Það þarf ekki að fara mörgum orðum yfir að árið 2020 hefur verið vægast sagt sérstakt og mjög krefjandi. Sú lýsing á einnig vel við verkefni bæjarstjórnar Akureyrarbæjar á árinu. Síðla árs vakti það skiljanlega töluverða athygli þegar við í bæjarstjórn ákváðum að vinna saman sem ein heild og leggja af meiri- og minnihluta. Flestir voru ánægðir með að láta reyna á þá tilraun þó svo að skiljanlega séu margir fullir efasemda. Í þessu samstarfi leggjum við bæjarfulltrúar Samfylkingarinnar megináherslu á grundvallar stefnu jafnaðarmanna sem og þau markmið sem við kynntum kjósendum í stefnuskrá okkar fyrir síðustu bæjarstjórnarkosningar.

Þar sem kjörtímabilið er rúmlega hálfnað og áramótin marka ávallt ákveðin tímamót er ágætt að horfa um öxl og skoða það sem við í bæjarstjórn höfum gert frá síðustu kosningum. Ég tel óhætt að segja að miklu hafi verið áorkað og að við jafnaðarmenn getum verið mjög ánægð með árangurinn hingað til.

Þar sem það yrði til þess að æra óstöðugan að fara nákvæmlega yfir öll atriði þess sem gert hefur verið frá síðustu kosningum, þá má hér sjá lauflétta samantekt í punktaformi, en að sjálfsögðu ekki allt sem gert hefur verið.  

12 mánaða börn fá leikskólavist haustið 2021

Nýr leikskóli við Glerárskóla tekinn í noktun haustið 2021

Akureyrarbær viðurkennt sem fyrsta barnvæna sveitarfélag landsins

Úttekt og aðgerðir vegna loftgæða í grunnskólum

Endurnýjun umferðarljósa til að auka öryggi

Bætt aðgengi fatlaðra í Sundlaug Akureyrar

Nýr göngu- og reiðstígur yfir Eyjafjarðará

Frístundastyrkurinn hækkaður úr 30.000 í 40.000 kr

Uppbyggingu íþróttamannvirkja forgangsraðað

Uppbygging við félagssvæði Nökkva hafin

Endurbætur í Skautahöllinni á fjárhagsáætlun næsta árs

Undirbúningur vegna uppbyggingar á KA svæðinu

Endurbætur á búningsklefum í íþróttahúsinu við Lundarskóla

Endurbætur í búningsklefum Sundlaugar Akureyrar

Bjarmahlíð ný miðstöð fyrir þolendur ofbeldis (samstarf við ríkið)

Kvennaathvarf á Akureyri (samstarf við ríkið)

Akureyrarbær hlaut viðurkenningu Jafnvægisvogarinnar

Aðgerðaráætlun gegn kynbundnu ofbeldi og ofbeldi gegn börnum

Nýir þjónustukjarnar fyrir fatlað fólk

Endurnýjaður samstarfssamningur við Aflið

Tekjumörk á afslætti fasteignaskatts til tekjulágra elli- og örorkulífeyris hækkuð 

Tilraunaverkefni um íbúasamráð vegna leiðarkerfis strætó

Sérstakt fjármagn til hverfisnefnda Hríseyjar og Grímseyjar

Verkefnið Brothættar byggðir í Hrísey 

Verkefnið Brothættar byggðir í Grímsey framlengt

Samkeppnisgreining á íbúa- og atvinnumarkaði

Stofnun SSNE með sameiningu AFE, AÞ og Eyþings til að tryggja kraftmeira starf

Akureyrarbær veitir formennsku í Arctic Mayors samstarfi

Aukinn stuðningur við SinfóníuNord vegna upptöku á kvikmyndatónlistar

Hækkun framlags í menningarsjóðs til listamanna

Styrkir til ungra og efnilegra listamanna

Nýr þjónustusamningur við Minjasafnið

Þriðji metan strætisvagninn tekinn í notkun

Gróðursettar plöntur í „Græna trefilinn“

Tilrauna- og átaksverkefni um aukna nýtingu moltu (samstarf við ríki)

Umhverfisþing ungmenna á Norðurslóðum haldið

Samstarfssamningur við Festa um loftslagsyfirlýsingu

Reikningar Akureyrarbæjar í íbúagátt

Afsláttur af gatnagerðargjöldum í Hrísey og Grímsey

Upplýsingastefna og aðgerðaráætlun samþykkt

Nýtt smáforrit fyrir íbúa í undirbúningi

Ný upplýsingastefna og aðgerðaráætlun

OneLandRobot tekið í notkun á skipulagssviði

Almannaheillanefnd og Neyðstjórn virkjuð

Bakvarðasveit í velferðarþjónustu sett á laggirnar

Viðburða- og vöruþróunarsjóður settur á laggirnar

Nú árið er liðið - og kjörtímabilið rúmlega hálfnað.

Nýárspistill frá Hildu Jönu bæjarfulltrúa og oddvita Samfylkingarinnar á Akureyri

Í júní í fyrra voru samþykkt lög sem eru til þess fallin að veikja Fjármálaeftirlitið. Síðastliðið vor var síðan Samkeppniseftirlitið veikt með lagasetningu og verið er að draga tennurnar úr skattrannsóknarstjóra með frumvarpi sem er til meðferðar í efnahags- og viðskiptanefnd. Og nú stendur til að selja hluti í Íslandsbanka áður en að kjörtímabili lýkur. Það er verið að búa í haginn fyrir þá sem sýsla með mikla peninga.

Í fyrra vor stóðum við frammi fyrir þeirri spurningu hvort sjálfstæður seðlabanki með allt fjármálaeftirlitið yrði sterkari til að takast á við framtíðaráföll. Um það voru skiptar skoðanir innan þings sem utan. Ég tel að það hafi hvorki verið heillaskref fyrir Fjármálaeftirlitið né Seðlabankann að renna Fjármálaeftirlitinu inn í Seðlabankann. Heildaryfirsýn á kerfisáhættu og sterkt eftirlit með fjármálageiranum er nauðsynlegt en leiðin sem samþykkt var með lögum í júní 2019 hafði, að mínu mati líkleg til að veikja Fjármálaeftirlitið og skapa vantraust á Seðlabanka Íslands.

Í þessu sambandi má einnig nefna orðsporsáhættu fyrir seðlabanka sem sinnir viðskiptaháttaeftirliti. Skemmst er að minnast hvernig fór þegar Seðlabankanum var falið gjaldeyriseftirlit og í máli Seðlabankans og fyrirtækisins Samherja. Traust á seðlabanka er afar mikilvægt í litlu landi og þar getur verið stutt í að deilur verði persónulegar og það sem skaðar orðspor seðlabankastjóra skaðar einnig orðspor bankans. Í öllum öðrum norrænum ríkjum er fjármálaeftirlit sjálfstæð stofnun en stjórnarflokkarnir þrír fengu sitt fram með umræddri lagabreytingu og þannig sker Ísland sig úr.

Á lokadögum síðasta þings í júní 2020 var frumvarp keyrt í gegnum þingið sem veikir Samkeppniseftirlitið þegar nærtækara hefði verið að styrkja það í því efnahagsástandi sem ríkir eftir Covid-19. Auk þess er íslenskt viðskiptalíf lítið og einangrað í samanburði við alþjóðleg markaðssvæði og gríðarlegt hagsmunamál fyrir neytendur að hér sé heilbrigt samkeppnisumhverfi. Með veiku eftirliti geta fyrirtæki nýtt sér aðstæður til að skapa einokunarstöðu sem vinnur gegn hag almennings. Breytingartillögur þær sem minnihlutinn á Alþingi knúði fram, drógu lítillega úr skaðanum sem annars hefði orðið en eftir stendur að sú varasama lagabreyting að stórir samrunar fyrirtækja eru ekki tilkynningarskyldir og fyrirtækjum er ætlað að meta sjálf hvort skilyrði samkeppnislaga til samstarfs séu uppfyllt.

Stjórnarliðar tóku ekkert tillit til þeirra breytinga á efnahagslífi og atvinnulífi sem fyrirsjáanlegar voru í kjölfar Covid-19, þegar lögin voru samþykkt. Í greinargerð frumvarpsins, kemur fram að það hafi verið samið m.a. til þess að taka tillit til breytinga sem hafi orðið á íslensku efnahagslífi frá því að samkeppnislögunum var síðast breytt árið 2011.

„Mikill uppgangur hefur verið á síðustu árum á ákveðnum sviðum atvinnulífsins þar sem mikil samkeppni hefur leitt af sér töluvert aðhald fyrirtækja hvert með öðru og nokkurn fjölda samruna.“

Öllum má vera ljóst að miklar breytingar hafa orðið á íslensku efnahagslífi eftir Covid-19 og því hafa þessar forsendur fyrir frumvarpinu einfaldlega brugðist. En stjórnarliðar héldu sínu striki þrátt fyrir að við séum í dýpstu kreppu í 100 ár.

Hættan á blokkamyndun er enn meiri í þeim aðstæðum sem nú hafa skapast eftir Covid-19. Það var því alls ekki rétta leiðin að nýta þetta erfiða umhverfi til að búa til kjöraðstæður fyrir ráðandi fyrirtæki á fákeppnismarkaði. Það er þvert á móti mjög mikilvægt að valda ekki auknu tjóni með því að skapa einokunarfyrirtæki á mörkuðunum. Slíkt gengur augljóslega gegn hag almennings.

Nú stendur til að veikja embætti Skattrannsóknarstjóra ríkisins með frumvarpi efnahags- og viðskiptaráðherra sem mælt hefur verið fyrir og er til vinnslu í efnahags- og viðskiptanefnd. Það er að mínu mati algjörlega fráleit ráðstöfun að renna embætti Skattrannsóknarstjóra ríkisins undir Skattinn en í góðu samræmi við aðrar aðgerðir ríkisstjórnarinnar sem stuðla að veikara eftirliti með þeim sem sýsla með peninga og reka stærstu fyrirtækin. Nær væri að styrkja embætti Skattrannsóknarstjóra líkt og margar skýrslur og greiningar hafa fjallað um og þingmál Samfylkingarinnar frá síðasta þingi gerir ráð fyrir.

Í greinargerð með þingmáli Samfylkingarinnar kemur m.a. fram að í meira en aldarfjórðung hefur reglulega verið vakin athygli á nauðsyn þess að uppræta augljósan tvíverknað í rannsókn á skattsvikum og efnahagsbrotum og útgáfu ákæra á því sviði, jafnt í þingmálum sem og mörgum skýrslum og greiningum. Fyrirkomulagið hér á landi er seinvirkt og kostnaðarsamt og hvorki hinu opinbera né meintum sakborningum í hag. Með löngum málsmeðferðartíma vex auk þess hætta á að réttarspjöll verði, sem leiðir til mildari dóma en ella eða jafnvel sýknu eins og dæmi eru um.

Eins og löggjöf er nú háttað er þeim brotum sem þykja alvarleg samkvæmt niðurstöðum rannsóknar Skattrannsóknarstjóra vísað til Héraðssaksóknara til opinberrar rannsóknar og venjulegar skattamálameðferðar. Réttara væri að auka skilvirkni að veita Skattrannsóknarstjóra ákæruvald í þeim málum sem embættið rannsakar en í september 2019 voru 140 óafgreidd mál frá Skattrannsóknarstjóra hjá Héraðssaksóknara.

Verkefnisstjórn um breytingar og umbætur á skattkerfinu frá 2016 leggur til að rannsóknarmál verði eingöngu til meðferðar hjá Skattrannsóknarstjóra, sem fái ákæruvald. Sakamál vegna skattalagabrota krefjast sérþekkingar og sérhæfingar, bæði hvað varðar rannsóknir og saksókn. Það stuðlar að skilvirkni að einn og sami aðilinn annist hvort tveggja. Slík tilhögun er þekkt í öðrum löndum, þar á meðal í Þýskalandi.

Peningaþvætti tengist oft skattsvikum og skattalagabrot eru ein helstu frumbrot peningaþvættis. Rannsókn peningaþvættisbrota er samkvæmt lögum á hendi héraðssaksóknara. Vegna þess hve mjög peningaþvættisbrot tvinnast saman við frumbrot liggur hins vegar vel við að rannsaka peningaþvætti vegna skattsvika samhliða þeim skattalagabrotum sem um ræðir. Hefur þeirri skipan einmitt nýlega verið komið á í Svíþjóð.

Í Panama-skjölunum voru Íslendingar margir og fyrirferðarmiklir og rannsókn málanna flókin og margþátta. Samherjaskjölin kalla líka á rannsókn á flóknum millifærslum og skoðun í að minnsta kosti þremur löndum. Við höfum ekki staðið okkur vel í aðgerðum gegn peningaþvætti og fjármögnun hryðjuverka.

Það er augljóst að efla þarf rannsóknir á skattalagabrotum, styrkja kröftuglega embætti Skattrannsóknarstjóra og gefa embættinu auknar heimildir og hlutverk. Því er fráleitt leggja af embættið með þeim hætti sem fjármála- og efnahagsráðherra leggur til og stjórnarflokkar virðast ætla að samþykkja.

Og svo á að selja banka í einum grænum hvelli. Ferlið var sett af stað með greinargerð fjármála- og efnahagsráðherra vegna sölu á hlutum ríkisins í Íslandsbanka. Tvær nefndir þingsins, efnahags- og viðskiptanefnd og fjárlaganefnd fengu greinargerð ráðherra sendar 22. desember sl. eftir að þingið hafði farið heim í jólaleyfi. Þingfundir hefjast ekki fyrr en 18. janúar en nefndirnar eiga að skila umsögnum sínum til ráðherra 20. janúar. Það er því augljóst að mjög lítill tími verður til umræðna um þetta stóra mál í þinginu enda tímasetningin sennilega valin með það í huga.

Samkvæmt tímalínu sem sett hefur verið upp fyrir ferlið á öflun tilboða og áskriftarloforða að vera lokið í byrjun maí. Ríkisstjórninni liggur greinilega mikið á að selja bankann áður en kjörtímabili líkur. Og það áður en lykilspurningum um framtíðarbankakerfi hefur verið svarað. Um bankakerfi sem á að þjóna venjulegu fólki og almennum atvinnurekendum til langs tíma en ekki skammtíma hag sérhagsmunaafla. Hvers vegna liggur ríkisstjórn landsins svona mikið á?

Greinin birtist fyrst á visi.is 6. janúar 2021

Ríkisstjórnin hefur með skipulegum hætti verið að veikja afar mikilvægar eftirlitsstofnanir í íslensku samfélagi.

Kjördæmisfundur Samfylkingarinnar í Suðvesturkjördæmi verður haldinn með rafrænum hætti fimmtudaginn 14. janúar 2021 kl. 20.
Fundarstjóri verður Elfur Logadóttir.

Dagskrá:
Setning kjördæmisfundar 
Ávarp formanns Samfylkingarinnar, Loga Einarssonar
Aðferð um val á framboðslista fyrir Alþingiskosningar 2021
Almennar stjórnmálaumræður


Póstur með fundargögnum og hlekk á fundinn hefur verið sendur á alla sem hafa rétt á þátttöku og eru á kjörskrá. 

Kjördæmisfundur Samfylkingarinnar í Suðvesturkjördæmi

Málefnanefnd efnahagshóps Samfylkingarinnar býður öllum á opinn umræðufund um framtíð bankanna og fyrirhugaða sölu á Íslandsbanka. Fundurinn er rafrænn og fer fram á Zoom. 

Gestum fundarins gefst tækifæri á að spyrja spurninga og ræða málin við frummælendur, þau eru: 

Oddný Harðardóttir þingflokksformaður Samfylkingarinnar og situr í efnahags- og viðskiptanefnd. 

Ágúst Ólafur Ágústsson þingmaður Samfylkingarinnar og situr í fjárlaganefnd.

Fundarstjóri: Bolli Héðinsson hagfræðingur og formaður efnahagshóps Samfylkingarinnar.

Sumir missa heilsuna líka. Í lok nóvember höfðu 3.919 manns verið atvinnulaus lengur en 12 mánuði. Á sama tíma í fyrra höfðu 1.540 manns verið atvinnulaus í meira en 12 mánuði. Það eru 2.379 fleiri nú en í fyrra eða 154% enda stendur yfir djúp atvinnukreppa og enga vinnu að fá.

Það fólk sem búið hefur við atvinnuleysi í meira en 12 mánuði hefur ekki fengið þriggja mánaða lengingu á tekjutengda bótatímabilinu. Það er vegna þess að ríkisstjórnin ákvað að þá búbót fengju aðeins þeir sem höfðu misst vinnuna í mars á þessu ári. Stjórnarliðar felldu tillögu Samfylkingarinn um að allir atvinnulausir fengju þessa viðbót, og létu eins og þær um 10.000 manneskjur sem voru atvinnulausar í febrúar væru betur staddar en hitt fólkið sem missti vinnuna í mars. Raunin er sú að  fólk er því verr sett sem það hefur lengur verið án vinnu.

Á næstu sex mánuðum mun hluti þeirra sem hafa verið atvinnulaus lengur en 12 mánuði klára tímabil atvinnuleysisbóta. Þetta fólk þarf þá að leita á náðir sveitarfélaga eftir fjárhagsaðstoð. Sú fjárhagsaðstoð er í öllum tilfellum mun lægri en atvinnuleysisbæturnar og í sumum sveitarfélögum helmingi lægri.

Samfylkingin lagði til að tímabilið yrði lengt því engin von er um vinnu í atvinnukreppunni. Og ef stjórnvöld geri ekkert eigi fólkið enga möguleika aðra en að segja sig til sveitar og óska eftir matargjöfum frá hjálparstofnunum. Stjórnarflokkarnir felldu tillögur okkar um þetta í tvígang rétt fyrir jólin.

En stjórnarliðarnir samþykktu aftur á móti skattalækkun sem tekjuhæstu 10% landsmanna njóta helst. Það gerðu þau með því að breyta viðmiðum fyrir fjármagnstekjuskatt þannig að hann taki til vaxtatekna, arðs og söluhagnaðar og hækka frítekjumarkið um 100%.

Skattalækkunin fyrir þau tekjuhæstu kostar ríkissjóð meira en að lengja atvinnuleysistímabilið um 6 mánuði. Ef að líkum lætur verðum við öll bólusett fyrir kórónuveirunni eftir 6 mánuði og atvinnulífið vonandi farið að taka við sér. Að lengja tímabil atvinnuleysisbóta kostar ríkissjóð innan við milljarð króna en skiptir sköpum fyrir fólkið sem fengi aukinn rétt til atvinnuleysisbóta.

Við jafnaðarmenn mótmælum harðlega aðgerðarleysi ríkisstjórnarinnar sem situr með hendur í skauti og horfir á skort fólks sem býr við sárafátækt eftir langvarandi atvinnuleysi í atvinnukreppu.

Við jafnaðarmenn mótmælum harðlega forgangsröðun ríkisstjórnarinnar sem lækkar skatta á  efnafólk í dýpstu efnahagskreppu í 100 ár.

Við jafnaðarmenn köllum eftir annarri forgangsröðun og krefjumst aðgerða sem vinna gegn vaxandi ójöfnuði í heimsfaraldri.

Því lengur sem fólk er án atvinnu því erfiðari er staða þeirra fjárhagslega og félagslega.

Hér koma nokkrir fréttapunktar af starfi þingflokksins á haustönninni 2020.

Þingsetning í haust var 1. október en ekki annan þriðjudag í september eins og lög gera ráð fyrir. Ástæðan var sú að ríkisstjórnin var ekki tilbúin með fjárlagafrumvarpið. Við í Samfylkingunni höfðum skilning á þessari seinkun því endurskoða þurfti allar fjármálaáætlanir ríkisins í dýpstu efnahagskreppu í 100 ár.

Umræðu um stefnuræðu forsætisráðherra var í beinni útsendingu að vanda. Ræðumenn okkar voru Logi Einarsson formaður Samfylkingarinnar, Guðmundur Andri Thorsson og Helga Vala Helgadóttir. Þið getið hlustað á þessar góðu ræður með því að smella á nöfnin þeirra.

Í september kynntum við Ábyrgu leiðina – úr atvinnukreppu til grænnar framtíðar. Ábyrga leiðin er leið jafnaðarmanna með  markvissum aðgerðum til að fjölga störfum, bæði í einkageiranum og hjá hinu opinbera, létta undir með atvinnulausu fólki og fjölskyldum þeirra, stíga fastar til jarðar í loftslagsmálum og beita ríkisvaldinu af krafti til að fjárfesta í grænni uppbyggingu til að renna fjölbreyttari stoðum undir útflutning og verðmætasköpun. Með því að smella hér getið þið séð kynningu á Ábyrgu leiðinni.

Við höfum gagnrýnt harðlega forgangsröðun ríkisstjórnarinnar sem birtist í fjárlögum, fjáraukalögum og fjármálaáætlun. Við gagnrýnum sérstaklega að störfum sé hvorki fjölgað í nægilegum mæli né tekið utan um þann hóp sem hefur misst atvinnuna. Mikill kynjahalli er á úrræðum stjórnvalda. Um 85% af úrræðunum gagnast helst körlum þó að fleiri konur séu atvinnulausar í nær öllum landshlutum. Aðgerðir ríkisstjórnarinnar breikka enn frekar bilið á milli launamanna og þeirra öryrkja og eldri borgara sem þurfa að treysta á greiðslur almannatrygginga. Við viljum styrkja heilbrigðiskerfið okkar mun betur en ríkisstjórnin og auka aðgengi að menntunartækifærum um allt land. Og við gagnrýnum ríkisstjórnina einnig fyrir metnaðarleysi í loftlagsmálum.

Ágúst Ólafur Ágústsson er fulltrúi okkar í fjárlaganefnd. Í ræðu hans í fjárlaganefnd fór hann vel yfir okkar áherslur. Þið getið hlustað á ræðuna með því að smella á nafnið hans.

Þingflokkurinn hefur lagt fram mörg þingmál en forgangsmálin okkar sem við höfum mælt fyrir eru þessi:

Breyting á lögum um almannatryggingar í þá átt að lífeyrisgreiðslur hækki í takti við lífskjarasamninginn. Hér má skoða frumvarpið og greinargerðina um málið.

Breyting á lögum um atvinnuleysistryggingar með hækkun á grunnatvinnuleysisbótum, lengra bótatímabili, 6 mánaðar tekjutengdu tímabili fyrir þau sem voru atvinnulaus í ágúst og hækkun á viðmiðun fyrir framfærslu barna atvinnulausra. Hér má skoða frumvarpið og greinargerðina um málið.

Aðgerðir í þágu sveitarfélaga. Mörg sveitarfélög lenda í miklum vanda við að halda uppi félagsþjónustu og annarri góðri þjónustu við íbúana og þurfa einnig að skera niður fjárfestingar. Það mun fækka störfum þegar þörfin er til að fjölga þeim. Hér má skoða þingsályktunina með greinargerð.

Græn atvinnubylting. Með tilliti til alþjóðlegra loftslagsskuldbindinga Íslands á tímum hamfarahlýnunar og í ljósi efnahagssamdráttar, sögulegs fjöldaatvinnuleysis og framleiðsluslaka vegna heimsfaraldurs kórónuveiru þarf að grípa til aðgerða til að fjölga störfum, örva eftirspurn og styðja við loftslagsvæna verðmætasköpun. Hér má skoða þingsályktunina með greinargerð.

Albertína Friðbjörg Elíasdóttir veitti forystu þingmáli um ráðstafanir til að draga úr notkun pálmaolíu. Meðflutningsmenn voru þingflokkur Samfylkingarinnar, þingmaður utan flokka, tveir þingmenn Vg og tveir Píratar. Þingmálið var samþykkt með miklum meirihluta atkvæða. Hér má sjá þingsályktunina og greinargerðina. Albertína flutti stutta ræðu þegar málið var tekið til atkvæðagreiðslu. Ef þið smellið á nafn hennar getið þið hlustað á ræðuna.

Í þinginu fáum við alþingismenn tækifæri til að spyrja ráðherra út úr tvisvar í viku undir dagskrárliðnum óundirbúnar fyrirspurnir. Guðjón S. Brjánsson fulltrúi okkar í umhverfis- og samgöngunefnd nýtti tækifærið eftir að svört skýrsla hafði verið birt um slaka stöðu Íslands í aðgerðum í glímunni við loftslagshamfarir af mannavöldum. Hér er góð ræða Guðjóns sem þið getið hlusta á með því að smell á nafnið hans.

Við í Samfylkingunni höfum lagt á það áherslu að fyrirtæki fái stuðning í atvinnukreppunni. Stjórnarliðar hafa verið með okkur í þeim áherslum að mestu. En þau hafa ekki viljað styðja nægilega fólkið sem misst hefur vinnuna hjá þessum sömu fyrirtækjum. Atvinnuleysi á landinu er nú um 12%. Sum landssvæði verða sérlega illa úti og þegar faraldurinn skall á okkur var 5% atvinnuleysi og helmingi meira á Suðurnesjum. Nokkur hundruð einstaklingar eru að klára atvinnuleysisbóta tímabilið sitt á næstu mánuðum og eiga þá þann einn kost að leita á náðir fjárhagsaðstoðar sveitarfélaga. Ekkert nema sárafátækt blasir við því fólki sem fær ekki vinnu því enga vinnu er að fá. Þess vegna lögðum við í Samfylkingunni til að atvinnuleysisbóta tímabilið yrði lengt. Því var hafnað af stjórnarliðum. Með því að smella hér getið þið hlusta á atkvæðaskýringu mína þegar skammarleg niðurstaða stjórnarflokkanna varð kunn við atkvæðagreiðsluna um málið.

Sá gleðilegi atburður átti sér stað 16. desember að Rósa Björk Brynjólfsdóttir gekk til liðs við þingflokkin. Nú erum við átta og verðum enn fleiri eftir næstu kosningar.

Kæru félagar. Við í þingflokki Samfylkingarinnar óskum ykkur gleðilegra jóla og farsældar á nýju ári. Við erum þakklát fyrir allan ykkar stuðning á árinu sem er að líða. Saman erum við sterkari!

Oddný G. Harðardóttir þingflokksformaður.

Í september kynntum við Ábyrgu leiðina – úr atvinnukreppu til grænnar framtíðar. Ábyrga leiðin er leið jafnaðarmanna með  markvissum aðgerðum til að fjölga störfum, bæði í einkageiranum og hjá hinu opinbera, létta undir með atvinnulausu fólki og fjölskyldum þeirra, stíga fastar til jarðar í loftslagsmálum og beita ríkisvaldinu af krafti til að fjárfesta í grænni uppbyggingu til að renna fjölbreyttari stoðum undir útflutning og verðmætasköpun.

Fundurinn hefst klukkan 16.00 miðvikudaginn 20. janúar, á Zoom, og innsetningarathöfnin hefst klukkan 17.00.

Lýðræðið er viðkvæmt og ekki sjálfgefið, eins og sannaðist þegar stuðningsmenn fráfarandi Bandaríkjaforseta ruddust inn í þinghúsið í Washington í því skyni að stöðva staðfestingu þingsins á kjöri Biden. Lýðræðisríki virða niðurstöður kosninga, líka þegar valdhafar eru ekki sáttir, hvort sem um ræðir alþingiskosningar, forsetakosningar eða þjóðaratkvæðagreiðslur.


Hvernig gat þetta gerst? Hvernig hefur Bandaríkjaforseti nýtt sér veikleika samfélagsins? Hvaða hlutverki gegndi hatursorðræða gegn minnihlutahópum í forsetatíð Trump?


Var þetta tilraun til valdaráns? Hvaða hlutverki þjóna stöðug misvísandi skilaboð fráfarandi forseta, til að mynda um ætlað svindl póstkosninga?

Markar dagurinn í dag endalok Trump(isma) og endurkomu Bandaríkjanna?
- Silja Bára Ómarsdóttir, alþjóðastjórnmálafræðingur og prófessor við stjórnmálafræðideild Háskóla Íslands.

Verkefni Biden eftir valdatíð Trumps.
- Kristján Guy Burgess, alþjóðastjórnmálafræðingur og fyrrverandi framkvæmdastjóri Samfylkingarinnar.

Spegill fyrir Ísland.
- Elín Ósk Helgadóttir, aðjúnkt við lagadeild Háskólans í Reykjavík.

Fundarstjóri er Jóhanna Vigdís Guðmundsdóttir, varaþingmaður Samfylkingarinnar og stjórnarkona í SffR.

Ellen Calmon, borgarfulltrúi Samfylkingarinnar í Reykjavík og forman SffR opnar fundinn.

Samfylkingarfélagið í Reykjavík býður til upphitunaræfingar fyrir innsetningarathöfn Joe Biden, nýkjörins forseta Bandaríkjanna.

Lýðræði, lýðskrum og siðferði í stjórnmálum

Nú í kvöld um kl. 19:25 var tillaga borgarstjórnar samþykkt einróma á borgarstjórnarfundi. Dagur B. Eggertsson borgarstjóri mælti fyrir tillögunni, hann sagði í samtali við fréttastofu RÚV  fyrr í dag "meginatriðið er að þetta verði vel gert og af virðingu fyrir því sem þarna gerðist, þannig að málið verði upplýst og réttar ályktanir af því dregnar.“ Frétt á ruv.is.  

Tillöguna, eins og hún var lögð fram, má lesa hér fyrir neðan. 

Í ljósi upplýsinga sem benda til illrar meðferðar á heimilisfólki á vistheimilinu Arnarholti fyrr á árum er lagt til að borgarstjórn samþykki að borgarstjóri fari þess á leit við forsætisráðherra að fram fari heildstæð athugun á starfsemi vistheimilisins Arnarholts og eftir atvikum annarra meðferðar- eða vistheimila á tilteknu árabili. 

Greinargerð: Samstaða er um það í borgarstjórn að fullt tilefni sé til að taka út vistheimilið að Arnarholti eftir að fram komu upplýsingar um illan aðbúnað þar fyrr á árum. Athugun borgarlögmanns hefur leitt í ljós að jafnvel þótt Reykjavíkurborg sé sannarlega bær til að taka ákvörðun um að skipa nefnd til að gera almenna og heildstæða athugun á starfsemi vistheimilisins Arnarholts eða annarra meðferðar- og vistheimila sem rekin hafa verið á vegum Reykjavíkurborgar á tilteknu árabili, þá myndi slík nefnd að óbreyttum lögum ekki hafa þær heimildir sem nauðsynlegar eru til að framkvæma athugun með þeim hætti sem þörf er á. Með hliðsjón af þeim verkefnum sem ætla má að þurfi að fela nefnd til að gera úttekt á starfsemi Arnarholts eða annarra meðferðar- eða vistheimila með viðhlítandi hætti verður að telja nauðsynlegt að skýrar lagaheimildir liggi til grundvallar skipan, stöðu, valdheimildum og verkefnum slíkrar nefndar. Með vísan til eðli þeirra upplýsinga sem komu nýverið fram í dagsljósið um vistheimilið Arnarholt er því talið rétt að borgarstjóri fari þess á leit við forsætisráðherra að hlutast til um að fram fari almenn og heildstæð athugun á starfsemi vistheimilisins Arnarholts og eftir atvikum annarra meðferðar- og vistheimila á tilteknu tímabili samkvæmt nánari útfærslu.

Tillaga borgarstjórnar um heildstæða athugun á starfsemi vistheimilisins Arnarholts

Mikil samþjöppun hefur átt sér stað í sjávarútvegi á undanförnum áratugum. Tíu  stærstu útgerðirnar fara með meira en helming kvótans og 20 stærstu meira en 70% kvótans. Ofan á þetta bætist svo eignarhald þessara útgerðarisa í öðrum útgerðum.

Fyrir rúmum 20 árum voru samþykktar lagabreytingar sem ætlað var að vinna sérstaklega gegn samþjöppun aflahlutdeildar. Samþjöppun var talin skaðleg, ekki síst út af mikilvægi fiskveiða fyrir íslenskan þjóðarbúskap. Of sterk yfirráð fárra aðila yfir fiskveiðiauðlindinni myndi þýða meiri völd þeirra í þjóðfélaginu en heilbrigt væri og of sterka stöðu gagnvart stjórnvöldum. Samþjöppun kæmi einnig í veg fyrir samkeppni og hamlaði nauðsynlegri endurnýjun. Þá var bent á að samþjöppun gæti beinlínis unnið gegn þjóðarhag, sérstaklega ef viðkomandi stæðu sig ekki í því að skapa sem mest verðmæti úr auðlindinni. Tilfærsla milli byggða myndi skaða sveitarfélög og tilfærsla milli útgerðarflokka gæti leitt til þess að minni útgerðir færu halloka. Á þessu öllu áttu lögin að taka.

Ljóst er að lögin hafa ekki náð tilgangi sínum. Enda má samkvæmt þeim einn aðili ráða yfir 12% kvótans, og því til viðbótar eiga 49,99% hlut í öllum hinum fyrirtækjunum sem ráða yfir þeim 88% sem út af standa. Þannig getur einn aðili átt hlutdeild í meira en helmingi kvótans sem árlega er úthlutað. Þessi túlkun á lögunum ýtir augljóslega undir samþjöppun og gengur þvert á anda þeirra.

Samþjöppun leiðir af sér fábreytt útgerðarform, aukna kerfislæga áhættu og getur leitt til einokunar. Stór útgerðarfyrirtæki hér á landi eru í raun rekin sameiginlega og hafa samráð um veiðar, vinnslu og sölu afurða. Það er nauðsynlegt að vinna gegn slíkri samþjöppun og því að stóru fyrirtækin verði  svo stór að völd þeirra og áhrif í þjóðfélaginu verði óeðlileg og vinni gegn almannahag.

Endurskoða þarf lögin strax og koma í veg fyrir frekari samþjöppun. Fyrirmyndina má finna í lögum um fjármálamarkaði varðandi það hvenær aðilar teljast tengdir og hvenær talið er að um raunveruleg yfirráð eins aðila sé að ræða. Þar hefur þetta leyfilega mark  verið lækkað og viðurkennd sú aðstaða sem aðilar eru í ef þeir hafa veruleg áhrif í gegnum eignarhlut. Í nýjum lögum um skráningu raunverulegra eigenda fyrirtækja er miðað við 25% beinan eða óbeinan eignarhlut til að aðilar teljast tengdir eða aðili teljist raunverulegur eigandi. Upplýsingar um raunverulega eigendur fyrirtækja eru ávallt aðgengilegar almenningi og ef sami háttur væri hafður á um fyrirtæki í sjávarútvegi og yfirráð yfir kvóta væri auðvelt að hafa eftirlit með því hvort farið er yfir 12% hámarkið. Það þarf að stöðva þessa hættulegu þróun með breytingum á lögum um stjórn fiskveiða.

Greinin birtist fyrst í Morgunblaðinu 1. desember 2020

Samþjöppun leiðir af sér fábreytt útgerðarform, aukna kerfislæga áhættu og getur leitt til einokunar. Stór útgerðarfyrirtæki hér á landi eru í raun rekin sameiginlega og hafa samráð um veiðar, vinnslu og sölu afurða. Það er nauðsynlegt að vinna gegn slíkri samþjöppun og því að stóru fyrirtækin verði svo stór að völd þeirra og áhrif í þjóðfélaginu verði óeðlileg og vinni gegn almannahag.

Leit um „��"

3340 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������"

3340 niðurstöður fundust við leit að „���������������������������"