Fyrir barn sem bíður eftir nauðsynlegri og lögbundinni þjónustu, hvort sem að það er stoðþjónusta á borð við meðferð hjá talmeinafræðingi, sérkennslu eða önnur einstaklingsmiðaðri stuðningsþjónusta á borð við aðstoð í bekk, þá skiptir þessi tími sem fer í bið miklu máli þegar kemur að velferð og líðan barnsins á viðkvæmu þroskaskeiði.

Við þekkjum líklegast öll einhvern sem hefur beðið eftir stoð- eða stuðningsþjónustu. Ég þekki sjálf þessa bið af eigin raun en barnið mitt beið eftir aðstoð talmeinafræðings á vegum sveitarfélagsins í tæp fjögur ár. Þeir sérfræðingar sem starfa hjá sveitarfélaginu anna ekki þeim fjölda barna sem að þurfa á meðferð hjá talmeinafræðingi að halda en ég upplifði jafnframt að kerfið gæti verið skilvirkara og hraðvirkara. Það jók svo líka álagið og dró úr tiltrú manns á kerfinu að þurfa stanslaust að ýta á eftir þjónustu sem að ætti að vera sjálfsögð.

Kópavogur er fjölmennt sveitarfélag með margar skólastofnanir og hér býr fjölbreyttur hópur barna. Það kemur oft í ljós í skólanum að barn þurfi meiri stuðning eða þjónustu af einhverju tagi. Bæði í leikskólum og grunnskólum bæjarins starfar öflugt fagfólk sem greinir þörf fyrir stuðning en tilvikunum þar sem þörf er á stuðningi fer fjölgandi og þau eru oft flóknari úrvinnslu en áður. Stór hluti af vandanum er að börnin eru mörg og vandinn oft flókinn. Farsældarlögin sem gera skýra kröfu á að börn fái samþætta þjónustu án hindrana í gegnum einn tengilið hafa aukið álagið á velferðarkerfið okkar en þau bjóða jafnframt upp á lausn á vandanum. Hér er mikilvægt að við forgangsröðum rétt og að við höfum eina heildarsýn á velferð barna og ungmenna en skiptum þessu ekki niður í annars vegar velferðarmál og hins vegar menntamál.

Samfylkingin vill styrkja kerfið í heild sinni. Við viljum fjölga fagfólki innan skólanna til að stytta biðlista og vera í stakk búin til að grípa börn sem þurfa þjónustu fyrr. Hér erum við að horfa til þess að fjölga talmeinafræðingum, atferlisfræðingum og sálfræðingum sem starfa innan skólanna. Jafnframt viljum við ráða inn félagsráðgjafa í skólana til að sinna þeim börnum þar sem að aðstæður kalla á meira samstarf milli skóla og heimilis. Þetta mun létta á álaginu sem hefur myndast í skólakerfinu og veita kennurunum nauðsynlegan stuðning og rými til að sinna kennslunni í skólastofunni.

Við þurfum líka að horfa sérstaklega til þeirra barna sem hafa flóknari stuðningsþarfir. Það er mikilvægt að þau fái viðeigandi þjónustu sem að mætir þeirra þörfum að fullu og að það sé án þess að þurfa að bíða lengi eða flytjast milli úrræða. Það kallar á markvissa uppbyggingu og fjárfestingu frá sveitarfélaginu í sérúrræðum og að við skoðum nýjar leiðir. Samhliða þessu þarf að fjölga plássum í sérdeildum en í dag komast mun færri börn að þar en sækja um.

Í okkar huga er aðalatriðið skýrt. Börn eiga ekki að bíða eftir því að kerfið virki og líða fyrir vonda forgangsröðun hjá núverandi meirihluta. Með skýrum verkferlum og fleira fagfólki inni í skólanum getur Kópavogur tryggt þjónustu sem nær til barnanna á réttum tíma og styður þannig við börn, fjölskyldur og skólasamfélagið í heild sinni.

Eydís Inga Valsdóttir.
Höfundur skipar 2. sæti á lista Samfylkingarinnar í Kópavogi

Í dag eru yfir hundrað börn sem bíða eftir stuðnings- og stoðþjónustu í Kópavogi. Þessi bið getur tekið vikur, mánuði og í sumum tilvikum jafnvel ár. 

Kosningastefna Samfylkingarinnar í Norðurþingi 2026 - 2030

1. Fjölskyldan númer eitt - Tökum ábyrgð hvert á öðru

Óháð stöðu þinni og æviskeiði ætlum við að létta þér daglega lífið. Við munum sinna öflugri þjónustu við alla íbúa, því við erum sterkari saman.

Engin fjölskylda greiði meira en 50 þúsund krónur á mánuði í leikskóla og frístund (dvalargjald og fæðisgjald) – en tekjulægri greiði minna. 

Komum á jafnvægi milli álags á fjölskyldur og starfsfólk í skólakerfinu. Finnum farsæla lausn á útfærslu sérskráningadaga í samvinnu við starfsfólk og fjölskyldur. 

Lögum hljóðvist í húsnæði sveitafélagsins.

Hækka frístundastyrki í áföngum uppí 50.000. kr. fyrir lok kjörtímabils.

Eflum samstarf við Öldungarráð, Notendaráð fatlaðra og Ungmennaráð. Veitum þeim sterkari rödd og aukið vægi.

Hafa samning Sameinuðu þjóðanna um réttindi fatlaðs fólks að leiðarljósi í ákvarðanatöku í sveitarfélaginu.

Tökum vel á móti öllum sem velja að gera Norðurþing að sínu heimili.

Lifandi samfélag er gott samfélag. Gerum Norðurþing að enn betri stað til að dvelja á og heimsækja allt árið um kring. Ræktum garðinn okkar svo við getum öll fengið að vaxa og dafna.

Eflum Kópasker og Raufarhöfn sem eftirsóknarverða áfangastaði - uppbygging á tjaldsvæðum og leikvöllum í forgangi.

Styrkjum starf hverfisráða til dæmis með beinni úthlutun á framkvæmdafé. Veitum þeim sterkari rödd og aukið vægi.

Barnvænar skemmtilegar gönguleiðir á milli skóla og frístundasvæða. Helstu gönguleiðir barna eiga að vera líflegar og öruggar. Klárum umferðaröryggisáætlun.

Finna leiðir til að efla heilsársferðamennsku í öllu sveitarfélaginu í samvinnu við hagsmunaðila. Gerum Norðurþing að spennandi áfangastað allt árið um kring.

Móta framtíðarhlutverk fyrir Hvamm sem mun koma til með að breytast með tilkomu nýs hjúkrunarheimilis. 

Styðjum íbúa í gegnum félagsstarf og fyrirbyggjum þannig einangrun og einmanaleika. 

Styðjum við öflugt menningarlíf með viðburðum og styrkjum til leikfélaga. 

Eflum íþrótta og tómstundastarf í samfélaginu fyrir öll.

Næstu ár gætu reynst áskorun fyrir sveitarfélagið og þann tíma þurfum við að nýta vel. Vinnum að atvinnuuppbyggingu og mörkum skýra sýn á hvernig við viljum að sveitarfélagið okkar verði til framtíðar.

Stuðla að uppbyggingu á Bakka sem styrkir fjárhag og mannlíf sveitarfélagsins.

Tökum vel á móti nýjum atvinnutækifærum og hlúum að fyrirtækjum sem fyrir eru.

Sjúkraflug um Húsavíkurflugvöll þarf að vera tryggt opna þarf möguleika á að hefja áætlunarflug að nýju.

Fólk í forgangi. Grunnþjónusta með þarfir og réttindi íbúa að leiðarljósi.

Nýtum kjörtímabilið í áætlunargerð í samstarfi við íbúa. Hættum að setja plástra á sárin. Verum tilbúin með hvert við ætlum að stefna og hvað við gerum í framtíðinni.

Stöndum vörð um þau mál sem gera samfélag að góðu samfélagi. Oft eru það litlu hlutirnir sem skipta mestu máli.

4. Framkvæmdir með fjölskylduna í forgrunni

Í rekstri sveitarfélaga þarf stöðugt að forgangsraða, vega og meta hvaða málefni eru brýnust hverju sinni. Nauðsynlegt er að horfa fram í tímann og skipuleggja það sem framundan er. Samfylkingin vill forgangsraða framkvæmdum í þágu fjölskyldunnar.

Setja byggingu leikvalla í forgang með skólalóðir Borgarhólsskóla, Grænuvalla, Öxarfjarðarskóla og Raufarhafnarskóla í fyrsta sæti. Augljóslega hafa þessi mál ekki verið í forgangi hingað til.

Forgangsraða framkvæmdafé í þágu fjölskyldunnar.

Bætum og byggjum upp göngustíga og útivistarleiðir í sveitarfélaginu.

Gerum viðhaldsáætlanir á fasteignum sveitarfélagsins. Íþróttamannvirki í forgang. Þau mannvirki eru dýr í uppbyggingu en jafnframt mest nýttu fasteignir sveitarfélagsins. Það er dýrt að taka rangar ákvarðanir í þeim málum.

Hús fyrir heilsutengda starfsemi. Samtal við aðila í heilsutengdri starfsemi um uppbyggingu á húsnæði. Norðurþing byggi húsnæði með það að sjónarmiði að gera langtíma leigusamning við þá sem sýna verkefninu áhuga. Leigutekjur komi til með standa undir kostnaði. Með þessu tryggjum við starfseminni húsnæði til framtíðar.

Hér má skoða kosningastefnuna í heild sinni á pdf skjali.

Samfylkingin birtir auglýsingar á samfélagsmiðlum og í gegnum auglýsingamiðlara til þess að koma skilaboðum sínum á framfæri til þeirra sem flokkurinn telur gagn hafa að. Er það gert með því að óska eftir því að þessir aðilar birti auglýsingarnar þeim notendum sínum sem uppfylla ákveðin skilyrði. Samfylkingin fær aldrei neinar persónuupplýsingar til sín um notendur. Breyturnar sem unnið er með eru aldur, kyn og búseta. Nánari upplýsingar um persónuverndarstefnu Samfylkingarinnar. 

Samfylkingin í forystu fyrir fólk og fjölskyldur

Setjumst niður yfir kaffi og nýbökuðum vöfflum og ræðum það sem skiptir ykkur máli.

Við viljum heyra ykkar sjónarmið og hugmyndir.

Það skiptir okkur máli að eldri borgarar njóti virðingar og hafi góð tækifæri til að hittast og efla tengsl sín.

Kosningastefna Samfylkingarinnar í Mosfellsbæ 2026 - 2030

Mosfellsbær á að vera samfélag þar sem öll fá tækifæri til að lifa góðu lífi, óháð aldri, efnahag eða aðstæðum. Við viljum byggja á þeim árangri sem náðst hefur og halda áfram að efla velferð, menntun, þjónustu og umhverfi bæjarins.

Leiðarljós okkar eru jöfnuður, velferð og ábyrg uppbygging. Við leggjum áherslu á samfélag sem byggir á sterkum grunni, þar sem fólk getur búið á öllum æviskeiðum, þar sem börn og ungmenni dafna, eldri borgarar njóta virðingar og atvinnulíf blómstrar í sátt við náttúru og bæjarbrag.

Velferð, mannréttindi og jöfn tækifæri eru grunnur að góðu samfélagi. Mosfellsbær á að vera samfélag þar sem fólk getur búið á öllum æviskeiðum og fengið þjónustu sem mætir þörfum þess. Við viljum halda áfram þeirri uppbyggingu sem hófst á líðandi kjörtímabili, sérstaklega í átt að samþættri og aðgengilegri þjónustu.

Ný skammtímavistun fyrir fötluð börn.

Nýr búsetukjarni fyrir fatlað fólk reistur í Helgafellshverfi.

Í Klapparhlíð hefur risið aðgengilegur leikvöllur þar sem öll börn geta leikið sér saman, óháð hreyfigetu.

Félagslegt leiguhúsnæði í eigu bæjarins aukið um 30%

Aðgengi hreyfihamlaðra hefur verið bætt markvisst með uppsetningu rampa við skóla, stofnanir, verslanir, þjónustu og veitingastaði í Mosfellsbæ.

Mosfellsbær tók yfir rekstur Skálatúns.

Við ætlum að þróa áfram samþættingu velferðar- og heilbrigðisþjónustu þannig að þjónustan verði fjölbreyttari, samfelld og aðgengileg. Markmiðið er að fólk þurfi ekki að leita á milli kerfa heldur fái heildstæða þjónustu á einum stað. 

Inngilding og þjónusta við fatlað fólk

Við viljum tryggja að fatlað fólk njóti fullrar þátttöku í samfélaginu. Það felur í sér að stytta bið eftir þjónustu, efla persónulega aðstoð og stoðþjónustu og styðja sjálfstætt líf. Þegar kemur að þjónustu er mikilvægt að sveitarfélagið taki aukið frumkvæði að því að bjóða þjónustu, í stað þess að einstaklingar þurfi sjálfir að bera sig eftir henni.

Styðja og efla fjölbreytt framboð íþrótta og tómstunda fyrir börn og ungmenni, með sérstakri áherslu á jafnt aðgengi, þátttöku og stuðning sem mætir ólíkum þörfum. 

Stefnt er að því að auka framboð íbúða á viðráðanlegu verði, sérstaklega fyrir tekjulága, ungt fólk og fyrstu kaupendur. Það verður gert með áframhaldandi uppbyggingu félagslegs húsnæðis og auknu samstarfi við óhagnaðardrifin leigufélög um uppbyggingu minni og ódýrra íbúða.

Við ætlum að  hækka upphæð fjárhagsaðstoðar í samræmi við nágrannasveitarfélög og leggja áherslu á að hún styðji fólk til sjálfstæðis. Þá verði aukinn afsláttur örorkulífeyrisþega af fasteignagjöldum.

Við ætlum að efla samtal við þá sem nýta þjónustu sveitarfélagsins, meðal annars með þjónustukönnunum og auknu íbúalýðræði, til að tryggja að þjónustan þróist í takt við raunverulegar þarfir og óskir íbúa.

Sett verði aðgengisstefna og unnið markvisst að því að bæta aðgengi allra íbúa, hvort sem er að almenningsrýmum, þjónustu eða upplýsingum. 

Við munum endurnýja lýðheilsu- og forvarnarstefnu bæjarins og samþætta hana við barnvænt samfélag. Við munum stuðla að hollu og næringarríku mataræði í skólum Mosfellsbæjar. Við munum tryggja jafnt aðgengi að hollum morgunverði í öllum skólum og bjóða upp á hafragraut.

Við viljum að skólar í Mosfellsbæ séu í fremstu röð og styðji við vellíðan, vöxt og þroska allra barna. Lykilatriði er að tryggja jafnt aðgengi að námi, efla stoðþjónustu og skapa gott og gefandi faglegt umhverfi.

100 milljónum króna var varið í átaks- og forvarnarverkefnið „Börnin okkar“, sem er nú fullfjármagnað.

Öll börn 12 mánaða og eldri með leikskólapláss

Aðgengi að sálfræðingi í unglingadeildum

Mosfellsbær vottaður sem Barnvænt sveitarfélag

Bergið headspace samstarf um ráðgjöf og viðtöl til ungmenna Mosfellbæjar

Skólalóðir og leiktæki mikið endurnýjað

Nýtt íþróttahús við Helgafellskóla

Við ætlum að fjölga sérfræðingum innan skólakerfisins, svo sem talmeinafræðingum, iðjuþjálfum, þroskaþjálfum, félagsráðgjöfum og hegðunarráðgjöfum, í samráði við fagfólk í skólum, og styrkja teymi í kringum nemendur og kennara. Fyrsta skref er að koma á fót farteymi og ráða talmeinafræðing sem þjónar leikskólum bæjarins.

Við munum standa vörð um innleiðingu farsældarlaganna og halda áfram að vinna eftir þeim verkferlum sem hafa verið innleiddir, með áherslu á snemmtæka íhlutun og samstarf milli kerfa.

Starfsumhverfi og fagmennska í leik- og grunnskólum
Við viljum halda áfram að bæta starfsumhverfi skólanna með markvissum stuðningi, símenntun og virku samtali við starfsfólk í skólum Mosfellsbæjar. Sérstök áhersla verður lögð á að skapa aðstæður sem laða að og halda í öflugt fagfólk.

Við munum jafnframt tryggja starfsfólki með annað móðurmál en íslensku og auka svigrúm til að læra íslensku, með markvissum úrræðum, stuðningi og tíma til náms. Það er lykilatriði fyrir gæði skólastarfs og samskipti við nemendur og foreldra.

Lág leikskólagjöld og 100% systkinaafsláttur
Við ætlum að halda leikskólagjöldum í Mosfellsbæ einum þeim lægstu á landinu og veita auk þess 100% systkinaafslátt strax við fyrsta systkini.

Réttur til leikskólavistar
Við höldum áfram að tryggja að börn í Mosfellsbæ komist í leikskóla að loknu fæðingarorlofi.
Við styðjum við lögfestingu á rétti til leikskólavistar að loknu fæðingarorlofi, með nýrri löggjöf og sameiginlegri fjármögnun ríkis og sveitarfélaga sem kemur til framkvæmda í skrefum á næstu 4 árum.

Skólahúsnæði og nýting
Sett verður skýr langtímastefna um uppbyggingu og viðhald skólahúsnæðis og annarrar námsaðstöðu, þar á meðal útikennsluaðstöðu í náttúru Mosfellsbæjar sem nýtist öllum skólabörnum. Jafnframt viljum við nýta skólahúsnæði betur utan skólatíma til hagsbóta fyrir samfélagið.

Við munum fjölga markvisst viðburðum fyrir ungmenni og skipuleggja þá í samráði við þau sjálf. Við munum byggja upp og bæta aðstöðu fyrir ungmenni, þar á meðal þrautabrautir, hreystibrautir og brettaaðstöðu. Við munum tryggja samráð við ungmenni áður en ákvarðanir eru teknar um málefni sem þau varða og setja upp einfaldar stafrænar leiðir fyrir ungmenni til að koma skoðunum sínum á framfæri við bæinn. Við munum jafnframt halda áfram að styðja vel við starfsemi Bólsins og bæta aðstöðu þess.

Við munum halda áfram að styrkja samstarf milli skóla, frístunda og velferðarþjónustu og tryggja að raddir barna og ungmenna heyrist, meðal annars með eflingu ungmennaráðs. 

Stoðþjónusta og snemmtæk íhlutun
Við munum efla stoðþjónustu í skólum þannig að börn fái stuðning fyrr og út frá þörfum sínum, í anda skóla án aðgreiningar, án þess að þurfa að bíða eftir formlegum greiningum. Í samráði við kennara og fagfólk munum við sérstaklega efla íslenskukennslu fyrir nemendur með annað móðurmál en íslensku. Það er lykilatriði fyrir vellíðan og námsárangur.

Þannig tökum við ábyrgð hvert á öðru og stöndum með fjölskyldum í Mosfellsbæ.

3. Íþrótta - tómstunda og menningarbærinn Mosfellsbær

Mosfellsbær er öflugt menningar- og íþróttasamfélag með ríka sögu. Við viljum styrkja enn frekar menningu, íþróttir og félagslíf og tryggja aðgengi fyrir öll að þessum lífsgæðum.

Hlégarður heim: Bærinn tók aftur við rekstri félagsheimilisins okkar og nú þegar blómstrar þar fjölbreytt menningarstarfsemi og félagsstarf.

Menning í mars menningarhátíðin sett á laggirnar og er nú þegar orðin ómissandi hluti vorsins, með sögukvöldum og fjölbreyttum viðburðum.

Hugað sérstaklega að tengslum við náttúru og sögu í hönnun nýs hverfis í Blikastaðalandi

Markviss uppbygging íþróttamannvirkja á Varmá, svo sem með útboði og hönnun á aðkomuhúsi og félagsaðstöðu. Gerður var nýr aðalleikvöllur og ný frjálsíþróttaaðstaða.

Aðgengi barna og ungmenna
Við munum hækka frístundastyrk til að tryggja að öll börn og ungmenni  hafi jafnt aðgengi að íþróttum og tómstundum. Með því lækkum við kostnað foreldra og eflum  þátttöku barna og ungmenna í skipulögðu íþrótta og tómstundastarfi.

Íþróttir og frístundir
Við ætlum að halda áfram uppbyggingu íþróttamannvirkja með fjölnota íþróttahúsi í Blikastaðalandi og ljúka uppbyggingu á Varmársvæðinu og  klárum stúku- og  þjónustubygginu. Skíðasvæði Skálafelli  verður opnað að nýju.

Við ætlum að lengja opnunartíma sundlauga bæjarins til kl. 21 um helgar yfir vetrartímann og 22 yfir sumartímann og fjölga heitum pottum, sánum og fleira, gestum laugarinnar til aukinnar ánægju og yndisauka. 

Íþrótta- og tómstundastefna mótuð til framtíðar
Mosfellsbær er ört vaxandi bæjarfélag og við ætlum að vera í fararbroddi þegar kemur að íþrótta- og tómstundastarfi. Við munum taka fagnandi á móti fjölgun barna og allra sem stunda íþróttir og tómstundir með metnaðarfullri íþrótta- og tómstundastefnu til framtíðar. Stefnan mun skýra hvernig við mætum ólíkum þörfum og tryggjum öllum  tækifæri til fjölbreyttrar þátttöku. Stefnan verður unnin í nánu samráði við íþrótta- og tómstundafélög í Mosfellsbæ.

Menning og saga
Við ætlum að efla Álafosskvosina, meðal annars með því að fylgja eftir umsókn um að svæðið verði skilgreint sem verndarsvæði í byggð og styðja við uppbyggingu ullarminjasafns. Jafnframt verður unnið að því að lyfta sögu bæjarins og hún gerð aðgengilegri og sýnilegri.

Menningarstofnanir
Við munum hefja undirbúning að framtíðarhúsnæði fyrir tónlistarskóla í Mosfellsbæ. Við munum standa vörð um Bókasafn Mosfellsbæjar og listasal bæjarins sem lykilstofnanir í menningarlífi bæjarins og tryggja áfram sterkt og lifandi starf þeirra.

Hlégarður
Við viljum efla starfsemi Hlégarðs enn frekar og bæta aðgengi að húsinu, þannig að það nýtist betur til félags- og menningarstarfs. Efri hæðin í Hlégarði tekin í notkun og nýtt í þágu bæjarbúa.

Mosfellsbær á að vera samfélag þar sem eldri borgarar njóta virðingar og öryggis og hafa tækifæri til virkrar þátttöku. Við viljum styðja fólk til að búa lengur heima og lifa innihaldsríku lífi.

„Gott að eldast“ verkefnið, samþætting á stuðnings- og heilbrigðisþjónustu

Tengiráðgjafi ráðinn til bæjarins, sem hafði meðal annars beint samband við alla íbúa Mosfellsbæjar 80 ára og eldri og bauð upp á viðtalstíma sem opnir voru öllum sem vildu og þurftu

Dagdvalarrýmum fjölgað úr 9 í 35 og dagdvölin Hlýjan opnuð 

Brúarland gert að miðstöð félagsstarfs í Mosfellsbæ og Hlégarður opnaður félagsstarfi eldra fólks

Við munum hækka frístundastyrk eldri borgara í 30 þúsund krónur til að efla þátttöku þeirra í samfélaginu. Við munum jafnframt styðja við og efla félagsstarf, menningar- og heilsueflandi úrræði og auka framboð af viðburðum og tækifærum til þátttöku. Starfið verður þróað í samráði við eldra fólk og öldungaráð Mosfellsbæjar þannig að þjónustan taki mið af þörfum og áhuga.

Mosfellsbær styður markvisst við uppbyggingu hjúkrunarrýma og vinnur með ríkinu að því að stytta biðtíma. Markmiðið er að enginn bíði lengur en nauðsynlegt er eftir viðeigandi úrræði.

Við munum þróa áfram þjónustu sem gerir eldri borgurum kleift að búa lengur heima, meðal annars með því að festa í sessi aðgerðir úr „Gott að eldast“ verkefninu, með samþættingu félags-, stoð- og heilbrigðisþjónustu og heimaendurhæfingu. Við munum jafnframt nýta tæknilausnir betur til að efla þjónustu, öryggi og lífsgæði.

Afsláttur ellilífeyrisþega af fasteignagjöldum aukinn.

Þannig tökum við ábyrgð hvert á öðru og hlúum að fólkinu sem byggði samfélagið.

Skipulag og umhverfi móta daglegt líf íbúa. Við viljum þróa Mosfellsbæ á sjálfbæran hátt þar sem náttúra, byggð og þjónusta mynda heildstæða og mannvæna heild.

Skipulag 1. áfanga Blikastaðalands klárað með einstaklega metnaðarfullum hætti, þar sem áherslu verður á að viðhalda bæjarbragnum og góðum tengslum við náttúru og sögu staðarins

Heildarendurskoðun á aðalskipulagi komin í samþykktarferli

Loftslags- og umhverfisstefna með mælanlegum markmiðum gerð og staðfest

Hagkvæm gatnalýsing innleidd með LED-væðingu

Minnkum kostnað og skutl með gjaldfrjálsum Strætó fyrir börn og ungmenni að 18 ára aldri.

Við stefnum á að auka tíðni strætó og gæta jafnræðis milli hverfa varðandi tíðni og hve lengi vagnarnir ganga. Við ætlum að auka gæði og fjölga biðskýlum. Byrja að skipuleggja betri tengingar á milli hverfa.

Náttúra og útivist
Við setjum vernd náttúrunnar í forgang, tryggjum líffræðilega fjölbreytni og viljum efla stígakerfi og aðgengi að útivistarsvæðum. Við ætlum að leggja hringstíga í kringum Úlfarsfell og Hafravatn. Fjölga skal bekkjum, ruslatunnum og salernisaðstöðum.

Við munum kanna og stefna að uppsetningu hundagerðis í Mosfellsbæ, til dæmis við upphaf gönguleiða við Úlfarsfell við Skarhólabraut. Markmiðið er að bæta aðstöðu fyrir hundaeigendur og styðja við virka útivist.

Samhliða munum við vinna að heildstæðri skipulagningu útivistarsvæðisins í kringum Úlfarsfell, í samstarfi við Reykjavíkurborg, með það að markmiði að þróa aðlaðandi útivistarsvæði með göngu- og hjólastígum, áningastöðum og bættri aðstöðu fyrir almenning. Þar getur hundagerði verið eðlilegur hluti af heildarlausn.

Sjálfbært skipulag og ný hverfi
Við viljum skipuleggja ný hverfi með sjálfbærni að leiðarljósi, með fjölbreyttri íbúðagerð og góðum tengingum við þjónustu, samgöngur og útivist. Greið tengsl við almenningssamgöngur og stígakerfi verði tryggð, bæði innan hverfa og til annarra hverfa og útivistarsvæða.

Blikastaðalandið
Markmiðið er að byggja þar upp grænt og heildstætt hverfi með sterkum innviðum og tengingum við náttúru og samfélag. Allir innviðir svo sem grunn- og leikskóli byggist upp samhliða íbúðar uppbyggingu.

Miðbær og þjónusta
Mosfellsbær verði skipulagður sem fjölkjarna þjónustusamfélag. Menningartengd starfsemi verði þróuð og byggð upp í og við Álafosskvos og Hlégarðssvæðið. Stjórnsýsla, ásamt fjölbreyttri verslunar- og veitingaþjónustu, verði þróuð í bland við uppbyggingu íbúðarbyggðar í núverandi miðbæ bæjarins.

Staðbundnir þjónustukjarnar 
Mótaðir minni staðbundnir þjónustukjarnar með áherslu á nærþjónustu í nýjum hverfum, í samræmi við íbúafjölda og þéttleika, eins og gert verður í Blikastaðahverfinu.

Sterkt atvinnulíf er forsenda velferðar. Við viljum byggja upp fjölbreytt og sjálfbært atvinnulíf sem fellur að bæjarbrag Mosfellsbæjar og vistvænni framtíðarsýn.

Þátttaka í ferðamálaverkefninu Áfangastaðaáætlun höfuðborgarsvæðisins skilaði fjölda tillagana sem styrkja Mosfellsbæ sem spennandi áfangastað ferðamanna

Vinna hafin við að víkka út skilgreind vaxtamörk athafnasvæðis

Við munum einfalda leyfisveitingar og regluverk með því að sameina og stytta leyfisferli, draga úr óþarfa umsögnum og setja skýr tímamörk á afgreiðslu. Samhliða munum við auka þjónustulund og byggja á trausti, þar sem fyrirtækjum er treyst til að hefja rekstur og eftirlit felst í leiðsögn og úrbótum, ekki hindrunum.

Við setjum upp einn viðkomustað fyrir fyrirtæki hjá Mosfellsbæ, þar sem einn tengiliður ber ábyrgð á samskiptum og samhæfingu. Með því léttum við á kerfinu, einföldum stjórnsýslu og aukum skilvirkni. Markmiðið er hraðari ákvarðanir, minna flækjustig og betri þjónusta við fólk og fyrirtæki.

Atvinnuuppbygging og skipulag
Við ætlum að vinna eftir aðgerðaáætlun atvinnustefnunnar og leggja aukinn metnað í uppbyggingu atvinnusvæða og greiðum götu verkefna sem styðja við græna framtíðarsýn. Fylgjum eftir vinnu við að víkka út skilgreind mörk atvinnusvæðis til að rýma fjölbreytta atvinnustarfsemi þannig að skortur á lóðum standi ekki uppbyggingu fyrir þrifum. 

Farsældartún
Við viljum í samstarfi við ríkið að  flýta uppbyggingu á Farsældartúni í þágu barna og ungmenna.

Við viljum styðja við atvinnustarfsemi sem að miðar að sjálfbærri ferðaþjónustu með áherslu á góða aðstöðu, bætt aðgengi og vernd náttúruperlna. Og laða að ferðaþjónustufyrirtæki sem við vilja taka þátt í þessari vegferð með okkur.

Umhverfi og nýsköpun
Við viljum setja skýr umhverfisskilyrði fyrir atvinnustarfsemi og styðja við nýsköpun og frumkvöðlastarf sem fellur að gildum bæjarins. 

7. Rekstur bæjarfélagsins og stjórnsýsla

Góð og gagnsæ stjórnsýsla er forsenda trausts og árangurs. Við viljum tryggja ábyrgan rekstur, hlúa að mannauði sveitarfélagsins og virkja íbúalýðræði í auknum mæli.

Viðsnúningur í rekstri - hallalaus rekstur síðustu þrjú ár

Farið í stjórnsýslu- og rekstrarúttekt á rekstri og þjónustu Mosfellsbæjar

Fjármála- og áhættugreining á rekstri sem nær til næstu 10 ára

Sett á laggirnar innri endurskoðun innan sveitarfélagsins með það fyrir augum að tryggja að ávallt sé farið vel með fjármuni sveitarfélagsins og rétt þjónusta sé veitt.

Bylting í stafrænni þjónustu bæjarins í þágu hraðari afgreiðslu og aukinnar þjónustu við íbúa 

Íbúalýðræði og samráð
Við ætlum að þróa áfram leiðir til innihaldsríks samráðs við íbúa, meðal annars með auknu aðgengi að kjörnum fulltrúum og fjölbreyttum samráðsleiðum. Við viljum tryggja að börn og ungmenni fái lýðræðislega aðkomu að málefnum bæjarins og að rödd þeirra heyrist t.d. með Krakka Mosó og eflingu ungmennaráðsins.

Aðgengi að þjónustu
Við munum halda áfram að bæta aðgengi að þjónustu á víðum grunni, til dæmis með því að halda áfram stafrænni vegferð og með því að setja upp aðgengileg stafræn mælaborð. Fólk geti fylgst með stöðu mála sinna rafrænt.

Við viljum styrkja faglegt starf fagnefnda bæarins. 

Við munum halda áfram að reka Mosfellsbæ með ábyrgum hætti og tryggja að reksturinn sé sjálfbær og réttu megin við núllið. Það gerum við með skýrri forgangsröðun, aðhaldi í rekstri og skilvirkri nýtingu fjármuna.

Við munum standa vörð um grunnþjónustu við íbúa, á sama tíma og við tryggjum svigrúm til uppbyggingar. Markmiðið er stöðugleiki í rekstri, ábyrg fjármálastjórn og traust til framtíðar.

Spil stemning og góðir vinningar. Ertu ósigrandi í Olsen Olsen?
Nú er tækifærið til að sanna það!

Ísbar á staðnum með öllu tilheyrandi.

Taktu vini með og kíktu við – þetta verður stemning!

Ertu meistari Olsen Olsen? Fundur með ungmennum

Verktakar mæta með tæki, grafa djúpa holu og skilja svo svæðið eftir mannlaust mánuðum saman á meðan þeir halda áfram í verkefni annars staðar í bænum með tilheyrandi raski fyrir íbúa og neikvæðum áhrifum á skólastarf.

Hálfkláruð verk og hættuleg leiksvæði á Álftanesi

Flestir Álftnesingar kannast við að þetta, það er ekki fyrr en athugasemdir hafa verið skrifaðar á íbúasíðuna sem eitthvað fer kannski að gerast. Að hringja eða senda pósta virkar ekki, það virðist ekki vera nógu áberandi eða mikilvægt til þess að fá áheyrn. Á meðan sitjum við Álftnesingar uppi með rask, óreiðu og jafnvel hættu langt umfram þann tíma sem raunverulega virðist þurfa til að klára verkin.

Skólalóðin við Álftanesskóla er gott dæmi um ákveðið sinnuleysi sem ríkt hefur í nokkur ár. Slæmur frágangur á framkvæmdasvæðum við skólalóðina hefur skapað hættulegar aðstæður fyrir nemendur sem sækja í svæðið, í frímínútum og eftir skóla. Þar hafa börn komist í allskyns verkfæri og járnrusl sem eiga ekkert erindi á skólalóðina. Ítrekað hefur verið bent á nauðsyn þess að ganga betur frá, en á þær ábendingar er ekki hlustað.

Samráð við íbúa hefur verið afar takmarkað. Til dæmis má benda á nýtt sleppistæði við Álftanesskóla, en ítrekað var varað við þeirri lausn. Hún var rýnd af síðustu bæjarstjórn Álftaness og niðurstaðan lá fyrir, staðsetningin er ekki góð. Hún skapar þrengsli og hættu á svæði sem má alls ekki við frekari þrengingu og aukinni umferð. Lausnin tekur ekki mið af raunveruleikanum, hvort sem litið er til veðurfars eða gönguleiða barna þegar snjómokstur bregst. Þrátt fyrir það var byrjað að moka og hefur þessi nýja lausn staðið hálfkláruð mánuðum saman með tæki og holur á víð og dreif með tilheyrandi raski við leikskóla, skóla og íþróttahús.

Vinnulagið á Álftanesi er ekki það eina sem þarf að ræða. Á yfirstandandi kjörtímabili hefur afar lítill hluti framkvæmdarfjár sveitarfélagsins farið í Álftanes. Við höfum gögn frá 2023, en þá fékk Álftanes um tíu prósent af framkvæmdarfé bæjarins.

Álftnesingar borga sitt útsvar og hækkuð gjöld eins og aðrir, en uppbyggingin fer annað á meðan við sitjum eftir með holur og tæki í geymslu. Það er eðlilegt að aukið fjármagn fer í ný hverfi á meðan þau byggjast upp, en það þarf samt sem áður að gæta jafnræðis. Þótt innviðagjöld komi að hluta á móti uppbyggingu í nýjum hverfum, þá sýnir forgangsröðun framkvæmdafjárins að fjármunir og fókus bæjarstjórnarinnar liggja annars staðar en á Álftanesi. Niðurstaðan er sú að framkvæmdir á Álftanesi eru illa skipulagðar, samráð er lítið og íbúar sitja eftir með rask á meðan milljarðar renna annað.

Þetta snýst ekki um skrúðgarða, glæsihýsi eða flugeldasýningu. Við viljum að verkin séu kláruð á eðlilegum tíma og umhverfinu og bæjarbúum sé sýnd virðing.

Við í Samfylkingunni viljum gott samráð, skýra upplýsingagjöf og að jafnræðis sé gætt þegar kemur að framkvæmdum og frágangi í öllum Garðabæ.

Höfundur, Rakel Margrét Viggósdóttir, skipar 3.sæti Samfylkingarinnar í Garðabæ í komandi sveitastjórnarkosningum.

Það er eitthvað undarlegt við framkvæmdir á Álftanesi. Stundum virkar eins og verið sé að leika í stað þess að framkvæma. 

Í tilefni verkalýðsdagsins 1.maí ætlum við að opna kosningaskrifstofuna okkar formlega með pompi og prakt.
Teymt verður undir börnum, blöðrur, grillaðar pylsur og lifandi tónlist.

Við munum líka að kynna stefnuskrána okkar og verður gott tækifæri til að ræða við frambjóðendur.

Fjölskylduskemmtun og opnun kosningaskrifstofu

Eldri borgarar eru fjölbreyttur hópur og því er ekkert eitt sem hentar öllum. Það sem við eigum þó flest sameiginlegt er þörfin að tilheyra og vera hluti af samfélagi. Það er til mikils að vinna þegar við komum í veg fyrir félagslega einangrun.

Sveitarfélagið Ölfus á minnst tvö félagsheimili, Versali og félagsheimili eldri borgara á 9unni. Að sögn íbúa er fyrirkomulag þess síðarnefnda með þeim hætti að því lokar kl. 15 á daginn. Þessu viljum við breyta. Við viljum halda félagsheimili eldri borgara á 9unni opnu fram eftir og skapa aðstæður sem hvetja til aukinnar þátttöku og félagslífs. Að auki þykir okkur sjálfsagt og eðlilegt að sveitarfélagið hafi starfsmann sem heldur utan um félagsstarf eldri borgara í samstarfi við Félag eldri borgara í Ölfusi. 
Blásum lífi í félagsstarfið

Rótgrónir Þorlákshafnarbúar muna eftir því þegar hér var metnaðarfullt starf í gler- og leirlist. Gler- og leirbrennsluofnar voru nýttir og eldri borgarar sköpuðu ýmsa listmuni sem var ýmist hægt að selja eða gefa í tækifærisgjafir. Hér var jafnframt öflugt kórastarf í yfir áratug og fleira sem mætti endurvekja. Einnig er hægt að horfa til ýmissa fyrirmynda víða um land, s.s. Skúrinn á Vesturlandi þar sem karlmenn 18 ára og eldri geta hist, rætt málin og unnið að fjölbreyttum verkefnum í góðum félagsskap í trésmíði og fleira. 

Félagsstarf eldra fólks þarf ekki að vera bundið við einn aldurshóp. Mikil tækifæri felast í því að byggja brýr á milli kynslóða, félagasamtaka, menningarfélaga og stofnana, og sveitarfélagið á að styðja slíkt samstarf markvisst.  
Tryggjum öryggi eldra fólks með bakvakt

Eldra fólk í samfélaginu hefur lýst því óöryggi þegar heilsu bregður og þjónustan ekki til staðar nema hluta úr degi. Samfylkingin og félagar vilja tryggja öryggi eldra fólks með bakvakt sem er til taks ef eitthvað kemur upp á, hvort sem er á 9unni eða á öðrum heimilum eldra fólks. Þetta skiptir máli.
Hjúkrunarheimili í Þorlákshöfn

Það hefur verið draumur stórs hluta þessa samfélags að hjúkrunarheimili rísi í Þorlákshöfn. Við deilum þessum draumi og ætlum að nýta þjóðarátak ríkisstjórnarinnar í uppbyggingu hjúkrunarrýma og tryggja að hjúkrunarheimili rísi í Þorlákshöfn. Það ætlum við að gera með markvissri hagsmunagæslu og góðri samvinnu við ríki, nágrannasveitarfélög og aðra sem að málinu koma. Við leggjum áherslu á að koma Þorlákshöfn á framkvæmdaáætlun hjúkrunarheimila sem nær til næstu fjögurra ára. Það er lykillinn að árangri enda er uppbygging og rekstur hjúkrunarheimila á forræði ríkisins.  
Trygg og samfelld þjónusta

Mikilvægt er að tryggja eldra fólki og fjölskyldum örugga handleiðslu á efri árum með samfelldri og samþættri þjónustu sem tekur mið af þörfum hvers og eins. Þar undir fellur meðal annars heimaþjónusta, heimahjúkrun, félagsstarf, dagdvöl, iðju- og sjúkraþjálfun og almenn heilsuefling. Við viljum einnig tryggja gjaldfrjálsan aðgang eldra fólks að sundi og rækt, ásamt áframhaldandi framboði á styrktarþjálfun. 
Markmiðið er að tryggja að það sé bæði öruggt og ánægjulegt að lifa sín efri ár í Ölfusi.

Berglind Friðriksdóttir
2. sæti á lista Samfylkingarinnar og félaga í Ölfusi

Eldra fólk er mikilvægur hluti samfélagsins og sveitarfélagið á að taka virkan þátt í að efla lífsgæði, heilsu, virkni og þátttöku þeirra í samfélaginu.

I.
Kæru félagar, í verkalýðshreyfingu og í Samfylkingu: Gleðilegan 1. maí!

Á þessum degi fögnum við baráttu og sigrum brautryðjendanna – um leið og við tökum stöðu og ræðum leiðina fram. Til nýrra sigra – í þágu þjóðar og vinnandi fólks á Íslandi.

* * *

Það er alltaf hátíðlegt að hittast hér í Iðnó – sem var reist af Iðnaðarmannafélagi Reykjavíkur, og er nátengt arfleifð okkar og sögu á margan hátt.

En þann 12. mars síðastliðinn voru liðin 110 ár frá stofnun Alþýðusambands Íslands og Alþýðuflokks – sem nú heitir Samfylking. Og það gerðist við Tjörnina þarna hinum megin – á fundi í Bárubúð – þar sem nú er Ráðhús Reykjavíkur. Þar komu saman fulltrúar mismunandi verkalýðsfélaga og stofnuðu landssamtök og stjórnmálaflokk: Til að koma baráttumálum sínum í framkvæmd – ekki aðeins með gerð kjarasamninga og kjarabaráttu. Heldur einnig með því að bjóða sig fram til Alþingis Íslendinga og sveitarstjórna landsins.

Ég bauð formönnum landssamtaka og stærstu aðildarfélaga Alþýðusambandsins til fundar 12. mars í vetur þar sem við fögnuðum þessum tímamótum í Stjórnarráðshúsinu – og áttum einnig samtal um stöðu þjóðmála og baráttu okkar á líðandi stund.

* * *

Við erum stórhuga hreyfing – og hreykin af uppruna okkar og árangri.

Enda var það róttæk hugmynd árið 1916 að venjulegt vinnandi fólk gæti stjórnað sér sjálft. Fyrst með því að stofna verkalýðsfélög og stjórnmálaflokka. Síðan með því að sigra í kosningum og taka ábyrgð á stjórn landsmála.

Þannig er saga verkalýðshreyfingarinnar samofin sögu lýðræðis á Vesturlöndum. Því að áður var það aðeins í höndum fámennrar yfirstéttar að fara með völdin í samfélaginu: auðmanna, menntafólks og aðalborinna.

Þetta er mikilvægt atriði:

Hugmynd þeirra sem ruddu brautina og stofnuðu verkalýðsfélögin var aldrei að sætta sig við að vera mótmælaafl með kröfuspjöld – eða hvað þá betlistaf – heldur þvert á móti: sterkt og stjórnandi afl, sem býður fram og treystir sér til að taka ábyrgð á Íslandi.

Við byggjum landið.

Það þýðir ekki að við hættum að halda kröfum okkar hátt á lofti og berja í borðið þegar þurfa þykir – alls ekki. En það er áminning um mikilvægi þess að við skipuleggjum okkur líka vel á sviði stjórnmála og vinnum pólitíska sigra, í kosningum. Sköpum breiða sátt og finnum málamiðlanir – sem munstra saman meirihluta. Meðal þjóðar, á þingi og í sveitarstjórnum.

Það er til marks um styrk jafnaðarstefnunnar að 110 árum eftir stofnun Alþýðusambands og -flokks – á grundvelli svo róttækrar hugmyndar – sé ríkisstjórn Samfylkingar, Viðreisnar og Flokks fólksins við völd á Íslandi.

Ég er stolt af því að leiða ríkisstjórn á þessum tímamótum og geri mitt besta á hverjum degi, minnug þeirra sem ruddu brautina og þakklát ykkur sem glæðið hreyfingu okkar lífi um landið allt. Við erum alltaf stórhuga – það verður aldrei af okkur tekið – og við stefnum sannarlega alltaf hærra.

II.
Já – kæru félagar: Öll þekkjum við árangurinn. Farsælustu samfélög heims eru í þeim ríkjum þar sem verkalýðshreyfing og jafnaðarmenn hafa gert það best.

* * *

Mörg af baráttumálum okkar eru þess eðlis að þegar stórir sigrar hafa unnist – þá eru þeir svo gott sem varanlegir sigrar – á meðan lýðræðið virkar. Vegna þess að enginn vill fara aftur til fyrra horfs. Allir vildu Lilju kveðið hafa, eftir á að hyggja – þó að oftar en ekki hafi þurft að berjast af hörku fyrir slíkum framförum:

Almennur kosningaréttur.
Verkfallsréttur.
Afnám fátækralaga.

Atvinnuleysistryggingar.
Almannatryggingar – gegn fátækt á efri árum eða vegna örorku.
Og almenn heilbrigðisþjónusta og menntakerfi.

Orlofsréttur og 40 tíma vinnuvika.
Lög um jöfn laun fyrir sömu vinnu.
Lífeyrissjóðir og fæðingarorlof.

Já og almennir leikskólar – sem andstæðingar okkar börðust svo sannarlega gegn á sínum tíma, og enn er reynt að grafa undan.

Sterkt almennt velferðarkerfi sem byggir á „réttlæti – ekki ölmusu“.

Og svo mætti lengi telja. Enn er sótt að sumu og reynt að hrifsa til baka fyrri sigra á þessum sviðum.

En þó má segja að heilt yfir snúist verkefni dagsins – bæði hjá stéttarfélögunum og á Alþingi – helst um að byggja og styrkja það sem við eigum hérna saman. Það á við um eilífðarverkefni í okkar pólitík – sem verða aldrei leyst í eitt skipti fyrir öll en við verðum að vinna að öllum stundum.

Hvernig birtist þetta nú við stjórn landsmála? Þetta eru verkefnin sem eru efst á blaði.

Við byggjum landið: Lögum vegi, öflum orku, mótum atvinnustefnu.
Stækkum verknámsskóla vítt um land.
Reisum hjúkrunarheimili – til að hlúa að fólkinu sem byggði landið.
Fjölgum lögreglumönnum.
Og pössum betur upp á heilbrigðiskerfið okkar.
Eflum úrræði vegna fíknivanda og styttum biðlista barna.
Innleiðum réttlát auðlindagjöld.
Lögum ríkisfjármálin og tökum til í rekstri.
En tryggjum að sjálfsögðu að lífeyrisgreiðslur hækki með launum – já, eins og vera ber.

Við lögfestum samning Sameinuðu þjóðanna um réttindi fatlaðs fólks – sem var stórt skref.

Og við stöndum með ungu fólki og fjölskyldum á húsnæðismarkaði – með fjölþættum aðgerðum til skemmri og lengri tíma, meðal annars í fyrsta og öðrum húsnæðispakka ríkisstjórnarinnar.

III.
Margt fleira mætti nefna. En ég vil staldra sérstaklega við húsnæðismálin:

Líklega er enginn einn málaflokkur ofar á blaði hjá verkalýðshreyfingunni – og það er kannski mesta eilífðarbarátta sem hreyfingin heyir fyrir almennt launafólk, fyrir utan kjarasamningagerðina sjálfa.

Það vill svo til að á stofnári ASÍ og flokksins árið 1916 var í fyrsta skipti komið upp félagslegu húsnæði í Reykjavík, í Bjarnaborg við Hverfisgötu, til að ráða úr mestu neyðinni – svo fólk og fjölskyldur þyrftu ekki að sofa í tjöldum eða undir bátum eins og verið hafði. Enda hafði framboðslisti verkalýðsfélaga fengið 3 menn af 5 sem voru kjörnir í bæjarstjórnina það ár.

Alþýðuflokkurinn fékk lög um verkamannabústaði samþykkt á Alþingi árið 1929 – og í kjölfarið hófst mikil uppbygging á öruggu húsnæði.

Og Viðreisnarstjórnin samdi við verkalýðshreyfinguna um byggingu Breiðholts árið 1964. Meðal annars til að „útrýma bröggunum“ eins og slagorðið hljómaði.

* * *

Í dag er líklega ekkert eitt baráttumál sem sameinar íslenska verkalýðshreyfingu eins og almenna íbúðakerfið – og mikilvægi þess að við byggjum íbúðir fyrir alla hópa samfélagsins.

Enda hefur aldeilis komið á daginn hvað það var hörmuleg ákvörðun hjá ríkisstjórn Sjálfstæðisflokks og Framsóknar að leggja niður verkamannabústaðakerfið um aldamótin – hörmuleg harðlínupólitík. Sem hefur enn þann dag í dag alvarlegar afleiðingar fyrir húsnæðisöryggi venjulegs vinnandi fólks, og fjölskyldur þess.

Í rannsókn ASÍ og BSRB á leigumarkaði á árinu 2025 sögðu um 90% leigjenda sem leigja í almenna íbúðakerfinu, af Bjargi eða öðrum óhagnaðardrifnum félögum – að þeir byggju við húsnæðisöryggi. En aðeins helmingur – 50% þeirra sem leigja á markaðsforsendum, af einstaklingum eða félögum með hagnaðarsjónarmið, telja sig búa við húsnæðisöryggi.

Þetta er sláandi munur. Og það liggur fyrir að að síðustu árin hefur uppbygging á almennum íbúðum ekki strandað á stofnframlögum frá ríkinu. Þvert á móti – fleiri milljarðar sem ríkið hefur ráðstafað til þessarar uppbyggingar hafa ekki ratað út í raun. Vegna þess að alltof mörg sveitarfélög hafa neitað að lyfta litla fingri í þessum málum – neitað standa við sinn hlut og úthluta lóðum til óhagnaðardrifinna íbúðafélaga. Þetta er ótrúlegt ábyrgðarleysi.

Staðreyndin er þessi: Stærsta húsnæðismálið á Íslandi í dag er að Samfylking sigri í sveitarstjórnarkosningunum 16. maí. Ekki síst í fjölmennum sveitarfélögum sem setja tóninn fyrir landið allt: Til að byggja íbúðir fyrir alla tekjuhópa – líka tekjulægra vinnandi fólk, öryrkja, eldra fólk, stúdenta og með öðrum íbúðafélögum sem eru rekin án hagnaðarsjónarmiða.

Samfylkingin verður að sigra og það er okkar verkefni að tryggja að svo verði. Ekki bara í Reykjavík. Heldur líka í Hafnarfirði og í Kópavogi og hringinn í kringum landið.

Tökum dæmi: Tíundi hver Íslendingur er Kópavogsbúi – en samt hefur bæjarstjórnin í Kópavogi ekki úthlutað einni einustu lóð til Bjargs, sem byggir fyrir tekjulægra vinnandi fólk og tryggir fjölskyldum þess öruggt húsnæði. Núll lóðir – á 10 árum – í næstfjölmennasta sveitarfélagi landsins. Þetta er til skammar – svo ekki sé fastar að orði kveðið.

* * *

Og það mikilvægasta af öllu í húsnæðismálum – sem er löngu tímabært – er að ríki og sveitarfélög fari að vinna raunverulega saman að uppbyggingu á íbúðum fyrir alla:

Núna í vikunni var samið um 1.400 íbúðir á ríkislóðum í Reykjavík. Það eru ekki bara einhver plön sem birtast í glærum – heldur beinlínis uppbyggingarsamningar, milli ríkis og borgarinnar. Sem er í fyrsta skipti frá árinu 2017 sem ríkið er að leggja sitt af mörkum á þennan hátt. Til að fjölga íbúðum – með skilyrði um að byggðar verði íbúðir fyrir alla tekjuhópa.

Ég spyr: Hvers vegna var þetta ekki gert fyrr? Hvers vegna í ósköpunum hafa ríkisstjórnir síðustu ára legið á þessum lóðum – verðmætu en vannýttu byggingarlandi í borginni – eins og ormur á gulli? Og það á tíma þegar húsnæðisverðið var að rjúka upp í hæstu hæðir – með tilheyrandi afleiðingum fyrir verðbólgu og vaxtastig.

Þetta er algjörlega óskiljanlegt. En sýnir á móti hvað við getum gert þegar ríki og sveitarfélög taka höndum saman og vinna saman að settu marki. Og við höfum þegar gert sambærilega samninga um íbúðir á ríkislóðum við til dæmis Reykjanesbæ og fleiri sveitarfélög.

* * *

Á sama tíma og höfum við tryggt að fleiri íbúðir nýtist sem heimili fólks – dregið úr hvata til að safna íbúðum á fáar hendur, lagað hlutdeildarlánakerfið, tekið á Airbnb – loksins – aukið hlut stofnframlaga frá ríkinu til almennra íbúða, hafið stórfellda einföldun byggingarreglugerðar og ráðist í miklar umbætur á stjórnsýslu húsnæðismála. Og nú gripum við til aðgerða til að styrkja stöðu leigjenda – með því að flýta úrlausn ágreiningsmála, leigjendum að kostnaðarlausu, stórauka stuðning við leigjendaaðstoð Neytendasamtakanna og stemma stigu við mánaðarlegum vísitöluhækkunum á leigusamningum.

Við drögum úr vægi verðtryggingar frá og með næstu áramótum.

Og við höfum mótað atvinnustefnu sem hægir á stórfelldum og ósjálfbærum innflutningi launafólks sem treyst hefur verið á til að drífa áfram hagvöxt – þó að hagvöxtur á mann hafi verið 0% á meðan, yfir tæplega 10 ára tímabil.

Allt skiptir þetta máli fyrir húsnæðisöryggi venjulegs fólks.

IV.
Kæru félagar. Það verður kosið um fleira en húsnæðismál og auðvitað er það mismunandi frá einu sveitarfélagi til annars – eftir því hvernig stendur á.

En Samfylking er eini stjórnmálaflokkurinn í landinu sem hefur kynnt útspil þar sem lögð eru fram stefnumál þvert á landið – með þremur samvinnuverkefnum ríkis og sveitarfélaga til næstu ára:

1. Við ætlum að auðvelda rekstur og uppbyggingu – með einföldun regluverks.
2. Við ætlum að hlúa að fólkinu sem byggði landið – með því að efla og samþætta þjónustu við eldra fólk.
3. Og við ætlum að lækka kostnað barnafólks – með þaki á leikskólagjöld og 100% systkinaafslætti.

Og já – við höfnum Kópavogsskattinum á barnafjölskyldur upp á 450 þúsund krónur á einu ári – fyrir fjölskyldu með tvö börn. Gjaldaleið Sjálfstæðisflokks gegn barnafjölskyldum er ekki rétta leiðin – og það er alls ekki leið okkar jafnaðarfólks.

Það hefur ekki farið framhjá neinum að við viljum lögfesta rétt til leikskólavistar – eins og gert hefur verið á öllum hinum Norðurlöndunum. Með sameiginlegri fjármögnun ríkis og sveitarfélaga.

Þetta væri risastórt skref fyrir Ísland – á pari við stóru sigra verkalýðshreyfingarinnar sem við rifjum gjarnan upp á hátíðlegum stundum eins og 1. maí.

Þá erum við að tala um að lögfesta leikskólann og rétt til leikskólavistar að loknu fæðingarorlofi. Með því brúum við bilið fyrir foreldra. Tryggjum börnum jafnan rétt. Og síðast en ekki síst hlúum við auðvitað betur að faglega starfinu á leikskólunum, og starfsaðstæðum kennara og annarra – þegar leikskólarnir fá loksins þann sess sem þeir eiga skilið og innspýtingu fjármagns með aðkomu ríkisins. Ég má til með að benda líka á áhrifin á jafnrétti kynjanna sem ættu að vera öllum ljós.

En ég verð að viðurkenna að ég hef orðið steinhissa á viðbrögðum pólitískra andstæðinga okkar við þessu mikilvæga og sjálfsagða baráttumáli okkar jafnaðarfólks. Sem er vel ígrundað og byggir meðal annars á tillögum frá aðgerðahópi um brúun bilsins – sem var skipaður eftir síðustu kjarasamninga á almennum vinnumarkaði – með fulltrúum verkalýðshreyfingar, atvinnurekenda, kennara, ríkis og sveitarfélaga. Og reyndar hefur það verið formleg stefna Sambands íslenskra sveitarfélaga frá árinu 2022 að hefja viðræður við ríkið um að gera rekstur leikskóla að lögbundnu hlutverki sveitarfélaga – og að semja um tekjustofna til þjónustunnar!

Ég skil vel réttmætar áhyggjur af mönnun leikskólanna – og það er viðfangsefni sem við verðum að leysa samhliða, meðal annars með fjármögnun. Enda er það uppleggið í tillögum aðgerðahópsins – og mönnun er vandamál víðar í velferðarkerfinu sem þarf að taka á.

En ég spyr bara: Viljum við ekki stórhuga stjórnmál? Megum við ekki lengur setja markið hátt á sama hátt og brautryðjendurnir gerðu á síðustu öld? Og leysa mál sem hvíla þungt á fjölskyldum landsins – á sama hátt og gert hefur verið á Norðurlöndum? Þegar skólaskyldan var lögfest snemma á 20. öld þá var það ekki stoppað af vegna stöðunnar á mönnun og fagmenntun í farskólunum. Nei. Hugsum stórt, leysum mál og höldum áfram að vinna glæsta sigra. Við getum það vel!

Á meðan boða andstæðingar okkar engar lausnir – heldur einungis úreltar hugmyndir og afturhvarf til verri tíma – með hvötum fyrir konur til að vera bara heima og stórhættulegum hugmyndum um að aðgengi barna og foreldra að leikskólum eigi að ráðast af því hvort foreldrarnir vinni hjá stórfyrirtæki eða ekki. Þjónusta sem er borguð með útsvarsfé borgaranna! Þetta er engin lausn á stöðunni heldur aðför að því sterka almenna velferðarkerfi sem við höfum byggt upp í áranna rás hér á Íslandi. Það er ekkert vandamál að vera með sjálfstæða skóla inn á milli og einhverja dagvistun á vegum fyrirtækja – en ég ítreka það að það væri alls ekki lausn, heldur hörmuleg afturför, ef aðgengi barna og foreldra að leikskólum ætti að ráðast af vinnustað foreldranna.

V.
Jafnaðarmenn – kæru félagar: Þegar við í Samfylkingu segjum „Sterk velferð – stolt þjóð“ þá fangar það ákveðin gildi og kjarna í því sem við erum og því sem við viljum vera hér á Íslandi.

Það er að hluta til lýsing á veruleika – árangri sem hefur þegar unnist – en um leið, og ekki síður, er það hugsjón okkar:

Þar sem hinn vinnandi maður getur verið stoltur af sínu framlagi og af sínu þjóðfélagi – því sem við gerum og getum, hvert og eitt, en ekki síður af því sem við eigum hérna saman og því sem við gerum og getum saman. Þegar við tökum ábyrgð hvert á öðru – með sterkri velferð, auðugri menningu og blómlegu mannlífi fyrir alla sem hér búa.

Þar sem virðingu og verðmætum samfélagsins er ekki aðeins ráðstafað eftir lögmálum markaðsafla, eignum og tekjum.

Enda er markaðurinn þarfur þjónn – en afleitur húsbóndi. Og þetta skiljum við sósíaldemókratar.

* * *

Nú er rétti tíminn til að taka slaginn: Það eru 15 dagar í kosningar. Og Samfylking er loksins komin á þann stað sem brautryðjendurna dreymdi um – leiðandi í landsmálum – með söguleg sóknarfæri í sveitarstjórnum vítt um land. Gefum allt í þessa kosningabaráttu – og höldum áfram að vinna stóra sigra.

Til hamingju með daginn! Njótið vel – og kærar þakkir til Samfylkingarfélagsins í Reykjavík fyrir að standa fyrir þessari hefð á hverju ári.

Ræða Kristrúnar Frostadóttur, formanns Samfylkingar og forsætisráðherra, á baráttudegi verkalýðsins 1. maí 2026 í Iðnó í Reykjavík.

Ræða formanns 1. maí: „Sterk velferð – stolt þjóð“

Leit um „��"

3400 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3400 niðurstöður fundust við leit að „���������������������������������������������������"