Öll velkomin á sumarfund jafnaðarmanna í Suðurnesjabæ í Vörðunni í Sandgerði klukkan 18:00, miðvikudaginn 16. júní.

Grillaðar pulsur verða á boðstólnum og Fríða og Smári leika fyrir okkur góða tónlist.

Eigum góða stund saman, fögnum sumrinu og tökum samtalið um pólitíkina.

Á staðnum verða:
- Formenn Samfylkingarfélagana í Garði og Sandgerði, Jónína Holm og Fríða Stefánsdóttir.
- Oddný Harðardóttir, þingmaður og oddviti Samfylkingarinnar í kjördæminu
- Viktor Stefán Pálsson og Inger Erla Thomsen, frambjóðendur Samfylkingarinnar í kjördæminu
- Fulltrúar frá landshreyfingum Samfylkingarinnar að ræða félagsstarf flokksins

Sumarfundur jafnaðarmanna í Suðurnesjabæ

Næsta miðvikudag 9. júní kl. 14:00 ætlum að fara í sumargöngu. Að þessu sinni ætlum við að gangaum Laugardalinn og verður Þorkell Heiðarsson, varaborgarfulltrúi, leiðsögumaður okkar. 

Við hittumst á bílastæðinu fyrir framan innganginn inn í garðinn - Skautahöllin og Fjölskyldu- og húsdýragarðurinn er við bílastæðið, sama stað og gengið er gjarnan inn í garðinn þegar haldið er á Kaffi Flóru . 

Gangan mun vara í um 1,5 klst. og eftir hana ætlum við að setjast niður á Kaffi Flóru og fá okkur kaffi og með því. Þau sem því ekki treysta sér í gönguna geta hitt okkur um kl. 15:30 á Kaffi Flóru. 

Við hlökkum til að sjá ykkur sem flest. 

Nú þegar sér fyrir endann á heimsfaraldrinum, er líkt og hulu eða grímu sé svipt frá andlitinu og við þurfum að horfast í augu við verkefnin sem blasa við okkur. 

Verkefni sem sum hafa legið í dvala vegna faraldursins, eða verið lögð vísvitandi til hliðar í skjóli heimsfaraldursins sem hefur verið notaður sem afsökun fyrir því að ná ekki stórum málum í gegn hér á þingi. 

Það vita allir að loftslagsmálin og umhverfismálin eru stóra verkefnið. Það er því meira en dapurlegt að grundvallarmál í stjórnarsáttmála ríkisstjórnarinnar af hálfu Vinstri grænna, miðhálendisþjóðgarðurinn, er ekki að nást í gegnum þingið nú, fjórum árum síðar. 

Málið var eitt stærsta, ef ekki stærsta mál VG við myndun ríkisstjórnarinnar og flokksfélagar fögnuðu því að minnsta kosti skyldi ráðist í þetta gamla baráttumál. Það er ekki svo að heimsfaraldur hafi komið í veg fyrir að miðhálendisþjóðgarður hafi orðið að veruleika, heldur annars konar faraldur sem er andstaða Sjálfstæðisflokksins og Framsóknarflokksins. Því ekki hefur  heimsfaraldurinn hindrað hjartans mál hinna flokkanna, eins og sölu Íslandsbanka, eða niðurlagningu skattrannsóknarstjóra.

Kæru landsmenn, loftslags – og umhverfismálin hafa verið í gíslingu Sjálfstæðisflokksins allt þetta kjörtímabil. Þau hafa náð því fram að metnaðurinn væri lítill, lítil skref tekin og engin róttækni leyfð. Og því miður hefur flokkurinn sem leiðir við ríkisstjórnarborðið guggnað yfir fleiri hápólitískum umhverfismálum. Má þar nefna vegalagningu um Teigskóg,  sem um gilda sérlög og hefur að auki sérstaka vernd í náttúruverndarlögum. Engin afdráttarlaus pólitísk lína hefur verið gefin út vegna virkjunaráforma í Hvalá á Ströndum, heldur treyst á lagaþrætur og dóma til að tefja málið. Rúmt ár tók að banna plastnotkun sem var nokkuð einföld EES innleiðing, sem lönd á borð við Albaníu höfðu löngu klárað á undan Íslandi. 

Árið 2020 átti að vera upphafið á áratug aðgerða í loftslagsmálum. Og þótt heimsfaraldurinn hafi sett strik í þann reikning, hafa nágrannaríki okkar sýnt að þeim er full alvara með því að leggja áherslu á græna viðspyrnu og græna endurreisn út úr COVID-19.  Slíkar aðgerðir hafa verið í skötulíki hér.

Hér á landi þurfa aðgerðir gegn loftlagsbreytingum að vera skýrar en ekki loðnar eins og nú er. Markmiðin þurfa að vera hærri og metnaðarfyllri. Fjárfestingar í grænum – loftslagsvænum aðgerðum þurfa að vera meiri. Hærri  fjármunum þarf að veita í rannsóknir og nýsköpun. Tækniþróun þarf að hverfast um loftslagsmarkmið. Setja þarf miklu meiri kraft í almenningssamgöngur og orkuskiptin þurfa að ganga hraðar fyrir sig. Enduruppbygging ferðaþjónustunnar á að vera á forsendum sjálfbærni. 

Ísland hefur nefnilega svo ótal tækifæri til að vera leiðandi í aðgerðum í umhverfis- og loftslagsmálum og þá þýðir ekki að tala um lagningu hitaveitunnar fyrir rúmum 70 árum við erlenda ráðamenn, heldur einblína á þau óteljandi tækifæri sem við höfum til framtíðar. 

Umskiptin vegna loftslagsbreytinga verða líka að vera sanngjörn. Metnaðarfull áætlun í loftslagsmálum getur nefnilega í senn skapað fjölda starfa, náð árangri í glímunni við ójöfnuð og stefnt að kolefnishlutleysi. 

Heimsfaraldurinn hefur aukið ójöfnuð og varpað ljósi á veikleika og óréttlæti samfélaga okkar. Því miður hafa sumir þjóðarleiðtogar og ríkisstjórnir nýtt faraldurinn til að grafa undan alþjóðasamvinnu. Þá verður að standa vörð um kjarnagildi mannréttinda, frelsis, sjálfsákvörðunar og jafnréttis. Alþjóðasamvinna hefur verið lykilatriðið í viðbragðinu. 

Án Evrópusamvinnunnar hefðum við ekki getað tryggt okkur aðgang að jafnmiklu bóluefni og raun ber vitni. Alþjóðaheilbrigðisstofnunin hefur staðið vaktina og samstarf vísindamanna og sérfræðinga við þróun bóluefnis hefur sannað gildi alþjóðasamvinnu svo um munar. 

En áskoranir alþjóðlegrar samvinnu ná yfir í gríðarlega brýn verkefni eins og loftslagsvána, sameiginlegri baráttu fyrir auknu félagslegu réttlæti og undirbúning okkar fyrir stafrænu byltinguna. 

Samstarfsríki okkar í Evrópusambandinu hafa verið leiðandi í aðgerðum um græna endurreisn en líka í því að leiða saman ólík Evrópuríki til að samþykkja sáttmála um málefni flóttafólks. 

Og þeir íslensku stjórnmálamenn sem tala niður ábyrgð okkar þegar kemur að móttöku fólks á flótta ættu að hugsa sinn gang. Ábyrgð okkar er siðferðisleg og mannúðleg. Hún snýst um að virða mannréttindi og halda í heiðri mannúð gagnvart þeim sem eru í langviðkvæmustu stöðunni, sem flýja heimili sín vegna stríðsátaka, loftlagsbreytinga eða sárafátæktar. 

Mér liggur við að segja svei þeim sem tala niður sam-mannlega ábyrgð okkar í   að taka á móti fólki á flótta með opnum örmum. Það eru ekki stjórnmál sem bæta samfélagið eða lífsgæði. Það eru stjórnmál haturs og ótta, rangfærslna og útúrsnúninga. Börn á flótta eru ekki glæpagengi. Fjölskyldufólk sem vill loks frið og ró eru ekki glæpagengi. 

Utanríkismál snúast um alþjóðasamvinnu, mannréttindi, virðingu fyrir lögum og reglum og eflingu lýðræðis. Þar eigum við að vera. Ekki bogin og hrædd eða ala á ótta og einangrun. Heldur bein í baki, opin og full sjálfstrausts á alþjóðasviðinu. 

Megi næstu sumarmánuðir færa okkur betri heilsu, lífsgæði, bjartsýni og gleði. Og góða, græna félagshyggjustjórn eftir komandi Alþingiskosningar. 

Þeir sem trúðu orðum utanríkisráðherra að með útgöngu Breta úr Evrópusambandinu fylgdu áður óþekkt tækifæri fyrir Íslendinga, eins og hann lýsti yfir, hafa nú fengið staðfestingu á því að þau áttu ekki stoð í raunveruleikanum.

Nú hefur verið kynntur nýr fríverslunarsamningur þar sem í besta falli er reynt að halda í horfinu við stöðuna eins og hún var fyrir Brexit en á mörgum sviðum hafa því miður verið reistar girðingar á milli okkar og þessarar mikilvægu viðskiptaþjóðar okkar.

Ekkert varð úr fyrirheitum um lægri tolla fyrir sjávarafurðir, eða tollfrelsi sem gefið var til kynna að væri í seilingarfjarlægð. Enda hafa hagsmunasamtök sjávarútvegsins lýst gríðarlegum vonbrigðum með samninginn og kvartað undan samráðsleysi af hálfu stjórnvalda. Hafi verið tækifæri í stöðunni, voru þau ekki gripin.

Staðan í samskiptum Íslands og Bretlands eftir Brexit er einfalega sú að það er flóknara fyrir Íslendinga að búa og starfa í Bretlandi. Sækja þarf um leyfi, stúdentar greiða hærri skólagjöld og aðgengi að rannsókna- og vísindastarfi er takmarkaðra en áður. Fyrirtæki lenda í auknu skrifræði.

Brexit var einfaldlega mjög vont mál fyrir þau sem styðja viðskiptafrelsi og alþjóðasamvinnu, og það er blekkingarleikur að gefa annað í skyn. Fram að Brexit gátu íslensk fyrirtæki og hæft fólk notað Bretland sem stökkpall yfir í hinn stærri heim, en eftir Brexit, eru tækifærin færri og þröskuldarnir hærri.

Rétt eins og í Bretlandi er varasamt að trúa þeim spámönnum sem hafa um árabil öskrað sig hása í blindri andstöðu við Evrópusambandið. Það er að reynast Bretum ótrúlega dýrt að hafa sagt skilið við sinn stærsta markað í von um að vinna nýjar lendur í fjarlægum löndum.

Svarið við tækifærum 21. aldarinnar er fólgið í því að opna landamæri, liðka fyrir greiðari leið að stærri mörkuðum, meiri Evrópusamvinnu en ekki minni.

Greinin birtist fyrst í Kjarnanum 15. júní 2021.

Rósa Björk Brynjólfsdóttir, þingmaður, skipar 2. sætið í Reykjavíkurkjördæmi suður fyrir komandi Alþingiskosningar

Þann 17 júní bjóða ungir jafnaðarmenn í Hafnarfirði í kaffi. Boðið verður uppá kaffi, vöfflur og vegan súkkulaði kökur. Einnig verður djús fyrir börnin.

Frambjóðendur kíkja við og þau sem vilja ræða pólitík fá tækifæri til þess og öll eru velkomin að að koma fá sér kaffi og vöfflu á þessum hátíðardegi óháð póltískum skoðunum.

Við verðum á Strandgötu 43, aðgengi fyrir alla

On the June 17, Young Social Democrats in Hafnarfjörður is inviting all to waffles and coffee at our Party’s home Strandgata 43.

The Parliament’s Candidates of our Party Samfylking will be there and those who want to discuss politics will have the opportunity to do so while also eating some of our great waffles and cakes. Everybody are welcome regardless of political stance

Aðalfundur Samfylkingarfélagsins á Norðan verðum Vestfjörðum var haldinn í Edinborgarhúsinu á Ísafirði í kvöldi. Á fundinum var samþykkt að Samfylkingarfélagið á Sunnan verðum Vestfjörðum sameinist félaginu á Norðan verðum Vestfjörðum. Er því núna eitt Samfylkingarfélag á Vestfjörðum.

Á fundinum var einnig kosin ný stjórn félagsins:

Stjórn: Bryndís Friðgeirsdóttir, Emil Emilsson, Guðrún Anna Finnbogadóttir og Lína Tryggvadóttir. 

Í varstjórn voru kosin Gunnhildur Björg Elíasdóttir og Magnús Bjarnason.

Í kvöld voru Samfylkingarfélögin á Sunnan og Norðan verðum Vestfjörðum sameinuð í eitt félag á Vestfjörðum 

Ágæti félagi í Samfylkingunni á N Vestfjörðum

Boðað er til aðalfundar félagsins þann 15. júní kl 20.00 í Edinborgarhúsinu á Ísafirði.
Á dagskrá fundarins auk aðalfundarstarfa verður tekin fyrir ósk frá Samfylkingunni í Vesturbyggð um að ganga í félagið á N Vestfjörðum. Verði tillagan samþykkt mun stjórnin bera upp tillögu að nýjum lögum félagsins ásamt nýju nafni. Meðfylgjandi er tillaga að nýjum lögum sem stjórnin mun bera upp á aðalfundinum. 

Dagskrá aðalfundarins:
1.       Skýrsla stjórnar.
2.       Reikningar félagsins lagðir fram.
3.       Skýrslur nefnda sem starfa á vegum félagsins.
4.       Breytingar á lögum félagsins.
5.       Kosning formanns.
6.       Kosning stjórnar, fjögurra aðalmanna og tveggja til vara.
7.       Kosning tveggja skoðunarmanna reikninga.
8.       Ákvörðun um félagsgjald.
9.       Önnur mál
 
Við hvetjum ykkur til að taka þátt í fundinum og hafa þannig áhrif á starfið okkar í heimabyggð og á landsvísu. Boðið verður upp á kaffiveitingar á fundinum.

Stjórn Samfylkingarinnar á N Vestfjörðum

Meirihluti á Alþingi greiddi í dag atkvæði með því að tillögu Samfylkingarinnar um Græna atvinnubyltingu verði vísað til ríkisstjórnar. Samfylkingin vill ráðast í græna sókn fyrir Ísland - sannkallaða græna atvinnubyltingu. 

Tillagan feslst í því að ríkisttjórnin grípi til 10 aðgerða til að fjölga störfum, örva eftirspurn og styðja við loftslagsvæna verðmætasköpun á Íslandi. Tillagan var lögð fram með tilliti til alþjóðlegra loftslagsskuldbindinga Íslands á tímum hamfarahlýnunar og í ljósi efnahagssamdráttar, sögulegs fjöldaatvinnuleysis og framleiðsluslaka vegna heimsfaraldurs kórónuveiru. Þær aðgerðir sem Samfylkingin lagði til að verði ráðist í eru:

1. Grænn fjárfestingarsjóður.
Stofnaður verði grænn fjárfestingarsjóður í eigu hins opinbera sem styðji við loftslagsvæna atvinnuuppbyggingu og grænan hátækniiðnað. Ríkið leggi sjóðnum til 5 milljarða kr. í hlutafé. Sjóðurinn leiti eftir samstarfi við einkafjárfesta, taki mið af aðgerðaáætlun stjórnvalda í loftslagsmálum og stefnu Vísinda- og tækniráðs í allri sinni starfsemi og ýti undir góða stjórnarhætti í félögum sem hann fjárfestir í. Umhverfisráðherra skipi í stjórn sjóðsins, m.a. eftir tilnefningu náttúruverndarsamtaka, samtaka launafólks og samtaka atvinnurekenda.

2. Metnaðarfyllri loftslagsmarkmið.
Umhverfis- og auðlindaráðherra hafi forgöngu um að mótuð verði ný aðgerðaáætlun í loftslagsmálum sem geri ráð fyrir 60% samdrætti í losun gróðurhúsalofttegunda fyrir árið 2030 miðað við árið 2005. Markmið um kolefnishlutleysi árið 2040 verði fest í lög, skerpt á sjálfstæði og aðhaldshlutverki loftslagsráðs gagnvart stjórnvöldum og stjórnsýsla loftslagsmála efld.

3. Efling almenningssamgangna.
Framkvæmdum vegna borgarlínu á höfuðborgarsvæðinu verði flýtt og 1,5 milljarða kr. viðbótarframlag veitt til uppbyggingar stofnleiða fyrir hjólreiðar á næsta ári. Betri samgöngum ohf. verði falið að flýta þeim framkvæmdum í samgöngusáttmála höfuðborgarsvæðisins sem eru mannaflafrek og skila miklum loftslagsávinningi. Jafnframt verði stutt við landsbyggðarstrætó til að gera auðveldara og ákjósanlegra að ferðast milli landshluta með strætisvagni.

4. Hröðun orkuskipta.
Ráðist verði í markvissar aðgerðir til að hraða orkuskiptum á láði og legi. Stutt verði við uppbyggingu rafhleðslustöðva um allt land með það fyrir augum að nýskráningu bensín- og dísilbíla verði hætt frá og með árinu 2025. Flutnings- og dreifikerfi rafmagns verði styrkt svo að kerfið standi undir auknu álagi, meðal annars vegna rafvæðingar hafna. Framlög til Orkusjóðs verði tvöfölduð til að styðja við kaup á vistvænum tækjum, bæði vegna iðnaðar og samgangna á landi og í skipum og haftengdri starfsemi.

5. Sterk sveitarfélög og fjárfesting í nærsamfélaginu.
Spornað verði gegn niðurskurði og uppsögnum á sveitarstjórnarstiginu með auknum stuðningi við sveitarfélög sem orðið hafa fyrir miklu tekjufalli vegna heimsfaraldursins. Ríkissjóður hafi milligöngu um hagstæðar lánveitingar til sveitarfélaga vegna loftslagsvænna fjárfestinga og byggða- og samfélagsþróun verði efld með 800 millj. kr. aukaframlagi til sóknaráætlana landshluta árið 2021.

6. Kolefnisbinding og bætt landnýting.
Ráðist verði í kraftmikið átak í skógrækt, landgræðslu og endurheimt votlendis, birkiskóga og kjarrlendis. Stuðningur við landbótaverkefni frjálsra félagasamtaka verði stóraukinn og sett af stað markviss vinna við endurskoðun styrkjakerfis og skattumhverfis til að ýta undir ábyrga landnýtingu og gera bændum kleift að einbeita sér í auknum mæli að kolefnisbindingu, endurheimt votlendis og uppgræðslu á illa förnu landi.

7. Menntasókn.
Stutt verði við námstengd vinnumarkaðsúrræði fyrir atvinnuleitendur og fleiri með auknum framlögum til starfsmenntunar, framhaldsfræðslu, símenntunarstöðva, starfsendurhæfingar og vinnustaðanáms. Stofnaður verði Umhverfis- og garðyrkjuskóli með starfsnámi á framhaldsskólastigi að Reykjum í Ölfusi, aðgengi að tæknifræðinámi utan höfuðborgarsvæðisins verði aukið og stutt við uppbyggingu háskólaútibús á Austurlandi.

8. Uppbygging iðngarða.
Skipaður verði starfshópur um skipulega uppbyggingu iðngarða á Íslandi þar sem auðlindastraumar eru fjölnýttir og virði hreinnar orku hámarkað, svo sem til uppbyggingar í matvælaiðnaði, lífrænni eldsneytisframleiðslu, líftækni og garðyrkju. Hafist verði handa við breytingar á lögum, regluverki og leyfiskerfum til að liðka fyrir slíkri starfsemi.

9. Stuðningur við listir og menningu.
Framlög til launasjóða listamanna verði stóraukin og komið verði til móts við menningarstofnanir sem orðið hafa fyrir tekjutapi vegna samkomubanns. Endurgreiðslur á virðisaukaskatti til framleiðenda kvikmynda og sjónvarpsefnis verði hækkaðar og ráðist í markvissar aðgerðir til að gera Ísland að ákjósanlegum stað til fullvinnslu kvikmynda.

10. Stórsókn í nýsköpun og þróun.
Ráðist verði í heildstæða greiningu á því hvernig bæta megi regluverk og nýta skattalega hvata til að treysta samkeppnishæfni Íslands á sviði nýsköpunar, rannsókna og þróunar og tryggja hugverka- og hátækniiðnaði hagfelldari rekstrarskilyrði. Framlög til Tækniþróunarsjóðs, Rannsóknasjóðs og Innviðasjóðs verði aukin og úrræðið Stuðnings-Kría fullfjármagnað svo að ekki þurfi að skerða mótframlagslán til nýsköpunarfyrirtækja í rekstrarvanda.

Í október kynnti Samfylkingin aðgerðaráætlunina Ábyrgu leiðina – úr atvinnukreppu til grænnar framtíðar, sem felur í sér markvissar aðgerðir til að fjölga störfum, bæði í einkageiranum og hjá hinu opinbera, létta undir með atvinnulausu fólki og fjölskyldum þeirra, stíga fastar til jarðar í loftslagsmálum og beita ríkisvaldinu af krafti til að fjárfesta í grænni uppbyggingu til að renna fjölbreyttari stoðum undir útflutning og verðmætasköpun á Íslandi. Er tilkoma þessarar þingsályktunartillögu einn áfangi í að koma þessum aðgerðum til leiðar. 

Með þessari þingsályktunartillögu er lagt til að við þessar fordæmalausu aðstæður stígi ríkisvaldið fram af festu og nýti fjárfestingarsvigrúmið til að styðja við vistvæna atvinnuuppbyggingu um allt land, auka framleiðslugetu þjóðarbúsins til langframa og renna nýjum stoðum undir verðmætasköpun á Íslandi. Markmiðið er að skapa verðmæt græn störf, efla innviði, auka umsvif í efnahagslífinu og tryggja að viðspyrnan eftir efnahagsáhrif heimsfaraldursins samræmist heimsmarkmiðum Sameinuðu þjóðanna um sjálfbæra þróun, einkum markmiðum 13, um samdrátt í losun gróðurhúsalofttegunda, og 14, um verndun hafsins. 

Brýnt er að Ísland uppfæri hið fyrsta landsframlag sitt til samdráttar í losun gróðurhúsalofttegunda í samræmi við Parísarsamkomulagið og sé ekki eftirbátur annarra Evrópuríkja í þessum efnum.

Græn atvinnubylting - samþykkt á Alþingi

Hallveig - félag ungra jafnaðarmanna í Reykjavík býður í grillveislu í Heiðmörk þann 16.júní næstkomandi kl. 17:00.
Til stendur að sameina í bíla svo endilega skráðu þig hér:
https://www.surveymonkey.com/r/5257WL8

Fyrst stendur til að planta saman trjám í landnemareitinn okkar og síðan grilla og hafa gaman ef íslenska sumarið leyfir. Við hlökkum til að sjá ykkur í sumarstuði í Heiðmörk 

Fyrir þá sem hafa áhuga á að koma á eigin bíl/hjóli þá er þetta staðsetning á landnemareitnum okkar fyrir Google maps:
64.064110 -21.735192

Undanfarið ár hefur COVID-19 tekið mikið pláss á vettvangi stjórnmálanna á meðan öðrum brýnum verkefnum hefur ekki verið sinnt af núverandi ríkisstjórn. Við viljum hér sérstaklega nefna eitt mál sem hefur verið látið sitja á hakanum hjá núverandi ríkisstjórn, en það er þjónusta og skyldur ríkisins við langveikt fólk, örorkulífeyrisþega og uppbyggingu endurhæfingaúrræða. Í þeim málaflokki hafa of mörg verkefni verið sett á bið og fólkið sem var fyrir tíma COVID-19 er enn í sömu stöðu og áður, jafnvel verri stöðu, því ekkert hefur þokast áfram í þeirra málum. Þau hafa einfaldlega verið látin bíða. Að okkar mati þarf að stokka upp stofnanakerfi ríkisins sem hefur með réttinda- og atvinnumál að gera, þar á meðal þeirra sem eru með skerta starfsgetu, fötlun eða örorku. Er þar átt við verkefni sem falla undir verksvið Tryggingastofnunar ríkisins, Vinnumálastofnunar og Sjúkratrygginga Íslands.

Við teljum skynsamlegast að sameina þrjár ofangreindar stofnanir í eina nýja stofnun sem hefur það að augnmiði að þjónusta notendur og leiðbeina þeim eins og best verður á kosið. Nú er tími til að fara í slíkar breytingar, ekki síst til að mæta þeirri þörf sem skapast hefur og mun skapast í kjölfar þeirrar félagslegu, fjárhagslegu og heilbrigðiskreppu sem COVID19 hefur haft og mun áfram hafa í för með sér.

Ný stofnun myndi í senn annast aðstoð við atvinnuleit, skipulag vinnumarkaðsúrræða, s.s. námskeiða, starfsúrræða, námsúrræða og endurhæfingar. Þar yrði áhersla lögð á vinnumiðlun og stuðningsúrræði fyrir alla, án aðgreiningar, auk aðgangs að hjálpartækjum og tækni- og starfsráðgjöf. Stofnunin hefði einnig umsjón með því að tryggja notendum greiðslur úr almannatryggingasjóði eða atvinnuleysistryggingasjóði eftir því sem við á.

Við leggjum áherslu á að efla þarf starfs- og námsráðgjöf, endurhæfingarúrræði, menntun- og símenntun, en aukin menntun og færni er hreyfiafl til atvinnuþátttöku. Til að auka möguleika fólks með ólíka starfsgetu til virkni og þátttöku á vinnumarkaði þarf að auka fjölda hlutastarfa og starfa með sveigjanlegan vinnutíma. Sérstaklega þarf að hafa í huga stöðu fólks sem hefur misst vinnu vegna árferðisins, ungs fólks (31% atvinnulausra í maí 2021 voru einstaklingar undir þrítugu), innflytjenda, fatlaðs fólks, fólks með geðraskanir og þeirra sem búa í dreifðari byggðum landsins. Víða á landsbyggðinni er aðgengi að endurhæfinga- og virkniúrræðum takmarkað en sérstaklega þarf að bæta aðgengi þeirra sem eru með annað móðurmál en íslensku að úrræðum.

Ríkið þarf að ganga ákveðnara til verks í því að tryggja rekstrargrundvöll ólíkra endurhæfingarúrræða, þannig að þeim sé gert kleift að veita einstaklingsmiðaða og fjölbreytta starfsendurhæfingu og stuðla þannig að virkni og atvinnuþátttöku fólks. Tíminn til að huga að þessu er núna, því þegar við förum að sjá út úr þessari kreppu þá kemur vandinn fyrst í ljós, eins og við sáum gerast eftir fjármálahrunið. Efla þarf þor og krafta fólks til virkni og almennrar samfélagsþátttöku með því að tryggja framboð úrræða, þar sem fagmennska er höfð að leiðarljósi en þá þarf einnig að gæta samfellu í endurhæfingu. Með því að vera með almannatryggingagreiðslur, ráðgjöf við hjálpartæki, vinnumarkaðsúrræði og endurhæfingu á sama stað verður þjónustan betur sniðin að notendanum. Þá verður yfirsýn yfir þörfina betri og það skapast fleiri tækifæri til að þróa vinnu- og velferðarþjónustu ríkisins enn frekar. Með því að sameina þessar stofnanir í eina þá eru hagsmunir notenda hafðir að leiðarljósi og aukið samspil verður á milli ábyrgðar og faglegra vinnubragða.

Greinin birtist fyrst í Kjarnanum 29. júni. 

Ellen Calmon, borgarfulltrúi, og Gunnar Alexander Ólafsson, heilsuhagfræðingur, segja að ríkið þurfi að ganga ákveðnara til verks í því að tryggja rekstrargrundvöll ólíkra endurhæfingarúrræða, þannig að þeim sé gert kleift að veita einstaklingsmiðaða og fjölbreytta starfsendurhæfingu.

Sameinum stofnanir – Vinnu- og velferðarstofnun í þágu notenda

Leit um „��"

3400 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3400 niðurstöður fundust við leit að „���������������������������������������������������"