Loftslag, náttúruvernd og umhverfi

Til þess að ná árangri í loftslagsmálum þarf að ráðast í markvissar aðgerðir til að hraða orkuskiptum í samgöngum og iðnaði, á sjó, landi og í innanlandsflugi. Sanngjörn gjaldtaka á losun kolefnis verður mikilvægur liður í þessu en brýnt er að slík gjöld séu útfærð í samráði við samtök launafólks, bitni ekki á tekjulægri hópum og að heildaráhrif komi ekki ójafnt niður á fólki eftir því hvar á landinu það býr. Orkunotkun þarf að vera þjóðhagslega hagkvæm. Í því sambandi þarf sérstaklega að huga að gagnaverum og stóriðju.

Samfylkingin vill stóraukinn stuðning við uppbyggingu rafhleðslu-, metan- og vetnisstöðva um allt land svo raunhæft verði að hætta nýskráningu bensín- og dísilfólksbíla frá og með árinu 2025. Einnig er brýnt að mótuð verði raunhæf en metnaðarfull áætlun um að hætta nýskráningu flutningabíla, hópferðabíla og vinnuvéla sem ganga eingöngu fyrir jarðefnaeldsneyti. Raf-, metan- eða vetnisbílar sem fluttir eru inn þurfa einnig að standast kröfur um förgun og endurnýjun enda ekki í boði að skipta bensín- og dísil bifreiðum út fyrir annan ferðamáta ef ekki er raunverluleg bót fyrir umhverfið með aðgerðunumLoks þarf að innleiða hvata og/eða kvaðir sem tryggja að bílaleigur leigi í auknum mæli út hreinorkubíla í stað bensín- og dísilbíla.

Samhliða þessu þarf að styrkja flutnings- og dreifikerfi rafmagns svo að kerfið geti staðið undir auknu álagi vegna orkuskiptanna.