Samfylkingin vill að Ísland skipi sér í fremstu röð þegar kemur að samdrætti í losun gróðurhúsalofttegunda og haldi áfram samvinnu við Evrópusambandsríkin og Noreg innan loftslagssamstarfs SÞ. Lögfesta þarf loftslagsmarkmið og setja þak á magn losunar. Markmið Íslands í loftslagsmálum verða að tryggja að Ísland standi við alþjóðlegar skuldbindingar í loftslagsmálum. 

Til að ná árangri í loftslagsmálum þarf að ná fram samdrætti í losun á öllum sviðum samfélagsins og leggja fram tímasettar aðgerðaráætlanir með mælanlegum markmiðum. Ekki má einblína á losun sem er á beinni ábyrgð stjórnvalda heldur þarf einnig að taka með í reikninginn losun frá landnotkun, stóriðju og alþjóðaflugi. Öll sveitarfélög eiga að vera með áætlanir um samdrátt í losun gróðurhúsalofttegunda sem styðja við metnaðarfull landsmarkmið í loftslagsmálum.

Samfylkingin telur brýnt að styrkja stjórnsýslu loftslagsmála og tryggja fjármagn og mannafla til að sinna nauðsynlegri greiningarvinnu, samhæfingu verkefna og eftirfylgni. Styrkja þarf stöðu Loftslagsráðs og tryggja að það hafi svigrúm og fjárhagslegt bolmagn til að gegna aðhalds- og eftirlitshlutverki gagnvart stjórnvöldum.

Aðlögun að loftslagsbreytingum er nauðsynlegur þáttur til að lágmarka tjón samfélagsins af loftslagsbreytingum. Forvirkar aðgerðir hafa jákvæð áhrif á samfélagið en geta líka sparað umtalsverðar fjárhæðir. Samfylkingin leggur áherslu á að ráðast hratt og örugglega í aðgerðir til að auka seiglu samfélagsins ‒ innviða, fyrirtækja og heimila ‒ vegna loftslagsbreytinga. Þá leggur Samfylkingin áherslu á að styðja fjárhagslega við aðlögun fátækari landa að loftslagsbreytingum og til uppbyggingar orkuinnviða. Þannig vinnum við að því að axla ábyrgð okkar sem eitt af þeim ríku löndum sem losar hvað mest miðað við höfðatölu. 

Samfylkingin leggur áherslu á samhæfingu opinberra fjármála við stefnu í loftslagsmálum og á samhæfingu stefnumörkunar og aðgerða allra ráðuneyta með tilliti til áhrifa á losun gróðurhúsalofttegunda. Samfylkingin vill að lagafrumvörp verði metin með tilliti til loftslagsáhrifa rétt eins og þau eru metin með tilliti til fjárhagslegra áhrifa. Samfylkingin telur að beita þurfi fjölbreyttum stjórntækjum til að draga úr losun gróðurhúsalofttegunda, til að hámarka skilvirkni loftslagsaðgerða, með jafnræði, sanngirni, jöfnuð og réttlæti að leiðarljósi. Hagræn stjórntæki eins og kolefnisgjöld og fjárhagslegir hvatar eru mikilvæg tól til að draga úr losun gróðurhúsalofttegunda ásamt samningum, upplýsingagjöf, fræðslu og laga- og reglusetningu. 

Samfylkingin vill að réttlát umskipti verði leiðarljós í glímunni við loftslagsvána, eins og verkalýðshreyfingin hefur kallað eftir hér heima og á alþjóðavettvangi. Dæmin sýna að engin samfélagssátt getur náðst um nauðsynlegar breytingar á atvinnu- og lifnaðarháttum nema félagsleg sjónarmið séu höfð að leiðarljósi, lífsviðurværi almennings og réttindi borgaranna verði tryggð, óháð búsetu og efnahag. Byrði þarf að deila með sanngjörnum hætti og allir landsmenn verða að njóta afraksturs nauðsynlegra breytinga.

Fest skal í lög að ekki verði borað eftir jarðefnaeldsneyti á íslensku yfirráðasvæði.

Loftslagsvá

Almenningi farnast best í opnu hagkerfi þar sem frjálsræði ríkir í viðskiptum, samkeppni er virk og gagnsæi einkennir alla efnahagsstarfsemi. Frjáls viðskipti nást ekki með afskiptaleysi hins opinbera. Þvert á móti er grundvöllur frjálsra viðskipta ævinlega fólginn í því að stjórnvöld tryggi sanngjarnar leikreglur og skýra umgjörð á markaði. Aðgerðir til að efla samkeppni og auka gagnsæi í efnahagslífi eru nauðsynlegar til að markaðir virki í þágu almannahagsmuna, sem og vernd eignarréttar, fyrirsjáanlegt regluverk og virkt eftirlit auk skilvirkni í framkvæmd löggæslu og dómsvalds. Samfylkingin er hins vegar alfarið andsnúin hvers kyns geðþóttaafskiptum stjórnvalda af atvinnulífi sem jafnan verða til þess að sérhagsmuna er gætt umfram almannahagsmuna. Jafnræði á að ríkja milli fyrirtækja og atvinnugreina og skýrar almennar leikreglur og viðurlög eiga að gilda fyrir alla.

Virk samkeppni skilar sér í lægra vöruverði og meiri kaupmætti. Við kjöraðstæður keppa fyrirtæki ekki síður um hylli neytenda með því að bjóða aukin gæði, betri þjónustu, aðgengi og úrval. Hagkerfi okkar er afar smátt og því er mjög hætt við fákeppni. Þess vegna er virk samkeppni eitt af mikilvægustu kjaramálum almennings á Íslandi. Frumkvöðlar og smærri fyrirtæki hafa einnig ríka hagsmuni af virkri samkeppni en síður stórfyrirtækin sem hafa komið sér vel fyrir í skjóli einokunar eða fákeppni, sem dregur úr hvata til fjárfestinga og aukinnar framleiðni. Mikilvægt er að smærri aðilar fái tækifæri til að taka þátt í útboðum ríkisins. 

Samfylkingin aðhyllist frelsi í alþjóðaviðskiptum. Íslenska hagkerfið er lítið, háð innflutningi á alls kyns vörum og þjónustu og tekjum af útflutningi. Ávinningur okkar af alþjóðaviðskiptum er að ýmsu leyti sá sami og af virkri samkeppni innanlands, svo sem lægra vöruverð fyrir almenning, meira úrval og frekari hvati til fjárfestinga og aukinnar framleiðni. Samkeppniseftirlitið á einmitt rætur að rekja til aðildar Íslands að Evrópska efnahagssvæðinu (EES), sem var eitt mesta heillaspor Íslendinga í efnahagsmálum á undanförnum áratugum.

Frjáls viðskipti og virk samkeppni

Til að ná árangri í loftslagsmálum þarf að ráðast í markvissar aðgerðir til að draga úr losun frá samgöngum sem er ein stærsta uppspretta gróðurhúsalofttegunda hér á landi. Samfylkingin vill hraða orkuskiptum og stórbæta almenningssamgöngur. Móta þarf metnaðarfulla áætlun um orkuskipti í samgöngum sem nær til fólksbifreiða og til flutningabíla, hópferðabíla og vinnuvéla. Þá þarf að þétta net rafhleðslu-, metan- og vetnisstöðva um allt land. Ríkisstjórn og alþingi skulu setja sér metnaðarfull en raunhæf markmið um að hætta á næstu árum innflutningi farartækja sem ganga fyrir jarðaefnaeldsneyti.

Orkuskipti ein og sér duga skammt til að ná markmiðum í loftslagsmálum. Samfylkingin vill efla almenningssamgöngur og gera þær að raunhæfum og fýsilegum valkosti til að draga úr umferðarálagi, auk þess að þétta byggð þar sem það á við. Á höfuðborgarsvæðinu þarf að flýta framkvæmdum vegna Borgarlínu og hraða uppbyggingu stofnleiða fyrir hjólreiðar eins og kostur er, sem og öðrum framkvæmdum í samgöngusáttmála höfuðborgarsvæðisins. Stjórnvöld þurfa einnig að styðja fjárhagslega við rekstur Strætó og almenningssamgangna um land allt til að bæta það kerfi sem nú er við lýði. 

Samhliða uppbyggingu Borgarlínu vill Samfylkingin byggja upp stærra samgöngunet sem þjónar landinu öllu þannig að ekki sé nánast nauðsyn að eiga bíl eða leigja til að ferðast um Ísland. Til að slíkt samgöngukerfi sé notendavænt þurfa stöðvar að vera þægilegar óháð veðri, tengdar göngu- og hjólastígum og örflæðilausnum. Brýnt er að tryggja öflugar almenningssamgöngur milli Keflavíkurflugvallar og Reykjavíkur og kanna til hlítar lestarsamgöngur frá höfuðborgarsvæðinu til Suðurnesja. 

Víða um land er innanlandsflug mikilvægur samgöngumáti. Samfylkingin vill að gerð verði úttekt á innanlandsflugi og mótuð verði um það stefna, með tilliti til byggðasjónarmiða, kostnaðar, ferðatíma, hagkvæmni og loftslagsáhrifa og að leitað verði leiða til rafvæðingar í innanlandsflugi.

Hraðari orkuskipti

Vinnan er undirstaða velferðar í samfélaginu og eiga allir íbúar rétt á því að geta unnið fyrir sér, helst á því sviði sem hæfileikar og menntun standa til. Sterk almenn velferðarþjónusta er að sama skapi undirstaða vinnu í samfélaginu og lykilatriði í því að viðhalda hárri atvinnuþátttöku og kraftmikilli verðmætasköpun.

Með öflugri velferðarþjónustu og tryggingum hlúum við best að þeim verðmætum sem felast í mannauði samfélagsins. Það er skylda samfélagsins að tryggja mannsæmandi framfærslu fólks sem finnur ekki vinnu við hæfi, tekst á við tímabundna erfiðleika eða býr við skerta starfsgetu og jafnframt að styðja þau sem geta aftur til virkni og starfa sem fyrst.

Atvinnuleitendum skal veita hvatningu og viðeigandi stuðning til að finna vinnu við hæfi. Þá þarf ávallt að leita betri leiða til að sporna við því með fyrirbyggjandi aðgerðum að starfsgeta skerðist og aðstoða fólk eftir fremsta megni við að efla og endurheimta starfsgetu þegar þess gerist þörf. Í þeim efnum skipta forvirkar aðgerðir á sviði vinnuverndar sköpum og sömuleiðis virkar vinnumarkaðsaðgerðir, gott aðgengi að starfsendurhæfingu og hvers kyns námstengdum úrræðum.  

Samfylkingin vill að innflytjendur fái vinnu við hæfi og njóti sanngirni á vinnumarkaði og að stjórnvöld auðveldi ferlið við viðurkenningu menntunar erlendis frá. Þá vill Samfylkingin að fólki sem fær hér alþjóðlega vernd bjóðist stuðningur og tækifæri til atvinnuþátttöku frá fyrsta degi. Samfylkingin vill tryggja fulla atvinnu á Íslandi þannig að fólk sem getur unnið fái að vinna. Atvinnuleysi felur í sér sóun á starfskröftum sem samfélagið hefur ekki efni á og aldrei getur talist eðlilegt að vinnufúsu fólki sé neitað um vinnu á meðan óleyst verkefni blasa hvarvetna við.

Vinna og velferð

Það er afstaða Samfylkingarinnar að náttúruauðlindir skuli nýta á forsendum sjálfbærrar þróunar og almannahagsmuna. Stefnumótun og ákvarðanataka í tengslum við auðlindanýtingu á að vera byggð á framtíðarhagsmunum en ekki skammtímagróða. 

Samfylkingin leggur áherslu á varðveislu og viðhald náttúrugæða með skýrum lagaramma og eftirliti auk rannsóknar og vöktunar. Náttúra Íslands, með öllum sínum sérkennum er verðmæt, en takmörkuð auðlind. Íslensk náttúra er einstök á heimsmælikvarða og eru 42% af lítt snortnum víðernum Evrópu á Íslandi, sem skapar skyldur gagnvart heimsbyggðinni og komandi kynslóðum. Samfylkingin vill efla verndun mikilvægra landslagsheilda, í samræmi við Landslagssamning Evrópu. Verndun náttúrunnar er ein tegund nýtingar, og í einhverjum tilfellum sú sem skilar mestum verðmætum, efnislegum og huglægum, fyrir samfélagið allt. 

Varúðar- og mengunarbótarreglurnar eru óaðskiljanlegur hluti náttúruverndar og eiga að vera leiðarljós efnahags- og atvinnustefnu stjórnvalda. Áætlun um vernd og orkunýtingu landsvæða (rammaáætlun) er lykilverkfæri stjórnvalda við ákvarðanir um orkuöflun, hvort sem um er að ræða nýtingu vatns, jarðvarma, vinds eða annarra orkukosta, þannig að tryggð sé verndarnýting mikilvægra náttúrusvæða sem ella kæmu til greina til orkunýtingar.

Samfylkingin styður stofnun þjóðgarðs á miðhálendinu í nánu samráði við nærsamfélög og alla hagaðila um framkvæmd og útfærslu. Þá er tímabært að huga að samræmdri gjaldtöku á friðlýstum svæðum til þess að standa straum af kostnaði við uppbyggingu þeirra, vernda náttúruauðævi og koma í veg fyrir ofurálag á viðkvæmum svæðum. Þannig er gætt að náttúruvernd og ekki síður að upplifun þeirra sem njóta íslenskrar náttúruundra. Tryggja þarf að réttur almennings til ferðar og dvalar um land sitt sé sterkur og að hann sé virtur, án þess að gengið sé á eðlilegar nytjar bænda og landeigenda.

Samfylkingin vill stuðla að verndun líffræðilegrar fjölbreytni sem er undirstaða náttúruauðlinda sem afkoma samfélaga byggir á. Ágangur mannsins á auðlindir jarðar hefur dregið úr líffræðilegum fjölbreytileika og er verndun og endurheimt fjölbreyttra vistkerfa og hæfni þeirra til að þjóna tilgangi sínum grundvallarforsenda velsældar. Efla verður vinnu við markmið Íslands um líffjölbreytni í samræmi við Kunming-Montréal-samninginn. Mikilvægt er að aðgerðir í loftslagsmálum og aðgerðir til verndar líffræðilegri fjölbreytni séu samþættar.

Hafið umhverfis Ísland og strendur landsins geyma vistkerfi sem okkur ber að standa vörð um. Loftslagsbreytingar valda súrnun sjávar sem auk áhrifa á vistkerfin geta haft neikvæð áhrif  á nýtingu sjávarauðlinda sem eru mikilvægar efnahag þjóðarinnar. Samfylkingin vill beita sér fyrir stórauknum rannsóknum á þeim hættum er steðja að lífríki sjávar og strandsvæða, í samstarfi við aðrar strandþjóðir.  

Samfylkingin vill banna hvalveiðar með lagasetningu á Alþingi.

Samfylkingin leggur áherslu á að stefnumótun og ákvarðanataka um orkuframleiðslu og -nýtingu grundvallist á sjálfbærri þróun með almannahagsmuni að leiðarljósi. Hvers kyns ákvarðanir um orkuvinnslu eiga að byggjast á heildstæðu umhverfis- og hagsmunamati þar sem tekið er tillit til verndargildis náttúru og menningarsögulegra minja og þjóðhagslegrar hagkvæmni ólíkra nýtingarkosta. Við þetta mat skal lögð áhersla á verðmæti náttúru Íslands, beint og óbeint, með langtímasjónarmið í huga. Við virkjun nýrra orkugjafa, úr vindi, frá sól eða sjávarföllum, verður í upphafi að móta stefnu sem tekur á þessum þáttum. Það sama á við um aðra auðlindanýtingu. Ákvarðanir um orkuvinnslu eiga að byggjast á leikreglum rammaáætlunar og á víðtæku samráði við almenning og félagasamtök samkvæmt leiðsögn Árósasáttmálans.

Tryggja þarf að auðlindir séu nýttar í þágu þjóðarinnar, að gjaldtaka af auðlindanýtingu sé eðlileg og réttlát og að ábati af auðlindanotkun renni í sameiginlega sjóði landsmanna. Samfylkingin vill að meginhluti raforkuframleiðslu á Íslandi verði áfram á hendi ríkis og sveitarfélaga og leggst gegn hvers kyns hugmyndum um einkavæðingu eða uppskiptingu Landsvirkjunar.

Samfylkingin vill jafna að fullu raforkukostnað milli þéttbýlis og dreifbýlis og fyrirbyggja að íbúar á köldum svæðum beri hærri kostnað af hitun húsnæðis en aðrir. Með þessu stuðlum við að byggðajafnrétti og liðkum fyrir atvinnuuppbyggingu í hinum dreifðu byggðum.

Styrkja þarf flutnings- og dreifikerfi raforku til að auka afhendingaröryggi og aflgetu og til að tryggja að kerfið standi undir auknu álagi vegna orkuskipta. Gæta skal að orkusparnaði við allt skipulag og aðgerðir. 

Íslensk náttúra og auðlindir hennar

Samfylkingin vill búa nýjum kynslóðum á Íslandi eins góð lífsskilyrði og unnt er allt frá fæðingu. Í því skyni þarf að afnema eða draga stórlega úr tekjutengingu barnabóta og hverfa þannig frá því fyrirkomulagi að þær beri keim af fátækrahjálp fyrri tíma. Þar gegna menntastofnanir og velferðarþjónustan lykilhlutverki. Við viljum styðja myndarlega við uppvöxt barna, létta undir með foreldrum og sjá til þess að sveigjanleiki á vinnumarkaði og stytting vinnuviku gefi svigrúm til samveru barna og foreldra. Þröngur fjárhagur ungs fólks má ekki halda aftur af möguleikum þess til barneigna og ekkert barn á að búa við fátækt eða skert tækifæri til náms og frístunda vegna fjárhagsstöðu foreldra sinna.

Samfylkingin ætlar að beita sér fyrir sterku almennu barnabótakerfi sem stenst samanburð við það sem best gerist á Norðurlöndunum. Þá er löngu tímabært að fæðingarorlofskerfið verði tekið til gagngerrar endurskoðunar. 

Samfylkingin vill brúa bilið á milli fæðingarorlofs og leikskóla, hækka hámarksgreiðslur fæðingarorlofs í samræmi við launaþróun og kveða á um að greiðslur upp að lágmarkslaunum haldist óskertar. Einnig þarf að hækka fæðingarstyrki námsmanna og annarra sem ekki eiga rétt á fæðingarorlofi, setja gólf á lágmarksgreiðslur og auka sveigjanleika. Auka þarf sveigjanleika fyrir námsmenn sem einnig eru á vinnumarkaði til fæðingarorlofsrétts. Hækkanir á greiðslum úr fæðingarorlofssjóði skulu ekki miðaðar við fæðingardag enda felur slíkt í sér kerfisbundið misrétti. Tryggja þarf meðgönguorlof fyrir verðandi foreldra.

Á hinum Norðurlöndunum hefur rétturinn til leikskóladvalar eftir að fæðingarorlofi lýkur verið lögfestur. Á Íslandi skortir hins vegar sameiginlega sýn, lagaumgjörð og samkomulag um fjármögnun leikskólastigsins. Ungbarnafjölskyldur í öllum sveitarfélögum bera hallann af því. Úr þessu þarf að bæta með samhentu átaki ríkis og sveitarfélaga og m.a. breytingum á lögum um tekjustofna sveitarfélaga.

Samfylkingin vill tryggja framfærslu og réttindi barna sem hafa misst foreldra, efla stuðning við fötluð börn, langveik börn og börn með hegðunarvandamál, geðraskanir og þroskafrávik auk þess að útrýma biðlistum barna og ungmenna sem bíða eftir greiningu og úrræðum við hæfi. Samfylkingin vill stórauka snemmtækan stuðning við börn, einkum á fyrstu árum í lífi þeirra. Viðeigandi og varanleg úrræði sem fylgt er eftir þurfa að vera aðgengileg fyrir börn og ungt fólk með margþættan félagslegan vanda. Loks viljum við bjóða öllum börnum upp á heilsueflandi umhverfi og heilsusamlegar skólamáltíðir þeim og forsjáraðilum þeirra að kostnaðarlausu.

Betri hagur barna og foreldra

Til að sem flest í íslensku samfélagi njóti hreysti og heilbrigðis er mikilvægt að fyrirbyggja heilsuleysi eftir því sem það er unnt, svo sem með áherslu á lýðheilsu, forvarnir og heilsueflingu í daglegu lífi. Þetta er mikilvægt að hafa í huga á öllum sviðum samfélagsins, meðal annars í heilbrigðisþjónustunni sjálfri en ekki síður á vinnustöðum og menntastofnunum, í umhverfismálum og við skipulag byggðar.

Samfylkingin vill ýta undir heilsusamlega lífshætti með því að auðvelda fólki hreyfingu og hollt mataræði og stuðla að virkri þátttöku allra í samfélaginu. Andleg og líkamleg heilsa helst í hendur.  Meðal annars þess vegna er aukin sálfræði- og geðheilbrigðisþjónusta eitt mikilvægasta verkefni okkar í heilbrigðismálum. Bjóða á sálfræðiþjónusta í skólum og stuðla áfram að aukinni umræðu og fræðslu um andlega heilsu. Aðgengi að geðheilbrigðisþjónustu þarf að tryggja allan sólarhringinn um land allt. Búsetukostir eldra fólks  og fatlaðs fólks eiga að miðast sérstaklega við það að auka tækifæri til félagslífs, tómstundastarfs og útivistar og tryggja gott aðgengi að heilsugæslu og annarri heilsutengdri þjónustu.

Takast þarf á við fíknisjúkdóma í góðu samstarfi við frjáls félagasamtök með áherslu á forvarnir, faglega meðferð og endurhæfingu og bjóða skaðaminnkandi úrræði þegar þess þarf á forsendum hvers og eins. Efla þarf úrræði fyrir jaðarsetta hópa þegar kemur að fíknimeðferð, svo sem fyrir fatlað fólk, fólk með geðrænar áskoranir og fólk af erlendum uppruna.

Lýðheilsa, heilsuefling og forvarnir

Samfylkingin vill tryggja húsnæðisöryggi allra. Í augum jafnaðarfólks eru það mannréttindi að þurfa ekki að lifa við óvissu og óöryggi um þak yfir höfuðið. Þá er viðráðanlegt verð á húsnæði eitt mikilvægasta kjaramál almennings enda er húsnæðiskostnaður að jafnaði stærsti útgjaldaliður heimila. Hið opinbera þarf að beita sér fyrir fjölbreyttu framboði á húsnæðismarkaði. Reynslan sýnir að markaðurinn gerir það aldrei upp á sitt einsdæmi. Öll sveitarfélög eru hvött til að bjóða upp á félagslegt húsnæði sem taki mið af rammasamningi um aukið framboð íbúða á árunum 2023-2032.

Besta leiðin til að auka framboð og fjölbreytni á húsnæðismarkaði er að styrkja leigu- og búseturéttarkerfi og beina framlögum hins opinbera í auknum mæli til uppbyggingar í samstarfi við húsnæðisfélög án hagnaðarsjónarmiða. Þannig má tempra verð og á sama tíma mæta þeim hópum sem eiga helst á hættu að lenda í klemmu á húsnæðismarkaði. Samfylkingin hefur verið leiðandi í þessum efnum á sveitarstjórnarstiginu, meðal annars með uppbyggingu í samvinnu við verkalýðshreyfinguna og húsnæðisfélög án hagnaðarsjónarmiða. Við viljum halda áfram á þeirri braut, auka stofnframlög til uppbyggingar í samstarfi við húsnæðisfélög án hagnaðarsjónarmiða og hækka tekju- og eignamörk. Það dregur þó ekki úr mikilvægi þess að byggja áfram hefðbundið félagslegt húsnæði, íbúðir fyrir fatlað fólk og sérstök búsetuúrræði fyrir heimilislausa, þar sem Samfylkingin hefur einnig verið í forystu. 

Mikilvægt er að húsnæðisstuðningur þróist til samræmis við þróun tekna og byrði húsnæðiskostnaðar fari ekki yfir 25% af ráðstöfunartekjum að jafnaði. Tryggja þarf nægilegt framboð og fyrirsjáanlega úthlutun lóða til að standa undir fjölbreyttri uppbyggingu um land allt. 

Jafnaðarfólk leggur höfuðáherslu á mikilvægi félagslegrar blöndunar í allri húsnæðisuppbyggingu og að öryggis- og hollustukröfum sé fylgt í hvívetna. Við viljum að á Íslandi sé eitt samfélag fyrir alla en ekki aðskilnaður eftir efnahag eða uppruna. Markmiðum um félagslega blöndun má ná með skilyrðum í samningum við byggingaraðila og hvatningu þess efnis til sveitarfélaga. Að sama skapi leggur Samfylkingin þunga áherslu á að allt skipulag byggðar miði að því að búa til mannvænt og grænt umhverfi sem skapar tækifæri til heilsueflandi og loftslagsvænna lifðnaðarhátta.

Fjölbreytt framboð á húsnæði fyrir öll

Samfylkingin leggur áherslu á að efla hringrásarhagkerfi á Íslandi með það að markmiði að ýta undir sjálfbæra framleiðslu og neyslu, endurnýtingu og endurvinnslu og draga úr sóun og ofnýtingu auðlinda. Samfylkingin vill koma á fót skilvirku kerfi sem styður við aðila sem auka líftíma vara, draga úr notkun hráefna og sporna við sóun. Sveitarfélög og einkaaðilar þurfa að huga betur að samnýtingu hráefna og varnings sem þegar hefur verið framleiddur. Stofnun iðn- og þróunarklasa er ein leið til að efla nýsköpun á þessu sviði, samnýta þekkingu og styrkja smærri fyrirtæki og samfélagsverkefni á sviði umhverfismála og hringrásarhagkerfis.

Vinna þarf að samræmdri flokkun sorps hjá fyrirtækjum og heimilum um land allt. Ríki og sveitarfélög verða að vinna að endurbótum í frárennslismálum og auka skolphreinsun, söfnun spilliefna og dælingu til að verja hafið og strendur landsins. Mikilvægt er að ríki styðji við sveitarfélög til að koma í veg fyrir losun spilliefna og standa að uppsetningu skólphreinsunar og vernda viðkvæm náttúrusvæði. 

Hringrásarhagkerfi og úrgangsmál

Samfylkingin vill að mótuð verði markviss stefna um dýravelferð á Íslandi og skerpt verði á eftirliti og reglum um bættan aðbúnað og meðferð dýra. Við viljum gæta að réttindum dýra og veita umráðamönnum þeirra ráðgjöf og fræðslu um dýravelferð og þær lögbundnu skyldur sem fylgja dýrahaldi. Vernda þarf heimkynni villtra dýra þannig að líffræðilegum fjölbreytileika sé ekki ógnað og meta áhrif loftslagsbreytinga á vistkerfi íslenskrar náttúru.

Leit um „��"

3374 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3374 niðurstöður fundust við leit að „���������������������������������������������������"