Árborg - Farsælt samfélag
Stefnuskrá Samfylkingarinnar í Árborg fyrir kosningar til sveitarstjórnar 14. maí 2022
Öflugt atvinnulíf
Sveitarfélagið Árborg er höfuðstaður Suðurlands og mikil íbúafjölgun á skömmum tíma kallar á fjölbreyttari tækifæri í atvinnumálum. Því þarf Árborg að sækja fram og skapa aðstæður fyrir fjölbreytta starfsemi.
Samfylkingin vill:
- Ráðast í átak í atvinnuppbyggingu og þróun ferðaþjónustu í Árborg – öflug kynning á sögustöðum og náttúruperlum.
- Byggja undir mikla möguleika og sérstöðu Stokkseyrar og Eyrarbakka í ferðaþjónustu með byggðasafni Árnesinga á Eyrarbakka, Fuglafriðlandið, verndarsvæði í byggð, vitaleiðinni og fjörunni á Stokkseyri.
- Koma á samstarfi milli skólasamfélagsins og atvinnulífsins með það að markmiði að efla nýsköpun og frumkvöðlastarf.
- Byggja upp öflugt þekkingarsetur sem hefur það m.a. að markmiði að vera grunnur að klasamyndun fyrir matvælaþróun og framleiðslu.
- Vinna verkáætlun í viðhaldi fasteigna í eigu sveitarfélagsins.
- Stuðla að nýsköpun og frumkvöðlastarfi Árborg eins og t.d. á ýmis konar léttum iðnað sem fellur að sjálfbæru og umhverfisvænu samfélagi.
- Skapa enn frekari aðstæður fyrir störf án staðsetningar á borð við framúrskarandi aðstæður í Bankanum,vinnustofu.
- Fara í markvissa kynningu á Árborg sem viðkomustað ferðamanna þar sem einstök flóra veitinga- og gististaða verður kynnt sérstaklega.
- Tryggja að ávallt sé nægt framboð af lóðum undir atvinnustarfsemi.
- Skapa fleiri störf fyrir fatlað fólk og fólk með skerta starfsgetu.
Umhverfis- og skipulagsmál
Framsýn og lýðræðisleg stefnumótun í skipulagsmálum er grundvallaratriði til að efla lífsgæði, draga úr umferð bíla, mengun og auka aðgengi hjólandi og gangandi vegfaranda í samfélaginu. Aðkoma íbúa sveitarfélagsins að skipulagsmálum skiptir sköpum og að öll stjórnsýsla skipulagsmála sé opin og heiðarleg. Vöxtur og íbúafjölgun í Árborg á sér vart hliðstæðu. Vanda þarf til þess að skipuleggja samfélag framtíðarinnar með hagsmuni almennings að leiðarljósi.
Samfylkingin vill:
- Ljúka framkvæmdum í fráveitumálum við hreinsistöð á Selfossi.
- Skoða notkun þeirra nýju lausna sem þróaðar hafa verið á sl. árum í fráveitumálum á Stokkseyri og Eyrarbakka, með það að markmiði að ekkert fari frá byggðinni útí sjó.
- Ráðast í tímasett átak um endurbætur á gangstéttum, göngustígum og götum í eldri hverfum.
- Bæta umhverfi grenndarstöðva, fjölga þeim og ýta undir hringrásarhagkerfið. Tryggja að umgengni sé góð og að hirðutíðni samræmist þörfum íbúa.
- Setja af stað átak í gróðursetningu trjáa og fegrun umhverfis á grænum svæðum og við aðkomu inn í þéttbýliskjarna sveitarfélagsins.
- Ráðist verði í uppbyggingu Sigtúnsgarðs samkvæmt fyrirliggjandi hönnun
- Heimsmarkmið Sameinuðu þjóðanna verði höfð að leiðarljósi í allri starfsemi sveitarfélagsins.
- Lögð verði áhersla á fjölbreytta búsetukosti og blandaða byggð í öllu skipulagi.
- Efla Árborgarstrætó með bættu skipulagi og gera hann að raunhæfum valkosti sem ferðamáta innan sveitarfélagsins.
- Nýta möguleika á uppbyggingu á Eyrarbakka og Stokkseyri. Þar er hægt að bjóða verðmætar sjávarlóðir sem og aðrar lóðir.
- Fara í átak í skráningu gáma í sveitarfélaginu, tryggja að skýrar verklagsreglur séu fyrirliggjandi vegna gáma og þeim fylgt eftir.
- Umhverfisstefnu sveitarfélagsins sé fylgt og hún endurskoðuð reglulega.
- Sett verði markmið í loftslagsmálum sem eru í samræmi við markmið ríkisstjórnar.
- Fjölga hleðslustöðvum fyrir rafbíla í þéttbýliskjörnum sveitarfélagsins í samstarfi við einkaaðila.
- Bæta aðgengi fyrir gangandi og hjólandi vegfarendur.
- Vinna að því að ljúka við tengingu þéttbýliskjarna sveitarfélagsins með göngu- og hjólastígum.
- Algild hönnun verði höfð að leiðarljósi í allri mótun umhverfisins, þannig er þess gætt að allir íbúar og gestir í Árborg geti notið umhverfisins óháð aldri, stærð, færni eða fötlun.
- Að unnin verði tímasett áætlun um úrbætur á aðgengismálum í samræmi við niðurstöður úttektarskýrslu á aðgengismálum í sveitarfélaginu.
Virðing, velferð og umburðarlyndi
Hlutverk sveitarfélaga er að hlúa að velferð íbúa sinna með framúrskarandi nærþjónustu, tryggja jöfnuð og jöfn tækifæri óháð fötlun eða félagslegri stöðu. Velferð fólks byggir á samfélagi þar sem fólk stendur saman og sýnir hvert öðru virðingu, umburðarlyndi og umhyggju.
Samfylkingin vill:
- Efla markvissa vinnu gegn kvíða barna og ungmenna og bjóða þeim stuðning sem greinast með einkenni kvíða og þunglyndis.
- Auka stuðning við fjölskyldur í vanda og bjóða fjölskyldumeðferð. Efla aðstoð við börn með þroskaraskanir eða fatlanir og fjölskyldur þeirra. Hlúa sérstaklega að börnum með annað móðurmál en íslensku og hvetja til virkni í skóla- og frístundastarfi.
- Virkja mannauð fólks af erlendum uppruna.
- Halda áfram samstarfi við óhagnaðardrifin húsnæðisfélög eins og t.d. Bjarg íbúðafélag og Brynju hússjóð ÖBÍ um byggingu og rekstur íbúða fyrir tekjulægri einstaklinga og fjölskyldur.
- Styðja við fjölmenningu og leggja sérstaka áherslu á að auka þátttöku og tækifæri fólks með annað móðurmál en íslensku.
- Tryggja að fötluðu fólki standi fjölbreytt búsetuúrræði til boða í samræmi við þarfir hvers og eins.
- Útrýma biðlistum eftir þjónustu við fatlað fólk.
- Efla og bæta stuðningsþjónustu, sporna markvisst gegn einsemd og hvetja til hreyfingar, útivistar og frístunda eldra fólks.
- Halda áfram að þrýsta á ríkisvaldið til þess að fá fleiri dagdvalarrými í Vinaminni og Árblik.
- Bjóða upp á heilsueflandi fræðslu fyrir eldri borgara í samstarfi við félög eldri borgara.
- Halda reglulega upplýsinga- og samstarfsfundi í með félögum eldri borgara í sveitarfélaginu.
- Nýta betur kosti velferðartækni til að bæta öryggi og aðstöðu í heimahúsum eldra fólks.
- Tryggja að framboð hjúkrunarrýma fyrir aldraða verði ávallt í samræmi við þörf.
Íþróttir og menning óháð efnahag
Fjölbreytt menningarstarfsemi og úrvals íþróttastarf eru á meðal helstu styrkleika sveitarfélagsins. Stefna á jöfn tækifæri til frístunda og tryggja að börn fái tækifæri til að þroska hæfileika sína með því að stunda listnám, íþróttir og annað æskulýðsstarf óháð efnahag foreldra.
Samfylkingin vill:
- Kanna möguleikann á að foreldrar greiði eitt þátttökugjald fyrir hvert barn að 12 ára aldri, óháð hvaða íþrótt barn stundar.
- Stuðla að heilsueflandi aðstæðum með umhverfi og skipulagi sem hvetur fólk til göngu, hjólreiða og fjölbreyttrar útivistar.
- Hækka tómstundastyrki jafnt og þétt
- Að styrkleikar frístundastarfsins verði nýttir til að bæta líðan barna og ungmenna, efla félagsfærni þeirra og virkni með sérstakri áherslu á börn sem ekki taka þátt í formlegu íþrótta- og tómstundastarfi.
- Efla þátttöku fólks með mismunandi menningarlegan bakgrunn til að skapa skemmtilegt og fjölmenningarlegt samfélag þar sem allir geta notið sín og lagt sitt af mörkum.
- Hefja byggingu frístundamiðstöðvar
Farsælt skólastarf
Menntun er undirstaða framfara og hækkunar á launastigi á svæðinu. Efla þarf starf á öllum skólastigum og byggja ofan á það góða starf sem unnið hefur verið í fullorðinsfræðslu og símenntun. Við viljum styrkja stöðu kennara og leggja áherslu á að bætt kjör og starfsaðstæður kennara í leik- og grunnskólum verði forgangsmál.
Samfylkingin vill:
- Jafna aðgang og tækifæri barna til fjölbreyttrar menntunar sem byggir þau upp sem fjölhæfa, skapandi einstaklinga sem fá stuðning og leiðsögn til að láta drauma sína rætast.
- Taka aukið tillit til félags- og efnahagslegrar stöðu barna við úthlutun fjármagns til skóla. Þannig fá skólar þar sem nemendur búa við þrengri kost hærri fjárveitingar til að jafna aðstöðu barna óháð efnahag foreldra.
- Auka stuðning við börn í viðkvæmri stöðu með markvissu samstarfi skóla og frístundar.
- Vinna að því að hækka hlutfall leikskólakennara í leikskólum sveitarfélagsins ásamt því að styðja ófaglært starfsfólk leikskóla til að afla sér menntunar.
- Áfram verði lögð rík áhersla á að bæta kjör og vinnuumhverfi starfsfólks leikskóla, grunnskóla, frístundaheimila og félagsmiðstöðva og fjölga fagfólki á öllum þessum starfsstöðvum. Sérstaklega verði unnið að þverfaglegri nálgun og nánara samstarfi mismunandi fagstétta. Lögð verði áhersla á að bæta enn frekar vinnuaðstæður og fjölga tækifærum til starfsþróunar.
- Jákvæðir hvatar verði nýttir til að styðja við bakið á ófaglærðu starfsfólki leikskóla að afla sér fagmenntunar og hvatt til aukinnar notkunar raunfærnimats til að meta starfsreynslu þess og þekkingu.
- Hefja uppbyggingu á nýju skólahúsnæði á Eyrarbakka og bæta aðstöðu til inniíþrótta á Stokkseyri.
- Auka sjálfstæði og sveigjanleika kennara í starfi með það að markmiði að ýta undir nýbreytni og sveigjanlega kennsluhætti
- Efla starfsþróun með áherslu á að styrkja starfsfólk til starfa í skóla margbreytileikans, s.s. varðandi kennslu tvítyngdra barna, fatlaðra barna eða barna með sértækar þarfir.
- Efla móðurmáls- og íslenskukennslu fyrir tvítyngd börn
- Styðja börn, foreldra og skóla í að takast á við stafrænan veruleika og fjórðu iðnbyltinguna.
- Auka hlut list- og verknáms í daglegu starfi leik- og grunnskólabarna, þar með talið nýsköpunarnáms.
- Stuðla að aukinni heilsueflingu innan skólanna í anda heilsueflandi samfélags. vinna að bættri andlegri vellíðan, gleði, þrautseigju og trú barna á eigin getu.
- Bæta nýtingu skólahúsnæðis til fræðslu- og tómstundarstarfs.
- Standa fyrir skólaþingi í öllum leik- og grunnskólum sem lið í vinnu við endurskoðun á mennta- og læsisstefnu sveitarfélagsins.
- Breyta gjaldtöku á leikskólum í skrefum með það að markmiði að 5 klst. kennsla á dag verði gjaldfráls til samræmis við grunnskólann.
- Brúa bilið milli fæðingarorlofs og leikskóla með því að byggja nýja leikskóla og/eða stækka starfandi leikskóla þar sem það er mögulegt. Halda áfram að lækka inntökualdur á leikskólum jafnt og þétt.
- Tryggja að stuðningur við börn og barnafjölskyldur miðist við þarfir þeirra en sé ekki háður greiningum.
- Beita snemmtækum stuðningi í auknum mæli í leikskólum og á yngsta stigi grunnskóla til að mæta svo fljótt sem verða má þörfum barna með fjölþættan vanda.
- Aukin áhersla verði lögð á að greiða leið barna og fjölskyldna þeirra í gegnum kerfið þegar þau þurfa aukinn stuðning eða heilbrigðisþjónustu í samræmi við ný farsældarlög.
- Ráða fólk úr fleiri fagstéttum í skólana til að auka þverfaglega samvinnu fagfólks og stuðla að því að hægt sé að koma betur til móts við fjölbreytilegar þarfir nemenda.
- Vinna með samstilltum aðgerðum gegn einelti og félagslegri einangrun barna og ungmenna.
- Mæta þörfum fatlaðra barna og barna með raskanir og sérþarfir á þeirra eigin forsendum í námi og frístundum við grunnskólana með auknum námslegum og félagslegum stuðningi.
- Auka formlegt samstarf ríkis, sveitarfélags og Sambands íslenskra sveitarfélaga um raunhæfar aðgerðir til að draga úr brotthvarfi barna úr framhaldsskólum og til að minnka hættu á skólaforðun á öllum skólastigum.
- Fylgja betur eftir og styðja ungmenni á aldrinum 16 til 18 ára, einkum þau sem eru í sérstökum áhættuhópum varðandi félagslega einangrun, áhættuhegðun eða skólaforðun
Stjórnsýsla og lýðræði
Sveitarstjórn er skipuð lýðræðislega kjörnum fulltrúum sem fara með framkvæmd málaflokka í umboði kjósenda. Þetta umboð eiga þeir að rækja með góðri upplýsingagjöf og reglubundnu samráði við íbúa. Sveitarfélagið Árborg á að hafa forystu um íbúalýðræði þar sem fólk finnur að það geti haft áhrif á þróun mála og að allir beri ábyrgð á rekstri sveitarfélagsins.
Samfylkingin vill:
- Að Íbúar eiga undantekningarlaust að geta sótt um þjónustu á vefnum, sem á að vera fyrsti viðkomustaður allrar þjónustu en gæta þess að þeir sem ekki geta nýtt sér snjalltæki fái aðstoð til þess.
- Endurskoða afslætti á fasteignagjöldum til eldri borgara og öryrkja.
- Vinna að endurskoðun og leita leiða til að lækka fasteignagjöld.
- Halda reglubundna íbúafundi til að veita upplýsingar og gefa fólki kost á að hafa áhrif á stefnumótun og rekstur.
- Gæta stjórnfestu í rekstri sveitarfélagsins þannig að leikreglur séu öllum ljósar og farið eftir samþykktum
- Bæta aðgengi að upplýsingum um þjónustu og rekstur sveitarfélagsins
- Mitt hverfi; opnað verði vefsvæði á heimasíðu sveitararfélagsins þar sem fólk getur komið á framfæri hugmyndum um hverfis sitt, og þar verði haldnar atkvæðagreiðslur um einstök málefni.