi eru tryggð í Svíþjóð, Noregi og Finnlandi og þannig eigum við að hafa það á Íslandi.

Rýmkum gjafsóknarreglur svo þolendur heimilis- og kynferðisofbeldis geti einnig sótt rétt sinn í einkamáli án þess að taka á sig fjárhagsáhættu og gerum ríkissjóð ábyrgan fyrir dæmdum bótum í einkamálum gegn gerendum með sams konar hætti og kveðið er á um í lögum um greiðslu ríkissjóðs á bótum til þolenda afbrota.

Ráðumst í skipulegt átak til að tryggja að lögregla hafi nægan mannafla til að rannsaka kynferðis- og heimilisofbeldismál vel og málin fái skjótari málsmeðferð í réttarkerfinu. Í tilvikum þar sem sakborningur fær refsilækkun vegna tafa hjá ákæruvaldi eða dómstólum ætti brota­þoli jafnframt að fá hærri bætur sem að hluta greiðist úr ríkissjóði.

Tryggjum brotaþolum langtíma stuðning og öryggi meðan mál eru til rannsóknar og tryggjum að starfandi séu þolendamiðstöðvar um allt land með auknum fjárframlögum. Stuðningur við brotaþola er mikilvægt samfélagslegt verkefni. Tökum sérstaklega utan um fatlað fólk, fólk af erlendum uppruna, heimilislaust fólk, transfólk og jaðarsetta hópa sem eru sérstaklega berskjaldaðir fyrir ofbeldi.

Ráðumst í endurskoðun á lagaumhverfi og stjórnsýslu barnaverndar- og umgengnismála til að tryggja að börn njóti raunverulega vafans þegar uppi er rökstuddur grunur um ofbeldi á heimili. Ekkert barn á að vera þvingað til umgengni við foreldri sem hefur verið dæmt fyrir eða er grunað um ofbeldi gegn því. Ríkisstjórn Jóhönnu Sigurðardóttur skerpti á vernd barna gegn ofbeldi með breytingum á barnalögum árið 2012 en síðan hefur lítið hreyfst í þessum efnum. Tökum upp þráðinn þaðan sem frá var horfið.

Tryggjum fólki aukinn rétt til launaðs leyfis í kjölfar heimilsofbeldis eins og lög í Nýja Sjálandi heimila án þess að gengið sé á önnur réttindi, almennt veikindafrí og orlof.

Stofnum Ofbeldisvarnarráð Íslands með bolmagn til að vinna markvisst að forvörnum og fræðslu gegn ofbeldi í samvinnu við sveitarfélög um allt land, lögreglu og grasrótarhreyfingar. Starfsemi Ofbeldisvarnarnefndar Reykjavíkurborgar hefur gefist vel og við þurfum sams konar starf um allt land. Jafnframt þarf að rýmka lagaheimildir til miðlunar upplýsinga um heimilisofbeldismál milli félagsþjónustu sveitarfélaga, heilbrigðisstofnana, skóla og lögregluembætta.

Umbæturnar sem hér hefur verið lýst taka mið af reynslu nágrannaþjóða okkar og eru í senn raunhæfar og róttækar. Ríkisstjórn Katrínar Jakobsdóttur virðist hafa afhent Sjálfstæðisflokknum neitunarvald í þessum málaflokki eins og svo mörgum öðrum, en við í Samfylkingunni vonumst eftir afgerandi pólitísku umboði í haust til að hrinda aðgerðunum í framkvæmd og stórbæta þannig stöðu þolenda á Íslandi.

Heiða Björg Hilmisdóttir, varaformaður Samfylkingarinnar og formaður velferðarráðs, og Jóhann Páll Jóhannsson þingframbjóðandi í 2. sæti í Reykjavík norður, leggja til sjö aðgerðir til að búa til þolendavænna samfélag og bæta réttarstöðu þeirra sem brotið er á.

Stór skref strax: Svona bætum við réttarstöðu þolenda

Þingflokkur Samfylkingarinnar fordæmir harðlega ofbeldisverk Ísraelshers, eins öflugasta hers í heimi, gagnvart saklausum borgurum Palestínu undanfarna daga þar sem 31 barn og 119 fullorðnir hafa nú verið drepin í loftárásunum. Þingflokkurinn harmar líka lát ísraelska borgara, 8 fullorðinna og 2 barna sem látist hafa í eldflaugaskotum frá Gaza-strönd. 

Loftárásir Ísrelshers gagnvart Palestínumönnum eru verstu stríðsátök á svæðinu síðan 2014, jafnvel lengur, og eru skýr og ólíðandi brot á alþjóðalögum og alþjóðasamningum.  Loftáárásirnar bætast við ólöglegt hernám Ísraela á Vesturbakkanum, aðskilnaðarstefnu ísraelska stjórnvaldagagnvart Palestínumönnum og ofsóknir og mannréttindabrotísraelska stjórnvalda gagnvart Palestínumönnum. Því miður virðast nýjustu yfirlýsingar forsætisráðherra Ísraels ekki gefa neina von um vilja hans til friðsamlegra lausna. 

Þessum átökum verður að linna strax og alþjóðasamfélagið verður að gefa skýr og klár skilaboð um að friðsamlegar lausnir í deilunni milli Ísrael og Palestínu er eina lausnin. Þingflokkur Samfylkingarinnar áréttar að tveggja ríkja lausnin er sú lausn sem þarf ávallt að tala fyrir og Ísland hefur alltaf stutt dyggilega enda er það m.a. grunnurinn að skiptingu Jerúsalemborgar sem ísraelsk stjórnvöld hafa virt að vettugi undanfarin ár. 

 Þingmenn Samfylkingarinnar í utanríkismálanefnd Alþingis hafa kallað eftir að utanríkisráðherra Íslands komi hið fyrsta á fund nefndarinnar til að ræða viðbrögð ríkisstjórnar Íslands við ástandinu. 

Ríkisstjórn Íslands verður að vera með afdráttarlaus skilaboð og taka skýra afstöðu með saklausum borgurum Palestínu sem verða fórnarlömb ofureflis eins sterkasta hernaðarríkis heims. 

Ísland á í sérstöku sambandi við Palestínu og var fyrsta vestræna ríkið til að viðurkenna sjálfstæði og fullveldi Palestínu með samhljóða samþykkt Alþingis árið 2011.   Þingflokkur Samfylkingarinnar hvetur ríkisstjórn Íslands til að senda skýr skilaboð til deiluaðila um að alþjóðalög séu virt og að friðsamlegum leiðum sé beitt í deilum Ísraelmanna og Palestínumanna. Hryllilegir atburðir undanfarna daga hafa sýnt að nú er nauðsyn sem aldrei fyrr og þar verður rödd Íslands að vera skýr en aðgerðir verða líka að fylgja orðum og yfirlýsingum. 

Þingflokkur Samfylkingarinnar fordæmir ofbeldisverk gagnvart Palestínumönnum

Hún Inga Björk er okkur Samfylkingarfólki ekki ókunnug enda mikill jafnaðarmaður, bæði er hún fyrrverandi formaður framkvæmdastjórnar og núna skipar hún 3. sæti í Suðvesturkjördæmi. Inga Björk hefur um árabil barist ötullega fyrir mannréttindum og er mikill fötlunaraktivisti. Í gærkvöldi var hún í Íslandi í dag þar sem hún ræddi foreldrahlutverkið og þá umræðu í samfélaginu um foreldra með fatlanir. Við mælum með að allir horfi á viðtalið við Ingu! 

„ Sumir þurfa aðstoð við heimanám barnanna sinna, sumir þurfa aðstoð við að sækja börnin í skólann, við þurfum öll aðstoð það er bara mismunandi hvaða aðstoð fólk þarf. Það er mikilvægt að bera virðingu fyrir fólki og vera ekki að áætla hvað fólk getur og getur ekki því við þekkjum fólk ekki neitt. Það að fólk sé fatlað, hinsegin, komi frá tilteknu svæði, trúi á tiltekinn guð segir ekki neitt um manneskjuna, við getum ekki dæmt fólk eftir því hvaða hópi það tilheyrir og það er ekkert öðruvísi með fatlaða foreldra, við erum eins ólík og við erum mörg.“ - Inga Björk Margrétar Bjarnadóttir. 

Inga Björk hefur um árabil barist ötullega fyrir mannréttindum og er mikill fötlunaraktivisti.

Inga Björk ræddi við Ísland í dag um foreldrahlutverkið og margt margt fleira

Stefnumót með frambjóðendum – spurt og spjallað?

Hver er uppáhaldsmatur Rósu?
Fyrir hverju brennur hún?

Þetta og margt margt fleira færðu að vita ef þú sest við skjáinn á næstu dögum til að kynnast frambjóðendum okkar í þremur efstu sætunum í Reykjavíkurkjördæmunum suður og norður.

„Ég hlakka mjög til að taka þátt í starfi Samfylkingarinnar og að leggja mitt á vogarskálarnar til að bæta íslenskt samfélag og hef fulla trú á að Samfylkingin og pólitískar áherslur flokksins eigi að vera í næstu ríkisstjórn.“ - Rósa Björk.

Samfylkingarfélagið í Reykjavík býður til rafrænna stefnumóta með þeim Jóhanni Páli, Helgu Völu, Kristrúnu, Dagbjörtu, Viðari og Rósu Björk núna í byrjun maí sem hér segir: 

Þriðjudaginn 4. maí - Jóhann Páll Jóhannsson: https://zoom.us/j/97667176763

Miðvikudaginn 5. maí - Helga Vala Helgadóttir: https://zoom.us/j/94318407885

Fimmtudaginn 6. maí - Kristrún Frostadóttir: https://zoom.us/j/95333064055


Miðvikudaginn 12. maí - Viðar Eggertsson: https://zoom.us/j/94026634251 

Miðvikudaginn 19, maí - Rósa Björk Brynjólfsdóttir: https://zoom.us/j/97255671240

Fimmtudaginn 20. maí - Dagbjört Hákonardóttir: https://zoom.us/j/99647786954

Rósa Björk Brynjólfsdóttir, þingkona Samfylkingarinnar, áður óháð þingkona og áður þingkona VG. Sit í utanríkismálanefnd Alþingis, form. Íslandsdeildar Evrópuráðsþingsins og fyrrv. varaforseti Evrópuráðsþingsins.

Hjúskaparstaða og aðstæður; Er í sambúð með Kristjáni Guy Burgess, alþjóðastjórnmálafræðingi og fyrrv. framkvæmdastjóra Samfylkingarinnar. Eigum 3 börn; Bjart (2012), Snæfríði (2013), Amíru Snærós (2003).

Heimilisfang; Melhagi 17, 107, Reykjavík. 

Pólitískar áherslur Samfylkingarinnar og mínar eru nátengdar með mikilvægi á aukinn jöfnuð í samfélaginu þar sem allir geta notið sín á eigin forsendum, burtséð frá stétt eða stöðu en líka á frið, sjálfbærni, grænar lausnir og opið, framsækið og fjölbreytt samfélag með áherslu á virka fjölþætta utanríkisstefnu. Að undanförnu hefur Samfylkingin að auki lagt mun meiri og skýrari þunga á loftlagsmálin og umhverfismálin en áður og lagt fram góða áætlun um græna viðspyrnu út úr Covid-19 kreppunni á Alþingi og svo “Græna planið” undir forystu og að frumkvæði Samfylkingarinnar í Reykjavíkurborg. Það gerði útslagið fyrir mig þegar ég tók ákvörðun um að ganga í Samfylkinguna og þingflokk hennar þann 16. desember. Ég hlakka mjög til að taka þátt í starfi Samfylkingarinnar og að leggja mitt á vogarskálarnar til að bæta íslenskt samfélag og hef fulla trú á að Samfylkingin og pólitískar áherslur flokksins eigi að vera í næstu ríkisstjórn.

Stefnumót með frambjóðanda - Rósa Björk Brynjólfsdóttir

Samfylkingarfélagið í Árborg og nágrenni boðar til aðalfundar, miðvikudaginn 19 maí, kl. 20.00 í sal félagsins á Eyravegi 15, Selfossi.

Dagskrá; hefðbundin aðalfundarstörf þ.m.t. kosning stjórnar.

Stjórn félagsins hvetur félaga og stuðningsfólk á svæðinu til þess að mæta og móta áherslur fyrir komandi starfsár.

Stjórn Samfylkingarfélagsins í Árborg og nágrenni.

Máttarstólpar er sjóður sem hefur það hlutverk að styðja við uppbyggingu flokksstarfs Samfylkingarinnar um land allt, sjóðurinn er fjármagnaður með frjálsum framlögum flokksmanna og framlagi frá flokknum. Sjóðurinn hefur styrkt fjölmörg verkefni frá stofnun hans 2005. Ný stjórn var skipuð á fundi framkvæmdastjórnar 22. febrúar s.l.  þau eru; Kristín Sævarsdóttir Kópavogi sem jafnframt er formaður stjórnar, Bryndís Friðbjörnsdóttir Ísafirði, Björgvin G. Sigurðsson Árborg, Jóhann Jónsson Akureyri og Sigfús Ómar Höskuldsson Reykjavík. Styrkjum verður úthlutað tvisvar á ári og í vetur voru samþykktir styrkir fyrir 1,3 millj kr. en heildar framlag til sjóðsins í ár er 3,6 millj kr. 

Rétt til að sækja um styrki í sjóðinn eiga öll aðildarfélög Samfylkingarinnar, kjördæmisráð, sérsambönd og einstakir flokksfélagar. Einnig önnur þau félög og stofnanir á vegum flokksins sem hyggjast standa fyrir sérstökum verkefnum.

Umsóknarfrestur um styrk úr annarri úthlutun þessa árs er til 20. maíu, msóknir þurfa að berast skrifstofu flokksins á netfangið gerda@samfylking.is fyrir þann tíma.  Skila skal umsóknum til sjóðsins með bréfi er tiltekur tilgang og inntak verkefnis, ábyrgðaraðila, framkvæmdaraðila, verkáætlun og fjárhagsáætlun. Þá skal koma fram fjárhæð styrkumsóknar.

Stjórn sjóðsins fer yfir umsóknir og úthlutar styrkjum. Styrkir eru greiddir í tvennu lagi og nauðsynlegt er að skila lokaskýrslu um framgang verkefnisins og mat á áragri til að fá lokagreiðslu.

Stjórn Máttarstólpa hefur tekið saman eftirfarandi lista sem ætlað er að gefa hugmyndir um verkefni sem til greina gætu komið við úthlutun styrkja.  Rétt er að ítreka að þessum lista er einungis ætlað að vekja innblástur en ekki þrengja á neinn hátt svigrúm flokksmanna til að leggja til hver þau verkefni sem hugur þeirra stendur til sem eflt geta innra starf flokksins. Listinn er á engan hátt tæmandi og er hvatt til þess að félagar noti  hugmyndaflugið  og sköpunarkraft við mótun verkefna.

Hugmyndalisti:
•          útgáfuverkefni, þ.e. ný verkefni til viðbótar reglulegri útgáfu
•          málþing og fundaraðir um pólitík
•          fyrirlestrar
•          námskeiðahald
•          menningardagskrá
•          átak til söfnunar nýrra flokksfélaga
•          rannsóknarverkefni í þágu stefnumótunar
•          ...og margt fleira

Meðfylgjandi er reglugerð og úthlutunarreglur Máttarstólpa.

Máttarstólpar - umsóknarfrestur er til 20. maí

Undanfarið ár hefur Borgarstjórn verið samtaka í því að huga þurfi að áhrifum Covid 19 á geðheilbrigði og vellíðan borgarbúa. Við settum af stað Borgarvaktina þar sem við fylgjumst með stöðu mála, mánuð frá mánuð, og höfum tekið til umfjöllunar inn í Velferðarráði niðurstöður kannana landlæknis og rannsóknar og greininga, á áhrifum á andlega líðan íbúa.

Niðurstaðan er að faraldurinn hefur haft áhrif á fólk í öllum aldurshópum og eru vísbendingar um að áhrifin séu mest á ungt fólk og svo þau sem eldri eru. Með auknu atvinnuleysi er ljóst að neikvæð áhrif á líðan verði meiri, það er því mikil þörf fyrir mótvægisaðgerðir eins og Reykjavíkurborg setti tóninn með í Græna planinu. Þar er horft til þess að sú græna umbreyt­ing sem fyrirhuguð er í borginni byggi á rétt­læti, sann­girni og þátt­töku og að íbúar búi við öryggi og geti haft jákvæð áhrif á eigið líf og annarra í nútíð og framtíð. 

Við höfum ekki bara varið störf hjá borginni heldur fjárfest í tímabundnum viðbótarstörfum til að skapa tækifæri fyrir fólk sem misst hefur vinnuna eða fær ekki tækifæri á vinnumarkaði til að bæta við reynslu sína. Þessi störf eru hluti af þeim vinnumarkaðsaðgerðum sem samþykkt var að fara í. Starfs­mönnum Reykja­víkur­borgar fjölgaði um 5% á síðasta ári, alls um 348 og starfa þeir yfir 90% í velferðar og menntamálum að þjónusta íbúa. Sumar­störfum var fjölgað í fyrra þar sem í boði voru 200 sumarstörf fyrir 17 ára og 400 sumarstörf fyrir 18 ára og eldri auk sumarafleysininga, þar vorum við ekki síst að horfa til erfið­leika stúdenta við að fá sumar­störf og verkefni þeirra voru hreint út sagt fjölbreytt og mikilvæg. Eins voru samþykkt 200 störf fyrir einstaklinga á atvinnuleysisbótum bótarétt og fyrir notendur fjárhagsaðstoðar án bótaréttar. Sama er upp á teningnum í ár en komið hefur verið upp Atvinnu- og virknimiðlun og markvissu samstarfi við Hugarafl sem eru með þjónustu við yngri einstaklinga sem glíma við geðrænar áskoranir og fá fjárhagsaðstoð og framfærslu. Sumarstörfin hjá Reykjavíkurborg í ár eru tæplega 1700, þar af um 250 störf fyrir 17 ára einstaklinga.

En lífið er ekki bara vinna og við höfum sannarlega reynt að bregðast við stöðunni um alla borg með fjölbreyttum hætti. Það hefur verið farið í fjölmargar og fjölþættar aðgerðir, þvert á aldurshópa og hin ýmsu svið og stofnanir borgarinnar til að stuðla að betri líðan og aukinni virkni á tímum covid-19. Fyrir elsta aldurshópinn hafa verkefni líkt og „spjöllum saman“ verið komið á laggirnar en þar sem haft var samband við alla 85 ára og eldri sem búa einir og voru með þjónustu frá velferðarsviði. Þetta verkefni var svo víkkað enn frekar út og aldurshópurinn breikkaður og öllum boðið að eignast símavini. Þetta var gert í góðri samvinnu við Félag eldri borgara, Landsamband eldri borgara og Rauða krossinn.

Eins var flýtt fyrir svokallaðri Velferðartæknismiðju velferðasviðs þar sem skjáheimsóknir með myndsímtölum voru tekin upp. Farið var í að efla félagsstarf fullorðinna með styrk frá Félags- og barnamálaráðuneytinu með áherslu á hreyfingu og andlega heilsu með hinum ýmsum námskeiðum til dæmis í notkun snjalltækja.

Haft var að leiðarljósi að reyna að raska sem minnst lífi hópa sem að eru í meiri hættu á félagslegri einangrun. Sem dæmi var hugað sérstaklega að fötluðum einstaklingum í búsetuúrræðum á vegum velferðarsviðs. Þar varð að færa félagsstarfið og virknina heim enda ekki unt að sækja sjúkraþjálfun, aðra hreyfingu eða félagslíf utan heimilis svo vikum skipti. Ráðgjafar í þjónustumiðstöðum fóru í átak í að hringja í borgarbúa og eins voru haldnir reglubundnir upplýsingafundir með hagsmunasamtökum og réttindagæslumönnum fatlaðs fólks á mismunandi stigum faraldursins. Vinnumarkaðsaðgerðir og sumarstörf í skapandi greinum voru líka nýtt til að skapa skemmtilegar samverustundir í íbúðarkjörnum fatlaðra einstaklinga og eins voru sumarstörf nýtt til stykrja starfsemi íbúðarkjarna og sambýla til að styðja betur að félagsþáttöku íbúa.

Hvað varðar málefni barna og ungmenna þá hefur verið farið í hinar ýmsu aðgerðir til að styðja betur við börna í viðkvæmri stöðu, börn sem bíða skólaþjónustu en þeim hefur fjölgað nú á tímum covid og við því þarf að bregðast. Í boði er sérstakur íþrótta og tómstundarstyrkur til barna tekjulágra foreldra og við höfum breytt reglum þannig að börn foreldra sem fá fjárhagsaðstoð til framfæslu eru gjaldfrjálst í mat í skóla, frístund og leikskóla og geta fengið styrki til frekari tómstunda. Vinnumarkaðsaðgerðir gerðu líka kleift að ráða inn starfssmenn fyrir Velkomin verkefnið sem er sérstaklega miðað að foreldrum og börnum af erlendum uppruna í borginni en við viljum sannarlega taka vel á móti öllum nýjum íbúum í Reykjavík. Það er erfitt að flytja til nýs lands hvað þá á tímum heimsfaraldurs og tilheyrandi samkomutakmarkana.

Það er alveg ljóst að Covid-19 hefur haft áhrif á líðan hinna ýmsu hópa og þurfum við að taka vel utan um hvort annað og samfélagið allt. Hér hef ég nefnt nokkur af verkefnum Reykjavíkur en við ætlum að gera það sem í okkar valdi stendur til þess að stuðla að heilsu og hamingju allra borgarbúa. Verum skapandi og pössum að halda í samstöðuna nú þegar vonandi fer að sjá fyrir endann á þessum faraldri. Við þurfum líka samstöðu í uppbyggingunni, samstöðu um að enginn verði skilinn eftir.

Heiða Björg Hilmisdóttir, varaformaður Samfylkingarinnar og formaður Velferðarráðs Reykjavíkurborgar, tekur saman nokkrar mikilvægar aðgerðir sem Reykjavíkurborg hefur hrundið af stað í kjölfar Covid 19. 

Fyrrum nemandi minn, nú fjögurra barna móðir í Bolungarvík, fór á dögunum til kvensjúkdómalæknis. Hún lýsti einkennum fyrir lækninum og læknirinn tók leghálssýni, sagði henni síðan að samkvæmt lýsingunum gæti verið um frumuvöxt eða krabbamein að ræða en nú tæki við 8-10 vikna bið eftir niðurstöðum greiningar á sýninu.

Rúmir tveir mánuðir í óvissu er sem sagt það sem konum er boðið upp á í heilbrigðiskerfinu á Íslandi, nú á árinu 2021. Rúmir tveir mánuðir í bið eftir niðurstöðum er það sem læknum á Íslandi er boðið upp á til að þeir geti lokið sinni vinnu og gefið sjúklingum sínum svör eða skipulagt næstu skref í meðferð, ef á þarf að halda.

Í upphafi þessa árs var fyrirkomulagi skimunar á leghálskrabbameini breytt á þann veg að nú sjá heilsugæslustöðvar um sýnatöku og sýnin eru svo send úr landi til greiningar, til danskrar rannsóknarstofu í Hvidovre. Það má sýna þeirri ákvörðun skilning að færa sýnatökuna inn á heilsugæslustöðvarnar, því með henni færist sú þjónusta nær konunum sjálfum og verkefnið getur styrkt starfsemi heilsugæslunnar. Ákvörðun um að senda sýnin úr landi var hins vegar tekin í trássi við ábendingar fjölmargra sérfræðinga um að þessa vinnu væri vel hægt að vinna hér á landi. Meðal annars hefur félag íslenskra rannsóknarlækna lýst furðu sinni yfir þessari ákvörðun og bent á að sýkla- og veirufræðideild Landspítalans hafi yfir að ráða bæði tækjum og sérfræðiþekkingu til að sinna þessum greiningum. Nú er hins vegar hætta á því að sú ákvörðun heilbrigðisyfirvalda að færa rannsóknirnar úr landi muni valda því að áralöng og yfirgripsmikil þekking sem byggst hefur upp hér á landi muni glatast.

Ekki verður annað séð en að kostnaður hafi verið látinn ráða för við þá ákvarðanatöku heilbrigðisráðherra að sniðganga íslenskt rannsóknarfólk og þann tækjakost sem Landspítalinn hefur yfir að ráða. Það hefði vissulega þurft að kosta einhverju til svo að hægt yrði að flytja þessa greiningarvinnu inn á Landspítalann en þrátt fyrir ítrekaðar fyrirspurnir liggur kostnaðargreiningin ekki enn fyrir og því óljóst hvort um sparnað sé að ræða. Heilbrigðisráðherra rökstuddi ákvörðunina í byrjun árs með því að hún snerist um öryggi kvenna, en nú 4 mánuðum síðar er ljóst að öryggi kvenna er stefnt í hættu. Smám saman hefur komið í ljós hversu illa ígrunduð þessi ákvörðun virðist hafa verið. Svör berast seint og illa frá dönsku rannsóknarstofunni og alls konar flækjustig virðist vera á leiðinni. Meðal annars þarf að færa öll sýni yfir á danskar kennitölur þegar þau berast þangað og þegar niðurstöður berast þarf að færa þær aftur yfir á íslenskar kennitölur. Augljóst er að flækjustig af þessu tagi tefur ferlið og getur aukið líkur á mistökum. Einnig hefur talsambandið milli lækna og rannsóknaraðila rofnað, því lítil tengsl eru við dönsku rannsóknarstofuna. Slíkt talsamband getur verið algerlega nauðsynlegt læknum við ákvarðanatöku um frekari meðferð.

Augljóst er að öryggi kvenna hefur ekki verið haft í fyrirrúmi við þessar aðgerðir og eftir standa þúsundir kvenna á Íslandi í fullkominni óvissu um eigið öryggi og heilsu. Getum við sætt okkur við að þannig sé staðið að málum í íslensku heilbrigðiskerfi á árinu 2021?

 Greinin birtist í Skessuhorni 6. maí.

Valgarður Lyngdal Jónsson, þingframbjóðandi í Norðvesturkjördæmi - 1. sæti, skrifa um þá óvissu sem konum er boðið upp á í heilbrigðiskerfinu á Íslandi í dag. 

Leit um „��"

3401 niðurstaða fannst við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3401 niðurstaða fannst við leit að „���������������������������������������������������"