Samfylkingin í Árborg og nágrenni hefur selt húsnæði sitt að Eyravegi 15, eftir að skemmdir af völdum raka komu upp í húsinu.

Fyrst um sinn munum við halda fundi okkar í Eldhúsinu að Tryggvagötu 40 á Selfossi.
Fundirnir verða hverju sinni frá kl 10 til 12 á laugardagsmorgnum.

Sá fyrsti verður núna á laugardaginn, 25. janúar.
Næstu fundir: 
8. og 22. febrúar, 8. og 22. mars og 26. apríl.

Einnig verða fundir á fleiri stöðum á mið-Suðurlandi í samráði við heimafólk á hverjum stað. Við förum líka brátt að undirbúa landsfund Samfylkingarinnar, sem haldinn verður fyrir páska. Fundir með nýjum þingmönnum okkar og fleiri viðburðir verða til vors, svo það er um að gera að fylgjast vel með fundarboðum.

Öll velkomin.

Ungt jafnaðarfólk kynnir með stolti 25 ára afmæli UJ.

Hreyfingin var stofnuð þann 11. mars árið 2000 í Iðnó. Í tilefni þess ætlum við að fagna afmælinu 14. mars nk. í Iðnó. Veislan hefst klukkan 20:00.


Skráning er hafin og fer fram hér: https://forms.gle/XbJC2Fnmu2XcCjoX9 

Almennt verð er 3.500 kr. en verð fyrir virka UJ-ara er 2.000 kr. 


Við hvetjum öll sem hafa tekið þátt í starfi hreyfingarinnar til þess að skrá sig, sem og allt jafnaðarfólk sem vill fagna þessum merku tímamótum með okkur. 

Spurningum skal beint til Lilju Hrannar Önnudóttur Hrannarsdóttur, forseta Ungs jafnaðarfólks í tölvupósti forseti@uj.is 

Höfundurinn er líka búin að selja kvikmyndaréttinn til Bandaríkjanna. Hildur Knútsdóttir rithöfundur er kona eigi einhöm. Hún hefur ritað fjölda vinsælla bóka fyrir börn og ungmenni og meðal annars hlotið Fjöruverðlaunin og Íslensku bókamenntaverðlaunin. 

Það er ástæða til að ræða um afrekshöfundinn Hildi Knútsdóttur í samhengi árvissrar umræðu um launasjóði listamanna hér á landi. Í nýlegu viðtali á RÚV sagði hún um listamannalaunin:

„Þetta er í raun og veru bara fjárfesting. Eins og með Myrkrið á milli stjarnanna. Ég hefði ekki skrifað hana ef ég hefði ekki verið á ritlaunum. Hún er að koma út í Bandaríkjunum og ég borga skatta af sölutekjunum þar hér heima. Svo er ég búin að selja kvikmyndaréttinn til Bandaríkjanna og ég borga skatta af því hérna. Ég er ekki í neinu skattaskjóli. Þetta eru peningar sem skila sér aftur.“ 

Allt er þetta í samræmi við niðurstöður skýrslu sem Ágúst Ólafur Ágústsson hagfræðingur vann fyrir Lilju D. Alfreðsdóttur, fráfarandi menningar- og viðskiptaráðherra, og birt var í haust. Þar kom fram að beint framlag menningar og skapandi greina nam 3,5 % af landsframleiðslu eða um 150 milljörðum króna árið 2022. Það er litlu minna framlag en sjávarútvegs til landsframleiðslunnar! Opinber framlög, eða öllu heldur fjárfesting, í menningu og skapandi greinum verður að þremur krónum í hagkerfinu. Ég er ekki viss um að slík ávöxtun bjóðist víða.

Enn fremur er sagt frá því að óbein hlutdeild menningar og skapandi greina hækki hlutfall af landsframleiðslu í 4,5% sem nemur um 190 milljónum króna á ársgrundvelli. Í skýrslunni eru áætlaðar skatttekjur hins opinbera vegna skatta á laun og neyslu vinnuafls í menningu og skapandi greinum ásamt tekjum vegna áhrifa þessara greina á ferðamannafjölda sagðar að minnsta kosti 40 milljarðar króna. 

Fólki má vera ljóst að þau sem starfa í menningu og skapandi greinum færa björg í bú rétt eins og útgerðin, stóriðjan og ferðaþjónustan. Þeirra framlag til verðmætasköpunar er umtalsvert eins og tölurnar úr skýrslunni sýna glöggt. Það eitt ætti að þagga niður í hinu árlega listamannalaunanöldri. Það á ekki að vera „fjárhagslega fullkomlega galin ákvörðun“ að gerast rithöfundur á Íslandi, eins og Margrét Tryggvadóttir formaður Rithöfundsambandsins benti réttilega á í nýlegu viðtali. Hið sama á við um aðrar listgreinar. 

1.339 umsóknir bárust í launasjóði listamanna fyrir árið 2025. 251 listamaður fékk úthlutun í þrjá, sex, níu eða tólf mánuði eftir atvikum. Mánaðarleg greiðsla ú launasjóðnum er 560.000 krónur, verktakagreiðsla fyrir skatt. Þeim peningum er vel varið.

Stórblaðið The New York Times var að velja Myrkrið á milli stjarnanna eftir Hildi Knútsdóttur eina af tíu bestu hrollvekjum ársins.

Bæjarmálafundur Samfylkingarinnar í Kópavogi verður miðvikudaginn 19. febrúar kl. 20:00 í húsnæði félagsins, Hlíðarsmára 9.

Umræður um það sem er efst á baugi í bæjarstjórn og nefndum. 

Kaffispjall Samfylkingarinnar í Hafnarfirði 60+ fellur niður  fimmtudaginn 6. febrúar sökum veðurs. 

FELLUR NIÐUR - Kaffispjall 60+ í Hafnarfirði 

Góðir landsmenn, þið senduð okkur skýr skilaboð í Alþingiskosningum 30. nóvember.

Þjóðin kaus breytingar og breytingarnar byrja strax.

Með tiltekt í ríkisrekstri og breyttu verklagi við stjórn opinberra fjármála.

Með laga- og reglugerðarbreytingum til að ryðja burt hindrunum og liðka fyrir framkvæmdum.

Með markvissum húsnæðisaðgerðum, úrbótum á fæðingarorlofskerfinu og kjarabótum fyrir eldra fólk og öryrkja.

Svona byrjum við. Og markmiðið er skýrt: að stækka kökuna og styrkja velferðina.

Forseti, ég veit að fjöldi fólks hefur áhyggjur af flugvellinum í Vatnsmýrinni, réttmætar áhyggjur. Þess vegna vil ég segja þetta: Það er forgangsmál okkar að tryggja flugöryggi vallarins. Ríkisstjórnin stendur með Reykjavíkurflugvelli á meðan annar jafngóður eða betri kostur er ekki tilbúinn. Og innviðaráðherra ríkisstjórnarinnar hefur gert borgarstjóra Reykjavíkur fullljóst að fella verði tré í Öskjuhlíð sem valdið hafa lokun á austur vestur brautinni í Vatnsmýrinni. Þetta þarf að gerast eins fljótt og kostur er.  

Gripið verður til sérstakra aðgerða ef frekari tafir verða á þessu. Í millitíðinni liggur á að tryggja að flugbrautin geti nýst fyrir sjúkraflug þegar þörf er á. Þess vegna er nú unnið að sérstöku áhættumati fyrir sjúkraflug sem gæti skapað grundvöll til undanþágu í neyðartilfellum. Það er mikilvægt að þingheimur allur sé meðvitaður um þetta.

Á undanförnum vikum höfum við fengið til liðs við okkur 4 þúsund manns, heilt prósent þjóðarinnar, í hugmyndavinnu um hagræðingu í ríkisrekstri, einföldun stjórnsýslu og bætta forgangsröðun fjármuna.

Umræðan hefur seytlað um allt samfélagið, verkalýðshreyfingin hefur tekið þátt í henni, einstök fyrirtæki hafa tekið þátt og atvinnurekendasamtök – en sumar af bestu tillögunum berast innan úr kerfinu sjálfu, frá fólki sem er einfaldlega steinhissa á því hvernig farið hefur verið með opinbert fé á undanförnu árum, hvernig fyrrverandi stjórnarflokkar fóru með vald sitt og fóru með stjórnkerfið á Íslandi.

Það er þessi óreiða sem við ætlum að vinda ofan af. Ríkisstjórn Kristrúnar Frostadóttur mun berja niður verðbólguvæntingar og vaxtastig.

Við gerum það með því að sýna aga í ríkisfjármálum og koma húsnæðismarkaðnum í fastari skorður.

Þetta er planið og nú er það komið til framkvæmda.

Vextir lækkuðu í síðustu viku og þeir munu halda áfram að lækka, við munum sjáum til þess, jafnvel þótt það kalli á óþægilegar ákvarðanir, því við erum ekki í pólitík til að kaupa okkur vinsældir um stundarsakir – heldur til að ná árangri fyrir land og þjóð.

Og auðvitað mætum við andstöðu. Það fyrsta sem heyrðist frá Sjálfstæðisflokkunum var gagnrýni á að ný ríkisstjórn ætlaði að binda lífeyri við laun, tryggja eldra fólki og öryrkjum sams konar hækkanir og verða á vinnumarkaði.  Og formaður Framsóknarflokksins, háttvirtur þingmaður sem kom ekki einum einustu jarðgöngum af stað á sjö árum og sat í ríkisstjórn sem kom ekki einum einustu virkjunarframkvæmdum yfir 10 megavött af stað á sjö árum, hann sakar núna nýja ríkisstjórn um andlandsbyggðarstefnu. Er það nú? 

Og reyndar beit hann höfuðið af skömminni með því að ljúga því blákalt hérna að þingheimi að hæstvirtur forsætisráðherra hefði ekki ávarpað kennara í ræðu sinni, hefði ekki vikið að menntamálum eða ávarpað kennara þarna úti sem hún gerði svo sannarlega. Það er látt risið á stjórnarandstöðunni hérna í kvöld. 

En það sem kannski stuðar gömlu valdaflokkana mest, það er að ný ríkisstjórn vilji innheimta sanngjörn auðlindagjöld og binda þjóðareign auðlinda í stjórnarskrá.

En ég segi við Sjálfstæðismenn: kveinið bara, farið í öll þau setuverkföll sem ykkur sýnist. Ríkisstjórn Kristrúnar Frostadóttur mun stöðva kjaragliðnun milli lífeyris og launa –

því það er réttlætismál. Og ríkisstjórn Kristrúnar Frostadóttur mun tryggja þjóðinni aukna hlutdeild í arðinum af auðlindum, vegna þess að við eigum þessar auðlindir saman.

Þetta er réttlætismál en líka liður í því að koma jafnvægi á rekstur ríkisins eftir óstjórn síðustu ára, þetta er líka liður í að koma jafnvægi á rekstur ríkisins sem er forsenda þess að við getum stutt og styrkt opinbera þjónustu til framtíðar og rekið sterkt velferðarþjóðfélag á Íslandi.

Það er planið. Þetta er nákvæmlega það sem þessir þrír flokkar voru kosnir til að gera. Og aðgerðir okkar í loftslagsmálum munu bera þess merki, að við erum ríkisstjórn sem þjónar vinnandi fólki. Þess vegna kemur ekki til greina virðulega forseti að fara í orkuskipti sem bitna á tekjulægri hópum eða íbúum í dreifbýli umfram aðra.  Það kemur ekki til greina. Áherslur ríkisstjórnarinnar í umhverfis- og loftslagsmálum munu styðja við byggðaþróun og styðja við atvinnuuppbyggingu um allt land.

Ábyrg hagstjórn og aukin framleiðni í atvinnulífi eru forsenda þess að við getum sótt fram í velferðarmálum og passað betur hvert upp á annað. Þetta er það leiðarstef sem ríkisstjórn Kristrúnar Frostadóttur vinnur eftir.

Þess vegna tökum við til í ríkisrekstrinum. Þess vegna vinnum við gegn fákeppni og greiðum fyrir samkeppni. Þess vegna leysum við strax Hvammsvirkjunarmálið með lagasetningu, einföldum leyfisferla og liðkum fyrir orkuöflun. Þess vegna munum við rjúfa kyrrstöðuna í samgöngumálum og koma þjóðhagslega arðbærum framkvæmdum af stað.

Allt í þágu vaxtar og verðmætasköpunar, til að stækka kökuna og styrkja velferðina.

Um þetta er ríkisstjórn Kristrúnar Frostadóttur mynduð og breytingarnar byrja strax.

Ræða Jóhanns Páls Jóhannssonar í umræðum um stefnuræðu forsætisráðherra á Alþingi, 10. febrúar 2025.

I.
Frú forseti – háttvirtir þingmenn. Það er heiður og mikil ábyrgð sem fylgir því að sitja á Alþingi Íslendinga. Til hamingju. Þjóðin hefur kosið. Þing er sett. Nú munu verkin tala.

Ný ríkisstjórn gengur samstíga til verka. Og með nýrri stjórn fylgir nýtt verklag.

Enda vorum við kosin til að leiða breytingar. Hvergi í vestrænu lýðræðisríki var eins mikil sveifla í kosningum á árinu 2024 eins og hér á Íslandi. Sem leiddi til hreinna stjórnarskipta. Og væntingar landsmanna hafa aldrei aukist eins mikið, samkvæmt mælingum á væntingavísitölu milli mánaða, eins og eftir að boðað var til þingkosninga síðasta haust.

Ég segi þetta vegna þess að það er von í lofti og miklum væntingum fylgir mikil ábyrgð – sem við þingmenn skulum öll vera meðvituð um og taka alvarlega. Til að standa okkur í starfinu og til að breyta í þágu lands og þjóðar.

Ég vænti þess að við getum átt gæfuríkt samstarf hér á Alþingi, milli stjórnar og stjórnarandstöðu og þvert á flokka. Auðvitað verður líka tekist á. En það verður þá á lýðræðislegan og málefnalegan hátt – með hagsmuni Íslands í fyrsta sæti, ofar öllu öðru.

II.
Forseti. Nýtt verklag birtist með ýmsum hætti.

Stefnuyfirlýsing ríkisstjórnarinnar er stutt og skýr, eins og tíðkaðist áður fyrr, og byggir á trausti í stað tilrauna til að binda niður allt og alla með málalengingum og orðskrúði.

Við vitum að verkin tala. Og höfum notað tímann vel á síðustu vikum. Til undirbúnings – með því að virkja stjórnkerfið og byrja á sjálfum okkur.

Nýtt verklag lýsir sér meðal annars í því að labba ekki inn í ráðuneytin og spyrja: Hvernig hefur þetta alltaf verið gert? Heldur gefa tóninn strax og hrista upp í hlutunum – og spyrja: Hvernig getum við virkjað þjóðina með okkur? Sem hefur nú skilað sér í 10 þúsund tillögum um hagsýni í ríkisrekstri – frá almenningi, atvinnurekendum, stéttarfélögum og stjórnendum og starfsfólki hins opinbera.

Takk! Takk fyrir að taka þátt og taka þessu svona vel. Ég veit að við munum ná árangri saman – og ég sé að verkefnið er þegar farið að skila árangri – með því að seytla um stjórnkerfið og samfélagið allt.

Nýtt verklag birtist líka í því hvernig við vinnum saman. Til dæmis með reglulegum sameiginlegum þingflokksfundum hjá stjórnarflokkum. Þá hef ég átt fundi einslega með hverjum einasta ráðherra til að stilla upp sterkri þingmálaskrá fyrir vorþingið – sem er trúverðug og sóar ekki dýrmætum tíma í mál sem munu aldrei komast til framkvæmda. Og á undanförnu hef ég sem forsætisráðherra farið í heimsóknir í ráðuneytin til að hitta fólkið sem vinnur á gólfinu í stjórnkerfinu. Með leyfi forseta:

„Ég hef unnið með 18 dómsmálaráðherrum en aldrei fengið forsætisráðherra í heimsókn,“ sagði ein. Sama sagði önnur eftir 21 ár í heilbrigðisráðuneytinu. Maður fyllist auðmýkt og virðingu við að hitta þetta fólk. Og það er hollt að minna sig á að margt er svo vel gert – þó að mörgu ætlum við að breyta, eins og við vorum kosin til að gera.

Ísland er frábært land. En við forðumst ekki stórar og jafnvel erfiðar ákvarðanir. Við ætlum áfram.

III.
Og það gleður mig að greina frá því, forseti, að það er full eining í þessari ríkisstjórn um öll þau mál sem birtast í þingmálaskrá sem fylgir stefnuræðu minni sem forsætisráðherra. Það er ánægjulegt eftir það sem undan hefur gengið og lofar góðu fyrir uppbyggilegt starf hér á Alþingi. 

* * *

Fyrst ber að nefna aðgerðir til að ná stöðugleika í efnahagslífi og lækkun vaxta. Stöðugleikaregla verður leidd í lög um fjármál ríkisins til að styðja við lægri vexti – með frumvarpi fjármálaráðherra sem verður lagt fyrir Alþingi seinna í þessum mánuði. Þá hefur ríkisstjórnin sammælst um að engin ný útgjöld verði á árinu 2025 án þess að hagræða eða afla tekna á móti til að gæta jafnvægis. Í lok þessa mánaðar mun hagræðingarhópur skila tillögum til ríkisstjórnarinnar um hagsýni í ríkisrekstri.

Til að stemma stigu við óstöðugleika á húsnæðismarkaði verður gripið til bráðaaðgerða strax í vor. Við munum taka styrkari stjórn á skammtímaleigu til ferðamanna, tryggja skilvirkari framkvæmd við veitingu hlutdeildarlána, lækka fjármögnunarkostnað hjá húsnæðisfélögum án hagnaðarsjónarmiða og liðka fyrir uppbyggingu einingahúsa. Þá verður innleidd skráningarskylda leigusamninga til að fá áreiðanlegri og skýrari mynd af þróun leiguverðs.

* * *

Næst vil ég nefna afmarkaðar aðgerðir í velferðarmálum á árinu 2025 sem skipta miklu máli – en kosta ríkissjóð hlutfallslega lítið og komast hratt til framkvæmda.

Meðferðarúrræðum verður ekki lokað í sumar – enda fer fíknisjúkdómurinn ekki í frí. Samhliða því að tryggja farsæla framkvæmd á breytingum á örorkulífeyriskerfinu munum við stíga fyrstu skref nýrrar ríkisstjórnar að bættum kjörum öryrkja og eldra fólks. Aldursviðbót örorkulífeyris mun haldast ævilangt, samkvæmt frumvarpi félags- og húsnæðismálaráðherra sem verður lagt fram í mars – og fellur þá ekki niður þegar öryrki nær 67 ára aldri eins og nú er raunin. Stöðu hagsmunafulltrúa eldra fólks verður komið á fót til að kortleggja félagslega stöðu þessa hóps og gera tillögur til úrbóta. Og þá verður kjaragliðnun launa og lífeyris loksins stöðvuð með lögum um að bæði örorku- og ellilífeyrir Tryggingastofnunar ríkisins hækki á hverju ári til samræmis við launavísitölu – en þó aldrei minna en verðlag. Þessi lög taka gildi með fjárlögum 1. janúar 2026.

Fyrstu breytingar nýrrar ríkisstjórnar á fæðingarorlofskerfinu munu sömuleiðis skipta sköpum fyrir marga – með frumvarpi í mars til að bæta hag fjölburaforeldra, lengja fæðingarorlof foreldra sem veikjast á meðgöngu eða eftir fæðingu og tryggja að hærri greiðslur gangi til allra foreldra sem eru í orlofi, óháð fæðingardegi barns. Þá verða fæðingarstyrkir námsmanna og fólks utan vinnumarkaðar hækkaðir um 30 þúsund krónur á mánuði.

En stóra einstaka velferðar- og mannréttindamálið sem ríkisstjórnin leggur fram í vor er það að við ætlum, loksins, að lögfesta samning Sameinuðu þjóðanna um réttindi fatlaðs fólks. Það verður stór stund og þýðingarmikil fyrir okkur sem þjóð.

* * *

Svo má nefna ýmsar aðgerðir til að auka verðmætasköpun í atvinnulífi og réttlæti í auðlindanýtingu. Við ætlum að höggva á hnútinn í orkumálum og verðum með að minnsta kosti fjögur stór þingmál í vor sem snúa að orkuöflun: Frumvarp strax á fyrstu dögum þings til að eyða óvissu um Hvammsvirkjun og aðrar mikilvægar framkvæmdir. Orkuforgangur almennings verður á dagskrá, ásamt umfangsmiklu einföldunarfrumvarpi til að hraða og samræma málsmeðferð í leyfisveitingum – án þess að slá af kröfum um umhverfisvernd og almannasamráð – og svo verður lögð fram ný rammaáætlun þar sem virkjunarkostir verða flokkaðir í verndarflokk eða nýtingarflokk samkvæmt tillögum verkefnastjórnar rammaáætlunar.

Með þessu styður ríkisstjórnin bæði við verðmætasköpun og orkuskipti um land allt. Einnig er hafinn undirbúningur að nýjum heildarlögum um loftslagsmál sem leggja á fyrir Alþingi næsta haust og sama gildir um samgönguáætlun sem verður í forgangi á haustþingi.

Í sjávarútvegsmálum eru stór verkefni framundan forseti. Atvinnuvegaráðherra leggur fram frumvarp í febrúar sem eykur gagnsæi í greininni, svo sem þegar kemur að eignarhaldi tengdra aðila. Strandveiðar verða styrktar og tryggðar í 48 daga í sumar og breytingar gerðar á veiðigjaldi til að það endurspegli betur raunverulegt aflaverðmæti.

* * *

Og svo mætti lengi telja: Fækkun ráðuneyta með 350 milljón króna hagræðingu á ári. Sala Íslandsbanka í gagnsæju og traustu ferli þar sem almenningur hefur forgang. Fjölgun lögreglumanna um 50 strax á þessu ári. Frumvarp sem gerir lögreglu kleift að krefjast farþegaupplýsinga verður lagt fyrir Alþingi seinna í þessum mánuði. Afturköllun á alþjóðlegri vernd fyrir einstaklinga sem fremja alvarleg brot eða síendurtekin. Sorgarleyfi fyrir foreldra sem missa maka. Heildarendurskoðun á Jöfnunarsjóði sveitarfélaga – sem er veigamikið mál. Síðan ætlum við að gera lagfæringar á lögum um leigubíla. Og sameina sýslumannsembætti úr 9 í 1 – án þess að það komi niður á þjónustu á landsbyggðinni.

Þá verða styrkir til einkarekinna fjölmiðla endurskoðaðir og hámark þeirra lækkað strax í vor. Með breytingum á lögum um sviðslistir munum við síðan bæta umgjörð óperustarfsemi og koma rekstrinum fyrir innan Þjóðleikhússins. Þar eru mikil sóknarfæri.

* * *

Í menntamálum verða nokkur mikilvæg frumvörp lögð fram. Meðal annars um nýtt fyrirkomulag við námsmat í grunnskólum og sömuleiðis um námsgögn – sem snýr bæði að fjölbreyttu framboði og því að gera námsgögn gjaldfrjáls í áföngum í leik-, grunn- og framhaldsskólum. Námslánakerfinu verður breytt þannig að hluti lána breytist í styrk í lok annar, og fleiri breytingar verða gerðar á Menntasjóði námsmanna.

Og þó að forsætisráðherra komi ekki með beinum hætti að gerð kjarasamninga, þá hefur þessi ríkisstjórn lýst sig reiðubúna til að liðka fyrir samningum við kennara – með því að standa einhuga að því að flýta virðismatsvegferð, og með því að flýta aðgerðum í menntamálum. Til að taka á breyttri stöðu í skólasamfélaginu og bæta aðstæður kennara og nemenda.

Við skiljum þörfina – og við skiljum líka að traustið er laskað, og nú þarf að byggja það upp að nýju.

Í heilbrigðismálum verður ráðist í ýmsar umbætur til viðbótar við styrkingu meðferðarúrræða – eins og til dæmis reglugerðarbreytingar til að draga úr skriffinnsku og vottorðafargani. Þannig gefum við heilbrigðisstarfsfólki meiri tíma með sjúklingum. Rafræn sjúkraskrá verður skylda svo að hægt sé að samnýta upplýsingar. Og áhersla nýrrar ríkisstjórnar á heilbrigðismál mun síðan birtast með skýrum hætti í fyrstu fjárlögum á haustþingi.

IV.
Forseti, háttvirtir þingmenn, góðir Íslendingar. Það eru viðsjárverðir tímar á alþjóðavísu og margir hafa áhyggjur af þróun og stöðu mannréttinda. Ég vil byrja á því að lýsa því yfir hér að þessi ríkisstjórn mun ekki gefa eina tommu eftir þegar kemur að mannréttindum hinsegin fólks, kvenna, jaðarsettra eða nokkurs manns. Það kemur ekki til greina.

Í samhengi alþjóðamála erum við sannarlega heppin með hæstvirtan utanríkisráðherra – enda ekki að ástæðulausu sem formaður eins af stjórnarflokkunum tók að sér þetta mikilvæga embætti. Mesti reynsluboltinn í ríkisstjórninni – reyndar á Alþingi og líklega í íslenskum stjórnmálum heilt yfir. Á næstu árum mun koma sér vel að vera með ofurtrausta konu í forsvari fyrir Ísland í utanríkismálum, og saman munum við takast á við þróun mála í þéttu samstarfi við okkar næstu nágranna, vinaþjóðir og bandalagsríki. Við Íslendingar eigum allt okkar undir virðingu fyrir alþjóðlegum lögum og fullveldi ríkja og munum beita okkur í samræmi við þetta.

* * *

Við verðum einnig að líta okkur nær og horfast í augu við að ofbeldi er ein stærsta ógnin í lífi kvenna og sameinast um að uppræta það. Í dag var Ólöf Tara Harðardóttir baráttukona gegn kynbundnu ofbeldi jarðsungin og var það enn ein áminningin um að kynbundið ofbeldi er faraldur sem hefur skelfilegar afleiðingar fyrir líf og heilsu kvenna, aðstandenda þeirra og samfélagið allt. Ríkisstjórnin hefur einsett sér að taka fast á kynbundu ofbeldi og styrkja réttarkerfið.

V.
Forseti, að lokum vil ég segja: Ég er stolt af nýrri ríkisstjórn – sem er ólík nokkurri annarri ríkisstjórn í sögu þjóðarinnar. Ekki vegna þess að Samfylking er í forystu og stærsti flokkurinn á Alþingi – sem þó er aðeins í annað sinn, frá upphafi, sem Sjálfstæðisflokkur er ekki í þeirri stöðu. Og ekki bara vegna þess það eru þrjár konur í forystu – þó að það sé líka óvenjulegt.

Heldur vegna þess að við erum kraftmikil og samstíga ríkisstjórn með sterkt umboð til breytinga, þar sem tveir af þremur stjórnarflokkum voru stofnaðir árið 2016, fyrir 9 árum – og annar þessara flokka var stofnaður á stofugólfinu hjá stoltum öryrkja, baráttukonu á miðjum aldri, sem er lögblind og fékk ekki agnarögn af forréttindum í meðgjöf en skellti sér á skólabekk um fimmtugt til að læra lögfræði – og hefur þegar náð ótrúlegum árangri í sinni baráttu fyrir tekjulægstu hópa samfélagsins, öryrkja og eldra fólk. Og nú er hún hæstvirtur félags- og húsnæðismálaráðherra.

Hvar annars staðar en á Íslandi? Hvar annars staðar en á Íslandi gæti þetta gerst? Og sýnir þetta ekki hvers konar samfélag við eigum hérna saman og hvað við höfum að verja?

Sama hvað hver segir og burtséð frá pólitískum skoðunum – þá megum við öll vera hreykin af þessu samfélagi sem við höfum byggt og stolt af Ingu Sæland. Þetta er stórt. Og við höfum verk að vinna.

Hæstvirtur forseti, þingmenn, ráðherrar – megi okkur öllum ganga sem best að standa undir ábyrgð okkar og skyldum gagnvart fólkinu í landinu.

Stefnuræða Kristrúnar Frostadóttur forsætisráðherra, flutt á Alþingi 10. febrúar 2025.

Stefnuræða Kristrúnar: „Með nýrri stjórn fylgir nýtt verklag“

Samfylkingin á Vestfjörðum boðar til félagsfundar í Háskólasetri Vestfjarða, Suðurgötu 12, Ísafirði, fimmtudaginn 20. febrúar, nk. kl. 20:00.
 
Dagskrá
 
1. Fundur settur
2. Kynning á landsfundi
3. Farið yfir stefnumál og lög flokksins
4. Önnur mál 

Opinn fundur með Kristrúnu Frostadóttur forsætisráðherra í Borgarnesi. Verið velkomin í Alþýðuhúsið fimmtudaginn 20. febrúar kl. 20:00.

Hvað brennur þér á hjarta? Hvernig gerum við Ísland betra? Hvað er framundan hjá nýrri ríkisstjórn?

Tökum opið samtal. Beint og milliliðalaust. Kaffi og kruðerí.

Opinn fundur með Kristrúnu í Borgarnesi

Bæjarmálafundur Samfylkingarinnar á Akranesi verður haldinn sunnudaginn 16. febrúar klukkan 20.00

Öll velkomin í kvöldkaffi og spjall um bæjarmálin.

Leit um „��"

2909 niðurstöður fundust við leit að „��"

Póstlisti Samfylkingarinnar

Samfylkingin

Flokkurinn

Flýtileiðir

Um Samfylkinguna

Vertu í bandi:

Leit um „������������������������������������������������������������"

2909 niðurstöður fundust við leit að „������������������������������������������������������������"