Sterk almenn velferðarþjónusta

Samfylkingin vill tryggja húsnæðisöryggi allra Íslendinga. Í augum jafnaðarmanna eru það mannréttindi að þurfa ekki að lifa við óvissu og óöryggi um þak yfir höfuðið. Þá er viðráðanlegt verð á húsnæði eitt mikilvægasta kjaramál almennings enda er húsnæðiskostnaður að jafnaði stærsti útgjaldaliður heimila. Hið opinbera þarf að beita sér fyrir fjölbreyttu framboði á húsnæðismarkaði. Reynslan sýnir að markaðurinn gerir það aldrei upp á sitt einsdæmi.

Besta leiðin til að auka framboð og fjölbreytni á húsnæðismarkaði er að beina framlögum hins opinbera í auknum mæli til uppbyggingar í samstarfi við húsnæðisfélög án hagnaðarsjónarmiða. Þannig má tempra verð og á sama tíma mæta þeim hópum sem eiga helst á hættu að lenda í klemmu á markaðnum. Samfylkingin hefur verið leiðandi í þessum efnum á sveitarstjórnarstiginu, meðal annars með uppbyggingu í samvinnu við verkalýðshreyfinguna og byggingarfélög á vegum stúdenta og eldri borgara. Við viljum halda áfram á þeirri braut, auka stofnframlög til uppbyggingar í samstarfi við húsnæðisfélög án hagnaðarsjónarmiða og hækka tekju- og eignamörk. Það dregur þó ekki úr mikilvægi þess að byggja áfram hefðbundið félagslegt húsnæði, íbúðir fyrir fatlað fólk og sérstök búsetuúrræði fyrir heimilislausa, þar sem Samfylkingin hefur einnig verið í forystu.

Jafnaðarmenn leggja höfuðáherslu á mikilvægi félagslegrar blöndunar í allri húsnæðisuppbyggingu. Við viljum að á Íslandi sé eitt samfélag fyrir alla en ekki aðskilnaður eftir efnahag eða uppruna. Markmiðum um félagslega blöndun má ná með skilyrðum í samningum við byggingaraðila, líkt og tíðkast hefur í Reykjavík undanfarin ár. Að sama skapi leggur Samfylkingin þunga áherslu á að allt skipulag byggðar miði að því að skapa mannvænt og grænt umhverfi sem býður upp á tækifæri til heilsueflandi og loftslagsvænna lífshátta.

Mikilvægt er að húsnæðisstuðningur þróist til samræmis við þróun tekna og byrði húsnæðiskostnaðar fari ekki yfir 25% af ráðstöfunartekjum að jafnaði.

Endurskoða þarf í heild stuðningskerfin með því markmiði að beina stuðningnum fyrst og fremst að tekju- og eignalágum einstaklingum og fjölskyldum.

Húsnæðisöryggi felur í sér að fólk ráði við byrði húsnæðiskostnaðar, búi í heilnæmu húsnæði og þurfi ekki að flytja nema það svo sjálft kjósi.  Mælikvarðar verði:  Byrði húsnæðiskostnaðar, biðlistar eftir félagslegu húsnæði og hjá leigufélögum, fjöldi heimilislausra, stöðugleiki í búsetu, ástand húsnæðis og þröngbýli.

Heimildir lífeyrissjóða verði rýmkaðar þannig að þeim verði gert það fært að fjárfesta í íbúðarhúsnæði.