Árni Rúnar Þorvaldsson - 1. sæti

Ég óska eftir stuðningi ykkar í 1. sætið í flokksvali Samfylkingarinnar í Hafnarfirði

Ég heiti Árni Rúnar Þorvaldsson og býð mig fram til þess að leiða lista Samfylkingarinnar í Hafnarfirði í sveitarstjórnarkosningum sem fram fara 14. maí næstkomandi. Flokksval Samfylkingarinnar verður haldið 12. febrúar næstkomandi. Allt félagsfólk Samfylkingarinnar í Hafnarfirði hefur kosningarétt  í flokksvalinu auk skráðra stuðningsmanna.

Ég vil bæ sem tryggir lýðræðislega aðkomu bæjarbúa að allri ákvarðanatöku. Ég vil bæ þar sem velferð, jöfnuður og jafnrétti eru leiðarljósin við stjórnun bæjarfélagsins þar sem öllum börnum og unglingum eru tryggð jöfn tækifæri til náms og tómstunda. Sem jafnaðarmaður tel ég það eitt mikilvægasta verkefni bæjarstjórnar að jafna byrðarnar í samfélaginu og leitast við að létta álögur, sem íþyngja barnafjölskyldum og tekjulægri hópum samfélagsins. Fræðast má um öll mín áherslu- og stefnumál á vef mínum arnirunar.is 

Hver er maðurinn?

Ég er fæddur árið 1976 og er því 45 ára. Foreldrar mínir eru Guðný Árnadóttir, frönskukennari í Flensborg og Þorvaldur Jón Viktorsson, fyrrum skólastjóri. Fyrir utan tvö ár sem ég bjó í London ólst ég upp í Hafnarfirði og gekk í Lækjarskóla. Þegar skólagöngunni lauk í Lækjarskóla lá leiðin beinustu leið upp á Hamarinn í Flensborg og þaðan útskrifaðist ég vorið 1997. Árið 2005 lauk ég prófi frá Kennaraháskóla Íslands og í dag er ég grunnskólakennari og starfa sem slíkur í Smáraskóla í Kópavogi.

Ég er kvæntur Ragnhildi Einarsdóttur deildarstjóra í Lækjarskóla. Við eigum þrjú börn: Guðnýju Árnadóttur, sem spilar fótbolta með AC Milan á Ítalíu, Einar Karl Árnason, sem spilar fótbolta með Sindra á Hornafirði og Sólborgu Árnadóttur sem er í 4. bekk í Öldutúnsskóla og spilar fótbolta með 6. flokki FH. Guðný og Einar Karl eru bæði stúdentar frá Flensborg.

Um aldamótin fluttum við hjónin til Hornafjarðar þar sem við bjuggum í ein 13 ár. Þaðan fluttum við svo með fjölskylduna í Vík í Mýrdal vorið 2013 þar sem konan mín starfaði þar sem skólastjóri Víkurskóla í tvö ár. Vorið 2015 fluttum við aftur í Hafnarfjörðinn þar sem við unum hag okkar afar vel.

Fjölbreytt reynsla

Ég var kjörinn fyrir hönd Samfylkingarinnar í bæjarstjórn Sveitarfélagsins Hornafjarðar árið 2006 og var bæjarfulltrúi þar í rúm sjö ár. Á þeim tíma gegndi ég embættum forseta bæjarstjórnar og formanns bæjarráðs, auk þessa að sitja í fjölda annarra nefnda og ráða á vegum sveitarfélagsins. Undanfarin ár hef ég setið í fjölskylduráði fyrir hönd Samfylkingarinnar í Hafnarfirði og verið varabæjarfulltrúi á því kjörtímabili sem nú er að ljúka. Ég hef því mikla reynslu af sveitarstjórnarmálum og stjórnmálastarfi.

Ég hef einnig komið mikið að félagsmálum t.d. innan íþróttahreyfingarinnar og stéttarfélags kennara. Undanfarin ár hef ég verið virkur í starfi meistaraflokks kvenna hjá FH í fótbolta þar sem ég hef verið formaður meistaraflokksráðs kvenna frá 2015.  Áður var ég einnig til fjölda ára formaður knattspyrnudeildar Sindra á Hornafirði. Auk þessa hef ég  verið í virkur í starfi stéttarfélags grunnskólakennara og sat um tíma í stjórn Félags grunnskólakennara.

Stoltur Hafnfirðingur

Þó ég hafi búið um nokkuð langan tíma utan Hafnarfjarðar þá hef ég alla tíð litið á mig sem mikinn Hafnfirðing. Hér liggja rætur mínar og hér sleit ég barnsskónum. Hér eru líka vinirnir frá fornu fari og stærstur hluti fjölskyldu minnar. Hér bjuggu afar mínir og ömmur, annars vegar Árni Bárður Guðmundsson og Ágústa Haraldsdóttir og hins vegar Viktor Þorvaldsson og Guðrún Ingvarsdóttir.

Ég hef alltaf verið stoltur Hafnfirðingur og það breyttist aldrei þann tíma sem ég bjó fjarri heimahögunum. Hafnarfjörður er fallegur og skemmtilegur bær og okkur ber skylda til þess að varðveita okkar sérstaka og fallega bæjarstæði. Hér er gott að búa en það er að sjálfsögðu alltaf hægt að gera betur. Mitt markmið og minn vilji stendur til þess að vera þátttakandi í því verkefni og leggja mitt af mörkum til þess að gera Hafnarfjörð að enn betri bæ og gera hann að eftirsóknarverðum valkosti fyrir einstaklinga, fjölskyldur og fyrirtæki.

Áfram Hafnarfjörður!

Árni Rúnar Þorvaldsson, grunnskólakennari og varabæjarfulltrúi.