Flokksstjórnarfundur er opinn öllu Samfylkingarfólki og öðrum sem hafa áhuga á að kynnast starfi flokksins.

Á fundinum gefst færi á opnu og milliliðalausu samtali við forystu Samfylkingar á landsvísu og í sveitarstjórnum. Stjórn flokksins kynnir upplegg að málefnavinnu Samfylkingar í vetur og fram að næsta landsfundi. Einnig verður boðið upp á áhugaverð erindi um málefni Suðurlands og almennar umræður að vanda.

Dagskrá:
 8:30     Lagt af stað frá Reykjavík til Hellu – Rútan fer frá bílastæði við Hús verslunarinnar
10:30    Heimsókn um Hellu - Eggert Valur Guðmundsson leiðir hópinn á valda staði
12:00    Skráning og létt hádegissnarl
12:30    Fundur settur
12:35    Kynning á stjórnmálaályktun
12:40    Ræða formanns
13:10    Samtal við salinn – Þingmenn og ráðherrar fara yfir áherslumál þingsins
13:50    Kynning á forystu málefnanefnda
14:00    Kaffihlé og kosning í formann laganefndar og sátta- og trúnaðarnefnd hefst       
14:25    Nýr stýrihópur fer yfir forgangsmál í málefnastarfi og svarar spurningum
14:55    Daglegt líf – Reynslusögur úr nærumhverfinu
15:15    Upptaktur fyrir sveitarstjórnarkosningar
16:00    Niðurstöður kynntar úr kosningum
16:05    Almennar umræður, afgreiðsla tillagna og ályktun fundarins   
17:05    Fundi slitið        
17:05    Gleðistund og frjáls tími - heitir pottar og gufuböð eru á svæðinu

Nýkjörinn forseti UJ, Jóhannes Óli og þingmaðurinn Sigmundur Ernir sjá um að stýra dagskrá kvöldsins vel og örugglega.

Skemmtinefnd Suðurlands verður með óvænt atriði og tónlistarmaðurinn Ívar Daníels sér um fjörið þegar líða tekur á kvöldið.

11:00    Rútan leggur af stað til Reykjavíkur 

Stjórnmálaályktun flokksstjórnar var samþykkt við lok fundarins. Hana má nálgast hér að neðan.

Allar ályktunartillögur fyrir reglulega flokkstjórnarfundi, sem aðrir flytja en stjórn eða framkvæmdastjórn, þurftu að berast fyrir 13. september. Ein tillaga barst frá stjórn Samfylkingarfélagsins í Kópavogi, hana má kynna sér hér. 

Breytingatillaga stjórnar Samfylkingarfélagsins í Kópavogi.

Óskað er eftir framboðum í sátta- og trúnaðarnefnd flokksins.
Á fyrsta flokksstjórnarfundi eftir reglulegan landsfund skal kjörin þriggja manna sátta- og trúnaðarnefnd og einn nefndarmann til vara. Opnað hefur verið fyrir framboð í nefndina, en framboðsfrestur er 27. september kl. 12:00, kosið verður í nefndina á fundinum.

Óskað eftir framboði í formann laganefndar.

Sökum óviðráðanlegra aðstæðna hefur sú staða formanns laganefndar losnað og er því óskað eftir framboði í embættið. Opið er fyrir framboð, en framboðsfrestur er 27. september kl. 12:00. Kosið verður á fundinum.

Hér er hægt að kynna sér þau sem hafa boðið sig fram. Framboðsfrestur er 27. september kl. 12:00. 

Flokksstjórnarfundur Samfylkingarinnar fer fram laugardaginn 27. september á Hótel Stracta á Hellu. Fundurinn verður settur kl. 12:30 og lýkur með kvöldverði og skemmtun.

Flokksstjórnarfundur á Hellu: Samfylking í þjónustu þjóðar

Samfylkingarfélagið í Reykjavík gengst í vetur fyrir spjallfundum um Ísland og Evrópusambandið, og er gert ráð fyrir stuttum fundum mánaðarlega með einum gesti eða tveimur.

Fyrsti fundurinn verður núna á miðvikudaginn, 1. október, frá kl. 17 til um 18.30, á Hallveigarstíg 1, og er gestur okkar þá Magnús Árni Skjöld, formaður Evrópuhreyfingarinnar, og góður félagi okkar í Samfylkingunni gegnum árin. Við spjöllum um starf hreyfingarinnar, væntanlega þjóðaratkvæðagreiðslu og stöðu Evrópumálsins.

Næsti spjallfundur verður svo miðvikudaginn 5. nóvember, og þá spjallar við okkur Þorgerður Katrín Gunnarsdóttir utanríkisráðherra. Miðvikudaginn 3. desember mætir svo Dagur B. Eggertsson, sem með öðru er formaður Natónefndarinnar á alþingi.

Þetta spjall um Evrópu verður á lágu nótunum, fjarri kastljósi fjölmiðla, og er tilgangurinn bæði að fræðast og undirbúa sig fyrir atkvæðagreiðsluna um aðildarviðræður seinna á kjörtímabilinu.

Allir félagar velkomnir ‒ og takið með ykkur gesti! 

Aðalfundur Fulltrúaráðs Samfylkingarinnar í Reykjavík verður haldinn á Kastalakaffi, Suðurlandsbraut 72, mánudaginn 22. september kl. 17:00 - 18:30 

Á fundinum er kosið í stjórn FSR, aðeins fulltrúaráð hefur atkvæðisrétt. Aðalfundur FSR er opinn öllum félögum í Reykjavík með málfrelsi og tillögurétt. Atkvæðisrétt á fundum fulltrúaráðsins eiga eingöngu kjörnir fulltrúar ráðsins. 


Ennþá er hægt að gefa kost á sér í embætti, frestur er fram að fundi 22. september til kl. 17:15. Eftirfarandi hafa gefið kost á sér til kjörs.

Formaður: 
Björk Vilhelmsdóttir 

Gjaldkeri: 
Lilja Hrönn Önnudóttir Hrannarsdóttir

Sigfús Ómar Höskuldsson 

Meðstjórnendur: 
Ármann Leifsson  

Viðar Eggertsson 
 
Kosið verður með kjörseðlum inni á fundinum sjálfum. Kjörstjórn skipa Sigríður Ingibjörg Ingadóttir, formaður, Aðalheiður Frantzdóttir og Stein Olav Romslo. 

Vakni upp einhverjar spurningar varðandi framboð eða kosningar er hægt að hafa samband við formann kjörstjórnar í síma 895 0272.  


Dagskrá
1.     Skýrsla framkvæmdastjórnar

2.     Ársreikningar og árshlutareikningur þess árs sem aðalfundur er haldinn

4.     Skýrslur þingsveitar og borgarstjórnarflokks

c.     Kjör þriggja aðalmanna og fimm varamanna

7.     Kjör félagslegra skoðunarmanna

8.     Önnur mál: Tillaga stjórnar FSR um fulltrúa í Flokksstjórn

Fundarstjóri: Gunnar Alexander Ólafsson

Svæðisskipulagið sem er frá 2015 fól í sér gríðarlega framför og framtíðarsýn um metnaðarfulla, hagkvæma og spennandi framtíðarþróun höfuðborgarsvæðisins. Það hefur algerlega staðist tímans tönn. En hvað er undarlegt í umræðunni?

Í fyrsta lagi hefur verið búin til umræða um óeðlilegt neitunarvald sveitarfélaga. Sannleikskornið í því er að svæðisskipulag byggist á sameiginlegri niðurstöðu og samþykki allra sveitarfélaga sem að því standa. Spjótum hefur hins vegar verið beint að Reykjavíkurborg. Staðreyndin er þó sú að aðeins eitt sveitarfélag hefur hafnað tillögu frá öðru um breytingar á vaxtarmörkum í svæðisskipulagi sl. ár. Þetta er Kópavogur sem hafnaði tillögu Garðabæjar um breytingar á skipulagi á mörkum sveitarfélaganna.

Í öðru lagi hefur verið látið að því liggja að staðið hafi verið gegn tillögum að útþenslu byggðar utan vaxtarmarka í Hafnarfirði annars vegar og hins vegar eldri borgara byggð við Gunnarshólma í landi Kópavogs, austan Hólmsheiðar. Í hvorugu tilvikinu hefur komið fram formleg tillaga viðkomandi bæjarfélaga. Ekki er beðið eftir borginni heldur niðurstöðum áhættumats um mögulegt hraunrennsli úr Krísuvíkurkerfinu annars vegar og Bláfjallakerfinu hins vegar, auk upplýsinga um vatnsvernd, snjóþyngsli og áhrif hugmyndanna á umferð á stofnbrautum höfuðborgarsvæðisins. Slíkar grunnupplýsingar þurfa að liggja fyrir áður en afstaða er tekin.

Í þriðja lagi virðist hafa farið fram hjá mörgum að svæðisskipulagið felur í sér ný lönd, lóðir og byggingarheimildir fyrir gríðarlegan áframhaldandi vöxt innan núverandi vaxtarmarka. Eru til tölur um þetta? Já. Margir hafa bent á að fjölgun á svæðinu hefur verið um 70.000 íbúar á sl. 10 árum, sem var umfram spár. Miklu færri virðast hafa áttað sig á að sveitarfélögin taka reglulega saman hvað er hægt að byggja innan skipulagsins. Í Þróunaráætlun höfuðborgarsvæðisins sem síðast var tekin saman fyrir rúmu ári kemur fram að hægt er að bæta við 58.000 íbúðum innan vaxtarmarka. Það jafngildir byggingu heils Kópavogs, auk Hafnarfjarðar, Garðabæjar, Mosfellsbæjar og tíu Seltjarnarnesja, og það innan 15 ára. Reykjavík á mesta uppbyggingarmöguleika en Mosfellsbær og Garðabær geta tvöfaldast, Kópavogur stækkað um þriðjung og Hafnarfjörður um meira en helming. Ef 2,4 einstaklingar búa í hverri íbúð, eins og nú, má byggja íbúðir fyrir 145.000 nýja íbúa á höfuðborgarsvæðinu, innan vaxtarmarka.

Svæðisskipulagið hefur nefnilega reynst gott tæki til að stýra þróun svæðisins út frá heildarhagsmunum. Það er sveigjanlegt og stórhuga þegar uppbygging er annars vegar.

Höfundur er alþingismaður Reykvíkinga. dagur@althingi.is

Það er mikil kosningalykt af umræðu um svæðisskipulag höfuðborgarsvæðisins og vaxtarmörk höfuðborgarsvæðisins, sem eru hluti af því.

I.
Flokksstjórn — félagar, Rangæingar og aðrir gestir:

Við erum á góðum stað. Og við erum sannarlega rétt fólk á réttum tíma – til að safnast saman hér á Hellu, taka stöðu og leggja línur.

Því að nú ræsum við vélarnar fyrir veturinn. Við höfum verk að vinna. Og ábyrgð okkar er mikil.

* * *

Í þessari ræðu ætla ég að flytja nokkur tíðindi af flokksstarfi Samfylkingar: Ég mun kynna upplegg fyrir nýja lotu í málefnavinnu flokksins – fram að næsta landsfundi. Lýsa minni sýn á verkefni okkar í sveitarstjórnarkosningum í vor. Og boða sérstakan húsnæðis- og efnahagspakka í haust til að gera meira hraðar til vinna niður vexti og verðbólgu.

II.
En fyrst vil segja þetta: Við jafnaðarmenn erum í góðri stöðu – ekki til að slaka á – heldur til að gera betur. Vinna meira og sækja fleiri sigra fyrir fólkið í landinu.

Það er alveg ljóst að sigurinn í þingkosningunum á síðasta ári var aldrei endapunktur í neinu. Heldur þvert á móti: Nýtt upphaf. Fyrir flokkinn og þjóðina.

Við höfum brett upp ermar og gengið til verka.

Og það leynir sér ekkert að það er kraftur í okkar röðum núna – sem við skynjum í salnum hér í dag og sem eftir er tekið úti í samfélaginu. Og ég segi:

Samfylkingin hefur aldrei verið eins sterk, samstillt og vel staðsett. Þétt með þjóðinni – við bak hins vinnandi manns. Til þjónustu reiðubúin.

* * *

Já, kæru félagar – við finnum þetta öll, upp úr og niður úr í flokknum okkar: Hugarfarið er rétt, viljinn sterkur, hæfnin til staðar. Og við erum samstilltari en nokkru sinni fyrr. Það er gleðilegt.

Samfylking í þjónustu þjóðar – í forystu í ríkisstjórn og víða í sveitarstjórnum. Og reiðubúin til verka í enn fleiri sveitarfélögum, hringinn í kringum landið, fáum við til þess traust.

Hvernig gerðum við þetta?

Við sögðumst ætla að fara aftur í kjarnann.
Við sögðumst ætla að koma á virkari tengingu við fólkið í landinu.
Við sögðumst ætla að breyta verklagi og menningunni í flokknum okkar – til að endurheimta traust.

Allt þetta höfum við gert.

Og þess vegna erum við á þessum stað í dag: Sterkur flokkur. Samstilltur flokkur. Tilbúin í kosningar, tilbúin að vinna og tilbúin að taka aukna ábyrgð í íslensku samfélagi.

Við getum verið stolt af þessu. Þetta var aldrei auðvelt eða sjálfsagt. En nú er næsta verkefni að fara aftur með þetta hugarfar til fólksins í landinu – halda áfram lifandi málefnavinnu og stefnumótun. Og sigra í sveitarstjórnarkosningum næsta vor. Það ætlum við að gera.

III.
Flokksstjórn: Samfylking – í þjónustu þjóðar.

Hvað meinum við með því og hvers vegna skiptir það máli?

Þetta er áminning um það hvers vegna við erum að þessu yfir höfuð. Og fyrir hvern við störfum í stjórnmálum. Því að stjórnmál eru þjónusta. Og jafnaðarstefnan – sem við höldum á lofti – er sú stjórnmálastefna sem sér til þess að allir séu með, óháð stétt og stöðu, búsetu eða bakgrunni.

Samfylkingin er sá flokkur sem stendur með venjulegu fólki og passar upp á Ísland. Það er enginn annar flokkur sem gerir þetta betur.

Við tökum slaginn. Hristum upp í kerfinu. Til að skila af okkur raunverulegum árangri og breytingum - sem virkilega munar um – fyrir vinnandi fólk í daglegu lífi .

Ég legg áherslu á þetta og við skulum öll hafa það hugfast:

Við megum aldrei verða varðhundar kerfis sem er ekki að virka – aldrei. Þvert á móti: Það er einmitt skylda okkar að láta kerfið virka. Tryggja að það virki – með því að gera breytingar þegar þörf er á og ala á samstöðu. Því ef við gerum það ekki þá verður það ysta hægrið sem þykist bjóða betur: Með því ala á sundrungu og brjóta kerfið bara niður.

* * *

Ég var í London í gær. Í samtali við leiðtoga systurflokkanna okkar – meðal annars á Norðurlöndum, í Bretlandi, Kanada, Ástralíu, Spáni og fleiri löndum – þar sem við ræddum um það hvernig við vinnum fyrir venjulegt fólk. Hvernig við leiðum breytingar og náum árangri. Og staðreyndin er sú að víða á Vesturlöndum hafa sósíaldemókratar verið að sigra í kosningum og vinna endurkjör. Það er sveifla alþjóðlega – gegn ysta hægrinu sem elur á sundrungu – með klassískri jafnaðarstefnu sem keyrir á samstöðu.

Og ég vil koma á framfæri kveðju til ykkar allra frá félögum okkar þarna úti. Við erum ekki einangruð – við erum hluti af alþjóðlegri hreyfingu jafnaðarmanna. En þó það séu viðsjárverðir tímar. Þá erum við staðráðin í því að halda áfram og sækja frekari sigra.

* * *

Já: Samfylking – í þjónustu þjóðar.

Við gætum hagsmuna Íslands fyrst – alltaf, ofar hagsmunum flokksins. Þannig hugsum við – þannig vinnum við. Við höfum sýnt það í verki og þetta hugarfar mættu fleiri flokkar temja sér í sinni pólitík. Það væri öllum fyrir bestu.

Við pössum upp á Ísland. Landið allt – það sem við eigum saman og það sem fyllir okkur stolti. Enda eftirlátum við ekki öðrum að skilgreina hvað það er sem bindur okkur saman og gerir okkur að þjóð.

Þetta hugtak – þjóð – skiptir máli. Það hefur meiningu fyrir fólki. Og okkar pólitík snýst um samstöðu – að vernda og varðveita það sem við eigum hérna saman – að vekja von og stolt í brjósti þeirra sem búa hérna og byggja þetta samfélag.

Það er ekki fjarhægrið sem gerir þetta – sama hvað það reynir að telja fólki trú um annað. Með því að skilgreina þjóðarhugtakið þröngt og beita því til að sundra. En svarið er ekki að forðast umræðu um þetta – heldur að finna sameinandi þráð í gegnum hug og hjörtu fólks, þvert yfir landið.

Og það erum við jafnaðarmenn sem gerum þetta best. Þorri Íslendinga er með sterka jafnaðartaug. Við erum flest kratar inn við beinið.

En það gerir ábyrgð okkar í Samfylkingu – jafnaðarflokki Íslands enn meiri fyrir vikið. Því að við erum kyndilberar þessarar stefnu hér á landi. Sem hefur skapað einhver farsælustu samfélög í heimi.

IV.
Kæru félagar – já. Við erum í góðri stöðu til að gera enn betur.

Það er sannarlega líf í flokknum. Þótt við veitum forystu í ríkisstjórn – þá höldum við áfram í stöðugri stefnumótun og samtali við fólkið í landinu.

Samkvæmt skipulagsreglum Samfylkingarinnar ber stjórn ábyrgð á málefnastarfi. Og á fyrsta fundi flokksstjórnar eftir landsfund er lögð fram tillaga að uppleggi í því fram að næsta landsfundi. Þetta gerum við í dag.

Og tillagan er sú að áfram verði unnið samkvæmt nýju fyrirkomulagi eins og verið hefur síðustu ár: Með tvískiptu málefnastarfi – þar sem annars vegar er unnið að vel völdum forgangsmálum, einu í einu, sem stjórn velur út frá pólitískum áherslum hverju sinni. Það er gert undir forystu stýrihóps sem stendur fyrir víðtæku samtali í flokknum, á opnum fundum um land allt og við sérfræðinga og aðra sem láta sig viðkomandi málefni varða.

Hins vegar eru skipaðir tengiliðir stjórnar við málefnanefndir sem vinna að endurskoðun á stefnu Samfylkingar í heild, eftir því sem þurfa þykir, fram að næsta landsfundi. Og í þessum nefndum er sömuleiðis tækifæri til að standa fyrir samtali í flokknum um ýmis mál sem kunna að koma upp og kalla á umræðu. Ég hvet alla flokksmenn til að láta til sín taka í þessari vinnu og opna flokkinn enn frekar fyrir öllum þeim sem vilja leggja okkur lið með einum eða öðrum hætti.

Á síðasta kjörtímabili unnum við unnum eftir þessu uppleggi. Samkvæmt plani. Og það virkaði:

Við sögðumst ætla að taka heilbrigðis- og öldrunarmálin fyrst, svo atvinnu og samgöngur og loks húsnæðis- og kjaramál. Þetta gerðum við – með opnu samtali um landið allt. Og gáfum svo út útspil eftir hverja lotu til að sýna á spilin: Örugg skref í heilbrigðis- og öldrunarmálum. Kröfu um árangur í atvinnu- og samgöngumálum. Framkvæmdaplan í húsnæðis- og kjaramálum.

Sem lagði svo grunninn að kosningastefnu, stefnuyfirlýsingu ríkisstjórnar og sem við framkvæmum nú í ríkisstjórn. Og eftir þessu er tekið.

Verkin tala. Höldum áfram.

* * *

Flokksstjórn – það gleður mig að greina frá því að fram að næsta flokksstjórnarfundi, sem verður að vori, skömmu fyrir sveitarstjórnarkosningar, þá tökum við fyrir fyrsta forgangsmálið í málefnavinnu Samfylkingar: Daglega lífið.

Það þarf ekki að vera flókið: Daglega lífið.

Strax í dag förum við af stað – með nýjan stýrihóp. Og á næstu vikum og mánuðum munum við banka á dyr hjá heimilum, fyrirtækjum og stofnunum og spyrja:

Hvernig getur Samfylkingin aðstoðað? Hvernig léttum við lífið þitt? Hvernig bætum við daglega lífið?

Þarna verður fókusinn: Passa krakkana, skutla í frístundir, kaupa í matinn. Hver er staðan hjá afa og ömmu? Hvernig er reksturinn? Og hvernig getur Samfylkingin aðstoðað?

Við byrjum breitt og daglega lífið er ansi opið umfjöllunarefni. Og þannig á það að vera – því að þegar kemur sveitarstjórnarkosningum þá er nærþjónustan öll undir. En við munum að sjálfsögðu skerpa á áherslunum í útspili vel fyrir kosningar. Þar sem við leggjum til afmarkaðar og raunhæfar aðgerðir til að bæta daglega lífið.

* * *

Næsta forgangsmál þar á eftir – sem við tökum þá fyrir frá vori á næsta ári og fram á haust – verður: Einföldun regluverks. Þá munum við taka stöðuna og spyrja: Hvernig gengur? Hver eru næstu skref? Hvað getur Samfylkingin gert til að tryggja að kerfið virki eins og það á að gera?

Og þriðja forgangsmálið – sem verður í brennidepli frá og með næsta hausti og fram að landsfundi vorið 2027 – verður: Öryggi borgaranna. Íslenska leiðin. Þá getum við rætt öryggis- og varnarmál í víðu samhengi. Allt frá löggæslu til almannavarna og utanríkismála. Hvað virkar? Hvað má varast? Og hverju þarf að breyta?

Þetta eru spennandi viðfangsefni og vonandi virkjum við sem flesta með okkur í þetta verkefni.

* * *

Formaður framkvæmdastjórnar mun á eftir fara betur yfir fyrirkomulag málefnavinnunnar og segja frá því hverjir verða tengiliðir stjórnar við hverja málefnanefnd.

En stýrihópurinn sem leiðir vinnu Samfylkingar við fyrsta forgangsmálið að þessu sinni – um daglega lífið – er skipaður góðu flokksfólki, héðan og þaðan af landinu, sem flest er í einhverjum tengslum við sveitarstjórnarstigið:
• Árni Rúnar Þorvaldsson – Hafnfirðingur í sveitarstjórn, kennari, stjórnarmaður í Samfylkingu og formaður sveitarstjórnarráðs
• Eydís Ásbjarnardóttir – Eskfirðingur á Alþingi og fyrrum skólameistari í Verkmenntaskóla Austurlands
• Eyrún Fríða Árnadóttir – Hornfirðingur í sveitarstjórn og formaður bæjarráðs
• Og formaður stýrihópsins verður Jónas Már Torfason – lögfræðingur og Kópavogsbúi sem er á heimleið til Íslands

Þetta er glæsilegur hópur. Gangi ykkur vel. Gefum þeim gott klapp.

V.
Flokksstjórn. Saman höfum við breytt gangi íslenskra stjórnmála.

Saman höfum við rifið okkur upp í landsmálunum eftir rúman áratug utan ríkisstjórnar.

En við höfum á síðustu árum staðið betur í sveitarstjórnum landsins. Þar höfum við um árabil notið trausts til að hafa stjórn á þeim málum sem standa fólki næst – en margt má betur fara víða. Og við megum aldrei festast í stað.

Þess vegna er mikilvægt að við sýnum fólki að við verðum ekki of góð með okkur og heimakomin á valdastólum. Við tökum traustinu og valdinu aldrei sem gefnu.

Heldur stöldrum við, stillum fókusinn upp á nýtt og hristum upp í hlutunum þar sem við á.

* * *

Hvernig sigrum við í sveitarstjórnarkosningum næsta vor?

Mín sýn er þessi: Gerum það sama og við gerðum í landsmálunum. Förum aftur í kjarnann. Verum í virkri tengingu við fólkið í landinu. Og sýnum í verki að við erum agaður og samstilltur flokkur sem hefur stjórn á hlutunum – sem kann að vinna og láta verkin tala.

Við gerum sömu kröfur til okkar fólks í sveitarstjórnum og við gerum okkar fólks í landsmálunum.

Við stöndum þétt saman. Enda styrkir það sveitarstjórnir að vera í góðu sambandi við landstjórnina, og öfugt.

Og síðast en ekki síst: Við bjóðum okkur alltaf fram til að leiða breytingar – laga vandamál – og þess vegna erum við óhrædd við að líta í eigin barm og skoða hvað við sjálf getum gert betur.

* * *

Aðrir flokkar hafa stundum lagt þá flokkspólitísku línu að félagarnir í héraði verði að bjóða fram lista undir merkjum síns flokks – til að halda „vörumerkinu“ á lofti. Þetta gerum við ekki. Við treystum fólki til að meta sjálft í sínu nærsamfélagi hvað er líklegast til að skila raunverulegum sigrum og árangri – að bjóða fram S-lista Samfylkingar, Samfylkingar og óháðra eða sameiginlegan framboðslista með öðrum flokkum. Skilaboðin eru skýr: Við stöndum með ykkur og veitum stuðning Samfylkingar sama hvernig þið gerið þetta. En takið slaginn, gefið kost á ykkur og axlið ábyrgð á nærsamfélaginu – með gildi klassískrar jafnaðarstefnu að leiðarljósi.

Þetta eru spennandi tímar í stjórnmálum. Vinnum þetta saman. Gerið okkur stolt.

VI.

Flokksstjórn. Ég vil ekki að þreyta fólk með því að þylja upp afrekaskrá – eða öll stórpólitísku málin á þingmálaskrá ríkisstjórnarinnar. Ég veit að þið fylgist vel með gangi mála á þinginu. Og ég veit að við munum ræða þessi mál hér á eftir í samtali við salinn og í almennum umræðum.

Í staðinn ætla ég að líta í eigin barm og játa að þótt ríkisstjórnin hafi verið sögð ganga heldur hratt til verka, fremur en hitt – þá liggur núna fyrir að við verðum að gera meira hraðar til að vinna niður vexti og verðbólgu.

Til að lækka kostnað heimila og fyrirtækja – eins og við sögðumst ætla að gera.

Vissulega hafa vextir lækkað um 1,5% síðan boðað var til kosninga fyrir tæpu einu ári – og það hefur lækkað kostnað meðalheimilis um allt að 50 þúsund krónur í hverjum einasti mánuði. Það munar nú um minna. En betur má ef duga skal.

Og þess vegna get ég greint frá því hér að ríkisstjórnin hefur komið saman sérstökum húsnæðis- og efnahagspakka sem verður kynntur núna á næstu vikum – til að gera meira hraðar:

Þetta verður stór pakki með nýjum efnahagsaðgerðum sem virkilega munar um – og ýmiss konar aðgerðum í húsnæðismálum sem fela í sér:
• tiltekt sem vinnur gegn þenslu,
• markvissari húsnæðisstuðning,
• meiri húsnæðisupbyggingu – með aukinni skilvirkni og fyrirsjáanleika,
• einföldun regluverks

• og margháttaðar aðgerðir sem við í Samfylkingu höfum talað fyrir til að draga úr hvata til að fjárfestingarvæða íbúðir – meðal annars með því að loka glufum og draga úr undanþágum í skattkerfinu.

Þetta kemur til viðbótar við endurflutt frumvörp frá vorþingi um að taka á Airbnb-útleigu og koma á betri yfirsýn og sanngjarnari reglum með skráningarskyldu á leigumarkaði.

Og allt verða þetta aðgerðir sem hægt verður að ganga í og framkvæma hratt. Því að þessi ríkisstjórn er fyllilega meðvituð um að það er löngu komið nóg af fögrum fyrirheitum og alls konar hugmyndum í húsnæðismálum. Við kynnum því ekki neitt nema það sem okkur er full alvara með að framkvæma.

Núna er tími framkvæmda.

VII.
Flokksstjórn – félagar og góðir gestir:

Ég hlakka til að verja deginum með ykkur. Ég er stolt af því að tilheyra hópi jafnaðarfólks á Íslandi. Við skulum nota tímann vel – og skiptast á skoðunum um það hvernig kröftum okkar er best varið. Með Samfylkingu – í þjónustu þjóðar.

Því öll höfum við hlutverki að gegna og öll getum við lagt okkar af mörkum.

Leyfum okkur að vera ósammála um einstök mál – en sameinumst svo, í lok dags, af fullum krafti í Samfylkingu. Skemmtum okkur vel í kvöld. Og förum svo út af þessum fundi og höldum hátt á lofti merki frelsis, jafnréttis og samstöðu á Íslandi.

Það er okkar hugsjón. Það er góður málstaður. Svo höldum áfram – til sigurs!

Ræða Kristrúnar Frostadóttur formanns Samfylkingar á flokksstjórnarfundi á Hótel Stracta á Hellu 27. september 2025.

Ræða Kristrúnar: „Samfylking í þjónustu þjóðar“

Samfylkingin í Kópavogi efnir til opins fundar um þingveturinn framundan og opins samtals við kjörna fulltrúa. 

Fundurinn verður haldinn í sal Siglingafélagsins Ýmis við Naustavör í Kópavogi. 

Gestir fundarins eru þau Guðmundur Ari Sigurjónsson þingflokksformaður og Arna Lára Jónsdóttir formaður efnahags- og viðskiptanefndar.

Spjallkaffi Samfylkingarinnar í Reykjavík 60+ verður á sínum stað miðvikudaginn 17. september kl. 10:00 - 12:00 í sal Samfylkingarinnar, Hallveigarstíg 1, 101 Reykjavík.

Gestur okkar verður Stefán Jón Hafstein.

Það verður heitt á könnunni og eitthvað með því.

Verið öll velkomin!

Fjárlög eru eitt stærsta lagafrumvarp sem lagt er fyrir Alþingi á hverju ári. Í því er ákveðið í hvað peningar úr sameiginlegum sjóðum eiga að fara, t.d. heilbrigðismál, menntamál og allt annað. Í tengdum frumvörpum eru heimildir til að innheimta skatta og gjöld til að eiga fyrir þessu öllu saman.

Undanfarin ár hafa útgjöldin verið mun hærri en tekjurnar. Það hefur búið til gat, sem taka þarf lán fyrir, og við köllum þetta gat fjárlagahalla. Halli hefur verið á fjárlögum á hverju ári síðan árið 2019. Mörg hundruð milljarðar hafa verið teknir að láni til að fjármagna það. Þau þarf að endurgreiða.

Hallinn í tillögu fjármálaráðherra að fjárlögum fyrir næsta ár er 15 milljarðar, sem er langtum minna en á undanförnum árum. Í fyrra var áætlað að hallinn yrði 62 milljarðar og gert var ráð fyrir því að hann yrði 39 milljarðar 2026 af fyrri ríkisstjórn. Skuldir ríkissjóðs lækka úr 59,3% af landsframleiðslu í fyrra í 50,9% á því næsta.

Þessi þróun er góð og stefnt er að því að skila fjárlögum án halla næsta haust, fyrir árið 2027. Þetta er mikilvægt því niðurstaða ríkissjóðs hefur áhrif á hvort vextir og verðbólga haldist há.

Flestir vita að vextir hafa verið að lækka en þyrftu að lækka meira. Tökum dæmi. Sú lækkun vaxta sem hefur orðið frá síðasta hausti er um 1,5% og þýðir að meðalheimili með meðalskuldir þarf að borga um 520 þúsund krónum minna í vexti á ári.

Ríkisstjórnin og ráðherrar hennar hafa kynnt margt sem meiri fjármunir fara í samkvæmt fjárlagafrumvarpinu. Framlög eru til fjölgunar lögreglumanna, og til aukinnar meðferðar við fíkn, geðheilbrigði og heilbrigðisþjónusta um landið er hluti af því. Öryrkjar fá kjarabætur. Það er verið að auka fjármagn í viðhald á vegakerfinu og aðrar fjárfestingar og þannig mætti áfram telja. Þetta er mikilvægt vegna þess að fjárfestingar hafa verið of litlar og við tölum um að samfélagið sé í innviðaskuld. Fjárfestingar verða 114 milljarðar á næsta ári en voru 95 milljarðar samkvæmt frumvarpi fyrir 2025.

Þótt þessar viðbætur séu oft taldar upp þá er því ekki að leyna að það er töluvert aðhald í frumvarpinu. Hver ráðherra fyrir sig leggur til hvernig fjármunum er forgangsraðað innan viðkomandi málaflokks og einstaka tillögur um sparnað eða niðurskurð hafa strax vakið athygli. Það er hlutverk Alþingis að fara yfir hvort forgangsröðunin sé í öllum tilfellum skynsamleg og hvort ástæða er til að gera einhverjar breytingar. Alþingi hefur síðasta orðið um endanlega niðurstöðu fjárlaga. Það er kallað að þingið hafi fjárstjórnarvaldið. Hvorki má verja fjármunum né leggja á skatta og gjöld nema með samþykki Alþingis.

Höfundur er alþingismaður Reykvíkinga og varaformaður fjárlaganefndar Alþingis. dagur@althingi.is

Er hægt að gera blaðagrein um fjárlög skiljanlega, jafnvel fyrir fólk sem er að spá í fjármál ríkisins í fyrsta sinn?

Kosið verður í sáttanefnd á haustfundi flokksstjórnar á Hótel Stracta, Hellu, laugardaginn 27. september, framboðsfrestur rennur út sama dag kl. 12:00. Nöfn þeirra sem hafa gefið kost á sér verða birt kl. 11:00 miðvikudaginn 24. sept., og bætt við eftir því sem framboð berast.  

Aðeins flokksstjórn á fundi hefur atkvæðisrétt. 

Hér er hægt að senda inn framboð: https://forms.gle/bbRXc9sVvN4Ym2S66

Kosning fer fram á fundinum og  niðurstöður verða kynntar á fundinum eftir að kjörstjórn hefur lokið sínum stöfum. 

Vinsamlegast hafið samband við sigrun@samfylking.is ef þið hafið einhverjar spurningar.

Á fyrsta flokksstjórnarfundi eftir landsfund skal kjörin þriggja manna sátta- og trúnaðarnefnd og einn til vara. Þeir sem skipa sátta- og trúnaðarnefndina skulu ekki vera kjörnir fulltrúar flokksins á Alþingi og/eða sveitarstjórnum, fulltrúar í framkvæmdastjórn flokksins, starfsmenn skrifstofu flokksins né heldur vera kjörnir fyrir hönd flokksins í stjórnir ríkisstofnana eða valdir af ráðherrum flokksins til slíkra verka.

Tilgangur nefndarinnar er að stuðla að lausn erfiðra mála sem kunna að koma upp innan og/eða á milli aðildarfélaga, kjördæmisráð, fulltrúaráða og/eða einstakra flokksmanna vegna:

a. að taka við erindum um ótilhlýðilega framkomu, þ.m.t. einelti, kynbundna áreitni, kynferðislega áreitni og ofbeldi, og afgreiða þau í samræmi við málsmeðferðarreglur sem settar eru af landsfundi, sbr. gr. 14.5 (trúnaðarnefndarmál), og

b. stuðla að lausn erfiðra mála sem kunna að koma upp innan og/eða á milli aðildarfélaga, kjördæmisráð, fulltrúaráða og/eða einstakra flokksmanna vegna:

alls ágreinings sem kann að koma upp innan aðildarfélaganna og varða starfsemi þeirra og samþykktir,

ágreinings sem kann að koma upp milli aðildarfélaga varðandi starfsemi þeirra og samskipti sem ekki tekst að jafna,

ágreinings sem kann að kom upp innan kjördæmis- eða fulltrúaráðs um lög flokksins eða samþykktir ráðsins,

Óskað eftir framboðum í sátta- og trúnaðarnefnd

Samfylkingin í Hafnarfirði boðar til opins fundar með Víði Reynissyni, þingmanni Samfylkingarinnar og formanni allsherjar- og menntamálanefndar, mánudaginn 8. september kl. 20:00 í húsnæði Samfylkingarinnar að Strandgötu 43.

Víðir ræðir við okkur um stöðuna í pólitíkinni í dag, þingveturinn fram undan, áherslur ríkisstjórnarflokkanna og önnur mál, t.d. hættumat fyrir höfuðborgarsvæðið.

Hvetjum áhugasama til að mæta og ræða mikilvæg málefni.

Hvetjum áhugasama til að mæta og ræða mikilvæg málefni.

Leit um „��“

2823 niðurstöður fundust við leit að „��“

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������“

2823 niðurstöður fundust við leit að „���������������������������“