Stjórnarfar, ríkisvald og mannréttindi 

Samfylkingin berst fyrir auknu lýðræði, valddreifingu og jafnri aðstöðu allra einstaklinga til þátttöku í ákvörðunum sem varða þá sjálfa og samfélagið allt. 

Við viljum samfélag þar sem allir eru jafnir fyrir lögum og njóta fullra mannréttinda án mismununar, svo sem vegna kyns, kynhneigðar, efnahags, uppruna eða stöðu að öðru leyti. Margbreytileiki mannlífsins skal virtur í hvívetna og öllum tryggð mannhelgi, persónufrelsi og vernd gegn ofbeldi og öðrum mannréttindabrotum. Samfylkingin gefur aldrei afslátt af þessum grundvallarkröfum siðaðs samfélags. 

Almannavaldi skal beitt með hófsemd samkvæmt fyrirsjáanlegum leikreglum. Lög eiga að vera skýr, framvirk og aðgengileg og enginn skal vera háður geðþótta yfirvalda. Jafnrétti allra gagnvart ríkisvaldinu ber að tryggja með óvilhallri framkvæmd löggæslu, dómsvalds og allrar stjórnsýslu. 

Samfylkingin vill að Alþingi samþykki breytingar á stjórnarskrá sem byggjast á tillögum stjórnlagaráðs og þeim þjóðarvilja sem kom fram í þjóðaratkvæðagreiðslunni þann 20. október 2012. Alþingi skuldar þjóðinni að ljúka því opna og lýðræðislega ferli stjórnlagabreytinga sem hófst eftir hrun. 

Treysta þarf grundvallarinnviði lýðræðissamfélagsins og setja valdhöfum skýrari meginskyldur, ábyrgð og hlutverk en gert er í gildandi stjórnarskrá. Ákvæði um þjóðareign auðlinda, þjóðaratkvæðagreiðslur, framsal valds, jafnt atkvæðavægi og umhverfisvernd eru á meðal þeirra fjölmörgu atriða sem brýnt er að bundin verði í stjórnarskrá sem fyrst. 

Allir eiga að hafa greiðan aðgang að dómstólum óháð efnahag, uppruna og stöðu að öðru leyti. Gæta þarf sérstaklega að stöðu jaðarsettra hópa við meðferð mála á öllum stigum. 

Til að rétturinn til sanngjarnrar málsmeðferðar fyrir óvilhöllum dómstóli sé virtur þarf sjálfstæði og óhlutdrægni dómsvaldsins að vera ótvírætt og fagleg sjónarmið að ráða för við skipun dómara. Dómur Mannréttindadómstóls Evrópu vegna skipunar dómara í Landsrétt er mikilvæg áminning um þetta. Niðurstöðuna þarf að taka alvarlega með viðeigandi ráðstöfunum gagnvart dómþolum sem brotið hefur verið á. 

Samfylkingin vill að réttarkerfið sé varið fyrir óeðlilegum afskiptum valdhafa og misbeitingu veitingarvalds í þágu flokkspólitískra hagsmuna. Þetta er ein af forsendum þess að grundvallarreglur réttarríkisins séu virtar, að Íslendingar uppfylli alþjóðlegar mannréttindaskuldbindingar og að auka megi traust almennings til dómstóla. 

Fjölga þarf lögreglumönnum og bæta aðbúnað og starfskjör til að tryggja öryggi og öfluga löggæslu um allt land. Pólitískt hlutleysi lögreglunnar verður að vera hafið yfir allan vafa og stöðuveitingar í löggæslukerfinu skulu alfarið byggja á faglegum sjónarmiðum. 

Koma þarf á sjálfstæðu og óháðu eftirliti með starfsemi og starfsháttum lögreglu til að auka traust til lögreglunnar. Jafnframt þarf að tryggja að „fjögurra augna“-reglunni sé fylgt í hvívetna og fleiri en einn lögreglumaður komi alltaf að lögregluaðgerðum og gerð lögregluskýrslna. Halda þarf áfram að jafna kynjahlutföll innan lögreglunnar og vinna gegn kynjamisrétti og fordómum gagnvart jaðarsettum hópum. 

Samfylkingin vill ráðast í markvissar aðgerðir til að bæta réttarstöðu brotaþola í heimilisofbeldis- og kynferðisbrotamálum. Þolendur eiga að geta gerst aðilar að sakamáli eða að njóta flestra þeirra réttinda sem felast í málsaðild líkt og tíðkast í flestum norrænu ríkjanna. Rýmka þarf gjafsóknarreglur fyrir þolendur heimilisofbeldis og kynferðisbrota og efla sálrænan og félagslegan stuðning við þolendur. 

Kynferðisbrotamál verða að fá skjóta og vandaða málsmeðferð í réttarkerfinu. Fái sakborningur refsilækkun vegna tafa hjá ákæruvaldi eða dómstólum ætti brota­þoli jafnframt að fá hærri bætur frá ríkinu. 

Viðbrögð við mansali þurfa að verða þolendavænni. Tryggja þarf brotaþola langtímastuðning og öryggi meðan mál eru í rannsókn. 

Samfylkingin vill stofna Ofbeldisvarnarráð Íslands sem vinni markvisst að forvörnum og fræðslu gegn ofbeldi í samvinnu við sveitarfélög um allt land, lögreglu og grasrótarhreyfingar. Þolendur þurfa að fá félagslegan stuðning og ráðgjöf og fjölga þarf úrræðum fyrir gerendur. Taka þarf sérstaklega utan um jaðarsetta þolendur ofbeldis, svo sem fatlaðs fólks, fólks af erlendum uppruna og transfólk, enda eru þeir hópar í meiri hættu á að verða fyrir ofbeldi. Stuðningur og úrræði þurfa að taka mið af þörfum þessa hópa. 

Tjáningarfrelsi og frjálsir fjölmiðlar 

Frjálsir fjölmiðlar gegna lykilhlutverki í lýðræðisþjóðfélagi og eru nauðsynleg undirstaða upplýstrar þjóðfélagsumræðu. Samfylkingin vill tryggja rekstrargrundvöll einkarekinna miðla með ríkisframlögum, gera þeim kleift að starfa óháðir fjármálavaldi og stuðla þannig að heilbrigðara fjölmiðlaumhverfi á Íslandi. Standa þarf vörð um sjálfstæði Ríkisútvarpsins og tryggja stofnuninni bolmagn til að upplýsa og veita aðhald án óeðlilegra afskipta valdhafa. 

Draga þarf lærdóm af dómum Mannréttindadómstóls Evrópu þar sem íslenska ríkið hefur verið dæmt brotlegt við tjáningarfrelsisákvæði mannréttindasáttmálans. Vinna þarf gegn kælingaráhrifunum sem felast í lögsókn gegn fjölmiðlafólki og ganga úr skugga um að löggjöf um meiðyrði standist kröfur nútímans. Lögbann á fréttaflutning er varðar almannahag er ósamrýmanlegt lýðræðishefðum og má ekki líðast. Endurskoða þarf lög og lagaframkvæmd til að tryggja að fréttaflutningur um valdhafa í aðdraganda kosninga verði aldrei stöðvaður með valdi. 

Samfylkingin beitir sér fyrir opinni, gagnsærri og skilvirkri stjórnsýslu þar sem jafnræði er í heiðri haft gagnvart borgurum landsins og allar ákvarðanir eiga sér stoð í lögum og byggjast á málefnalegum sjónarmiðum, þar á meðal allar ákvarðanir um stöðuveitingar í stjórnsýslunni. 

Skerpa þarf á framkvæmd reglna um skráningu upplýsinga og samskipta í stjórnsýslu ríkis og sveitarfélaga. Styrkja þarf upplýsingalög og framkvæmd þeirra til að almenningur þurfi ekki að bíða mánuðum saman eftir upplýsingum sem hann á lögvarinn rétt til. 

Umboðsmaður Alþingis verður að hafa mannafla til að sinna frumkvæðisathugunum vegna brotalama í stjórnsýslu ríkis og sveitarfélaga. Stjórnvöld eiga að bregðast hratt við fyrirspurnum embættisins og fylgja tilmælum þess. 

Allar ákvarðanir og ráðstafanir yfirvalda gagnvart börnum skulu byggjast á þeirri grundvallarreglu barnasáttmála Sameinuðu þjóðanna að það sem er barni fyrir bestu hafi alltaf forgang. Stjórnvöld eiga að sýna börnum virðingu og veita þeim tækifæri til að tjá sig um mál sem þau varða. 

Börn eiga að njóta vafans þegar grunur er um ofbeldi á heimili. Rýna þarf lagaumhverfi og lagaframkvæmd barnaverndar- og umgengnismála með hliðsjón af þessu. 

Samfylkingin vill að börn fái snemmtækan stuðning og þá þjónustu sem þau þurfa til að geta nýtt hæfileika sína og liðið vel. Vellíðan barna í daglegu lífi leggur grunn að árangri í skóla- og frístundastarfi, að heilbrigði og að virkri þátttöku í samfélaginu. 

Samfylkingin vill að almennur kosningaréttur miðist við 16 ára aldur og að gripið verði til markvissra aðgerða til að auka kosninga- og stjórnmálaþátttöku ungs fólks. Fara þarf í sérstakt átak til að auka þátttöku fólks af erlendum uppruna í kosningum hér á landi. Auka þarf beina aðkomu almennings að stefnumótun hjá ríki og sveitarfélögum, bæði með samráði eftir rafrænum leiðum og með reglulegum þjóðfundum um mikilsverð málefni. Atkvæði kjósenda alls staðar á landinu eiga að vega jafnt og þingstyrkur stjórmálaflokka á að samræmast kjörfylgi þeirra. 

Bætt staða innflytjenda á Íslandi er ekki aðeins réttlætismál heldur lykillinn að farsælli uppbyggingu fjölmenningarsamfélags þar sem fjölbreytni, gagnkvæmur skilningur og jöfnuður fara hönd í hönd. Samfylkingin vill liðka fyrir atvinnuþátttöku innflytjenda með sveigjanlegra regluverki og stuðla að því að menntun þeirra fáist í auknum mæli viðurkennd og metin til launa. Auðvelda þarf fólki utan EES-svæðisins að setjast að og vinna á Íslandi. Þá á íslenskukennsla að vera ódýr eða gjaldfrjáls og aðgengileg á fjölbreyttu formi. Samfylkingin telur að hið opinbera eigi að koma að greiðslu fyrir íslenskunámskeið sem séu aðgengileg bæði vinnandi fólki og einstaklingum án atvinnu. 

Stjórnvöld eiga að leita allra leiða til að virkja fólk af erlendum uppruna til þátttöku í samfélaginu. Ráðast þarf í markvissar aðgerðir til að vinna gegn fordómum og tryggja að aðfluttir upplifi sig velkomna. 

Harka gagnvart umsækjendum um alþjóðlega vernd stríðir gegn grunngildum okkar um samhygð og samstöðu. Samfylkingin vill ráðast í gagngera endurskoðun á útlendingalöggjöfinni og móttökukerfi umsækjenda um alþjóðlega vernd með mannúð að leiðarljósi og hliðsjón af mannréttindasáttmálum sem Ísland hefur staðfest. 

Samfylkingin stendur vörð um trúfrelsi og sannfæringarfrelsi og vill tryggja jafnræði allra trúfélaga og lífsskoðunarfélaga gagnvart ríkisvaldinu. Það kallar á fullan lagalegan og fjárhagslegan aðskilnað ríkis og kirkju. 

Samfylkingin er femínískur flokkur sem vill jafna stöðu kynjanna og ráðast af alefli gegn kynbundnum launamun. Við viljum vinna gegn kerfisbundinni mismunun og fordómum og tryggja jafna meðferð á öllum sviðum samfélagsins óháð kynhneigð, kynvitund, kyneinkennum eða kyntjáningu. 

Ísland á að skipa sér í fremstu röð á alþjóðavísu hvað varðar réttarstöðu hinseginfólks, kynsegin fólks og fólks með ódæmigerð kyneinkenni. Vinna þarf áfram að bættri réttarstöðu þessara hópa í samvinnu við félög og fulltrúa þeirra. 

Samfylkingin vill að yfirvöld komi fram við fanga af virðingu og tryggi örugga, mannúðlega og vel skipulagða afplánun og betrunarvistun. Fangar eiga að fá tækifæri til ábyrgðar, endurreisnar og farsællar endurkomu út í samfélagið. Menntunarúrræði, starfsþjálfun, öflug sálfræðiþjónusta og tækifæri til samfélagsþjónustu í stað refsivistar eru lykilatriði og geta dregið úr líkum á endurteknum afbrotum. 

Brýnt er að íslenska ríkið dragi lærdóm af fjölmörgum dæmum um að fólk sé frelsissvipt að tilhæfulausu eða haldið í gæsluvarðhaldi lengur en þörf var á. 

Skaðaminnkun og afglæpavæðing neysluskammta 

Samfylkingin vill endurskoða refsiramma vímuefnalöggjafarinnar og auka stuðning og aðstoð við þá sem glíma við vímuefnavanda. Vímuefnaneysla er heilbrigðisvandamál og varsla neysluskammta á ekki að vera refsiverð. 

Stjórnvöld eiga að styðja við jaðarsetta hópa og vinna út frá skaðaminnkandi nálgun með ráðgjöf og stuðningi, nálaskiptaþjónustu, hjálp við að draga úr líkum á smiti og sýkingum og aðstoð við að komast í sértækari heilbrigðisþjónustu. Aðgengi að gagnreyndri meðferð er mikilvægt fyrir fólk með vímuefnavanda en skaðaminnkun tekur á þeirri staðreynd að margir sem nota vímuefni eru ófærir um eða vilja ekki hætta notkun þeirra á tilteknum tíma. Því er mikilvægt að bjóða þjónustu og stuðning sem stuðlar að því að lágmarka áhættu og skaða af áframhaldandi notkun vímuefna fyrir einstakling, fjölskyldu og samfélag. 

Stjórnarfar, ríkisvald og mannréttindi

Samfylkingin leggur áherslu á að Ísland beiti sér fyrir jöfnuði og mannréttindum um allan heim og sé alltaf málsvari friðar, mannúðar, jafnréttis og lýðræðis. Sjaldan hefur verið jafn mikilvægt og nú að alþjóðasinnar snúi bökum saman, fylki sér um grunngildi opins lýðræðisþjóðfélags og standi vörð það sem áunnist hefur í alþjóðasamvinnu frá lokum síðari heimsstyrjaldar. 

Samfylkingin er íslenskur stjórnmálaflokkur og starfar á Íslandi en hefur alþjóðlegan hugmyndagrunn og tilheyrir alþjóðahreyfingu jafnaðarmanna. 

Okkur sem búum í einu af ríkustu samfélögum jarðar ber siðferðileg skylda til að leggja hlutfallslega meira af mörkum á alþjóðlegum vettvangi en fátækari ríkjum er unnt. Ísland á að reka mannúðlega utanríkisstefnu sem miðar í senn að því að styrkja stöðu Íslands á alþjóðavettvangi og leggja okkar af mörkum við úrlausn þeirra risavöxnu áskorana sem heimsbyggðin stendur frammi fyrir. Samfylkingin styður þá grunnstefnu í öryggis- og varnarmálum sem mörkuð var með samþykkt þingsályktunar um þjóðaröryggisstefnu Íslands á Alþingi árið 2016. 

Samfylkingin beitir sér fyrir kraftmikilli samvinnu Íslands við önnur lýðræðisríki, ekki síst við nágranna okkar í Evrópu. Margar af mikilvægustu réttarbótum og umbótum sem náðst hafa fram á lýðveldistímanum eru afsprengi Evrópusamvinnu. Samstarf EFTA-ríkjanna við ESB hefur verið stórkostleg lyftistöng fyrir íslenskt atvinnulíf og knúið fram nútímavæðingu stjórnsýslu og samkeppnislöggjafar. 

Samfylkingin vill efla og dýpka þessa samvinnu og stefnir að fullri aðild að Evrópusambandinu með upptöku evru að undangenginni þjóðaratkvæðagreiðslu. Þangað til þessu markmiði er náð þurfa íslensk stjórnvöld að nýta með markvissari hætti þau tækifæri sem felast í samstarfinu innan Evrópska efnahagssvæðisins, efla hagsmunagæslu Íslands gagnvart Evrópusambandinu og bæta framkvæmd EES-samningsins. 

Loftslagsváin kallar á markvissa alþjóðasamvinnu. Þar eigum við Íslendingar að taka frumkvæði og marka okkur græna utanríkisstefnu með áherslu á sjálfbæra þróun og aðgerðir gegn loftslagsvánni. Liður í þessu er að skipaður verði sendiherra loftslagsmála sem samhæfi stefnu og skilaboð Íslands erlendis um loftslagsmál, stofnuð verði burðug umhverfis- og loftslagsskrifstofa í utanríkisráðuneytinu og mörkuð stefna um græna fríverslun og alþjóðaviðskipti með hliðsjón af loftslagsmarkmiðum Íslands. 

Samstaða með kúguðum og jaðarsettum 

Samfylkingin stendur með þjóðum sem þurfa að þola ólöglegt hernám og yfirgang stórvelda, svo sem í Palestínu, og gerir kröfu um að reglur þjóðaréttar um friðsamleg samskipti þjóða séu virtar í hvívetna. Ísland á alltaf að taka slaginn gegn mannréttindabrotum, styðja réttindabaráttu viðkvæmra hópa á heimsvísu og taka forystu í baráttu gegn fordómum og hvers kyns mismunun. 

Skaðleg skattasamkeppni og skattasniðganga alþjóðlegra stórfyrirtækja er áskorun sem kallar á samstöðu og samvinnu ríkisstjórna um allan heim. Samfylkingin vill að Ísland taki virkan þátt í slíkri vinnu, beiti rödd sinni gegn skattaundanskotum og undirboðum og tali fyrir aukinni samræmingu skattlagningar fjármagns og fyrirtækja í Evrópu. 

Við Íslendingar eigum að leggja ríkulega af mörkum í baráttunni gegn fátækt og barnadauða á heimsvísu og aðstoða við efnahagslega og félagslega uppbyggingu í fátækum ríkjum. Samfylkingin leggur áherslu á að framlög Íslands til þróunarsamvinnu nái í tímasettum áföngum viðmiðum SÞ um 0,7 prósent af vergum þjóðartekjum og verði sambærileg við það sem gerist annars staðar á Norðurlöndum. 

Menntun, jafnréttismál, málefni barna og viðkvæmra hópa og heilbrigðismál eru allt mikilvægir þættir þróunarsamvinnu sem Samfylkingin áherslu á að Ísland taki virkan þátt í. Leggja þarf sérstaka áherslu á að efla konur til menntunar, atvinnu og sjálfstæðis um allan heim og verja rétt þeirra yfir eigin líkama. 

Ísland í samfélagi þjóðanna

Í dag er vorfundur flokksstjórnar, hann verður haldinn með rafrænum hætti og hefst kl. 10:00.

Endurskoðuð stefna verður lögð fram til afgreiðslu á flokksstjórnarfundinum. Hér fyrir neðan finnið þið drögin, ásamt eyðublaði sem þarf að fylla út og senda inn hafi þið breytingartillögur sem þið viljið bera upp á fundinum. 
TENGJAST FUNDINUM HÉR.


Landsfundarfulltrúar hafa atkvæðisrétt á flokksstjórnarfundi þegar stefnan verður lögð fram til afgreiðslu.
Kjörnir flokksstjórnarfulltrúar hafa atkvæðisrétt í öðrum liðum en varða stefnu flokksins.

Heiða Björg Hilmisdóttir, varaformaður Samfylkingarinnar, setur fundinn.

Formaður framkvæmdastjórnar kynnir fundarsköp og dagskrá fundarins.

Heiða Björg Hilmisdóttir kynnir endurskoðaða stefnu flokksins.

Endurskoðuð stefna lögð fram til afgreiðslu.

Nýtt fyrirkomulag og forysta málefnanefnda kynnt.

Tillaga framkvæmdarstjórnar um sáttanefnd lögð fram til afgreiðslu.

*Dagskrá er birt með fyrirvara um breytingar.

*Áætluð fundarlok er kl. 14:00. 

Á landsfundi 6. og 7. nóvember í fyrra var samþykkt að fresta afgreiðslu endurskoðaðrar stefnu til flokksstjórnarfundar, stefnan verður því lögð til afgreiðslu á þessum flokksstjórnarfundi.
TENGJAST FUNDINUM HÉR.


Landsfundarfulltrúar hafa því atkvæðisrétt á flokksstjórnarfundi þegar stefnan verður lögð fram til afgreiðslu.
En aðeins kjörnir flokksstjórnarfulltrúar hafa atkvæðisrétt í öðrum liðum en varða stefnu flokksins.

Heiða Björg Hilmisdóttir setur fundinn formlega og kynnir endurskoðaða stefnu flokksins

Endurskoðuð stefna lögð fram til afgreiðslu

Nýtt fyrirkomulag og forysta málefnanefnda kynnt

Tillaga framkvæmdarstjórnar um sáttanefnd lögð fram til afgreiðslu
Vinna, velferð og græn framtíð

Fundi slitið
*Dagskrá er birt með fyrirvara um breytingar.
*Áætluð fundarlok er kl. 14:00. 

Vorfundur flokksstjórnar Samfylkingarinnar verður haldinn laugardaginn 13. mars á Zoom, við hvetjum alla til að taka þátt en flokksstjórnarfundinum eru opnir öllum flokksfélögum. Tökum virkan þátt í flokksstarfinu!

Vorfundur flokksstjórnar Samfylkingarinnar

Þórunn Sveinbjarnardóttir formaður BHM og fyrrverandi þingmaður og ráðherra Samfylkingarinnar leiðir listann, í öðru sæti er þingmaðurinn og rithöfundurinn Guðmundur Andri Thorsson. Í þriðja sæti er Inga Björk Margrétar Bjarnadóttir listfræðingur sem hefur verið ötul baráttukona fyrir réttindum fatlaðs fólk og starfar fyrir Þroskahjálp, fjórða sæti skipar svo Guðmundur Ari Sigurjónsson bæjarfulltrúi Samfylkingarinnar á Seltjarnarnesi og tómstunda- og félagsmálafræðingur 

Listinn er skipaður 26 kraftmiklum frambjóðendum, með margs konar reynslu og þekkingu, sem allir eiga það sameiginlegt að vilja vinna að framgangi hugsjóna og málefna Samfylkingarinnar - jafnaðarmannaflokks Íslands og berjast af fullu afli fyrir hagsmunum íbúa kjördæmisins. 

“Ég vil þakka félögum mínum í Suðvesturkjördæmi traustið sem þau sýna mér með því að velja mig til að leiða framboðslista Samfylkingarinnar til Alþingis„ segir Þórunn Sveinbjarnardóttir, „Hér er saman kominn mjög öflugur hópur frambjóðenda sem á brýnt erindi við kjósendur í Kraganum“.

Þórunn er formaður BHM, fyrrverandi alþingismaður og umhverfisráðherra. Þórunn er stjórnmálafræðingur frá Háskóla Íslands og Johns Hopkins University, Paul H. Nitze School of Advanced International Studies.

Samfylkingin vinnur nú að því að skipa lista í öllum kjördæmum landsins. Áætlað er að listarnir í Norðaustur-, Suður- og Norðvesturkjördæmi verði fullskipaðir og kynntir fyrir páska.

Framboðslisti Samfylkingarinnar í Suðvesturkjördæmi:

Þórunn Sveinbjarnardóttir, formaður BHM

Guðmundur Andri Thorsson, alþingismaður og rithöfundur

Inga Björk Margrétar Bjarnadóttir, baráttukona fyrir réttindum fatlaðs fólks, starfsmaður Þroskahjálpar og listfræðingur

Guðmundur Ari Sigurjónsson, tómstunda- og félagsmálafræðingur og bæjarfulltrúi á Seltjarnarnesi

Sólveig Skaftadóttir, alþjóðafræðingur og starfsmaður þingflokks Samfylkingarinnar

Óskar Steinn Ómarsson, deildarstjóri á leikskóla

Donata H. Bukowska, kennsluráðgjafi í málefnum nemenda með íslensku sem annað mál í Kópavogi

Árni Rúnar Þorvaldsson, grunnskólakennari

Sigurþóra Bergsdóttir, framkvæmdastjóri Bergsins headspace

Sigurjón Gunnarsson, húsasmíðameistari

Ingibjörg Iða Auðunardóttir, íslenskunemi og forseti Ungra jafnaðarmanna í Garðabæ

Gylfi Ingvarsson, vélvirki og eldri borgari

Branddís Ásrún Snæfríðardóttir, meistaranemi í lögfræði

Hörður Þorsteinsson, framkvæmdastjóri

Hildur Rós Guðbjargardóttir, kennaranemi og starfsmaður Hrafnistu

Magnús Norðdahl, lögfræðingur ASÍ og fyrrverandi alþingismaður

Dóra Hansen, innanhússarkitekt og kennari

Jónas Sigurðsson, fyrrverandi bæjarfulltrúi í Mosfellsbæ

Jóna Dóra Karlsdóttir, fyrrverandi bæjarfulltrúi og forseti bæjarstjórnar í Hafnarfirði

Rannveig Guðmundsdóttir, fyrrverandi alþingismaður og ráðherra

Framboðslisti Samfylkingarinnar í Suðvesturkjördæmi fyrir alþingiskosningarnar 25. september 2021 var samþykktur með miklum meirihluta á fundi kjördæmisráðs Samfylkingarinnar í kvöld.

Framboðslisti Samfylkingarinnar í Suðvesturkjördæmi

Ágætu félagar í 60+

Næsti fundur 60+ á höfuðborgarsvæðinu, verður miðvikudaginn 17. mars og stendur frá kl. 10 til 12.

Gestur okkar í þetta sinn verður Kristrún Mjöll Frostadóttir, sem leiðir lista Samfylkingarinnar í Reykvíkurkjördæmi suður.

Sjálfsagt gefst einnig tími til að ræða flokksstjórnarfundinn og stefnu flokksins.
Kaffi verður á boðstólum að venju og innpakkað meðlæti og auðvitað verður gætt að sóttvarnarreglum.


Miðvikudagsfundur 60+ á höfuðborgarsvæðinu

Getur Ísland orðið óbyggilegt á okkar líftíma?: Já.

Hvert er stærsta hagsmunamálið þegar á öllu er á botninn hvolft?: Golfstraumurinn.

Ef, eða jafnvel þegar, Golfstraumurinn breytist er hætta á því að hitastigið falli hér um meira en 10 gráður samkvæmt nýlegri úttekt New York Times. Það er mjög mikið, en Ísland yrði þá eins og Svalbarði. Lífið, eins og við þekkjum það, væri þá lokið. Fasteignir okkar yrðu verðlitlar og jafnvel verðlausar, verðmæti okkar í krónum yrðu einnig verðlaus og fiskurinn færi.

Áhrifin yrðu einnig skelfileg annars staðar í heiminum, m.a. hækkun sjávarmáls í Bandaríkjunum, sterkari fellibyljir, nístingskuldi í Evrópu, og þurrkar í Afríku.

Nú eru sterkar vísbendingar að loftlagsbreytingar og bráðnun jökla séu einmitt að hafa áhrif á okkar kæra Golfstraum. Þótt Golfstraumurinn sé ekki að hverfa er hann farinn að hægjast og veikjast samkvæmt nýjum rannsóknum.

Og það er dauðans alvara fyrir okkur hér á Íslandi. Einungis sá möguleiki að straumurinn fari að haga sér öðruvísi ber að taka mjög alvarlega.

Við Íslendingar ættum því að huga miklu meira að hafinu í kringum okkur og ekki síst Golfstrauminum sem er bókstaflega lífæð okkar. Hann er lífæðin okkar, sannkallaður lífstraumur. Flest annað, sem við deilum um, getur beðið.

Getur Ísland orðið óbyggilegt á okkar líftíma?: Já. Hvert er stærsta hagsmunamálið þegar á öllu er á botninn hvolft?: Golfstraumurinn.

Atvinnuleysi er því okkar helsta áskorun og því höfum við í Samfylkingunni lagt til 32 alvöru aðgerðir. Förum yfir 10 atriði:

1. Aðgerðir Samfylkingarinnar munu búa til þrisvar sinnum fleiri störf en þau sem tillögur ríkisstjórnar gera ráð fyrir.

2. Við viljum fjölga störfum, BÆÐI hjá einkageiranum OG hjá hinu opinbera. Sem dæmi vantar 400 hjúkrunarfræðinga, mörg hundruð sjúkraliða, 200 lögreglumenn, fjöldann allan af skólafólki, sálfræðingum, félagsráðgjöfum í skóla og heilsugæslu. Þá er barnaverndarkerfið og félagslega þjónustan undirmönnuð og svona mætti lengi telja. Mikið af þessu fólki höfum við nú þegar menntað. Fjármálaráðherra sagði hins vegar að fjölgun opinberra starfa væri „versta hugmynd“ sem hann hefði heyrt.

Iðnaðarmaðurinn, búðareigandinn og litlu þjónustufyrirtækin

3. Við viljum að tryggingargjald verði fellt niður í a.m.k. eitt ár fyrir einyrkja og lítil fyrirtæki þannig að öll fyrirtæki fái 2 milljón kr. afslátt af tryggingagjaldi. Þetta er atvinnuskapandi skattalækkun í stað sértækrar skattalækkunar ríkisstjórnarinnar sem setur núna í forgang að lækka fjármagnstekjuskatt til hinna allra ríkustu en einungis 1% af ríkustu Íslendingunum aflar um 50% allra fjármagnstekna í landinu. Samfylkingin vill í staðinn huga að litlum fyrirtækjunum, iðnaðarmanninum, búðareigandanum og litlu þjónustufyrirtækjum.

4. Við munum styrkja fyrirtæki sem ráða fólk af atvinnuleysisskrá í stað þessa að niðurgreiða uppsagnir eins og ríkisstjórnin gerir. Það er fáheyrt aðgerð að nota almannafé til að hjálpa fyrirtækjum að segja upp fólki enda gerir engin ríkisstjórn það í nágrannalöndunum.

5. Við viljum draga úr vinnuletjandi skerðingum gagnvart barnafólki og öryrkjum.

6. Við munum hækka atvinnuleysisbætur og hækka grunnbætur til aldraða og öryrkja. Ríkisstjórnin hefur hins vegar ákveðið að þessir þrír hópar eiga að lifa á um 240 þúsund kr. á mánuði. Enginn ráðherranna segist geta lifað af slíkri upphæð.

7. Við viljum styrkja sveitarfélögin sem sjá um nærþjónustuna, byggja nýjan geðspítala og fjárfesta almennilega um allt land. Fjárfestingarátak ríkisstjórnarinnar fyrir næsta ár nemur einungis 1% af landsframleiðslu og auðvitað dugar það ekki til að mæta dýpstu kreppu í 100 ár.

8. Við viljum innleiða græna atvinnustefnu með metnaðarfyllri loftslagsaðgerðum, stofna grænan fjárfestingarsjóð og stórefla grænmetisframleiðslu og skógrækt.

9. Við viljum hækka endurgreiðsluhlutfall vegna kvikmyndagerðar, fjölga listamannalaunum og styrkja sérstaklega sviðslistafólk.

10. Við viljum stórefla nýsköpun, hátækniiðnaðinn og efla fjarheilbrigðisþjónustu. Viðbót ríkisstjórnarinnar í nýsköpun næsta árs er einungis 0,3% af landsframleiðslu, sem er nánast ekki neitt til að tala um.

Þetta er hluti af tillögum Samfylkingarinnar þar sem kostnaðurinn er um 80 milljarða kr (sem er sama upphæð og brúarlán ríkisstjórnarinnar áttu að kosta en þau misstu algjörlega marks). Hins vegar kostar hvert prósentustig í atvinnuleysi um 6,5 milljarða kr. fyrir utan hinn mannlega harmleik sem því fylgir. Aðgerðir ríkisstjórnarinnar lækka atvinnuleysi einungis um eitt prósentustig.

Við viljum hins vegar fjárfesta með mun myndarlegri hætti í fólki og fyrirtækjum og taka lengri tíma til að borga niður hallann. Stundum þarf að verja pening til að búa til pening. Þær aðstæður eru núna.

Þetta er það sem Samfylkingin kallar ábyrga leiðin. Það er óábyrgt að gera of lítið í svona ástandi eins og ríkisstjórnin er að gera. Það er ábyrgt að taka stór græn skref núna, eins og Samfylkingin leggur til. Vinna og velferð þar sem græn uppbygging um allt land er okkar rauði þráður. Þetta er leið úr atvinnukreppu til grænnar framtíðar.

Hvað þarf eiginlega að gera til að koma Íslandi aftur á fætur? Næstu jól stefnir í að allt 25-30.000 manns verði atvinnulaus en það eru fleiri störf en eru samanlagt á Akureyri, Reykjanesbæ, öllum Austfjörðum og Vestfjörðum. 

Gríðarlega miklar breytingar eru að eiga sér stað í orkugeiranum úti um allan heim. Samkeppnishæfni Íslands er að breytast sömuleiðis á ótrúlega miklum hraða. Verð á umhverfisvænum orkugjöfum er að lækka mikið og hratt, sér í lagi á sólar- og vindorku sem breytir allri samkeppnishæfni Íslands á örskömmum tíma. Sem dæmi hafa vindorkugarðar í sjó í Norður-Atlantshafi nú þegar lækkað raforkuverð á því svæði og áætlað er að lækkunin muni nema um 60% á næstunni samkvæmt færustu sérfræðingum.

Árið 2030 er á næsta leiti og fjölmörg lönd hafa sett sér gríðarlega metnaðarfull markmið varðandi samdrátt í útblæstri það ár miðað við árið 1990. Það er því miður dapurleg staðreynd að Ísland er ekki í hópi metnaðarfyllstu landa þegar kemur að viðmiðum í samdrætti í útblæstri, en þar skipta stóriðja, iðnaður og samgöngur langmestu máli. Það þarf nauðsynlega nýja nálgun af hálfu stjórnvalda í raforkuframleiðslu okkar Íslendinga og þar skiptir öllu máli að hugsa skapandi, vera óhrædd við hraðar breytingar og halda ekki í horfna tíma.

Loftslagsváin er stærsta viðfangsefni okkar tíma og komandi kynslóða. Orkukerfin eru í lykilhlutverki þegar tekist er á við loftslagsvána. Fulltrúar Landsvirkjunar, stærsta orkufyrirtækis landsins, hafa sem betur fer talað fyrir nýjum og enn umhverfisvænni nálgunum en áður í orkugeiranum hér á landi og er það vel. Í orkustefnu fyrir Ísland, sem kynnt var og lögð fram í október síðastliðnum, eru mörg góð viðmið þegar kemur að umhverfismálunum og loftslagsmálunum, en í orkustefnunni er líka forðast alfarið við að takast á við erfiðar og krefjandi pólitískar spurningar á borð við stöðu og framtíð stóriðjunnar eða möguleika á útflutningi á hreinni raforku.

Það verður að vera til skýr stefna um framtíð raforkuframleiðslu og um stóriðjuna til að við sjálf höfum stjórn á aðstæðunum sem eru að breytast hratt, en ekki láta erlend stórfyrirtæki ráð för, á borð við Rio Tinto sem nýlega hótaði að leggja niður álverið í Straumsvík með nánast einu pennastriki.

Skýr stefna og sýn stjórnvalda í málefnum stóriðju er ekki bara bráðnauðsynleg út frá stöðunni í loftslagsmálum heldur líka út frá atvinnustefnu yfirvalda á tímum atvinnuþrenginga. Við þurfum að skapa ný, græn störf til að vera viðbúin þessari byltingu í framleiðslu á raforku, en ekki að lengja í hengingaról mengandi stóriðju sem er að verða hratt hluti af fortíðinni en ekki partur af framtíðinni. Það er ekki bara óboðlegt að vera stefnulaus gagnvart þeim alþjóðlegu skuldbindingum sem við höfum undirgengist í loftslagsmálum, heldur – og ekki síður - gagnvart þeim hundruð starfsmanna sem vinna í stóriðju og afleiddum störfum sem þurfa að fá að heyra og vita að þau verða gripin og að framtíðaratvinnumöguleikar þeirra geti breyst og þróast en ekki horfið.

Greinin birtist fyrst á visi.is 31. janúar.

Stefnuleysi í málefnum stóriðju ekki í boði

Vernda strandlengjuna með lagningu á tvöföldu fráveitukerfi

Jafna búsetuskilyrði með miðlægri kostun á varmaskiptum

Setja upp vistvæna og orkusparandi götulýsingu

Skoða kosti og útfærslur á birtustýringu á götulýsingu með snjallvæðingu ljósastaura

Tengja hleðslustöðvar fyrir rafmagnsbíla í ljósastaura

Byggja hjólageymslu við sundlaug og Eiðistorg og stuðla að notkun almenningssamgangna

Auka flokkun á sorpi – taka við lífrænu sorpi

Ástand fráveitu í fjörum á Seltjarnarnesi er ámælisvert en niðurstöður heilbrigðiseftirlits síðustu ára sýna að fjöldi saurkólígerla í sjó er oftar en ekki yfir viðmiðunarmörkum auk þess sem ástand vatns telst reglulega með öllu ófullnægjandi. Í vatnaveðrum er skólpi ekki dælt til Reykjavíkur í hreinsun heldur um yfirfall í viðtaka á Seltjarnarnesi og þaðan óhreinsuðu út í sjó við fjörumörk í Bakkavík, við Lambastaði, Eiðsvík og Norðurvík. Á sama tíma eru strendur Seltjarnarness vinsælir viðkomustaðir barna, fjölskyldna og vatnaíþróttafólks. Samfylkingin vill setja verndun strandlengjunna í forgang með því að aðskilja lagnir fyrir skolp frá húsum og regnvatn frá götum með lagningu á tvöföldu fráveitukerfi eins og tíðkast annars staðar. Einnig vill hún koma upp mælum svo hægt sé að fylgjast með flæði skólps um yfirföll og sjá til þess að reglugerðum sé fylgt. Einungis þannig má uppfylla viðmiðunarmörk um ástand vatns, og standa vörð um strandmenningu á Seltjarnarnesi.

Fyrir Seltirninga eru það sjálfsögð lífsgæði að hita hýbýli sín með ódýru heitu vatni. Á Nesinu gerir efnainnihald jarðhitavatnsins það hinsvegar að verkum að ekki er hægt að leiða vatnið beint inn á ofnakerfi húsa. Fyrir vikið bera húseigendur mikinn kostnað af viðhaldi og endurnýjun varmaskipta sem nauðsynlegir eru til tryggja öryggi og verja lagnir gegn tæringarskemmdum. Samfylkingin vill jafna búsetuskilyrði á Seltjarnarnesi með því að láta skoða kosti þess að koma annað hvort upp miðlægum varmaskiptabúnaði þannig að upphituðu ferskvatni er dælt í gegnum dreifikerfið og inn í hýbýli eða niðurgreiðslu á varmaskiptum til húseigenda með þátttöku hitaveitunnar í útboði á slíkum búnaði fyrir íbúa.

Gatnalýsing á Seltjarnarnesi er eign bæjarfélagsins. Þrátt fyrir bann skv. Evróputilskipunar frá árinu 2015 notast bæjarfélagið enn við orkufrekar kvikasilfursperur í ljósastaurum. Samfylkingin vill setja fram langtímaáætlun um breytingu á ljósgjöfum þar sem umhverfis- og orkuvæn LED lýsing er sett í forgang. Samfylkingin vill skoða kosti og útfærslu á því að innleiða snjallstaura með áherslu á ljós- og myrkurgæði samhliða áætlun um endurnýjun ljósgjafa. Snjallvæddir staurar bjóða upp á notkun birtuskynjara sem gera okkur kleift að draga úr birtumagni þegar það á við s.s. á nóttunni, á sama tíma og hreyfiskynjarar tryggja fullkomið öryggi íbúa með nákvæmri birtustýringu þegar gangandi, hjólandi og akandi umferð þurfa á að halda. Með markvissri birtustýringu næst fram enn frekari orkusparnaður auk þess sem okkur opnast ómetanlegur aðgangur að himinhvolfinu og þeim náttúrugæðum sem þar er að finna.

Gríðargögn sem fást munu með tilkomu snjallstaura, munu í fyrsta sinn segja okkur til um hvernig íbúar og gestir nota bæjarrýmið. Með slíkum gögnum opnast okkur áður óþekktar leiðir til skilvirkrar og ábyrgar ákvarðanatöku en með gríðargögnum getum við meðal annars byggt markvissar umferðaröryggisáætlanir sem taka til raunnotkunar gatnakerfis, göngu- og hjólaleiða og hraðatakmarkandi aðgerða.

Samfylkingin leggur áherslu á orkuskipti í samgöngum og vill minnka útblástur gróðurhúsalofttegunda ásamt því að kolefnisjafna Seltjarnarnesbæ. Samfylkingin stefnir á uppsetningu hleðslustöðva fyrir rafbíla samhliða nýjum snjallstaurum. Þannig geti bæjarbúar hlaðið bílana sína á einfaldan og aðgengilegan hátt við heimili sín og stofnanir bæjarins með orkulyklum. Samfylkingin vill einnig koma upp yfirbyggðum hjólageymslum við sundlaugina og Eiðistorg til að létta á bílastæðavanda íþróttamiðstöðvarinnar og gera íbúum auðveldara fyrir að hjóla á torgið og nýta sér þjónusta þar eða taka strætó númer 13 úr bænum.

Til að vinna að sjálfbæru samfélagið þarf að stíga skrefið til fulls í sorphirðu á Seltjarnarnesi. Íbúum hefur um nokkra hríð staðið til boða að flokka pappír, ásamt því að nú er einnig hægt að safna plasti og setja í heimilistunnuna. Samfylkingin vill bæta við flokkun á gleri, málmi og lífrænum úrgangi og þar með flokka allan úrgang sem fellur til frá íbúum, stofnunum og fyrirtækjum á Seltjarnarnesi. Til viðbótar vill Samfylkingin innleiða hvata sem eykur vilja bæjarbúa til að flokka með nýrri gjaldskrá fyrir sorp þar sem greitt er minna fyrir flokkunartunnur og meira fyrir almenna heimilistunnu enda er kostnaður við urðun óflokkaðs heimilissorps margfalt meiri fyrir sveitarfélagið.

Leit um „��“

2366 niðurstöður fundust við leit að „��“

Póstlisti Samfylkingarinnar

Samfylkingin

Flokkurinn

Flýtileiðir

Vertu í bandi:

Leit um „���������������������������“