Farið verður yfir helstu verkefni sem eru í vinnslu þessa stundina og fram undan. Jafnframt viljum við hefja samtal við félaga um fjárhagsáætlun næsta árs og heyra hvaða áherslur þið viljið sjá í þeirri vinnu.

Við hvetjum ykkur eindregið til að mæta. Fundurinn er mikilvægt tækifæri fyrir okkur til að heyra sjónarmið baklandsins áður en vinnan við fjárhagsáætlunina fer lengra.

• Kl. 20:00–20:30: Óformlegt samtal við Gylfa bæjarstjóra um mál sem eru á döfinni. Þar gefst gott tækifæri til að spyrja spurninga, koma með hugmyndir og ræða beint við bæjarstjórann.

• Yfirferð yfir verkefni sem eru í vinnslu og þau mál sem við erum að undirbúa.

• Umræður um tillögur sem hafa komið fram í nefndum og þær áherslur sem við viljum leggja inn í fjárhagsáætlun næsta árs.

• Opnar umræður, spurningar og næstu skref.

Það skiptir okkur máli að fá sem flest sjónarmið inn í umræðuna og því vonumst við til að sjá sem flesta félaga á fundinum.

Hlökkum til að sjá ykkur og eiga gott samtal!

Sveitarstjórnarfulltrúar í Ísafjarðarbæ boða til bæjarmálafundar 20. október kl. 20:00 í Hömrum. 

Málefnanefnd Samfylkingarinnar um velferðarmál, í samstarfi við Ungt jafnaðarfólk (UJ) og Landssamtök 60+ hjá Samfylkingunni, býður til opins fundar á Akureyri undir yfirskriftinni Samtal kynslóðanna um velferðarmál.

📅 Miðvikudaginn 21. október
⏰ Kl. 18:00–20:00
📍 Salur Samfylkingarinnar á Akureyri, Sunnuhlíð 12

Á fundinum verður sjónum beint að velferðarmálum út frá sjónarhorni kynslóðanna. Hvað skiptir mestu máli á mismunandi æviskeiðum? Hvaða áskoranir eigum við sameiginlegar og hvað getum við lært hvert af öðru?

Ástþór Jón Ragnheiðarson og Ragna Sigurðardóttir, sem leiða málefnanefnd Samfylkingarinnar um velferðarmál, munu stýra fundinum.

Fundurinn er liður í málefnastarfi Samfylkingarinnar og markmiðið er að skapa vettvang fyrir opið og uppbyggilegt samtal þar sem ólík sjónarmið og reynsla kynslóðanna fá að heyrast.

Fundurinn er öllum opinn og öll hjartanlega velkomin! 🌹

I.
Alþýðusamband Íslands – forseti, þingfulltrúar, kæru félagar:

„Eðli verkalýðsbaráttunnar er ekki skyndiupphlaup, hávaðafundir og ævintýri, heldur markvisst, sleitulaust strit fyrir málefnunum sjálfum.“

* * *

Ég hef oft vitnað í prentarann að vestan, Jón Baldvinsson, sem mælti þessi orð á örlagaríkum fundi í Gamla bíó í Reykjavík árið 1938 – sem reyndist vera hans síðasti fundur.

Þá hafði Jón verið foringi Alþýðusambands og -flokks allt frá stofnárinu 1916. Þegar verkalýðsfélögin komu saman og stofnuðu landssamtök og stjórnmálaflokk. Til að vinna sigra og koma baráttumálum sínum í framkvæmd – ekki aðeins með gerð kjarasamninga – heldur líka með því að bjóða sig fram til sveitarstjórna og Alþingis Íslendinga.

* * *

Það var róttæk hugmynd árið 1916: að venjulegt vinnandi fólk gæti stjórnað sér sjálft á Íslandi. Fyrst með því að stofna verkalýðsfélög og stjórnmálaflokk. Síðan með því að sigra í kosningum, semja lög og taka ábyrgð á stjórn landsmála.

Áður var allt slíkt í höndum lítillar yfirstéttar í landinu: aðalborinna, auðmanna og menntafólks.

Hugsið ykkur árangurinn sem hefur náðst. Á 110 árum.

II.
Já. Þetta er stórhuga hreyfing.

Enda er það ekki nema von. Við höfum alltaf verið stórhuga. Og árangurinn talar sínu máli.

En verkefni verkalýðshreyfingar og jafnaðarmanna eru eilífðarverkefni: Að verja það sem áunnist hefur og sækja fram til nýrra sigra.

Ég veit að þið hér vitið manna best hvað til þarf. Ekki „skyndiupphlaup“ og „hávaðafundi“ – heldur „markvisst, sleitulaust strit“. Úthald til lengri tíma. Til að móta samfélagið okkar í þágu vinnandi fólks, frá einni kynslóð til annarrar, um ókomna tíð.

Því að hugmyndin var aldrei að sætta sig við að vera mótmælaafl með kröfuspjöld – eða enn síður með betlistaf – heldur þvert á móti: sterkt og stjórnandi afl sem tekur ábyrgð á Íslandi.

* * *

Sameinuð verkalýðshreyfing er miklu stærri en stök félög, einn flokkur eða hvað þá einstakir forystumenn í stjórnmálum eða stéttarfélögum. Og það segi ég af fullri virðingu fyrir stórum persónuleikum sem takast á innan Alþýðusambandsins – enda ekkert nýtt að það standi styr um menn og málefni í þessari hreyfingu.

En það hefur sýnt sig og er margreynt í gegnum 110 ára sögu: Við erum sterkari saman.

III.
Þess vegna hef ég átt reglulega fundi með forseta Alþýðusambandsins á síðustu árum – frá því að ég tók við embætti forsætisráðherra og áður sem formaður í Samfylkingu.

Ég hlusta, tek gagnrýni og geri mitt besta. Við deilum um mál – en við leysum líka mál.

Á síðustu mánuðum hefur ríkisstjórnin átt í þéttu þríhliða samtali við ASÍ og Samtök atvinnulífsins. Og ég vil hrósa Alþýðusambandinu sérstaklega fyrir sína aðkomu og ábyrga nálgun í þessu verkefni – ekki síst Finnbirni Hermannssyni, fráfarandi forseta, um leið og ég þakka honum kærlega fyrir góða samvinnu og gjöfult starf í þágu verkalýðshreyfingarinnar um áratugaskeið – lengur en ég hef lifað.

Það er ánægjulegt að hans drjúgu aðkomu að þessum verkstað skyldi ljúka með eins farsælum hætti og raun bar vitni í síðustu viku.

Við tryggðum friðinn á vinnumarkaði. Með samstilltu átaki. Og nú göngum við í verkin:

Févíti fyrir launaþjófnað, keðjuábyrgð í stórframkvæmdum og loksins festa í þróun barnabóta.

Leigubremsa, almennar íbúðir og minna vægi verðtryggingar. 2,5% þak á gjaldahækkanir hjá ríki og sveitarfélögum. 3,5% þak á launahækkanir þjóðkjörinna fulltrúa og æðstu embættismanna út árið 2028. Og – ef verðbólguforsendur bresta: 100 þúsund krónur að meðaltali fyrir 20 til 30 þúsund skuldsettar fjölskyldur með einskiptisvaxtabótum.

* * *

Allt þetta – á sama tíma og við klárum hallalaus fjárlög í fyrsta skipti í að verða áratug. Til að hætta að reka ríkissjóð á yfirdrætti – sem er það mikilvægasta sem ríkið getur gert til að kynda ekki undir verðbólgu.

* * *

Já – ég trúi því að þetta verði vendipunktur í baráttunni við verðbólguna. Sem stendur í tæpum 6% núna en hefur verið 5% að meðaltali frá aldamótum. Við vitum öll hvaða afleiðingar hækkandi heimsmarkaðsverð á olíu hefur haft. En nú erum við að snúa við blaðinu – ef allir standa við sitt – með samstilltu átaki.

Það er fagnaðarefni. Og Finnbjörn skilar sannarlega góðu búi. Gefum honum gott klapp!

IV.
Við höfum einnig átt gott samstarf við Samtök atvinnulífsins.

Á síðustu árum má segja að ýmis jákvæð skref hafi verið stigin varðandi umgjörð vinnumarkaðarins, samtal aðila vinnumarkaðar við stjórnvöld og þróun félagslegra stuðningskerfa – þó að margt megi auðvitað ennþá betur fara.

Ég nefni sem dæmi það fyrirkomulag sem var innleitt varðandi þróun þrepamarka í tekjuskattinum fyrir nokkrum árum – sem við höfum nú ákveðið að útvíkka þannig að það nái einnig til barnabóta. En húsnæðismál eru dæmi um málaflokk þar sem við verðum að herða okkur og hrista upp í kerfinu til að ásættanlegur árangur náist – líkt og ríkisstjórnin hefur nú boðað varðandi almenna íbúðakerfið.

* * *

Í mínum huga er ljóst að við getum haldið áfram að stíga slík skref og vinna að umbótum á íslenskum vinnumarkaði á næstu árum. Til að tryggja aukinn efnahagslegan og félagslegan stöðugleika. Það er jafnljóst að breytingar á grundvallarleikreglum vinnumarkaðar verða aldrei gerðar nema í sátt og með aðkomu verkalýðshreyfingar. Allavega ekki á minni vakt.

En það gætu falist mikil tækifæri í því fyrir atvinnulífið, launafólk og samfélagið allt að koma á meiri stöðugleika. Og þess vegna hef ég lagt til að umræða um leiðir að því marki fari fram – samhliða því sem við búum í haginn fyrir næstu kjarasamninga.

V.
Þingfulltrúar. Í ræðu minni á ársfundi Samtaka atvinnulífsins höfðaði ég til þeirra um að sjá og nýta tækifærin með ríkisstjórn Samfylkingar, Viðreisnar og Flokks fólksins – til að vinna saman, láta verkin tala og styrkja Ísland.

Því þó að við verðum ekki öll sammála um allt þá getum við sameinast um þetta: Við eigum eitthvað algjörlega sérstakt saman hérna á Íslandi – sem vekur stolt og bindur okkur saman sem þjóð – sem við viljum vernda og varðveita áfram. Og þar hefur hvert og eitt okkar mikilvægu hlutverki að gegna.

Ég veit að þetta eru skilaboð sem eiga góðan hljómgrunn hér í þessum sal. Því að það er fleira sem brennur á félagsfólki í verkalýðshreyfingunni en krónur og aurar í eigin veski. Og það er enn stærri mynd sem við tökum ábyrgð á í sameiningu – sem er sjálfsmynd þjóðar og framtíð Íslands.

* * *

Þegar sagt er að stjórnmál skipti ekki máli – að allir flokkar séu eins – að baráttan skili okkur engu; þá má benda á verkin á fyrstu tveimur árum þessarar ríkisstjórnar:

Lífeyrir fylgir launum, þjóðarátak í fjölgun hjúkrunarrýma og besta staða Landspítala á þessari öld.

Stóraukið viðhald á vegum, stofnun innviðafélags og fyrstu undirbúningsframkvæmdir við jarðgöng í áratug.

Fyrsta atvinnustefna Íslands, orkuöflun, einföldun regluverks, fækkun stofnana og mesta fjárfesting hjá íslensku atvinnulífi í 50 ár – að frátöldum árunum fyrir hrun.

Stækkun verknámsskóla, stjórn á útlendingamálum, fjölgun lögreglumanna, lækkun raforkuverðs í dreifbýli, betra námslánakerfi og ekkert barn á bið eftir meðferðarheimilum stjórnvalda.

Verðhækkanir á húsnæðismarkaði stöðvaðar, hlutdeildarlán sem virka, tekið á Airbnb, skrúfað fyrir skattahvata til að safna íbúðum og hæsta hlutfall fyrstu kaupenda frá árinu 2008.

Samningurinn um réttindi fatlaðs fólks. Leiðrétting veiðigjalda. Þjóðaratkvæði um aðildarviðræður við Evrópusambandið.

Loforð gefin – loforð efnd.

En þetta er bara byrjunin. Kjörtímabilið er hálfnað. Og við erum komin í gang.

* * *

Ég er ekki komin hingað til að segja ykkur að allt sé fullkomið eða að allt þetta sem gengur svo vel á Íslandi sé ríkisstjórninni að þakka. Alls ekki – enda vinnst ekkert í stjórnmálum með stórum orðum heldur aðeins með stórum verkum. Ég er líka fyllilega meðvituð um framlag forvera minna úr ýmsum flokkum. Og það eru ærin verkefni framundan.

En ef við horfum á stóru myndina þá blasir við að það er margt sem við getum gert og margt sem við getum sameinast um að gera enn betur á Íslandi.

Leysum mál. Brjótum niður vantraust og byggjum upp traust. Og keyrum á samstöðu – sem færir fólkið í landinu nær hvert öðru en ekki fjær. Hvort sem er í Alþýðusambandinu, í landstjórninni eða í samfélaginu í heild.

VI.
Kæru félagar. Hvernig sem á það er litið hefur stóra myndin oft verið dekkri í stjórnmálastarfi verkalýðs og alþýðu.

Í upphafi var Jón Baldvinsson einn síns liðs á Alþingi – til dæmis þegar Vökulögin voru samþykkt sem kváðu á um lögbundinn hvíldartíma togarasjómanna. Og á þeim tíma tókust á í verkalýðshreyfingunni lýðræðissinnaðir og byltingarsinnaðir jafnaðarmenn – sem lyktaði með klofningi.

En þegar hann lést árið 1938, og mælti þau orð sem ég lagði út af í upphafi ræðunnar, þá hafði hann leitt verkalýðshreyfinguna til öndvegis við stjórn landsmála, á kreppuárunum, í Stjórn hinna vinnandi stétta.

* * *

Hugsið ykkur árangurinn og sleitulausa stritið – sem hefur lagt grunninn að farsælustu samfélögum heims hér á Norðurlöndum. Þannig lá leiðin frá vonleysi til vonar. Og frá von til sigurs. En þetta byrjaði allt með þeirri róttæku hugmynd að fólkið gæti stjórnað sér sjálft.

Við erum sterkari saman. Rísum undir ábyrgð okkar. Og höldum áfram að sigra.

Ræða forsætisráðherra og formanns Samfylkingar á 47. þingi Alþýðusambands Íslands á Hilton í Reykjavík 14. október 2026.

Ræða Kristrúnar á þingi ASÍ: „Höldum áfram að sigra“

Flokksstjórnarfundur Samfylkingarinnar fagnar þeim árangri sem náðst hefur við stjórn landsins undir forystu Kristrúnar Frostadóttur forsætisráðherra og formanns Samfylkingarinnar og leggur áherslu á að haldið verði áfram af festu við að bæta hag fólks um land allt.

Ríkisstjórn Samfylkingarinnar fékk umboð til að ráðast í breytingar eftir langvarandi kyrrstöðu. Við tökum þá ábyrgð alvarlega. Verkefnið er að lækka framfærslukostnað heimilanna, endurreisa innviði, stuðla að stöðugleika í ríkisfjármálum, auka vöxt með sjálfbærum hætti og tryggja að velferðin standi undir þeim kröfum sem fólk gerir til hennar. Þannig byggjum við samfélag þar sem öll geta átt örugga framtíð.

Íslensk heimili og fyrirtæki þurfa festu í efnahagsmálum. Verðbólga og vextir eru enn of há og þrengja að daglegu lífi fólks.

Flokksstjórnarfundurinn brýnir fyrir ríkisstjórninni að halda ótrauð áfram vinnu að ná niður kostnaði en tryggja um leið grunnþjónustu og skapa þannig skilyrði fyrir næsta vaxtaskeið á Íslandi. Þar skiptir ábyrg fjármálastjórn sköpum.

Ríkisstjórnin hefur lagt fram fjárlagafrumvarp fyrir árið 2027 sem gerir ráð fyrir hallalausum rekstri ríkissjóðs á næsta ári. Aðhaldið byggir á skýrri forgangsröðun, hagræðingu og sanngjarnari tekjuöflun samhliða áframhaldandi auknum stuðningi við grunnþjónustu.

Samfylkingin stendur ávallt vörð um grunngildi jafnaðarstefnunnar, að þau sem hafa mest svigrúm leggi meira af mörkum til samfélagsins og glufum í skattkerfinu verði lokað með sanngirni og jöfnun að leiðarljósi.

Sterkur ríkissjóður gerir okkur kleift að reka betri velferðarþjónustu og bregðast við þegar áföll verða. Við ætlum að nýta opinbera fjármuni betur og tryggja að þeir skili sér til fólksins sem þjónustan er ætluð.

Flokksstjórnarfundurinn fagnar sameiginlegri niðurstöðu stjórnvalda og aðila vinnumarkaðarins sem tryggður að kjarasamningarnir halda. Með samkomulaginu hefur verið lagður grunnur að þjóðarsátt um að draga úr verðbólgu og verja kaupmátt. Ríkisstjórn undir forystu Samfylkingarinnar var leiðandi í að ná þessari niðurstöðu með virku samtali og skýrum skilaboðum um hver aðild hins opinbera að lausn gæti orðið.

Ríkið hefur heitið að takmarka hækkanir krónutölugjalda og gjaldskráa ríkisstofnana sem hafa bein áhrif á vísitölu neysluverðs við 2,5 prósent á næsta ári. Jafnframt hefur ríkisstjórnin, undir forystu Samfylkingarinnar, boðað afgerandi aðgerðir til að fjölga hagkvæmum leiguíbúðum, auka fyrirsjáanleika húsaleigu, halda aftur af hækkun húsaleigu og styrkja þannig réttindi launafólks. Allt er þetta gert án þess að markmiðinu um hallalaus fjárlög sé ógnað.

Þessi niðurstaða sýnir hvað hægt er að gera þegar ólíkir aðilar vinna saman að hag almennings. Flokksstjórnarfundurinn þakkar aðilum vinnumarkaðarins fyrir þeirra framlag og brýnir fyrir ríkisstjórninni að fylgja samkomulaginu eftir af festu. Ávinningurinn verður að skila sér í heimilisbókhaldið. Þar bera fyrirtæki líka ábyrgð með því að halda álagningu og verðlagningu hóflegri og sveitarfélögin í landinu sömuleiðis. Enn fremur þarf að efla samkeppni og neytendavernd svo almenningur njóti þess þegar kostnaður lækkar.

Samfylkingin fór í ríkisstjórn til að laga kerfi sem höfðu brugðist fólki. Sá mikli árangur sem þegar hefur náðst á fyrri hluta yfirstandandi kjörtímabils er hvatning til áframhaldandi góðra verka.

Við ætlum að mæta uppsafnaðri þörf fyrir þjónustu og framkvæmdir af þeirri alvöru sem verkefnið krefst.

Við erum að lyfta grettistaki í orkumálum og styrkt orkuöryggi um land allt. Við ráðumst í átak í endurheimt votlendis og vistkerfa í þágu náttúruverndar, líffræðilegrar fjölbreytni og viðnámsþrótt samfélaga vegna loftslagsbreytinga.

Þjóðarátak í umönnun eldra fólks hefur rofið kyrrstöðu í uppbyggingu hjúkrunarheimila. Unnið er að því að fleiri fái fastan heimilislækni og að heilbrigðisþjónustan geti betur sinnt fólki um allt land. Áfram skal höggvið á hnúta við uppbyggingu samfélagslega mikilvægra innviða og fyrirsjáanleiki í framkvæmdum tryggður.

Flokksstjórnarfundurinn leggur áherslu á að halda áfram að stytta bið eftir þjónustu og tryggja fólki með skerta starfsgetu og eldra fólki afkomuöryggi. Mannvirðing á öllum æviskeiðum er grundvallaratriði í jafnaðarstefnunni.

Húsnæðisöryggi er forsenda þess að fólk geti skipulagt líf sitt. Áfram þarf að fjölga íbúðum, styðja fyrstu kaupendur og tryggja leigjendum raunhæfa möguleika á öruggu heimili með viðráðanlegum kostnaði.

Fundurinn styður boðaðar breytingar sem takmarka reglubundnar hækkanir húsaleigu við eitt skipti á ári og kallar eftir því að uppbyggingu almenna íbúðakerfisins verði hraðað.

Uppbygging samgangna og orkuinnviða þarf að bæta lífsgæði og atvinnumöguleika í öllum landshlutum. Ný samgönguáætlun og stofnun innviðafélags sem hlotið hefur nafnið Göng

og brú ohf. skapa tækifæri til að koma þjóðarhagslega mikilvægum verkefnum hraðar í framkvæmd.

Flokksstjórnarfundur Samfylkingarinnar fagnar þeim skrefum sem stigin hafa verið til að bæta kjör námsmanna og efla háskólakerfið. Fundurinn lýsir yfir stuðningi við heildstæða háskólastefnu sem byggir á skýrari forgangsröðun, auknum gæðum náms og rannsókna og betri nýtingu fjármuna. Halda þarf áfram uppbyggingu öflugrar háskólasamstæðu og efla samstarf háskóla og atvinnulífs.

Menning á að vera aðgengileg öllum landsmönnum óháð búsetu og efnahag. Fundurinn leggur áherslu á að efla menningarinnviði um allt land með öflugri menningarsamningum sem byggja á sérstöðu hvers landshluta. Jafnframt þarf að efla samstarf menningarstofnana, nýta opinbert fjármagn betur og skapa ný tækifæri fyrir skapandi greinar með sterkari tengingum við atvinnulíf og nýsköpun.

Á tímum örra tæknibreytinga og vaxandi samkeppni við erlenda tæknirisa er mikilvægt að standa vörð um öflugt og sjálfstætt RÚV sem sinnir mikilvægu hlutverki í almannaþágu. Jafnframt þarf að styrkja rekstrargrundvöll frjálsra og óháðra fjölmiðla og tryggja fjölbreytta íslenska fjölmiðlun til framtíðar, enda eru öflugir fjölmiðlar ein af grunnstoðum lýðræðisins.

Flokksstjórnarfundurinn leggur áherslu á að verðmætasköpun byggi á sjálfbærri og skynsamlegri nýtingu auðlinda og að þjóðin fái sanngjarnan hlut af nýtingu auðlinda í sameiginlegri eigu þjóðar sem verða til. Framfarir eiga að styrkja velferð og auka jöfnuð.

Flokksstjórnarfundur Samfylkingarinnar fagnar því að ríkisstjórnin hefur tekið utanríkisstefnu Íslands föstum tökum og eflt samtal og samstarf við helstu vinaþjóðir okkar. Þéttari samvinna við nágranna okkar á Norðurlöndum, á Grænlandi og í Færeyjum, sem og mikilvægustu samherja okkar í Evrópu og Bandaríkjunum, styrkir stöðu Íslands og getu okkar til að gæta hagsmuna þjóðarinnar. Fundurinn leggur áherslu á að þessari vinnu verði haldið áfram af festu og ábyrgð. Ísland er traustur samstarfsaðili sem stendur vörð um frið, mannréttindi og alþjóðalög og tekur virkan þátt í að leysa sameiginleg viðfangsefni með vinaþjóðum sínum.

Flokksstjórnarfundurinn brýnir fyrir ríkisstjórninni að setja málefni barna og ungmenna í forgang á komandi vetri. Árangur hefur náðst í málaflokknum en enn bíða of mörg börn eftir þjónustu og fjölskyldur þurfa að berjast fyrir aðstoð sem á að vera sjálfsögð. Því verður að breyta. Við höfum skyldu til að tryggja að börn fái stuðning þegar þau þurfa á honum að halda.

Því er fagnað að bið barna og ungmenna eftir þjónustu á meðferðarheimili á vegum stjórnvalda hefur verið eytt. Með samkomulagi ríkis og sveitarfélaga hefur einnig verið bætt þremur milljörðum króna á ári í þjónustu á þriðja stigi. Nú þarf að tryggja að sú

fjármögnun leiði til betri þjónustu og að sveitarfélög geti sinnt snemmtækum stuðningi og frístundastarfi. Skýr ábyrgð og samfella í þjónustu eiga að koma í veg fyrir að börn falli milli kerfa.

Fundurinn kallar eftir markvissum aðgerðum til að stytta bið eftir greiningu, meðferð og annarri nauðsynlegri þjónustu. Börn sem greinast með þörf fyrir stuðning við skimun fyrir ofbeldi í grunnskólum eiga að fá viðeigandi aðstoð án tafar. Þau þurfa virka þjónustu sem veitir þeim vernd. Fyrsta ungmennastefna Íslands, aðgerðir gegn fátækt barna og aðgerðaáætlun menntastefnu til ársins 2030 eru grunnur að þessari vinnu. Aðstæður foreldra mega ekki ráða möguleikum barna til náms eða þátttöku í íþróttum og frístundum og ungt fólk þarf að eiga rödd í ákvörðunum sem varða líf þess.

Lög um símafrí í skólum og boðað frumvarp um 15 ára aldurstakmark á samfélagsmiðlum eru rétt skref í þágu barna. Flokksstjórnarfundurinn styður jafnframt að þau sem sætti óforsvaranlegri meðferð í æsku á opinberum stofnunum geti sótt sanngirnisbætur.

Samfylkingin ætlar að nýta veturinn til að fylgja þessum verkefnum og fleirum eftir af krafti. Við höfum tekið að okkur að laga Ísland og berum ábyrgð á að það finnist í lífi fólks. Börnin okkar eiga að finna það fyrst. Samfylkingin, jafnaðarflokkur Íslands, tekur ábyrgð sína alvarlega sem forystuafl í íslenskum stjórnmálum. Fulltrúar flokksins á Alþingi og í sveitarstjórnum ganga til starfa af áræðni og framsýni og láta verkin tala – hér eftir sem hingað til.

Flokksstjórn Samfylkingarinnar, Suðurnesjabæ 10. október 2026

Flokksstjórn Samfylkingarinnar samþykkti neðangreinda ályktun á fundi sínum í Suðurnesjabæ, 10. október 2026. 

Á boðstólum verður kaffi og kruðerí. Markmiðið er að hittast í óformlegu spjalli og hafa gaman saman. 

Kjörnir fulltrúar á staðnum og alltaf til í spjall.

Viðburðurinn er opinn og öll velkomin!

Samfylkingin í Hafnarfirði heldur laugardagskaffi á laugardaginn næstkomandi, þann 17. október, kl. 11:00.

I.
Flokksstjórn, jafnaðarmenn, góðir gestir.

Það er gott að koma saman hérna í Samkomuhúsinu í Sandgerði á þessum tímapunkti. Eftir tíðindaríka viku í pólitíkinni – bæði á landsvísu og ekki síður hér í Suðurnesjabæ. Þar sem Samfylking vann stórsigur í kosningum í vor og axlaði ábyrgð sína, og vinnur nú að því að ná saman um nýjan meirihluta.

Og án þess að fara nánar í saumana á því þá hvetjum við ykkur til góðra verka. Til að leiða Suðurnesjabæ áfram. Með styrka hönd á stýri – fyrir fólkið í bænum.

* * *

Því að það er verkefni okkar jafnaðarfólks og hefur verið í 110 ár, frá stofnun Alþýðuflokks og Alþýðusambands – hvort sem er við stjórn landsmála eða í sveitarstjórnum, í stéttarfélögum eða í stjórnmálum: Að vinna í þágu þjóðar. Og stjórna fyrir fólkið. Með styrka hönd á stýri.

* * *

Þannig rísum við undir ábyrgð okkar. Til að skapa samfélag frelsis, jafnréttis og samstöðu fyrir alla Íslendinga – og öryggi í daglegu lífi.

Þetta eru háleitar hugsjónir. Þær útheimta „sleitulaust strit“. En hreyfingin okkar hefur sýnt í verki í meira en 100 ár að saman gerum við hugsjón að veruleika. Hér á Íslandi og þvert á landamæri.

Og þess vegna höldum við áfram að vinna og berjast á hverjum einasta degi, saman, til sigurs.

II.
Já, flokkstjórn. Áður en lengra er haldið vil ég ávarpa þau ykkar sérstaklega – sem landsmenn og flokksmenn hafa falið verðugt verkefni og aukna ábyrgð á árinu – með því að kjósa ykkur til forystu í sínu nærsamfélagi í sveitarstjórnarkosningum í vor.

Samfylkingin fékk næstflest atkvæði á landsvísu í þessum kosningum. Við fjölguðum fulltrúum okkar í sveitarstjórnum um helming. Og þið eruð núna 38 talsins – sem er næstmesti fjöldi fulltrúa af S-listum frá stofnun flokksins.

Þetta er ný kynslóð jafnaðarfólks. Sem mun láta til sín taka á næstu árum og áratugum – í þjónustu þjóðar. Og ég hlakka til að heyra meira hér á eftir um hvernig gengur í nýjum meirihlutum vítt um land.

* * *

Kjörnir fulltrúar jafnaðarfólks: Munum alltaf ábyrgð okkar. Tökum aldrei einu einasta atkvæði sem gefnu. Við höfum sameiginlegt verkefni – því að saman þjónum við köllun og hugsjón sem er okkur öllum æðri.

Til hamingju. Takk fyrir að bjóða ykkur fram – gangi ykkur sem allra best. Og gefum þeim gott klapp.

III.
Á vettvangi landsmála höfum við staðið í stafni og tekið ábyrgð á Íslandi. Á ólgutímum í alþjóðamálum og í öldugangi í efnahagslífi þjóðar – þá er það Samfylking sem passar upp á Ísland – ásamt staðföstum samstarfsflokkum okkar í ríkisstjórn.

Þessu getur fólkið í landinu treyst: Styrk hönd á stýri. Jafnaðarstefna með stjórnfestu. Ísland í öruggum höndum.

En hvernig höfum við siglt þennan vind sem blásið hefur? Lítum yfir það helsta:

(i)
Við tryggðum friðinn á vinnumarkaði. Samningar halda með samstilltu átaki. Þrátt fyrir olíuverðshækkanir að utan. Og standi allir við sitt er ljóst í mínum huga að þetta verður vendipunktur í baráttunni við verðbólguna.

(ii)
Við hvikum hvergi frá hallalausum fjárlögum. Þannig hættum við að reka ríkið á yfirdrætti. Þrátt fyrir viðstöðulausan þrýsting frá minnihlutanum á Alþingi um afturhvarf til óstjórnar í efnahagsmálum – með kröfum um allt í senn: að auka útgjöld, lækka skatta og hverfa frá erfiðum ákvörðunum um hagræðingu.

En við bognum ekki – heldur gerum það sem við sögðumst ætla að gera: Við lögum ríkisfjármálin.

(iii)
Við vinnum þétt með öllum bandalagsríkjum okkar og vinaþjóðum. Til að tryggja hagsmuni Íslands á róstusömum tímum. Þó að við virðum niðurstöðu þjóðaratkvæðagreiðslunnar um að hefja ekki aðildarviðræður að nýju við Evrópusambandið – þá lokum við að sjálfsögðu ekki á Evrópu eða gröfum undan samningnum um Evrópska efnahagssvæðið.

Það kemur ekki til greina. Enda var ekki kosið um neitt slíkt. Þvert á móti er það stefna Samfylkingar og ríkisstjórnar að við stöndum okkur nú í stykkinu og styrkjum EES-samninginn enn frekar í sessi.

Og við treystum sambandið við Bandaríkin og Kanada. Á síðustu vikum hef ég átt jákvæð samtöl og fundi með fulltrúum bandarískra stjórnvalda, forseta Bandaríkjanna og utanríkisráðherra.

En síðast en ekki síst eflum við samstarfið við okkar nánustu nágranna hér í útnorðri: Færeyinga og Grænlendinga. Og þess vegna var gleðilegt í vikunni að efna til fyrsta leiðtogafundar Útnorðurlanda hér á Íslandi með formanni grænlensku landsstjórnarinnar og lögmanni Færeyja.

Allt er þetta alþjóðasamstarf í okkar heimshluta sem skiptir Ísland og Samfylkingu miklu máli.

(iv)
En stóru verkefnin sem eiga hug okkar allan flesta daga eru, eftir sem áður, hér heima.

Við sögðumst ætla að laga Ísland. Við erum að laga Ísland.

Og ef einhver heldur því fram að baráttan skili okkur engu; að stjórnmál skipti ekki máli – að allir flokkar séu eins – þá bendum við á verkin eftir minna en tvö ár með Samfylkingu í ríkisstjórn:

Lífeyrir fylgir launum, þjóðarátak í umönnun, stórfjölgun hjúkrunarrýma og besta staða Landspítala á þessari öld. Samgönguáætlun kláruð, stóraukið viðhald vega, stofnun innviðafélags og fyrstu undirbúningsframkvæmdir við jarðgöng í áratug.

Samningurinn um réttindi fatlaðs fólks, leiðrétting veiðigjalda, fyrsta atvinnustefna Íslands, orkuöflun, einföldun regluverks, fækkun ríkisstofnana og mesta fjárfesting atvinnulífs á Ísland í 50 ár – að frátöldum árunum fyrir hrun.

Stækkun verknámsskóla, stjórn á útlendingamálum, fjölgun lögreglumanna, betra námslánakerfi og ekkert barn á bið eftir meðferðarheimilum stjórnvalda. Lægri raforkureikningur í dreifbýli. Hlutdeildarlán sem virka, tekið á Airbnb, skrúfað fyrir skattahvata til að safna íbúðum, verðhækkanir á húsnæðismarkaði stöðvaðar og hæsta hlutfall fyrstu kaupenda frá árinu 2008.

Þjóðaratkvæði um aðildarviðræður við Evrópusambandið. Allt þetta höfum við gert. Loforð gefin – loforð efnd.

* * *

Og nú göngum við í verkin sem tryggðu friðinn á vinnumarkaði: Févíti fyrir launaþjófnað, þróun barnabóta í fastar skorður, leigubremsa, fleiri almennar íbúðir og frumvarp til að minnka vægi verðtryggingar.

Þetta er önnur nálgun en tíðkast hefur í tengslum við kjarasamninga: Afmarkaðar aðgerðir. Í fullu samræmi við efnahagsleg markmið, stefnuyfirlýsingu og þingmálaskrá ríkisstjórnar. Og án þess að ógna hallalausum fjárlögum

* * *

Já, kæru félagar. Allt eru þetta breytingar sem munu bæta daglegt líf venjulegs vinnandi fólks – um land allt – á hverjum einasta degi: Klassísk jafnaðarstefna sem setur markið hærra. Fyrir fólkið í landinu sem við elskum. Fyrir Ísland allt.

IV.
Flokksstjórn Samfylkingar – við erum rétt að byrja.

Kjörtímabilið er hálfnað. Við erum komin í gang. En við erum fullmeðvituð um það að framundan eru ærin verkefni og við sögðum alltaf að það tæki meira en eitt kjörtímabil að koma Íslandi aftur á rétta braut – eftir 11 löng ár án jafnaðarmanna við stjórn landsmála.

Þess vegna skulum við nota þennan flokksstjórnarfund vel til að stilla miðið, þétta raðirnar og halda síðan sameinuð út aftur til verka.

* * *

Ég er ekki komin hingað til að segja ykkur að allt sé fullkomið eða að allt þetta sem gengur svo vel á Íslandi sé ríkisstjórninni að þakka. Alls ekki – enda vinnst ekkert í stjórnmálum með stórum orðum heldur aðeins með stórum verkum. Ég er líka fyllilega meðvituð um framlag forvera okkar úr ýmsum flokkum. Og við vitum að við getum alltaf gert betur.

Þess vegna skulum við vera óhrædd við að gagnrýna og taka opna umræðu í eigin röðum. Spyrjum spurninga. Leitum svara. Tökumst á og miðlum málum.

En gerum það með þeim hætti að við sameinumst í lok dags um stóru myndina. Til að styrkja Ísland.

V.
Kæru félagar – ég hef á tilfinningunni að þetta verði góður flokksstjórnarfundur.

Margt er að ræða, mörgu má fagna og það er mikið sem brennur á hjörtum okkar.

Dagurinn byrjaði vel hjá mér á góðum fundi í Reykjanesbæ með verkalýðsmálaráði Samfylkingar og fráfarandi forseta Alþýðusambands Íslands.

Ég vil nýta tækifærið til að þakka Finnbirni Hermannssyni kærlega fyrir gott samstarf – ekki síst á síðustu misserum í þríhliða samtali ríkisstjórnar, ASÍ og Samtaka atvinnulífsins – en einnig á síðustu árum á reglulegum fundum okkar frá því að ég tók við embætti forsætisráðherra og sem formaður í Samfylkingu. Finnbjörn er góður félagi og hefur áratuga reynslu af störfum í verkalýðshreyfingunni, sem formaður Byggiðnar og þar áður Trésmíðafélags Reykjavíkur. Og það er sérlega ánægjulegt að hans langa og góða ferli á þessum vettvangi skyldi ljúka með eins farsælum hætti og raun bar vitni í liðinni viku.

Hér á eftir gefst færi á að eiga beint samtal við kjörna fulltrúa Samfylkingar og þá verður nægur tími fyrir almennar umræður – þar sem flokksfélagar eru hvattir til að kveðja sér hljóðs. Við ætlum fara yfir málefnastarfið fram að landsfundi næsta vor. Og svo förum við í borðavinnu um strategíu og ræðum hvort þörf er á að uppfæra eða endurskoða þá strategíu sem forysta Samfylkingar hefur fylgt frá árinu 2022 – og þá hvernig?

Það er ekki seinna vænna að hefjast handa. Því eins og fróður maður sagði: Kosningar vinnast ekki á vikum – heldur árum.

Í kvöld ætlum við síðan að gleðjast að hætti heimamanna og syngja saman. Og það verður stór stund því að loksins eru Söngvar jafnaðarmanna að verða tilbúnir til útgáfu í söngbók – sem verður dreift í rafrænum drögum hér á eftir – en þetta er söngbók sem á í raun rætur að rekja til fyrstu útgáfu árið 1923 á Söngvum jafnaðarmanna. Þetta er eitt fárra verkefna okkar sem hefur hreyfst heldur hægt á síðustu árum – en nú er harðsnúinn hópur loksins að loka þessu þjóðþrifaverki. Sem við ætlum að prufukeyra saman í kvöld áður en prentvélarnar verða ræstar.

* * *

En síðast en ekki síst, kæru vinir, er komið að því við jafnaðarfólk kjósum okkur nýjan varaformann.

Og þá er rétt að við stöldrum við og heiðrum okkar góða fráfarandi varaformann – Guðmund Árna Stefánsson.

Sem hóf sinn feril sem leiðtogi í stjórnmálum með stórsigri í Hafnarfirði árið 1986. Með því að fella meirihluta íhaldsins og hífa fylgi Alþýðuflokksins upp – fyrst úr 20% í 35% og svo upp í 48% eftir fyrra kjörtímabilið sem bæjarstjóri.

Guðmundur Árni var heilbrigðis- og tryggingamálaráðherra og síðan félagsmálaráðherra í fyrsta ráðuneyti Davíðs Oddssonar, sat á þingi fyrir okkur jafnaðarmenn í 12 ár, starfaði í utanríkisþjónustu í 16 ár og sneri svo aftur til að sýna okkur sósíaldemókrötum hvernig á að gera alvöru endurkomu – í kosningunum í Hafnarfirði og svo sem varaformaður frá árinu 2022.

Guðmundur Árni – þú hefur verið sem klettur við hlið mér í forystu Samfylkingar á mögnuðum tíma í sögu flokksins. Það munaði oft um manninn með reynsluna. Og á ögurstundu höfum við alltaf getað treyst á þig – takk félagi frá dýpstu hjartarótum. Nú stöndum við upp og klöppum þér lof í lófa. Takk!

* * *

Að því sögðu er ég fullviss um að Guðmundur Árni verður áfram á vettvangi – til halds og trausts. Og það er ljóst að það kemur valinn maður í manns stað. Því að við eigum þess kost að kjósa einstaklega öflugan nýjan varaformann sem fær sviðið hér á eftir.

Gerum þetta að góðum degi og góðu kvöldi fyrir Samfylkinguna.

VI.
Flokkstjórn. Það sem ég er stoltust af við Samfylkinguna í dag er hvað við erum vel samstillt og sameinuð um að taka ábyrgð á flokknum okkar og taka ábyrgð á Íslandi.

Við gleðjumst þegar gengur vel – en við lítum jafnharðan fram á veg og hugum að ábyrgð okkar.

Við höldum áfram – með 110 ára sögu: Ný kynslóð jafnaðarfólks. Þétt með þjóðinni. Styrk hönd á stýri.

En samt er tilfinningin svo skýr í Samfylkingunni að við séum rétt að byrja núna að leiða breytingar. Og að saman höfum verk að vinna og einhverja æðri köllun – til að þjóna Íslandi og vinnandi fólki hér í þessu landi, frá einni kynslóð til annarrar, um ókomna tíð.

* * *

Hvert og eitt okkar leggur sitt af mörkum. Við getum alltaf hert okkur og gert enn betur. En ef einhver segir að barátta okkar sé einskis virði – þá dugar að benda á verkin og þann árangur sem náðst hefur með tryggð Samfylkingar við land og þjóð og hugsjón klassískrar jafnaðarstefnu.

Takk. Takk fyrir samstöðuna. Og takk fyrir ykkar framlag í sókn okkar – til nýrra sigra.

Ræða Kristrúnar Frostadóttur formanns Samfylkingar á flokksstjórnarfundi í Samkomuhúsinu í Sandgerði 10. október 2026.

Ræða Kristrúnar: „Styrk hönd á stýri“

Boðið verður upp á rútuferð fyrir alla félaga frá Reykjavík kl. 9:30 frá bílastæðinu við Hús verslunarinnar. Rútan mun keyra beint í Reykjanesbæ á fund Verkalýðsmálaráðs sem hefst kl. 10:30. Þar næst keyrir rútan að Samkomuhúsinu í Sandgerði þar sem flokksstjórnarfundurinn verður haldinn.

Heimferð verður til Reykjavíkur kl. 23 eftir skemmtun og mat.

Þú getur skráð þig í rútuna um leið og þú skráir þig á fundinn: https://forms.gle/FCdfTK1C6cbkGQME8

Dagskrá
09:30 - Lagt af stað frá Reykjavík með rútu

12:00 - Húsið opnar, skráning og hádegismatur

12:30 - Svavar Grétarsson oddviti okkar í Suðurnesjabæ býður gesti velkomna

12:40 - Guðmundur Árni setur fundinn og ber upp stjórnmálaályktun 

12:55 - Ræða Kristrúnar Frostadóttur formanns flokksins og forsætisráðherra

13:20 - Staðan í hálfleik: Ráðherrar ræða verkefnin sem hafa áunnist og áherslur seinni hálfleiks

13:50 - Samtal við salinn: Ása Berglind, Dagbjört Hákonardóttir, Ragna Sigurðardóttir og Sigurmundur Ernir þingmenn sitja fyrir svörum

14:00 - Framboðsfrestur til varaformanns rennur út

14:20 - Guðmundur Árni varaformaður þakkar fyrir sig

14:25 - Kynningar frambjóðenda til varaformanns

14:30 - Kaffihlé og kosning- veitingar frá kvenfélaginu Gefn

15:15 - Samtal við oddvita í meirihluta í sveitarstjórnum: Birgitta Ragnarsdóttir Hveragerði, Kjartan Páll Þórarinsson Norðurþingi og Ragnheiður Erla Stefánsdóttir frá Skagaströnd

15:30 - Kynning á málefnastarfi í aðdraganda landsfundar

15:40 - Borðavinna: hvernig vinnum við aftur 2028

16:20 - Úrslit úr varaformannskosningu kynnt

17:25 - 23:00 - Gleðistund, kvöldmatur og skemmtiatriði

Ein tillaga barst frá félögum fyrir frest og mun hún vera borin upp á fundinum, tillögunina má nálgast með því að smella hér er hægt að nálgast tillöguna.

 Kaffi- og fundargjald er 4.000 og 3.000 fyrir námsmenn, lífeyrisþega og fólk á fjárhagsaðstoð. Kvöldverður og teiti á 7.000 og 6.000 fyrir námsmenn, lífeyrisþega og fólk á fjárhagsaðstoð, greiðist inn á bk. 0111 hb. 26 rknr. 19928 - kt. 690199-2899.

Um kvöldið verður slegið upp Októberfest, pretzel, pylsur og sauerkraut verða á boðstólum.

Hobbitarnir frá Suðurnesjum sjá um að skemmta gestum. Dúettinn skipa þeir Ólafur Þór Ólafsson og Hlynur Þór Valsson sem eru „heimsfrægir” í Suðurnesjabæ en hafa spilað um allt land í gegnum tíðina við góðan orðstír.

Þetta er partý sem enginn vill láta fram hjá sér fara.

Kvöldverður og skemmtun kostar 7.000 og 6.000 fyrir námsmenn, lífeyrisþega og fólk á fjárhagsaðstoð greiðist inn á bk. 0111 hb. 26 rknr. 19928 - kt. 690199-2899.

Óskað er eftir framboðum til embættis varaformanns Samfylkingarinnar en núverandi varaformaður, Guðmundur Árni Stefánsson, hefur óskað eftir lausn frá embættinu.

Aðeins meðlimir flokksstjórnar Samfylkingarinnar geta boðið sig fram og hafa kosningarétt. Kjörtímabilið er sá tími sem eftir er af kjörtímabili fráfarandi varaformanns, sbr. grein 7.6 í lögum Samfylkingarinnar.

Frambjóðendur sem hafa tilkynnt framboð sitt til skrifstofu með því að fylla út eyðublaðið sem er að finna hér fyrir neðan geta óskað eftir afhendingu kjörskrár með tölvupósti á skrifstofu, samfylking@samfylking.is.  

Flokksstjórn Samfylkingarinnar samanstendur af framkvæmdastjórn flokksins, fulltrúum sem kjörnir eru á aðalfundum kjördæmisráðanna, þrjátíu fulltrúum kjörnum á landsfundi, alþingismönnum og sveitarstjórnarfulltrúum Samfylkingarinnar, formönnum aðildarfélaga, kjördæmisráða og landshreyfinga, stjórn verkalýðsmálaráðs og formanni laganefndar.

25. september: Lokafrestur til að skila inn ályktunartillögum, ein tillaga barst, með því að smella hér er hægt að nálgast tillöguna. 

október: Frestur til að boða varamann, sjá gr. 7.4 .

10. október: Flokksstjórnarfundur verður haldinn í Suðurnesjabæ. 

Flokksstjórnarfundur verður haldinn í Samkomuhúsinu í Sandgerði í Suðurnesjabæ laugardaginn 10. október.

Guðmundur Ari Sigurjónsson hefur verið kjörinn varaformaður Samfylkingarinnar – jafnaðarflokks Íslands. Guðmundur Ari var sjálfkjörinn á flokksstjórnarfundi Samfylkingarinnar sem fram fer í Suðurnesjabæ.

Guðmundur Ari tekur við af Guðmundi Árna Stefánssyni, sem baðst lausnar frá embætti varaformanns fyrr á árinu og kvaddi flokksstjórn Samfylkingarinnar með ræðu á fundinum í dag.

Því næst hélt Guðmundur Ari ræðu þar sem hann fór yfir þær áherslur sem hann ætlar að beita sér fyrir næstu árin, sem varaformaður Samfylkingarinnar. Hann sagði meðal annars að hann teldi að varaformaður ætti að leggja krafta sína í að rækta flokkinn, tengja fólkið okkar saman og byggja hreyfinguna upp fyrir næstu kosningar og að sá undirbúningur eigi að hefjast strax.

„Við jafnaðarmenn vitum að baráttan fyrir almannahagsmunum er öðruvísi en baráttan fyrir sérhagsmunum. Sterkir sérhagsmunir verja gríðarlegum fjármunum í að verja sína stöðu.

En baráttan fyrir almannahagsmunum þarf að byggjast á öflugri fjöldahreyfingu og samstöðu fólksins í landinu. Því þurfum við púls í félögunum okkar um allt land,“ sagði Guðmundur Ari.

Guðmundur Ari er 38 ára gamall og var kjörinn á þing árið 2024 fyrir Suðvesturkjördæmi. Hann er Seltirningur og sat í bæjarstjórn Seltjarnarness frá 2014-2024, auk þess sem hann var formaður framkvæmdastjórnar Samfylkingarinnar á árunum 2022-2025 og stjórnarmaður í Sambandi íslenskra sveitarfélaga frá 2018-2024. Guðmundur Ari hefur verið þingflokksformaður Samfylkingarinnar á þessu kjörtímabili.

Hann er tómstunda- og félagsmálafræðingur að mennt og starfaði lengi við æskulýðsmál á Seltjarnarnesi, meðal annars sem forstöðumaður. Einnig hefur hann sinnt stundakennslu í tómstunda- og félagsmálafræði við Háskóla Íslands og starfaði sem sérfræðingur hjá Rannís áður en hann var kjörinn á Alþingi.

Guðmundur Ari er giftur Nönnu Kaaber Árnadóttur og eiga þau saman þrjú börn.

Guðmundur Ari Sigurjónsson er nýr varaformaður Samfylkingarinnar.

Samfylkingin á Akranesi býður til bæjarmálafundar sunnudaginn 18. október kl. 11:00. Gestur fundarins að þessu sinni er Dagur B. Eggertsson, þingmaður og fyrrum borgarstjóri. 

Við ætlum að eiga saman skemmtilegt kvöld með spilum, leikjum og góðum félagsskap!

Fimmtudaginn 15. október kl. 20:00. Stillholti 16–18

Spil og leikir hjá Ungu jafnaðarfólki á Akranesi

Leit um „��"

3416 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „���������������������������������������������������"

3416 niðurstöður fundust við leit að „���������������������������������������������������"